Matius 17

Yesus pung murid-murid lia Antua pung kuasa yang hebat di atas gunung

17:1-13

(Markus 9:2-13; Lukas 9:28-36)

1Abis itu, lewat anam hari, Yesus bawa Petrus, Yakobis, deng dia pung sudara Yohanis ka gunung tinggi satu. Di situ seng ada orang laeng, cuma dong ampa sa. 2Waktu itu, dong lia Antua pung rupa jadi laeng. Antua pung muka jadi tarang macang deng matahari deng Antua pung pakiang jadi paleng puti mangkilat-mangkilat. 3Skrek bagini, dong tiga dapa lia Allah pung Juru Bicara Musa deng Elia ada bicara deng Antua. 4La Petrus bilang par Antua kata, “Tuang Guru#17:4 Tuang Guru: Dalang teks bahasa Yunani, pake kata kurie di sini. Akang pung arti luas, bisa ‘Tuhan’, ‘tuang’, ‘bapa’, ka ‘guru’. e, katong paleng sanang ada di sini. Kalo Tuang Guru mau, beta bisa biking walang tiga bua di sini. Satu par Tuang Guru, satu par Musa, deng satu lai par Elia.”

5Waktu dia ada bicara, awang tarang turung tutu dong la ada suara dari dalang awang tu yang bilang kata, “Ini ni Beta pung Ana yang Beta paleng sayang. Dia biking Beta pung hati paleng sanang. Kamong musti dengar Dia!”#Carita Mula-Mula 22:2; Lagu-Lagu 2:7; Matius 12:18; Markus 1:11; Lukas 3:22; 2 Petrus 1:17-18

6Pas dengar bagitu, Antua pung murid tiga tu tikang lutu sampe muka kana tana tagal dong paleng taku. 7Tarus, Yesus datang la sonto dong la bilang kata, “Badiri, jang taku!” 8La waktu dong angka muka, dong seng lia satu orang lai, cuma Yesus sandiri sa.

9Waktu dong turung dari gunung tu, Yesus pasáng par dong kata, “Jang carita apa yang kamong lia tadi tu par sapa-sapa! Tunggu sampe Beta Ana Manusia ni hidop kombali dari kamatiang do!”

10Tarus, Antua pung murid-murid bilang par Antua kata, “Tuang Guru e! Kalo Tuang Guru su datang jadi Orang yang Allah su Angka par Kasi Salamat Manusia, la mana Elia? Barang, guru-guru Torat bilang kata Elia musti datang kamuka do baru Orang yang Allah su Angka par Kasi Salamat Manusia tu.”#Malaki 4:5

11La Yesus jawab dong kata, “Memang batul, Elia datang kamuka par biking samua-samua jadi bae kombali do. 12Mar dengar Beta bilang par kamong: Elia memang su datang, mar orang seng kanal dia la dong biking dia iko dong pung suka. La Beta Ana Manusia ni nanti dapa biking sangsara macang bagitu lai dari dong.”#Matius 11:14

13Pas dengar bagitu, Antua pung murid tiga tu baru mangarti kalo yang Antua maksud tu Yohanis Tukang Baptis.

Yesus user setang dari ana satu yang saki mati-mati ayang

17:14-21

(Markus 9:14-29; Lukas 9:37-43)

14Waktu Yesus deng Antua pung murid tiga tu bale par orang banya tu, ada satu orang datang tikang lutu di muka Antua. 15La dia bilang kata, “Sio Tuang Guru#17:15 Tuang Guru: Dalang teks bahasa Yunani, pake kata kurie di sini. Akang pung arti luas, bisa ‘Tuhan’, ‘tuang’, ‘bapa’, ka ‘guru’. e, tolong kasi unju Tuang Guru pung hati bae par beta pung ana laki-laki jua. Dia saki mati-mati ayang deng dia paleng sangsara. Dia jaga jatu dalang api ka dalang aer. 16Beta su bawa dia par Tuang Guru pung murid-murid, mar dong seng bisa kasi bae dia.”

17La Antua bilang par orang banya tu kata, “Hoe kamong manusia jamang sakarang yang tar parcaya Allah deng yang ilang jalang e! Sampe apa tempo Beta musti tinggal deng kamong? Sampe apa tempo Beta musti sabar deng kamong?” Abis itu, Yesus bilang par ana tu pung bapa kata, “Bawa ana tu kamari!” 18Tarus, Antua hokmat setang yang ada dalang ana tu, la setang tu kaluar dari dia, la oras itu jua ana tu bae.

19Abis itu, Antua pung murid-murid pi par Antua waktu Antua ada sandiri la tanya kata, “Tuang Guru e, mangapa kong katong seng bisa user setang tu?”

20La Antua bilang par dong kata, “Kamong seng bisa user setang tu tagal kamong seng parcaya Allah sunggu-sunggu! Dengar bae-bae tagal apa yang Beta bilang ni batul! Kalo kamong ada pung parcaya par Allah, biar kata kacil sa macang deng biji yang paleng kacil, kamong bisa bilang par gunung ni, ‘He gunung! Pinda dari sini ka sana!’ La akang nanti pinda. Seng ada yang kamong seng bisa biking kalo kamong parcaya.#Matius 21:21; Markus 11:23; 1 Korintus 13:2 21[Setang macang itu bisa dapa user cuma kalo kamong sombayang deng puasa do.]”

Yesus kasi tau par kali kadua kalo Antua nanti dapa bunu

17:22-23

(Markus 9:30-32; Lukas 9:43-45)

22Waktu Yesus deng Antua pung murid-murid bakumpul di propinsi Galilea, Antua bilang par dong kata, “Seng lama lai Beta Ana Manusia ni nanti dapa jual par orang-orang yang pung kuasa, 23la dong nanti bunu Beta. Mar akang pung tiga hari, Beta nanti dapa kasi hidop kombali.”

Pas dengar bagitu, Antua pung murid-murid pung hati paleng susa.

Yesus bayar pajak par Tampa Sombayang Pusat

17:24-27

24Waktu Yesus deng Antua pung murid-murid sampe di kota Kapernaum, orang yang biasa tagi Tampa Sombayang Pusat pung pajak datang tanya Petrus kata, “E, ale pung Guru bayar pajak dua dirham tu par Tampa Sombayang Pusat ka seng?”#17:24 Dua dirham sama deng orang pung ongkos karja dua hari waktu itu. Orang Yahudi pung agama pung atorang bilang kalo samua laki-laki Yahudi yang su umur dua pulu taong ka atas musti bayar Tampa Sombayang Pusat pung pajak (Kaluar dari Mesir 30:11-16, 38:26; 2 Orang Israel pung Sejara 24:9-14; Nehemia 10:32).

25Petrus jawab kata, “Antua jaga bayar.”

Pas Petrus pulang la maso ruma, Yesus tanya dia kamuka kata, “Simon e, kalo iko ale bagemana? Raja-raja di dunya ni tagi pajak dari sapa? Dari dong pung rayat ka dari orang dagang?”

26Petrus jawab kata, “Dari orang dagang Tuang Guru.”

La Antua bilang, “Jadi rayat seng parlu bayar pajak. 27Mar jang katong biking dong mara. Jadi pi mangael di dano Galilea la ikang partama yang ale dapa, buka akang pung mulu, la ale nanti dapa kepeng gobang ampa dirham. Ambe akang la pi bayar katong dua pung pajak par dong.”

Currently Selected:

Matius 17: ABMA

Highlight

Copy