Markus 14

Rencana par bunu Yesus

14:1-2

(Matius 26:1-5; Lukas 22:1-2; Yohanis 11:45-53)

1Dua hari lai orang Yahudi biking dong pung hari basar Paska#14:1 Hari basar Paska tu hari basar waktu orang Israel makang daging domba par inga Allah kasi kaluar dong pung tete-nene moyang dari negri Mesir. Waktu itu, dong jua makang roti yang seng pake ragi tuju hari sepe-sepe. deng Roti Seng Pake Ragi. Orang Yahudi pung imam-imam kapala deng guru-guru Torat ada baku skongkol par tangkap Yesus tado-tado la bunu Antua. 2Dong laeng bilang par laeng kata, “Jang katong tangkap Dia pas pesta hari basar, biar orang-orang yang suka deng Dia seng biking kaco.”

Parampuang satu sirang Yesus pung kapala deng minya narwastu

14:3-9

(Matius 26:6-13; Yohanis 12:1-8)

3Waktu Yesus ada di kampong Betania, Antua makang di Simon yang parna saki lepra tu pung ruma. Waktu Antua ada dudu makang bagini, ada parampuang satu datang par Antua. Dia bawa botol satu dari batu marmer. Dalang botol tu ada minya narwastu asli yang mahal paskali. Tarus, dia kasi pica leher botol tu la sirang minya narwastu tu di Yesus pung kapala.#Lukas 7:37-38 4Mar babarapa orang yang ada di situ jadi mara lia apa yang parampuang tu biking la dong laeng bilang par laeng kata, “Mangapa kong dia buang-buang minya tu bagitu? 5Akang pung harga paleng mahal.#14:5 Bahasa Yunani bilang tiga ratus dinar. Waktu itu gaji satu hari tu satu dinar. Jadi, tiga ratus dinar tu sama deng gaji tiga ratus hari karja. Labe bae jual akang la kasi akang pung kepeng par orang-orang kasiang.” Tarus, dong tagor parampuang tu deng mara.

6Mar Yesus bilang par dong kata, “Mangapa kamong mara dia? Kasi tinggal dia sa. Dia su biking apa yang bae par Beta. 7Orang-orang kasiang salalu ada sama-sama deng kamong,#Carita Ulang 15:11 jadi kamong bisa tolong dong apa tempo sa kamong mau. Mar, Beta seng tinggal sama-sama deng kamong tarus. 8Dia su biking apa yang dia bisa biking. Dia sirang minya tu par kasi siap Beta pung badang par dapa kubur nanti.#14:8 Orang-orang Yahudi biasa sirang minya bobou sadap di mayat par kasi siap akang par dapa kubur. Mar, parampuang ni biking bagitu bukang tagal dia sadar kata Yesus mau mati, mar tagal dia sayang Antua deng mangkali tagal mau minta dangke dari Antua. 9Dengar bae-bae tagal apa yang Beta bilang ni batul! Waktu orang-orang kasi tau Kabar Bae ka antero dunya, dong jua nanti carita apa yang parampuang ni baru biking par inga-inga dia.”

Yudas akor par jual Yesus

14:10-11

(Matius 26:14-16; Lukas 22:3-6)

10La Yudas Iskariot pi par orang Yahudi pung imam-imam kapala deng maksud par mau jual Yesus par dong. Dia tu satu dari Yesus pung murid sapulu dua orang tu. 11Dong sanang paskali dengar akang la janji mau kasi kepeng par dia. Tarus, dia cari waktu yang pas par bawa Antua par dong.

Yesus pung murid dua orang kasi siap samua par makang Paska

14:12-16

(Matius 26:17-19; Lukas 22:7-13)

12Hari partama dari orang Yahudi pung hari basar Roti Seng Pake Ragi, samua kaluarga biasa bunu dong pung domba par makang Paska.#Kaluar dari Mesir 12:1-11 Waktu itu, Yesus pung murid-murid tanya Antua kata, “Tuang Guru e, Tuang Guru mau katong pi kasi siap makanang Paska par katong makang tu di mana?”

13Jadi, Antua suru Antua pung murid dua kata, “Pi ka kota Yerusalem. Di sana, kamong nanti baku dapa deng laki-laki satu yang ada pikol aer deng tampayang kacil. Iko dia. 14La kalo dia maso dalang ruma satu, maso ka situ lai la bilang par tuang ruma tu kata, ‘Bapa e, Tuang Guru tanya kata tampa par Antua deng Antua pung murid-murid mau makang Paska tu ada di mana?’ 15Tuang ruma tu nanti kasi unju ruang basar satu yang ada di tingkat. Tampa tu su siap par katong pake. Jadi, kasi siap makanang par katong makang Paska di situ!”

16Tarus, Antua pung murid dua orang tu pi. Sampe di kota tu dong dua dapa samua macang deng apa yang Antua su bilang tu. La dong dua kasi siap makanang Paska.

Yesus deng Antua pung murid-murid makang Paska

14:17-26

(Matius 26:20-30; Lukas 22:14-23; Yohanis 13:21-30; 1 Korintus 11:23-25)

17Pas akang pung malang, Antua deng Antua pung murid sapulu dua orang pi ka ruma tu. 18Waktu dong samua dudu makang, Antua bilang par Antua pung murid-murid kata, “Dengar bae-bae tagal apa yang Beta bilang ni batul! Satu dari kamong yang ada dudu makang sama-sama deng Beta ni nanti jual Beta.”#Lagu-Lagu 41:10

19Pas dengar bagitu, dong pung hati susa la dong satu abis satu bilang par Antua kata, “Tuang Guru e, beta seng to?”

20La Antua jawab dong kata, “Orang yang nanti jual Beta tu satu dari kamong sapulu dua ni yang ada colo roti dalang kua sama-sama deng Beta. 21Beta Ana Manusia ni nanti mati macang deng apa yang su tatulis dalang Allah pung Tulisang.#Lagu-Lagu 22, 118:2; Yesaya 53 Mar cilaka par orang yang jual Beta tu! Labe bae jang dia lahir!”

22Waktu Yesus deng Antua pung murid-murid ada makang, Antua ambe roti la minta dangke dari Allah. Tarus, Antua pata-pata akang la bage-bage akang par Antua pung murid-murid. Antua bilang par dong kata, “Ambe la makang. Ini ni Beta pung badang.”

23Abis itu, Antua ambe cawan yang isi anggor la minta dangke dari Allah. Tarus, Antua kasi akang par dong la dong samua minong dari cawan tu. 24Antua bilang par dong kata, “Anggor ni Beta pung dara yang nanti tatumpa par tabus banya orang dari dosa. Deng Beta pung dara ni Allah kasi sah janji yang Antua ika deng manusia.#Kaluar dari Mesir 24:8; Yeremia 31:31-34, 32:40; Yeheskel 16:59-63, 37:24-28 25Dengar bae-bae tagal apa yang Beta bilang ni batul! Mulai dari oras ni Beta seng minong anggor lai sampe waktu Allah datang pegang parenta jadi Raja do, baru Beta minong anggor yang baru.”

26Tarus, dong manyanyi puji Allah la abis itu dong pi ka gunung Saitun.

Yesus bilang par Petrus kalo dia nanti manyangkal Antua

14:27-31

(Matius 26:31-35; Lukas 22:31-34; Yohanis 13:36-38)

27La Yesus bilang par Antua pung murid-murid kata, “Kamong nanti lari kasi tinggal Beta sandiri tagal apa yang mau jadi par Beta. Barang, dalang Allah pung Tulisang jua ada bilang kata, ‘Beta nanti bunu orang yang jaga domba la domba-domba tu nanti lari talamburang.’#Sakaria 13:7 28Mar waktu Beta su hidop kombali, Beta nanti pi kamuka kamong ka propinsi Galilea.”#Matius 26:32, 28:16

29La Petrus bilang par Antua kata, “Tuang Guru e, biar kata dong samua lari kasi tinggal Tuang Guru lai, mar beta seng!”

30Tarus Antua jawab dia kata, “Dengar bae-bae tagal apa yang Beta bilang ni batul! Hari ini, malang ini ni jua, waktu ayang pai balong bakuku dua kali lai, ale su manyangkal tiga kali kalo ale seng kanal Beta.”

31Mar Petrus bale bilang deng sunggu-sunggu kata, “Biar kata beta musti mati sama-sama deng Tuang Guru lai, mar beta pasti seng manyangkal Tuang Guru!” Antua pung murid-murid yang laeng jua bilang bagitu lai.

Yesus sombayang di Getsemani

14:32-42

(Matius 26:36-46; Lukas 22:39-46)

32La Yesus deng Antua pung murid-murid sampe di tampa satu yang nama Getsemani, yang ada di gunung Saitun. La Antua bilang par dong kata, “Dudu tunggu di sini sa! Beta mau pi sombayang di sana.” 33La Antua panggel Petrus, Yakobis, deng Yohanis par pi sama-sama deng Antua. Waktu itu, Antua mulai balisa paskali deng hati susa. 34Tarus, Antua bilang par dong tiga kata, “Beta pung hati paleng susa macang kata mau mati sa. Tinggal di sini la jaga-jaga.”

35Tarus, Antua maju sadiki jau la tikang lutu sampe muka kana tana par sombayang. Antua sombayang biar kalo bisa Antua jang dapa susa deng sangsara yang Antua ada mau dapa tu. 36Antua sombayang bagini, “Sio Bapa, Bapa e! Bapa pung kuasa par biking apa sa. Kalo bisa, tolong kasi lapas Beta dari susa deng sangsara ni#14:36 Kasi lapas Beta dari susa deng sangsara ni: Teks bahasa Yunani bilang, “ambe cawan ni dari Beta”. jua. Mar jang iko Beta pung mau, mar iko Bapa pung mau sa!”

37Abis itu, Antua bale par murid tiga tu, mar Antua dapa dong ada tatidor. La Antua bilang par Petrus kata, “Simon! Simon e! Ale su tidor tu jua? Masa ale seng bisa jaga-jaga barang sajam lai? 38Kamong musti jaga-jaga deng sombayang biar waktu dapa coba, kamong seng biking dosa. Dalang hati, kamong memang mau biking apa yang batul, mar kamong seng kuat par biking akang.”

39Tarus, Antua bale pi sombayang kombali la bilang kata-kata yang sama deng kamuka tu lai. 40La waktu Antua bale kombali, Antua dapa dong tiga ada tatidor kombali tagal dong paleng manganto. Waktu Antua kasi bangong dong, dong su seng tau mau jawab apa par Antua lai.

41Abis itu Antua bale pi sombayang kali katiga. Waktu Antua bale, Antua lia dong ada tatidor lai. Tarus, Antua bilang par dong kata, “Masa kamong masi tidor lai? Bangong jua! Sakarang ni su waktu par Beta Ana Manusia ni dapa jual par orang-orang bardosa yang pung kuasa. 42Bangong la mari katong pi baku dapa dong! Lia, dia yang jual Beta tu su dekat.”

Yesus dapa tangkap

14:43-52

(Matius 26:47-56; Lukas 22:47-53; Yohanis 18:1-11)

43Waktu Yesus masi bicara, Yudas sampe. Dia tu satu dari Antua pung murid sapulu dua orang tu. Dia datang sama-sama deng orang-orang sakawang yang bawa parang deng kayo. Dong dapa suru dari orang Yahudi pung imam-imam kapala, guru-guru Torat, deng pamimping-pamimping. 44Yudas yang jual Yesus tu su kasi satu tanda biar dong tau Yesus tu yang mana. Dia bilang kata, “Kalo kamong lia beta ciong sapa, itu Dia suda. Tangkap la bawa Dia, mar jaga jang sampe Dia lari.”

45Waktu Yudas sampe, dia langsung pi par Yesus la bilang par Antua kata, “Tuang Guru!”#14:45 Tuang Guru: Teks bahasa Yunani bilang Rabbi. Orang Yahudi pake kata ni par kasi unju kalo dong paleng taru hormat par dong pung ‘guru basar’ ka ‘bapa guru’ tu. Abis itu dia ciong Antua. 46La orang banya tu maju tangkap Antua. 47Mar satu orang yang badiri di situ langsung cabu dia pung parang la potong orang Yahudi pung Imam Basar pung jongos la dia pung talingang putus.

48La Yesus bilang par dong kata, “Kamong kira kata Beta ni tukang malawang pemerinta kapa sampe kamong datang bawa parang deng kayo par tangkap Beta? 49Sabang hari Beta ada sama-sama deng kamong dalang kintal Tampa Sombayang Pusat par kasi balajar orang,#Lukas 19:47, 21:37 mar kamong seng tangkap Beta. Mar samua ni musti jadi macang bagini biar apa yang tatulis dalang Allah pung Tulisang tu jadi.”#Yesaya 53:12 50Tarus, Antua pung murid-murid samua lari kasi tinggal Antua sandiri.

51Waktu itu ada ana muda satu iko Yesus. Dia cuma pake kaeng lenan par tutu dia pung badang. Waktu dong mau tangkap dia, 52dia lapas dia pung kaeng tu la lari talanjang-talanjang.

Yesus dapa sidang

14:53-65

(Matius 26:57-68; Lukas 22:54-55, 63-71; Yohanis 18:12-14, 19-24)

53Abis tangkap Yesus, dong bawa Antua ka Imam Basar pung ruma. Di sana orang-orang Yahudi pung imam-imam kapala, guru-guru Torat, deng pamimping-pamimping samua su bakumpul. 54Waktu Antua dapa bawa tu, Petrus jua iko Antua dari jau. Dia iko sampe dalang Imam Basar pung kintal ruma. Di sana, dia dudu baasar sama-sama deng tantara-tantara yang jaga orang Yahudi pung Tampa Sombayang Pusat.

55Imam-imam kapala deng samua Pamimping-pamimping Sidang cari-cari alasang par kasi sala Antua biar dong bisa hukum mati Antua. Mar dong seng dapa bukti satu lai. 56Ada banya orang jua yang datang par jadi saksi la carita hal-hal yang seng batul soal Antua. Mar, dong pung bicara tu seng sama satu deng laeng. 57Akang pung laste, ada satu dua orang maju par jadi saksi la carita hal-hal seng batul soal Antua kata, 58“Katong dengar Dia bilang kata, ‘Beta nanti kasi rubu Tampa Sombayang Pusat yang manusia biking ni. La dalang tiga hari, Beta nanti kasi badiri yang laeng yang manusia seng biking.’ ”#Matius 27:40; Markus 15:29; Yohanis 2:19 59Mar kali ini jua, dong pung bicara tu seng sama satu deng laeng.

60Tarus, Imam Basar badiri di muka samua orang yang ada di situ la bilang par Yesus kata, “Ale su dengar dong tudu-tudu Ale to? Ale seng jawab dong?” 61Mar Antua tado sa, Antua seng jawab apapa. La Imam Basar tu bale tanya Antua satu kali lai kata, “Se ni Orang yang Allah su Angka par Kasi Salamat Manusia ka? Antua yang katong puji-puji tu pung Ana?”

62La Yesus jawab Imam Basar kata, “Batul, Beta ni. La kamong nanti lia Beta Ana Manusia ni dudu di Allah yang pung Kuasa Paleng Basar tu pung sabala kanang, tampa paleng panting.#Lagu-Lagu 110:1 Kamong jua nanti lia Beta turung dari sorga dalang awang-awang.”#Danyel 7:13; Yohanis Dapa Tanda 1:7

63Pas dengar bagitu, Imam Basar tu robe dia pung pakiang tagal mara paskali la bilang kata, “Katong seng parlu saksi lai! 64Kamong sandiri su dengar Dia hojat Allah to? Kalo iko kamong, katong musti biking apa Dia?”

La dong samua putus kalo Antua musti mati.#Imam-Imam pung Atorang 24:16 65Abis itu, ada babarapa orang mulai luda Antua. Dong tutu Antua pung mata la palungku Antua la tanya kata, “Hoe Allah pung juru bicara e! Coba Se rai kata sapa yang palungku Se ni?” Abis itu, tantara-tantara bawa la pukul Antua.

Petrus manyangkal Yesus

14:66-72

(Matius 26:69-75; Lukas 22:56-62; Yohanis 18:15-18, 25-27)

66Waktu itu Petrus masi ada di Imam Basar pung kintal ruma. La ada Imam Basar pung jongos parampuang satu pi ka sana. 67Waktu dia lia Petrus ada baasar di dekat api tu, dia lia Petrus pung muka bae-bae la bilang kata, “Ale ni jua yang sama-sama deng Yesus orang Nasaret tu to?”

68Mar Petrus manyangkal. Dia bilang kata, “Beta seng tau ale pung maksud apa! Beta seng mangarti akang!” La Petrus pi ka dekat pintu pagar [la ayang pai bakuku].

69Waktu jongos parampuang tu lia Petrus kombali, dia bilang par orang-orang yang ada di situ kata, “He, Dia ni satu dari dong yang sama-sama deng Yesus tu.” 70Mar Petrus manyangkal kombali.

Seng lama bagini, orang-orang yang ada di situ bilang par Petrus kata, “Seng sala lai! Ale ni satu dari dong yang sama-sama deng Yesus tagal ale jua dari propinsi Galilea.” 71La Petrus kutok dia pung diri sandiri la sumpa kata, “Demi Tuhan e! Beta seng kanal orang yang kamong bilang tu. Biar Tuhan hukum beta kalo beta parlente!”

72Pas dia bilang bagitu deng langsung ayang pai bakuku par kali kadua. La Petrus dapa inga kalo Yesus su bilang par dia kata, “Waktu ayang pai balong bakuku dua kali lai, ale su manyangkal tiga kali kalo ale seng kanal Beta.” Tarus, dia pung hati ancor paskali la manangis sampe tahek-hek.

Currently Selected:

Markus 14: ABMA

Highlight

Copy