Matius 16

Orang Farisi deng Saduki minta Yesus biking tanda herang

16:1-4

(Markus 8:11-13)

1Tarus, satu dua orang Farisi deng Saduki datang par coba Yesus. Dong minta Antua biking tanda herang satu par jadi bukti kalo memang Allah utus Antua.#Matius 12:38; Markus 8:11; Lukas 11:16

2Mar Antua bilang par dong kata, “Kalo sore kamong lia langit mera, kamong bilang, ‘O, eso wer bagus’. 3La kalo pagi kamong lia langit mera deng sadiki galap, kamong bilang, ‘O, hari ini wer seng bae’. Kamong mangarti langit pung rupa, mar kamong seng mangarti apa yang Beta jaga biking deng ajar tu pung arti apa.#Lukas 12:54-56 4Orang-orang jamang sakarang ni jahat deng seng mau parcaya Allah. Kamong minta Beta biking tanda herang. Mar kamong seng dapa tanda satu lai, cuma tanda macang apa yang su jadi par Allah pung Juru Bicara Yunus.” Abis bicara bagitu, Antua pi kasi tinggal dong.#Matius 12:39; Markus 8:12; Lukas 11:29

Ati-ati deng orang Farisi deng Saduki pung ajarang

16:5-12

(Markus 8:14-21)

5Waktu Yesus deng Antua pung murid-murid balayar ka sabala dano Galilea, Antua pung murid-murid lupa bawa roti par bakal. 6Antua bilang par dong kata, “Ingatang! Kamong musti ati-ati deng orang Farisi deng orang Saduki pung ragi.”#16:6 Yang Yesus maksud deng ragi di sini ni orang Farisi deng Herodes pung pangaru, ajarang, deng cara pikir yang seng bae. Lia Markus 8:15 deng Lukas 12:1.

7Mar dong seng mangarti apa yang Antua baru bilang tu, jadi dong laeng bilang par laeng kata, “Antua bilang bagitu tagal Antua tau kalo katong seng bawa roti.”

8Mar Antua tau dong ada bicara soal apa. La Antua tanya dong kata, “Hoe orang-orang yang kurang parcaya! Mangapa kong kamong baku bicara soal seng ada roti? 9Masa sampe oras ni kamong balong bisa mangarti lai? Masa kamong seng inga lai deng roti lima bua par lima ribu orang makang tu deng akang pung labe barapa bakol yang kamong kumpul tu ka?#Matius 14:17-21 10Ka jang sampe kamong seng inga lai deng roti tuju bua par ampa ribu orang makang tu deng akang pung sisa barapa bakol pono-pono yang kamong kumpul tu ka?#Matius 15:34-38 11Masa kamong seng mangarti kalo yang Beta maksud tu bukang roti? Beta bilang kalo kamong musti ati-ati deng orang Farisi deng orang Saduki pung ragi.”

12Waktu Antua bilang bagitu baru dong mangarti kalo yang Antua maksud tu bukang ati-ati deng ragi par kasi nai roti, mar ati-ati deng orang Farisi deng orang Saduki pung ajarang.

Petrus mangaku kalo Yesus tu Orang yang Allah su Angka par Kasi Salamat Manusia

16:13-20

(Markus 8:27-30; Lukas 9:18-21)

13Yesus deng Antua pung murid-murid sampe di daera dekat kota Kaisarea Filipi. La Antua tanya Antua pung murid-murid kata, “E, kalo kamong dengar-dengar, orang-orang bilang Beta Ana Manusia ni sapa?” 14La dong jawab Antua kata, “Ada yang bilang kata Tuang Guru tu Yohanis Tukang Baptis yang su hidop kombali. Ada lai yang bilang kata Tuang Guru tu Allah pung Juru Bicara Elia yang su muncul kombali. Mar ada jua yang bilang kata Tuang Guru tu Allah pung Juru Bicara Yeremia ka satu dari Allah pung juru-juru bicara yang laeng, yang su hidop kombali.”#Matius 14:1-2; Markus 6:14-15; Lukas 9:7-8 15Tarus, Antua tanya dong kata, “Mar kalo iko kamong sandiri, Beta ni sapa?” 16La Simon Petrus jawab, “Tuang Guru ni Orang yang Allah su Angka par Kasi Salamat Manusia, Allah yang hidop tarus-tarus pung Ana.”#Yohanis 6:68-69

17La Antua bilang par dia kata, “Simon, Yunus pung ana e! Ale paleng baruntung paskali tagal bukang manusia yang kasi tau akang par ale, mar Beta pung Bapa di sorga. 18Beta bilang par ale: Ale sakarang pung nama Petrus, yang pung arti ‘batu’. Di atas batu ni Beta nanti kasi badiri Beta pung jamaat la kamatiang pung kuasa seng bisa kasi kala dong. 19Beta nanti kasi kuasa par ale par pimping Beta pung jamaat.#16:19 Bahasa Yunani bilang, “Beta nanti kasi konci-konci karajaang sorga par ale”. Apa yang ale larang di dunya ni, Allah di sorga jua larang akang lai. Deng apa yang ale mau orang biking di dunya ni, Allah di sorga jua kasi ijin akang lai.”#Matius 18:18; Yohanis 20:23 20La Antua larang Antua pung murid-murid par jang kasi tau par sapa-sapa kalo Antua tu Orang yang Allah su Angka par Kasi Salamat Manusia.

Yesus mulai kasi tau kalo Antua nanti dapa siksa deng dapa bunu

16:21-28

(Markus 8:31—9:1; Lukas 9:22-27)

21Dari waktu itu, Yesus mulai kasi tau Antua pung murid-murid kalo Antua musti pi ka kota Yerusalem la dapa biking sangsara barát dari orang Yahudi pung pamimping-pamimping, imam-imam kapala, deng guru-guru Torat. La Antua nanti dapa bunu, mar akang pung tiga hari,#16:21 Orang Yahudi bilang tiga hari, tagal dong rekeng hari mulai dari waktu matahari maso sampe matahari maso kombali. Itu satu hari. Jadi, kalo Yesus mati hari Jumat sore la hidop kombali hari Minggu amper siang, itu tiga hari. Par katong di Maluku, katong bilang itu “lusa”. Antua nanti dapa kasi hidop kombali.

22Mar Petrus tarek Antua ka pinggir la mulai tagor Antua kata, “Tuang Guru e! Beta minta biar Allah kasi jau akang dari Tuang Guru! Hal macang bagitu seng bole jadi par Tuang Guru!”

23Mar Antua bale muka par dia la bilang kata, “Hoe Setang pung Raja, barangkat dari Beta pung muka! Jang se pele-pele Beta par biking Allah pung mau. Se cuma pikir apa yang manusia pikir, bukang apa yang Allah pikir.”

24La Yesus bilang par Antua pung murid-murid kata, “Sapa yang mau iko Beta, dia musti manyangkal dia pung diri la iko Beta. Dia musti pikol dia pung salib. Beta pung maksud, dia musti siap par dapa biking malu deng dapa siksa, biar kata sampe mati lai.#Matius 10:38; Lukas 14:27 25Tagal sapa yang usaha par kasi salamat dia pung diri, dia nanti seng bisa hidop tarus-tarus deng Allah. Mar sapa yang siap mati tagal iko Beta, dia nanti hidop tarus-tarus deng Allah.#Matius 10:39; Lukas 17:33; Yohanis 12:25 26Guna apa satu orang dapa dunya ni lapis deng akang pung isi samua, mar seng bisa hidop tarus-tarus deng Allah? Barang, seng ada apapa satu yang dia bisa kasi par Allah biar dia bisa hidop tarus-tarus deng Antua. 27Tagal Beta Ana Manusia ni nanti bale ka dunya ni kombali deng Beta pung Bapa pung kuasa sama-sama deng Beta pung malekat-malekat. Beta nanti balas samua orang iko apa yang dong biking.#Lagu-Lagu 62:13; Matius 25:31; Roma 2:6 28Dengar bae-bae tagal apa yang Beta bilang ni batul! Dari kamong samua yang ada di sini, ada satu dua orang yang nanti balong mati sampe dong lia Beta Ana Manusia ni datang la pegang parenta jadi Raja.”

Currently Selected:

Matius 16: ABMA

Highlight

Copy