Popular Bible Verses from Markus 14

Share

Antua sombayang bagini, “Sio Bapa, Bapa e! Bapa pung kuasa par biking apa sa. Kalo bisa, tolong kasi lapas Beta dari susa deng sangsara ni jua. Mar jang iko Beta pung mau, mar iko Bapa pung mau sa!”

Kamong musti jaga-jaga deng sombayang biar waktu dapa coba, kamong seng biking dosa. Dalang hati, kamong memang mau biking apa yang batul, mar kamong seng kuat par biking akang.”

Dengar bae-bae tagal apa yang Beta bilang ni batul! Waktu orang-orang kasi tau Kabar Bae ka antero dunya, dong jua nanti carita apa yang parampuang ni baru biking par inga-inga dia.”

Tarus, Antua bilang par dong tiga kata, “Beta pung hati paleng susa macang kata mau mati sa. Tinggal di sini la jaga-jaga.”

Waktu Yesus deng Antua pung murid-murid ada makang, Antua ambe roti la minta dangke dari Allah. Tarus, Antua pata-pata akang la bage-bage akang par Antua pung murid-murid. Antua bilang par dong kata, “Ambe la makang. Ini ni Beta pung badang.”

Abis itu, Antua ambe cawan yang isi anggor la minta dangke dari Allah. Tarus, Antua kasi akang par dong la dong samua minong dari cawan tu. Antua bilang par dong kata, “Anggor ni Beta pung dara yang nanti tatumpa par tabus banya orang dari dosa. Deng Beta pung dara ni Allah kasi sah janji yang Antua ika deng manusia.

La Yesus bilang par Antua pung murid-murid kata, “Kamong nanti lari kasi tinggal Beta sandiri tagal apa yang mau jadi par Beta. Barang, dalang Allah pung Tulisang jua ada bilang kata, ‘Beta nanti bunu orang yang jaga domba la domba-domba tu nanti lari talamburang.’

Bangong la mari katong pi baku dapa dong! Lia, dia yang jual Beta tu su dekat.”

Tarus Antua jawab dia kata, “Dengar bae-bae tagal apa yang Beta bilang ni batul! Hari ini, malang ini ni jua, waktu ayang pai balong bakuku dua kali lai, ale su manyangkal tiga kali kalo ale seng kanal Beta.”