Matius 13

Ande-ande soal orang bakabong satu deng biji-biji yang dia ambor

13:1-23

(Markus 4:1-20; Lukas 8:4-15)

1Hari itu tu, Yesus kaluar dari ruma tu la pi dudu di pinggir dano Galilea. 2Tarus, orang banya kawang-kawang datang koliling Antua par dengar Antua pung ajarang. Tagal itu, Antua nai ka parau satu la dudu di situ, la orang banya tu badiri di pinggir dano.#Lukas 5:1-3 3Tarus, Antua kasi balajar banya hal par dong deng ande-ande. Antua bilang, “Basudara e, dengar Beta mau carita satu! Satu kali bagini, ada orang bakabong satu pi ambor biji-biji di dia pung kabong. 4Waktu dia ambor biji-biji tu, ada yang jatu di jalang la burung-burung datang tetu akang sampe abis. 5Ada biji-biji jua yang jatu di tana yang babatu yang akang pung tana sadiki sa. La tagal tana tipis, biji-biji tu akang batumbu capat. 6Mar waktu matahari nai, akang layu la karing, tagal akang pung akar seng maso dalang tana bae-bae. 7La ada biji-biji lai yang jatu di rumpu baduri la batumbu. Mar rumpu baduri tu garser la gepe akang sampe mati. 8Mar ada biji-biji lai yang jatu di tana yang bagus. Akang batumbu la babua. Akang pung hasil ada yang saratus kali, anam pulu kali, deng tiga pulu kali labe banya dari yang dia ambor.”

9Abis carita ande-ande tu, Antua bilang par dong kata, “Sapa ada pung talingang, dengar apa yang Beta bilang tu bae-bae!”

10Abis itu, Antua pung murid-murid pi par Antua la tanya kata, “Tuang Guru e, mangapa kong Tuang Guru ajar dong pake ande-ande?”

11La Antua jawab dong kata, “Allah su kasi ijin kamong par tau rahasia-rahasia soal bagemana Antua pegang parenta jadi Raja, mar dong seng. 12Barang, sapa sa yang mau mangarti apa yang Beta bilang, Allah nanti biking dia labe tamba mangarti sampe dia batul-batul mangarti akang. Mar sapa yang seng mau mangarti akang, biar kata dia cuma tau sadiki sa, Antua nanti ambe akang dari dia.#Matius 25:29; Markus 4:25; Lukas 8:28, 19:26 13Itu yang biking sampe Beta kasi balajar dong pake ande-ande. Barang, biar kata dong lia lai, mar dong seng tau akang pung arti. Biar kata dong pasang talingang lai, mar dong seng dengar ka mangarti jua. 14Jadi par dong, apa yang Allah bilang lewat Antua pung Juru Bicara Yesaya tu jadi. Antua bilang kata,

‘Kamong nanti pasang talingang bae-bae,

mar kamong seng mangarti.

Kamong nanti lia bae-bae,

mar kamong seng tau akang pung arti.

15Barang, bangsa ni pung hati su jadi batu,

dong pung talingang su tuli,

deng dong pung mata su tatutu.

Deng bagitu, dong pung mata seng lia,

dong pung talingang seng dengar,

deng dong pung hati seng mangarti,

biar dong jang bale par Beta

la Beta kasi bae dong.’#Yesaya 6:9-10

16Mar kamong tu, kamong paleng baruntung tagal kamong su lia deng dengar samua yang Beta biking. 17Dengar bae-bae tagal apa yang Beta bilang ni batul! Dolo, Allah pung juru bicara banya deng orang banya yang pung hidop batul di muka Antua inging paskali lia apa yang kamong lia sakarang ni, mar dong seng dapa lia akang. Dong inging paskali dengar apa yang kamong dengar, mar dong seng dapa dengar akang.#Lukas 10:23-24

18Jadi, dengar ande-ande soal orang bakabong yang pi ambor biji-biji tu pung arti ni: 19Biji yang jatu di jalang tu sapa sa yang dengar ajarang soal bagemana Allah pegang parenta jadi Raja, mar seng mangarti akang, la Setang pung Raja datang rampas apa yang dia su dengar tu dari dia pung hati.

20Biji yang jatu di tana yang babatu tu orang yang dengar Allah pung ajarang la langsung tarima akang deng hati sanang paskali. 21Mar, dia seng kuat macang deng tanamang yang pung akar seng maso dalang tana bae-bae, jadi dia seng batahang lama. Waktu dia susa deng sangsara tagal ajarang tu, dia langsung bale balakang dari Allah.

22Biji yang jatu di rumpu baduri tu orang yang dengar Allah pung ajarang, mar abis itu dia tinggal kong pikirang deng dia pung hidop hari-hari deng jua gila harta. Samua tu biking sampe dia seng pusing lai deng ajarang tu la ajarang tu seng bawa hasil apapa dalang dia pung hidop.

23Mar, biji yang jatu di tana yang bagus tu orang yang dengar Allah pung ajarang deng mangarti akang la hidop iko Antua pung mau. Dia pung hidop tu sama deng pohong yang babua banya, ada yang saratus kali, anam pulu kali, deng tiga pulu kali labe banya dari biji-biji yang dapa ambor.”

Ande-ande soal kusu-kusu di kabong gandum

13:24-30

24Yesus bale kasi ande-ande satu lai par dong. Antua bilang kata, “Waktu Allah pegang parenta jadi Raja, akang macang carita satu ni. Satu kali bagini, ada orang bakabong satu ambor biji yang bae di dia pung kabong. 25Waktu samua orang ada tidor, dia pung musu datang ambor biji kusu-kusu di tenga-tenga gandum tu la pi. 26Waktu gandum tu batumbu deng mulai babua, orang dapa lia kusu-kusu lai. 27Tarus, orang bakabong tu pung orang-orang karja datang la bilang par dia kata, ‘Bapa e, bapa ambor biji-biji yang bae di bapa pung kabong ni to? La kusu-kusu ni dari mana?’

28La dia jawab dong kata, ‘Itu tu beta pung musu pung karja.’

Tarus, dong bilang par dia kata, ‘Jadi bapa mau katong cabu kusu-kusu tu ka seng?’

29Mar dia bilang par dong kata, ‘Jang. Kalo kamong cabu akang, kamong nanti bisa cabu lapis deng gandum lai. 30Kasi tinggal dua-dua nai sama-sama sampe musing ambe hasil. Waktu itu baru beta bilang par orang-orang yang ambe hasil par kumpul kusu-kusu tu kamuka la ika satu-satu ika par dapa bakar. Abis itu baru beta bilang par dong par kumpul gandum la isi akang dalang beta pung tampa simpang gandum.’ ”

Ande-ande soal biji yang paleng kacil deng ragi

13:31-35

(Markus 4:30-34; Lukas 13:18-21)

31Yesus bale kasi ande-ande satu lai par dong. Antua bilang, “Waktu Allah pegang parenta jadi Raja, akang macang deng biji paleng kacil#13:31 Biji paleng kacil: Yang Yesus maksud tu biji dari satu tanamang yang batumbu di daera Palestina, yang bisa batumbu sampe 3 meter. Akang pung biji tu kacil paskali macang deng biji bayam. Orang Palestina pake akang pung biji par jadi bumbu la minya dari biji tu par jadi obat. yang orang ambe la tanang di dia pung kabong. 32Biji itu tu biji yang paleng kacil dari samua biji. Mar kalo akang su batumbu, akang labe basar dari tatanamang yang laeng. Akang nanti jadi pohong sampe burung-burung datang biking sarang di akang pung jaga-jaga.”

33Antua jua carita ande-ande ini par dong. Antua bilang, “Waktu Allah pegang parenta jadi Raja, akang macang deng ragi yang parampuang satu ambe la antong akang deng tarigu banya paskali#13:33 Tarigu banya paskali: Akang pung banya mangkali barang 30 kilo. sampe akang nai.”

34Antua kasi balajar orang banya tu cuma pake ande-ande sa. Antua seng parna kasi balajar dong kalo seng pake ande-ande. 35Antua biking bagitu biar apa yang Allah pung juru bicara bilang tu akang jadi. Dia bilang,

“Beta mau bicara pake ande-ande,

Beta mau kasi tau hal-hal yang tatutu mati dari waktu dunya dapa biking.”#Lagu-Lagu 78:2

Yesus kasi tau ande-ande soal kusu-kusu di kabong gandum pung arti

13:36-43

36Abis kasi balajar orang banya tu, Yesus pi dari dong la pulang ka ruma. Tarus, Antua pung murid-murid datang par Antua la bilang kata, “Tuang Guru e, tolong bilang ande-ande soal kusu-kusu di kabong gandum tu pung arti par katong do.”

37La Antua bilang kata, “Orang yang ambor biji yang bae tu Beta Ana Manusia ni. 38Kabong tu dunya. Biji yang bae tu Allah pung orang-orang. La biji kusu-kusu tu Setang pung Raja pung orang-orang. 39Musu yang ambor biji kusu-kusu tu Setang pung Raja. Musing ambe hasil tu kiamat, hari waktu Allah putus manusia pung parkara. La orang-orang yang ambe hasil tu malekat-malekat.

40Jadi, sama deng kusu-kusu dapa kumpul, dapa ika, la dapa buang ka dalang api, itu jua yang nanti jadi par orang-orang jahat waktu dunya ni kiamat. 41Beta Ana Manusia ni nanti suru Beta pung malekat-malekat kumpul samua orang yang biking orang laeng bardosa deng samua orang yang biking kajahatang, la kasi pisa dong dari Beta pung orang-orang yang Beta parenta jadi Raja. 42Dong samua nanti dapa buang dalang api yang manyala-manyala. Di sana dong nanti sangsara paskali deng marata. 43Waktu itu tu orang-orang yang hidop batul di muka Allah nanti jadi tarang macang deng matahari waktu dong pung Bapa pegang parenta jadi Raja. Sapa ada pung talingang, dengar apa yang Beta bilang tu bae-bae!”

Ande-ande soal harta dalang tana deng mutiara

13:44-46

44“Waktu Allah pegang parenta jadi Raja, akang macang deng harta yang paleng mahal yang orang dapa dalang tana di kabong. La dia bale kubur akang kombali. La tagal dia paleng sanang, dia pi jual dia pung harta samua-samua la bali kabong tu.

45Bagitu jua, waktu Allah pegang parenta jadi Raja, akang macang deng orang badagang satu yang cari mutiara yang paleng bagus. 46Waktu dia su dapa mutiara yang paleng bagus tu, dia pi jual dia pung harta samua-samua la bali mutiara tu.”

Ande-ande soal orang buang jareng

13:47-50

47Yesus bale bilang lai kata, “Waktu Allah pegang parenta jadi Raja, akang macang deng orang buang jareng di dano la dapa ikang rupa-rupa macang. 48Pas jareng su pono, dong hela akang ka dara. Tarus, dong dudu pili ikang yang bae la taru dalang karanjang, mar yang seng bae dong buang. 49Bagitu jua yang nanti jadi waktu dunya kiamat. Malekat-malekat nanti kasi pisa orang-orang jahat dari orang-orang yang pung hidop batul di muka Allah. 50Tarus, malekat buang orang-orang jahat tu dalang api yang manyala-manyala. Di sana dong nanti sangsara paskali deng marata.”

Ajarang baru deng lama sama deng harta yang baru deng lama

13:51-52

51La Antua tanya Antua pung murid-murid kata, “Kamong mangarti samua ande-ande yang Beta su bilang tu ka seng?” La dong bilang, “Katong mangarti.” 52La Antua bilang par dong kata, “Jadi, guru Torat sapa sa yang dapa kasi balajar soal Allah pegang parenta jadi Raja, dia sama deng kapala ruma tangga satu yang kasi kaluar harta yang baru deng yang lama dari dia pung tampa simpang harta.”

Orang Nasaret seng mau tarima Yesus

13:53-58

(Markus 6:1-6; Lukas 4:16-30)

53Abis Yesus carita ande-ande tu, Antua pi dari situ. 54Antua pi ka kampong Nasaret, tampa Antua basar. Di sana, Antua kasi balajar orang-orang di orang Yahudi pung tampa sombayang. Orang-orang Nasaret tu taherang-herang dengar Antua pung ajarang. La dong bilang kata, “Dia balajar samua tu dari mana? Bagemana sampe dia pung pikirang tajang macang bagitu paskali? Dia dapa kuasa par biking tanda-tanda herang tu dari mana? 55Dia ni cuma tukang kayo pung ana to? Dia pung mama nama Maria la Dia pung sudara-sudara par Yakobis, Yusuf, Simon, deng Yudas to? 56Dia pung sudara-sudara parampuang jua ada tinggal sama-sama deng katong lai to? Jadi Dia dapa samua-samua tu dari mana?” 57La dong seng mau parcaya deng seng mau tarima Antua.

La Antua bilang par dong kata, “Orang seng taru hormat par Allah pung juru bicara di dia pung kampong deng di dia pung ruma sandiri.”#Markus 6:4; Lukas 4:24; Yohanis 4:44 58Di tampa tu Antua seng biking tanda herang banya tagal dong seng parcaya Antua.

Currently Selected:

Matius 13: ABMA

Highlight

Copy