Markus 5

Yesus user setang-setang dari laki-laki satu yang takanal

5:1-20

(Matius 8:28-34; Lukas 8:26-39)

1Tarus, Yesus deng Antua pung murid-murid sampe di dano Galilea tu pung sabala, di orang Gerasa pung daera. 2Waktu Antua turung dari parau, ada laki-laki satu yang takanal langsung kaluar dari kubur-kubur#5:2 Orang Yahudi biasa kubur orang mati dalang liang batu yang dong gale di badang batu. la datang par Antua. 3Dia tinggal di kubur-kubur tu. Seng satu orang lai yang bisa ika dia kombali, biar kata deng rante besi lai. 4Barang, su banya kali orang ika dia pung kaki tangang deng rante besi, mar dia bisa kasi putus rante-rante tu. Dia paleng kuat, jadi seng ada satu orang lai yang bisa tahang dia. 5Siang-malang dia tinggal kong bajalang bataria-bataria di kubur-kubur deng di gunung-gunung kong kasi luka dia pung badang deng batu.

6Waktu dia lia Antua dari jau, dia lari par baku dapa Antua la tikang lutu somba Antua. 7-8La Antua bilang par dia kata, “Hoe setang, kaluar dari dia!”

Mar dia bataria basar-basar kata, “Yesus, Allah yang Paleng Tinggi pung Ana e! Se ada pung urusang apa deng beta? Beta minta Se janji deng Allah pung nama kalo Se seng siksa beta!”

9Tarus Antua tanya dia kata, “Ose nama sapa?” Dia jawab, “Beta nama Legion, tagal katong ni banya.”#5:9 Legion tu bahasa Latin par tantara Roma satu kalompok yang pung banya ada anam ribu orang. Jadi, setang yang ada dalang dia tu banya paskali. 10Setang-setang tu minta deng sunggu-sunggu ulang-ulang dari Yesus par jang user dong dari daera tu.

11Di dekat situ, ada babi sakawang yang cari makang di badang gunung. 12La setang-setang tu minta deng sunggu-sunggu dari Yesus kata, “Sio Yesus e! Suru katong maso tinggal dalang babi-babi tu jua!” 13Antua kasi ijin setang-setang tu maso ka dalang babi-babi tu. La setang-setang tu kaluar dari orang yang takanal tu la maso ka dalang babi-babi tu. Tarus, babi-babi tu lari buang diri dari jurang ka dalang dano la mati tinggalang. Samua tu mangkali ada dua ribu ekor.

14Pas orang-orang yang jaga babi-babi lia bagitu, dong lari ka kota deng kampong-kampong yang baku dekat deng tampa tu la carita akang par orang-orang di situ. Tarus, orang-orang tu pi ka tampa tu par lia apa yang jadi. 15Waktu dong datang par Yesus, dong lia orang yang takanal tu ada dudu. Dia pung pikirang su bale deng su pake pakiang. Pas lia bagitu, dong takotang. 16La orang-orang yang lia apa yang Antua biking par orang yang takanal deng par babi-babi tu carita akang par dong. 17Tarus, orang-orang Gerasa tu minta deng sunggu-sunggu dari Yesus par kaluar dari dong pung daera tu.

18Waktu Antua nai parau par mau pi, orang yang takanal tadi tu minta deng sunggu-sunggu dari Antua par iko Antua lai. 19Mar Antua seng mau. Antua bilang par dia, “Pulang ka ale pung ruma la carita par ale pung sudara-sudara deng orang-orang yang ada di ale pung kampong soal samua yang Tuhan su biking par ale deng bagemana Antua su kasi unju Antua pung hati bae par ale.” 20Tarus dia pi ka daera Dekapolis#5:20 Dekapolis ni pung arti ‘sapulu kota’. la carita samua yang Yesus su biking par dia. Samua orang taherang-herang dengar dia pung carita tu.

Yesus kasi hidop Yairus pung ana deng kasi bae parampuang satu yang dapa mens seng barenti-barenti

5:21-43

(Matius 9:18-26; Lukas 8:40-56)

21Yesus deng Antua pung murid-murid bale balayar deng parau ka sabala dano kombali. Waktu Antua masi ada di pinggir dano lai, orang banya kawang-kawang su datang ron Antua. 22Tarus, ada satu orang yang nama Yairus datang ka situ lai. Dia tu satu dari orang Yahudi pung kapala tampa sombayang. Waktu dia lia Antua, dia tikang lutu di muka Antua, 23la minta deng sunggu-sunggu dari Antua kata, “Bapa e, beta pung ana parampuang ada saki su amper mati. Mari tolong pi ka beta pung ruma jua la taru tangang di atas dia biar dia bisa bae deng jang mati.” 24La Antua pi deng Yairus tu.

Orang banya kawang-kawang iko Antua. Dong baku soso di pinggir-pinggir Antua. 25Dari orang banya tu, ada parampuang satu yang su sapulu dua taong dapa mens seng barenti-barenti. 26Dia su stenga mati bula-bale pi ka dokter satu abis satu sampe dia pung kepeng su abis, mar dia seng bae-bae. Mala dia labe tamba saki lai. 27Dia su dengar soal apa yang Antua biking, jadi dia iko Antua dari balakang di tenga-tenga orang banya tu la sonto Antua pung baju panjang luar. 28Barang dalang hati dia bilang kata, “Asal beta sonto Antua pung baju panjang luar sa, beta pasti bae.” 29Oras itu jua dia langsung bae dari dia pung panyaki tu. Dia sandiri jua rasa kalo dia su bae.

30Waktu parampuang tu sonto Yesus pung baju panjang luar, Antua langsung rasa kalo ada kuasa yang kaluar dari Antua pung diri. Jadi Antua bale muka lia orang banya tu la tanya dong kata, “Sapa yang sonto Beta pung baju ni?”

31La Antua pung murid-murid bilang par Antua kata, “Tuang Guru e, Tuang Guru sandiri lia kalo ada banya orang baku soso di pinggir-pinggir Tuang Guru to? Masa Tuang Guru tanya kata sapa yang sonto Tuang Guru pung baju tu bagemana?”

32Mar Antua nganga kiri-kanang par cari orang yang sonto Antua pung baju panjang luar tu. 33Parampuang tu taku paskali sampe gamatar tagal dia tau apa yang su jadi par dia. Jadi dia maju la tikang lutu di muka Antua la carita samua-samua par Antua. 34Tarus Antua bilang par dia kata, “Nona e, tagal nona parcaya Beta, nona su bae. Pulang jua deng dame tagal nona pung panyaki su seng ada lai!”

35Waktu Yesus masi bicara deng parampuang tu, ada babarapa orang datang dari Yairus pung ruma la bilang par Yairus kata, “Bapa e, bapa pung ana tu su mati, jadi jang biking pastiu Tuang Guru lai.”

36Mar Yesus seng pastiu deng apa yang dong bilang tu. Antua bilang par Yairus kata, “Jang taku, parcaya sa!”

37Waktu mau pi ka Yairus pung ruma, Antua seng mau satu orang lai iko Antua, cuma Petrus, Yakobis, deng dia pung sudara Yohanis sa. 38Pas dong sampe, Antua lia ada orang manangis marata. 39La Antua maso dalang ruma tu la bilang par dong kata, “Mangapa kamong baribot deng manangis? Ana ni seng mati, dia cuma tidor sa!”

40Waktu dong dengar bagitu, dong tatawa Antua. Mar, Antua user dong samua kaluar. Tarus, Antua panggel ana tu pung mama-papa deng Antua pung murid tiga tu, la dong maso ka ana tu pung kamar. 41La Antua pegang ana tu pung tangang la bilang par dia kata, “Talita kum!” Akang pung arti, ‘Ana e, Beta bilang par se, bangong suda!’

42Oras itu tu jua ana umur sapulu dua taong tu langsung bangong la bajalang. Samua orang yang ada di situ langsung taherang-herang paskali lia apa yang jadi tu. 43La Antua larang dong deng karas par jang carita akang par sapa-sapa. Tarus, Antua suru dong kasi makang ana tu.

Currently Selected:

Markus 5: ABMA

Highlight

Copy