Markus 8
8
Yesus kasi makang labe dari ampa ribu orang
8:1-10
(Matius 15:32-39)
1Seng lama abis itu, orang banya datang bakumpul dekat Yesus kombali. Dong seng ada pung makanang, jadi Antua panggel Antua pung murid-murid la bilang par dong kata, 2“Beta rasa kasiang lia orang banya ni. Dong su iko Beta tiga hari sepe-sepe baru dong jua seng ada pung makanang lai. 3Kalo Beta suru dong pulang lapar-lapar, nanti saparu smaput di jalang, tagal ada yang datang dari jau.”
4La Antua pung murid-murid bilang kata, “Tuang Guru e, tampa ni jau dari kampong, jadi katong mau dapa makanang par orang banya ni dari mana?”
5Antua bale tanya dong kata, “Kamong pung roti ada barapa?”
La dong jawab Antua kata, “Ada tuju bua, Tuang Guru.”
6La Antua suru orang banya tu dudu di tana. Abis itu, Antua ambe roti tuju bua tu la sombayang minta dangke dari Allah. Tarus, Antua pata-pata akang la kasi akang par Antua pung murid-murid biar dong bisa bage akang par orang banya tu makang. 7Dong jua ada pung ikang kacil satu dua ekor lai. Abis sombayang minta dangke dari Allah par ikang-ikang tu, Antua suru dong bage-bage akang lai. 8Samua orang makang sampe kanyang. Abis itu, Antua pung murid-murid kumpul panggal-panggal roti deng ikang sisa. Samua ada tuju bakol pono-pono. 9Orang banya yang makang tu mangkali ada ampa ribu orang.
Abis makang, Antua suru dong samua pulang. 10La Antua deng Antua pung murid-murid nai parau la balayar ka daera Dalmanuta.
Orang Farisi minta Yesus kasi bukti kalo Allah yang utus Antua
8:11-13
(Matius 16:1-4)
11Ada orang Farisi satu dua orang datang la baku soal jawab deng Yesus. Dong mau coba Antua, jadi dong minta Antua biking tanda herang satu par jadi bukti kalo memang Allah utus Antua. 12Pas dengar bagitu, Antua hela napas panjang la bilang par dong kata, “Mangapa kong orang-orang jamang sakarang ni minta tanda? Dengar bae-bae tagal apa yang Beta bilang ni batul! Jang harap Beta mau biking akang!”#Matius 12:38-39; Lukas 11:16, 29 13Tarus, Antua pi kasi tinggal dong la nai parau la balayar ka sabala dano tu.
Ati-ati deng orang Farisi deng Herodes
8:14-21
(Matius 16:5-12)
14Waktu itu, Yesus pung murid-murid lupa bawa roti par bakal, cuma ada satu bua areng-areng sa dalang parau. 15La Yesus bilang par dong kata, “Ingatang! Kamong musti ati-ati deng orang Farisi deng Herodes pung ragi.”#8:15 Orang Farisi deng Herodes pung ragi: Yang Yesus maksud tu, orang Farisi deng Herodes pung pangaru, ajarang, deng cara pikir yang seng bae. Lia Matius 16:6 deng Lukas 12:1.
16Mar, dong seng mangarti apa yang Antua baru bilang tu, jadi dong laeng bilang par laeng kata, “Antua bilang bagitu tagal Antua tau kalo katong seng ada pung roti.”
17Mar Antua tau dong ada bicara soal apa. La Antua tanya dong kata, “Mangapa kong kamong baku bicara soal seng ada roti? Masa sampe oras ni kamong balong bisa lia ka mangarti lai? Kamong pung hati masi karas ka? 18Kamong ada pung mata mar seng bisa lia! Ada pung talingang mar seng bisa dengar!#Yesaya 6:9-10; Yeremia 5:21; Yeheskel 12:2; Markus 4:12 Masa kamong seng inga lai 19deng roti lima bua yang Beta pata-pata par lima ribu orang makang tu ka? Waktu itu kamong kumpul panggal-panggal roti sisa ada barapa bakol pono-pono?”
La dong jawab Antua kata, “Sapulu dua bakol.”
20Antua bale tanya dong lai kata, “Kong waktu Beta pata-pata roti tuju bua par ampa ribu orang makang tu, kamong kumpul panggal-panggal roti sisa barapa bakol pono-pono?”
La dong jawab Antua kata, “Tuju bakol.”
21La Antua bilang par dong kata, “Kamong masi balong mangarti lai?”
Yesus kasi bae orang buta satu di kota Betsaida
8:22-26
22Yesus deng Antua pung murid-murid sampe ka kota Betsaida. Di situ ada orang-orang bawa orang buta satu par minta deng sunggu-sunggu dari Antua par sonto dia biar dia jadi bae. 23Jadi, Antua pegang dia pung tangang la bawa dia kaluar dari kota tu. Tarus, Antua luda dia pung mata la taru tangang di atas akang la bilang par dia kata, “Ale dapa lia apapa satu ka seng?”
24Dia lia ka muka la bilang par Antua kata, “Beta dapa lia orang-orang, mar seng jelas. Dong bajalang kasana-kamari, mar dong macang deng pohong-pohong.”
25Antua bale taru tangang di atas dia pung mata kombali. Jadi waktu dia usaha par lia, dia bisa dapa lia kombali la sakarang bisa dapa lia samua tarang-tarang. 26La Antua bilang par dia kata, “Pulang jua, mar jang lewat kota tu.”
Yesus tu Orang yang Allah su Angka par Kasi Salamat Manusia
8:27-30
(Matius 16:13-20; Lukas 9:18-21)
27Satu kali bagini, Yesus deng Antua pung murid-murid pi ka kampong-kampong dekat kota Kaisarea Filipi. Di tenga jalang, Antua tanya Antua pung murid-murid kata, “E, kalo kamong dengar-dengar, orang-orang bilang Beta ni sapa?”
28La dong jawab Antua kata, “Ada yang bilang kata Tuang Guru tu Yohanis Tukang Baptis yang su hidop kombali. Ada jua yang bilang kata Tuang Guru tu Allah pung Juru Bicara Elia yang su muncul kombali. Mar ada lai yang bilang kata Tuang Guru tu satu dari Allah pung juru-juru bicara yang laeng yang su hidop kombali.”#Markus 6:14-15; Lukas 9:7-9
29Tarus Antua tanya dong kata, “Mar kalo iko kamong sandiri, Beta ni sapa?”
La Petrus jawab, “Tuang Guru ni Orang yang Allah su Angka par Kasi Salamat Manusia.”#Yohanis 6:68-69
30Tarus Antua larang dong par jang paskali kasi tau akang par sapa-sapa.
Yesus kasi tau kalo Antua nanti susa deng sangsara deng dapa bunu
8:31—9:1
(Matius 16:21-28; Lukas 9:22-27)
31Abis itu, Yesus mulai ajar Antua pung murid-murid kalo Antua, Ana Manusia tu, musti pikol sangsara yang barát. Orang Yahudi pung pamimping-pamimping, imam-imam kapala, deng guru-guru Torat nanti seng mau tarima Antua. La Antua nanti dapa bunu, mar akang pung tiga hari,#8:31 Orang Yahudi bilang tiga hari, tagal dong rekeng hari mulai dari waktu matahari maso sampe matahari maso kombali. Itu satu hari. Jadi, kalo Yesus mati hari Jumat sore la hidop kombali hari Minggu amper siang, itu tiga hari. Par katong di Maluku, katong bilang itu “lusa”. Antua nanti hidop kombali. 32Antua bilang samua tu tarang-tarang par dong. Mar, Petrus tarek Antua ka pinggir la mulai tagor Antua. 33La Antua bale muka lia Antua pung murid-murid la tagor Petrus kata, “Hoe Setang pung Raja, barangkat dari Beta pung muka! Se cuma pikir apa yang manusia pikir, bukang apa yang Allah pikir.”
34La Antua panggel orang banya yang ada di dekat situ deng Antua pung murid-murid la bilang par dong kata, “Sapa yang mau iko Beta, dia musti manyangkal dia pung diri la iko Beta. Dia musti pikol dia pung salib. Beta pung maksud, dia musti siap par dapa biking malu deng dapa siksa, biar kata sampe mati lai.#Matius 10:38; Lukas 14:27 35Tagal sapa yang usaha par kasi salamat dia pung diri, dia nanti seng bisa hidop tarus-tarus deng Allah. Mar, sapa yang siap mati tagal iko Beta deng tagal kasi tau Kabar Bae, dia nanti hidop tarus-tarus deng Allah.#Matius 10:39; Lukas 17:33; Yohanis 12:25 36Guna apa satu orang dapa dunya ni lapis deng akang pung isi samua, mar seng bisa hidop tarus-tarus deng Allah? 37Barang, seng ada apapa satu yang dia bisa kasi par Allah biar dia bisa hidop tarus-tarus deng Antua. 38Jadi, jang malu par mangaku di muka manusia jamang sakarang yang su bale balakang dari Allah deng yang suka biking dosa ni kalo kamong iko Beta deng Beta pung ajarang. Tagal sapa yang malu, Beta Ana Manusia ni jua nanti malu par mangaku kalo dia tu Beta pung murid waktu Beta bale kombali. Waktu itu, Beta nanti bale deng Beta pung Bapa pung kuasa yang hebat deng malekat-malekat yang kudus.”
Currently Selected:
Markus 8: ABMA
Highlight
Share
Copy
Want to have your highlights saved across all your devices? Sign up or sign in
© 2022, Sinode Gereja Protestan Maluku
