Markus 6

Orang Nasaret seng mau tarima Yesus

6:1-6a

(Matius 13:53-58; Lukas 4:16-30)

1Abis itu, Yesus deng Antua pung murid-murid bale dari kota Kapernaum la pulang kombali ka Antua pung kampong. 2Pas orang Yahudi pung hari Barenti Karja, Antua maso ka orang Yahudi pung tampa sombayang la kasi balajar orang-orang di situ. Waktu orang banya dengar akang, dong taherang-herang. Dong laeng bilang par laeng kata, “E, Dia balajar samua tu dari mana e? Bagemana sampe Dia pung pikirang tajang macang bagitu paskali? Dia dapa kuasa par biking tanda-tanda herang tu dari mana? 3Dia ni cuma tukang kayo sa to? Maria pung ana ni to? Yakobis, Yoses, Yudas, deng Simon pung sudara ni to? Dia pung sudara-sudara parampuang jua ada tinggal sama-sama deng katong lai to?” Tagal itu kong dong hati saki Antua deng seng mau tarima Antua.

4La Antua bilang par dong kata, “Orang seng taru hormat par Allah pung juru bicara di dia pung kampong sandiri, di tenga-tenga dia pung sudara-sudara, deng di dia pung ruma.”#Yohanis 4:44

5Di tampa tu Antua seng dapa biking tanda herang satu lai tagal dong seng parcaya Antua. Antua cuma taru tangang di atas satu dua orang yang saki par kasi bae dong. 6aAntua taherang-herang tagal dong seng parcaya Antua.

Yesus utus Antua pung murid sapulu dua orang

6:6b-13

(Matius 10:5-15; Lukas 9:1-6)

6bYesus pi ka kampong-kampong sabala la kasi balajar orang di sana. 7Antua panggel Antua pung murid sapulu dua orang tu la kasi kuasa par dong par user setang-setang, la utus dong dua-dua orang. 8Antua pasáng par dong kata, “Waktu kamong pi, jang bawa apapa lai. Jang bawa makanang, tas, ka kepeng. Cuma tongka sa. 9Kamong bisa pake sandal, mar jang bawa baju ganti.”

10Antua jua bilang par dong kata, “Kalo kamong sampe di tampa satu la ada orang yang mau tarima kamong manumpang di dia pung ruma, tinggal di ruma tu sa sampe kamong kaluar dari tampa tu. 11Mar, kalo kamong sampe di tampa satu la orang-orang di situ seng mau tarima kamong ka dengar kamong pung ajarang, pi dari situ la kabas abu dari kamong pung kaki par jadi tanda par dong kalo Allah nanti seng tarima dong.”#Lukas 10:11; Utusang pung Carita 13:51 12Tarus, Antua pung murid-murid tu barangkat. Dong pi kasi tau orang-orang par musti kasi tinggal dosa-dosa, 13deng dong jua user setang-setang. La waktu dong goso minya di orang-orang saki, dong jadi bae.#Yakobis 5:14

Carita soal bagemana Yohanis Tukang Baptis dapa bunu

6:14-29

(Matius 14:1-12; Lukas 9:7-9)

14Barita soal Yesus su sampe ka Raja Herodes pung talingang lai, tagal orang-orang su kanal Yesus pung nama di mana-mana. La ada orang bilang kata, “Dia tu Yohanis Tukang Baptis yang su hidop kombali. Tagal itu kong Dia ada pung kuasa par biking tanda-tanda herang.” 15Ada jua yang bilang, “Dia tu Allah pung Juru Bicara Elia.” Mar ada lai yang bilang kata, “Dia tu Allah pung juru bicara, macang deng Allah pung juru-juru bicara yang dolo-dolo tu.”#Matius 16:14; Markus 8:28; Lukas 9:19

16Waktu Herodes dengar samua tu, dia bilang kata, “Dia tu Yohanis Tukang Baptis! Beta su suru orang potong dia pung kapala, mar sakarang dia su hidop kombali!”

17-18Herodes bilang bagitu tagal dia parna pung masala basar deng Yohanis. Akang pung carita bagini: Babarapa waktu lalu Herodes kaweng deng Herodias. Herodias tu dia pung sudara Filipus pung bini. La Yohanis tagor Herodes kata, “Ale su langgar atorang tagal kaweng deng ale pung konyadu.” Tagal itu, Herodes suru tantara pi tangkap Yohanis, ika dia, la kasi maso dia dalang bui.#Matius 14:3-4; Lukas 3:19-20 19Itu tu jua yang jadi alasang mangapa kong Herodias binci Yohanis la rencana mau bunu dia, mar seng bisa. 20Barang, Herodes taru hormat par dia, jadi Herodes suru tantara jaga dia bae-bae dalang bui. Herodes biking bagitu tagal dia tau kalo Yohanis tu orang yang pung hidop batul deng jua Allah pung orang. Kalo Yohanis bicara par dia, dia pung hati balisa takaruang, mar dia tetap suka dengar akang.

21Akang pung laste, Herodias dapa kans par bunu Yohanis waktu Herodes pung hari jadi. Waktu itu, Herodes biking pesta par orang-orang basar samua, komandan-komandan, deng orang-orang panting di Galilea. 22Di pesta tu, Herodias pung ana parampuang manari di muka Herodes deng dia pung tamu-tamu la dong paleng sanang lia dia manari. La Herodes bilang par ana parampuang tu kata, “Nona mau apa? Bilang sa nanti beta kasi.”

23La Herodes angka sumpa kata dia nanti kasi apa yang ana parampuang tu minta. Dia bilang kata, “Beta sumpa! Kalo nona minta apa sa, beta nanti kasi akang, biar kata itu stenga dari beta pung karajaang ni lai!”

24La ana parampuang tu kaluar la pi tanya dia pung mama kata, “Mama, beta musti minta apa?”

La Herodias bilang, “Minta Yohanis Tukang Baptis tu pung kapala.” 25La ana parampuang tu bale capat-capat par Herodes la bilang kata, “Papa, beta minta papa kasi Yohanis Tukang Baptis tu pung kapala di atas bake par beta sakarang ni.”

26Waktu Herodes dengar itu, dia pung hati susa paskali. Mar dia seng bisa tola tagal dia su sumpa par biking akang, baru dia pung tamu-tamu jua su dengar akang lai. 27Jadi, dia parenta dia pung tantara satu par pi ka bui par ambe Yohanis pung kapala. La tantara tu pi ka bui la potong Yohanis pung kapala. 28Abis itu, tantara tu bawa Yohanis pung kapala tu di atas bake par ana parampuang tu, la dia pi kasi akang par dia pung mama.

29Waktu Yohanis pung murid-murid dengar kata Yohanis pung kapala su dapa potong, dong pi ambe dia pung mayat la bakubur dia.

Yesus kasi makang labe dari lima ribu orang

6:30-44

(Matius 14:13-21; Lukas 9:10-17; Yohanis 6:1-13)

30Waktu Yesus pung murid sapulu dua orang yang Antua utus tu bale la bakumpul kombali deng Antua, dong kasi tau samua yang dong su ajar deng biking par orang-orang tu par Antua. 31Mar waktu itu, orang paleng banya tinggal kong pi-datang par bicara deng Antua dong, sampe dong mau makang jua seng bisa. Tagal itu, Antua bilang par dong kata, “Mari katong pi ka tampa sunyi biar katong bisa ambe waktu sandiri deng ambe sanang sadiki.” 32Jadi, dong pi sandiri deng parau ka tampa sunyi.

33Mar waktu dong barangkat, banya orang dapa lia dong deng tau kata dong mau pi ka mana. Jadi, orang-orang dari kampong-kampong dekat daera tu kaluar dari dong pung kampong-kampong samua la bajalang capat-capat iko jalang dara ka sana. Jadi, dong sampe labe kamuka di situ. 34Waktu Antua turung dari parau la lia orang paleng banya tu, Antua rasa kasiang deng dong. Barang, seng ada orang par kasi unju jalang yang batul par dong, sama deng domba sakawang yang kalalerang tagal seng ada orang jaga.#Orang Israel di Padang Gurun 27:17; 1 Raja-Raja 22:17; 2 Orang Israel pung Sejara 18:16; Sakaria 10:2; Matius 9:36 Jadi, Antua mulai ajar banya hal par dong.

35Akang pung amper malang, Antua pung murid-murid datang la bilang kata, “Tuang Guru e, ini ni tampa sunyi deng su mulai galap. 36Suru orang banya ni pi jua biar dong bisa bali makanang di kampong-kampong yang ada di dekat-dekat sini.”

37Mar Yesus bilang par dong, “Kamong yang musti kasi makang dong!”

La dong bilang par Antua kata, “Tuang Guru e, katong mau dapa kepeng gaji dua ratus hari karja tu dari mana par bali roti par kasi makang dong?”#6:37 Waktu itu, tantara ka orang karja dapa bayar satu hari satu dinar. Jadi, gaji dua ratus hari tu sama deng dua ratus dinar.

38Mar Antua bilang par dong kata, “Coba kamong pi lia kata kamong ada pung roti barapa bua!”

Waktu dong su pi lia, dong bilang par Antua kata, “Tuang Guru e, katong ada pung roti lima bua deng ikang dua ekor.”

39La Antua bilang par Antua pung murid-murid par suru orang banya tu dudu kalompok-kalompok di atas rumpu. 40Tarus, orang-orang tu dudu dalang kalompok-kalompok. Satu kalompok ada yang saratus orang, ada jua yang lima pulu orang. 41Abis itu, Yesus ambe roti lima bua deng ikang dua ekor tu, la angka muka ka langit, la sombayang minta dangke dari Allah par akang. Abis itu Antua pata-pata roti tu, la kasi akang par Antua pung murid-murid par bage-bage akang par orang banya tu. Antua biking bagitu lai deng ikang dua ekor tu. 42Dong samua makang sampe kanyang. 43Abis itu, Antua pung murid-murid bajalang kumpul panggal-panggal roti deng ikang-ikang sisa. Samua ada sapulu dua bakol pono-pono. 44Orang banya yang makang tu, kalo rekeng laki-laki sa ada lima ribu orang.

Yesus bajalang di atas aer

6:45-52

(Matius 14:22-23; Yohanis 6:16-21)

45Abis itu, Yesus langsung suru Antua pung murid-murid nai parau la balayar kamuka Antua ka kota Betsaida, di dano tu pung sabala. Mar Antua sandiri tinggal di situ la suru orang banya tu pi dari situ. 46Abis bapisa deng orang banya tu, Antua nai ka gunung par sombayang.

47Waktu su malang, Antua pung murid-murid tu dong su sampe di tenga-tenga dano, mar Antua sandiri masi ada di dara. 48Antua lia dong ada panggayo toma stenga mati tagal anging hantam dari muka. Pas amper siang, Antua bajalang di atas aer pi par dong. Antua biking macang kata Antua ada mau langgar dong bagitu. 49Waktu dong lia Antua bajalang di atas aer, dong kira kata Antua tu setang jadi dong bataria-bataria. 50Dong samua takajo deng takotang paskali dapa lia Antua.

Mar Antua langsung bilang par dong kata, “He, tenang! Ini Beta ni! Jang taku!” 51Tarus, Antua nai ka parau tu sama-sama deng dong la anging tado. Antua pung murid-murid tu taherang-herang paskali. 52Barang, biar kata dong su lia Antua kasi makang orang banya tu, mar dong balong mangarti kata Antua tu sapa. Dong pung hati masi karas.

Yesus kasi bae orang-orang saki di kampong Genesaret

6:53-56

(Matius 14:34-36)

53Waktu Yesus deng Antua pung murid-murid su sampe di sabala dano tu, di daera Genesaret, dong balabu di situ. 54Pas dong turung dari parau, orang-orang langsung dapa kanal kalo itu Yesus. 55Jadi, dong mulai paparipi pi ka sagala tampa yang ada di daera tu la carita kata Yesus su datang. La asal dong dengar Antua ada di mana sa, dong bawa orang-orang saki lapis deng dong pung palbet par Antua. 56Kalo Antua pi ka mana sa, ka dusung-dusung ka, negri-negri ka, kota-kota ka, orang bawa orang-orang saki la taru dong di tampa rame. Tarus waktu Yesus lewat, dong minta deng sunggu-sunggu dari Antua par kasi ijin orang-orang saki sonto Antua pung baju panjang luar pung ujung biar dong bisa bae. La samua orang yang sonto akang jadi bae.

Currently Selected:

Markus 6: ABMA

Highlight

Copy