Matius 12

Yesus pung kuasa par hari Barenti Karja

12:1-8

(Markus 2:23-28; Lukas 6:1-5)

1Satu kali bagini, pas orang Yahudi pung hari Barenti Karja, Yesus deng Antua pung murid-murid bajalang langgar kabong gandum. Waktu dong ada bajalang, Antua pung murid-murid pete gandum la makang akang tagal lapar.#Carita Ulang 23:25 2Mar ada orang Farisi lia itu la dong bilang par Yesus kata, “Lia tu! Ale pung murid-murid biking apa yang orang seng bole biking pas hari Barenti Karja ni.”

3Mar Antua bilang par dong kata, “Kamong seng parna baca apa yang Raja Daud biking waktu dia deng dia pung anana bua lapar ka? 4Dia maso ka dalang Tenda Sombayang la dia deng dia pung anana bua makang roti yang imam-imam su kasi par Allah.#1 Samuel 21:1-6 Dia tetap biking bagitu biar kata kalo iko atorang dalang Kitab Torat, cuma imam-imam sa yang bisa makang akang.#Imam-Imam pung Atorang 24:5-9 5Ka, kamong balong parna baca dalang Kitab Torat kalo waktu hari Barenti Karja, imam-imam karja di Tampa Sombayang Pusat ka? Deng bagitu dong su langgar atorang soal hari Barenti Karja, mar Allah seng kasi sala dong to?#Orang Israel di Padang Gurun 28:9-10 6Dengar Beta bilang! Di sini ada yang labe basar dari Tampa Sombayang Pusat. 7-8Barang, Beta Ana Manusia ni pung kuasa par bilang apa yang orang bisa biking deng seng bisa biking di hari Barenti Karja. Dalang Allah pung Tulisang jua ada bilang kata, ‘Orang yang kasi unju dia pung hati bae par orang laeng, itu yang biking Beta pung hati sanang labe dari korbang yang dia kasi par Beta.’#Hosea 6:6; Matius 9:13 Kalo memang kamong mangarti kata-kata tu, kamong pasti seng kasi sala orang yang seng biking sala.”

Yesus kasi bae satu orang pas hari Barenti Karja

12:9-14

(Markus 3:1-6; Lukas 6:6-11)

9Tarus, Yesus pi dari situ la pi ka orang Yahudi pung tampa sombayang. 10Di situ ada satu orang yang pung tangang mati sabala. Ada orang yang tanya Yesus kata, “Bapa, bisa ka seng kasi bae orang pas hari Barenti Karja?” Dong tanya bagitu deng maksud par cari-cari alasang par kasi sala Antua.

11Mar Antua bilang par dong kata, “Sapa di sini yang kalo dia pung domba jatu ka dalang lobang pas hari Barenti Karja, dia seng pi kasi kaluar akang?#Lukas 14:5 12Manusia labe panting dari domba! Jadi, katong bisa biking apa yang bae pas hari Barenti Karja.”

13La Antua bilang par orang yang pung tangang mati sabala tu kata, “Lunjur ale pung tangang tu kamari!” Dia lunjur dia pung tangang par Antua la oras itu jua dia pung tangang saki tu bae macang deng dia pung tangang yang satu lai. 14Tarus, orang-orang Farisi dong kaluar dari tampa sombayang tu la baku skongkol par bunu Antua.

Allah pung Orang Karja yang Antua pili

12:15-21

15Yesus tau kalo orang-orang Farisi dong rencana par bunu Antua, jadi Antua pi dari situ. Waktu itu orang banya iko Antua la Antua kasi bae samua orang yang saki. 16Antua larang dong par jang paskali kasi tau kata Antua tu sapa. 17Akang jadi bagitu, biar apa yang Allah bilang lewat Antua pung Juru Bicara Yesaya tu jadi. Antua bilang kata,

18“Ini ni Beta pung Orang Karja yang Beta su pili,

Dia tu yang Beta paleng sayang deng yang biking Beta pung hati sanang.

Beta nanti kasi Beta pung Roh par Dia,

la Dia nanti kasi tau par bangsa-bangsa kalo Beta putus parkara deng batul.

19Dia seng baku malawang deng orang laeng deng seng suara basar par orang-orang.

Orang jua seng dengar Dia pung suara di jalang-jalang.

20Macang deng buluh yang su pata mar orang seng kasi putus akang,

deng macang deng palita yang manyala seng kuat-seng kuat mar orang seng kasi mati akang,

Dia nanti tolong orang-orang yang su seng kuat lai deng Dia pung hati bae.

Dia nanti usaha sampe Beta pung putusang yang batul tu manang.

21La bangsa-bangsa nanti taru harap par Dia.”#Yesaya 42:1-4

Yesus pung kuasa labe basar dari Setang pung Raja pung kuasa

12:22-37

(Markus 3:20-30; Lukas 11:14-23, 6:43-45)

22Abis itu, ada orang bawa satu orang yang takanal datang par Yesus. Dia buta deng bisu. La Antua kasi bae dia la dia bisa bicara deng lia. 23Lia bagitu, orang banya yang ada di situ taherang-herang paskali la bilang kata, “Dia ni mangkali Raja Daud pung Turunang yang Allah su janji tu kapa?”

24Mar waktu orang Farisi dengar bagitu, dong bilang kata, “Cuma tagal Dia pake Beelsebul, Setang pung Raja tu pung kuasa sampe dia bisa user setang-setang.”#Matius 9:34, 10:25

25Mar Yesus tau dong pung pikirang la Antua bilang par dong kata, “Kalo rayat dalang satu karajaang tinggal kong baku prang, karajaang tu pasti ancor. Bagitu lai deng satu kota ka ruma tangga. Kalo orang-orang dalang kota ka ruma tangga tu tinggal kong baku bakalai, kota ka ruma tangga tu pasti seng bisa batahang. 26Bagitu lai deng Setang pung Raja pung karajaang. Kalo setang-setang tapica-pica dalang kalompok-kalompok yang baku musu kong laeng user laeng, karajaang tu pasti seng bisa batahang. 27Jadi, kalo memang Beta pake Beelsebul pung kuasa par user setang-setang, kamong pung murid-murid pake sapa pung kuasa par user setang-setang? Pasti pake Allah pung kuasa to? Jadi, apa yang kamong pung murid-murid biking tu kasi unju kalo apa yang kamong tudu tu sala. 28Mar, Beta user setang-setang deng Allah pung Roh pung kuasa. Jadi, itu tu tanda kalo Allah su pegang parenta jadi Raja di tenga-tenga kamong.

29Conto bagini: Bagemana kong orang bisa maso ka orang yang kuat pung ruma par rampas dia pung harta kalo dia seng ika orang yang kuat tu do? Kalo su ika, baru dia bisa rampas orang tu pung harta. Itu jua yang Beta biking par Setang pung Raja.

30Sapa yang seng iko Beta, dia malawang Beta. La sapa yang seng bantu Beta pung karja, dia kasi kaco Beta pung karja.#Markus 9:40 31Jadi dengar Beta bilang par kamong, dosa apa sa yang manusia biking deng kata-kata hojat apa sa yang dong bilang, itu bisa dapa kasi ampong. Mar sapa hojat Allah pung Roh, dia seng bisa dapa kasi ampong. 32Sapa bilang apapa satu malawang Beta Ana Manusia ni, dia bisa dapa kasi ampong. Mar sapa bilang apapa satu malawang Allah pung Roh, dia seng bisa dapa kasi ampong, di dunya sakarang ni seng, deng di dunya baru jua seng.#Lukas 12:10

33Kalo pohong bagus, pasti akang pung bua bagus lai. Mar kalo pohong seng bagus, pasti akang pung bua seng bagus lai. Orang bisa tau pohong tu bagus ka seng dari akang pung bua.#Matius 7:20; Lukas 6:44 34Hoe kamong ular-ular babisa! Bagemana kamong bisa bilang hal-hal yang bae kalo kamong sandiri tu jahat? Barang, apa yang orang bilang, akang asal dari hati.#Matius 15:18-19; Lukas 6:45 35Orang yang bae bilang apa yang bae dari dia pung hati yang bae. Bagitu lai, orang yang jahat bilang apa yang jahat dari dia pung hati yang jahat. 36Dengar Beta bilang! Nanti waktu Allah putus manusia di dunya pung parkara, samua orang musti tanggong jawab kata apa sa yang seng ada pung guna yang dia parna bilang. 37Tagal dari kamong pung kata-kata sandiri, Allah nanti putus kata kamong tu batul ka nanti dapa hukum.”

Guru Torat deng orang Farisi minta Yesus biking tanda herang

12:38-42

(Lukas 11:29-32)

38Abis itu, guru Torat deng orang Farisi satu dua orang datang la bilang par Yesus kata, “Tuang Guru, coba biking tanda herang satu biar katong bisa tau kalo Allah utus Tuang Guru ka seng.”#Matius 16:1; Markus 8:11; Lukas 11:16

39Mar Antua bilang par dong kata, “Orang-orang jamang sakarang ni jahat deng seng mau parcaya Allah. Kamong minta Beta biking tanda herang. Mar kamong seng dapa tanda satu lai, cuma tanda macang apa yang su jadi par Allah pung Juru Bicara Yunus.#Matius 16:4; Markus 8:12 40Barang, sama deng Yunus tinggal dalang ikang basar pung poro tiga hari tiga malang, Beta Ana Manusia ni jua nanti tinggal dalang kubur tiga hari tiga malang.#Yunus 1:17 41Nanti waktu Allah putus manusia pung parkara, orang-orang Niniwe jua nanti badiri sama-sama deng kamong yang hidop sakarang ni la kasi unju kamong pung sala. Barang waktu orang-orang Niniwe dengar Allah pung pasáng dari Yunus, dong kasi tinggal dong pung dosa-dosa. Sakarang, di sini ada yang labe basar dari Yunus tu, mar kamong seng mau dengar Dia.#Yunus 3:5 42Nanti waktu Allah putus manusia pung parkara, Ratu dari Salatang jua nanti badiri sama-sama deng kamong yang hidop sakarang ni la kasi unju kamong pung sala. Barang dolo-dolo dia datang dari jau paskali par dengar Raja Salomo yang pung pikirang tajang tu. Sakarang, di sini ada yang labe basar dari Raja Salomo tu, mar kamong seng mau dengar Dia.”#1 Raja-Raja 10:1-10; 2 Orang Israel pung Sejara 9:1-12

Setang bisa bale maso kombali ka orang yang akang parna tinggal

12:43-45

(Lukas 11:24-26)

43Yesus bilang lai kata, “Kalo setang kaluar dari satu orang, akang nanti bajalang koliling ewang-ewang par cari tampa tinggal. Mar tagal seng dapa, 44akang bilang, ‘E! Labe bae beta bale ka ruma yang dolo tu jua.’ Pas akang sampe di ruma tu, akang lia ruma tu kosong, barsi, deng taator bae-bae. 45Tarus, akang pi undang akang pung tamang tuju yang labe jahat lai dari akang la maso tinggal dalang ruma tu. Akang pung laste, orang itu labe rusak lai dari yang kamuka. Itu jua yang nanti jadi par kamong yang jahat yang hidop jamang sakarang ni.”

Sapa yang jadi Yesus pung mama deng sudara-sudara

12:46-50

(Markus 3:31-35; Lukas 8:19-21)

46Waktu Yesus masi bicara deng orang banya tu, Antua pung mama deng sudara-sudara datang. Dong badiri di luar la usaha par mau bicara deng Antua. 47La satu orang bilang par Antua kata, “Tuang Guru e, Tuang Guru pung mama deng sudara-sudara ada badiri di luar mau bicara deng Tuang Guru.”

48La Antua jawab dia kata, “Beta pung mama deng Beta pung sudara tu sapa?” 49La Antua unju Antua pung murid-murid la bilang kata, “Beta pung mama deng Beta pung sudara-sudara tu kamong yang ada di sini! 50Barang, sapa sa yang iko Beta pung Bapa di sorga pung mau, dia tu Beta pung sudara laki-laki, Beta pung sudara parampuang, deng Beta pung mama.”

Currently Selected:

Matius 12: ABMA

Highlight

Copy