प्रेरितुल्कुना कबाह्क 16
16
पौलुसुंक तिमोति कलियंतोर
1पजा पौलुस मर्रा दिरबे इनना सहर होंचि अगटाल लिसरा इनना सहर होत्तोर. हूळा! अगा तिमोति पोरोलतोर वरोर सिस्युड मत्तोर. ओना तल्लुर यहुदि जातिता उंदि विस्वासि मुरतळ आंद. गानि ओना बाबाल वेरे जातितोर (युनानि जातितोर) मत्तोर. 2लिसरा, इकोनिया सहरकुने मनना विस्वासुल्क ओन बेस मनकल इनुंदुर. 3अय्ते पौलुस, तिमोतिन ओना पज्जेके ओयाना विचारम कीतोर. गानि अद एरियाते मनना अंटोर यहुदि लोकुल्कुंक, तिमोति वेरे जातितोना (युनानि जातितोना मर्रि) मर्रि इंचि एर्का मत्ता, अदुनहाटीं यहुदिल्कुंक समादानम आयना इंचि पौलुस तिमोतिना कतना कियागोटतोर. 4अस्के ओर येरुसलेमता प्रेरितुल्क आनि पेद्दाल्क वेहता पोल्लेन सहर-सहर होंचि वेहचि, अव पोल्लेन परकारम ताकना इंचि वेहासेक होत्तुर. 5इल्हा अगाटा कलिसियानोरा विस्वासम गट्टिगासि इंका वेल्लेन लोकुल्क विस्वासमते वासि रोज-रोज वेल्लेन मंदि आतुर.
पौलुसुन मेसिडोनिया एरियाते केयमळ
6ओर्कुन पवित्र आत्मा, ‘आसिया एरियाते पेनदा पोल्ले वेहा मन्नि’ इंचि इत्ताहाटीं ओर अदे एरियाता पुगरिया, गलातिया एरियानाल होत्तुर. 7पौलुस आनि तिमोति मूसिया एरियाता गेट्टुदाका एवतस्के ओर बितुनिया एरिया होनना कोसिस कीतुर. गानि येसुना आत्मा अगा इंका होन्ना हिया हिल्ले. 8अय्ते ओर मूसियाताल त्रोआस सहरते एव्तुर. 9अदे नर्का मेसिडोनिया एरियातोर वरोर मनकल, निमे मेसिडोनियाते वासि, मावा सहायम कीम, इंचेक विनंति कीसेके मंतोर. इल्हा पौलुस दर्सनमते हूळतोर. 10ओन्क इल्हा दर्सनम आतारित्ते, आ लोकुल्कुंक पेनदा बेसता पोल्लें वेहालय पेन माकुन केयता इल्हा इनकुंचि मोमोट अस्केन मेसिडोनिया होनानद विचारम पक्का कीतोम.#16:10 इगेटाल ई पुस्तकमतुन रासता लूकलगुडा पौलुसुनतोनि कलियतोर.
लिदिया मुरताटद मनसु मारियमळ
11इल्हा मोमोट त्रोआस सहरताल डोंगाते समुद्रम हर्रि पीसि सवरगा सुमात्राके सहरते एव्सि, इंकुंदि रोजु नियापुलिस इनना सहर होत्तोम. 12पजा अगटाल पिलिपिया इनना सहर होत्तोम. अद मेसिडोनिया एरियाता मुक्य सहर आंदु. अगा रोमि लोकुल्क मनुंदुर. अद सहरते मोमोट कोन्नि रोजकु मत्तोम.
13उंदि नोमकेम रोजुने, यहुदिल्कुना पारतना कियाना जेगा, सहरता पलाते बेरेड ओड्डुंक मंदार इंचेके मोमोट होत्तोम. अगा पारतनाकु वासि मत्ता मुर्ताह्कुनतोनि उद्दिस वळकसेके मत्तोम. 14अवुन लोप्पो उंदि लिदिया पोरोलता मुरतळ मत्ता. अद तुयतीरा सहरतद आंद. दान्क पेनदापोर्रो वेल्लेन विस्वासम मत्ता. अद वेल्लेन दराता नेडि पंडि रंगुना कपडिं अम्मुंदु. अद बेस मनसु दोस्सि मावा पोल्लें केंजसेके मत्ता. पौलुस वेहना पोल्लेन बेस केंजालय सामि दाना मनसुन तयार कीतोर. 15अद आनि दाना लोते मत्तोर अंटोर बापतिस्मा एततारित्ते अद, “मिमेटगिंटा नाकुन पेनदा निजम विस्वासि मुरतळ इंचि इनकुनानय्ते नावा लोन वासि आगट,” इंचि माकुन विनंति कीता. अस्के मोमोट दाना लोन होत्तोम.
पौलुस, सिलास जेलने अर्रंतुर
16उंदि मल्का मोमोट पारतना कियाना जेगातेके होंचेके मत्तोम, अस्के माकु उंदि दासि पेगिड कलियता, दाना लोप्पो बविस्य वेहाना आत्मा#16:16 बविस्य वेहाना आत्मा इगे मनना आत्मा देय्यमता आत्मा आंद. मत्ता. अद लोकुल्कुंक ओरा बविस्य वेहचि दाना मालकुल्कुंक वेल्लेन दनम संपलिच्चि हियुंदु. 17अद, “ई मनकालोर अन्निंकन्ना पेद्दा पेनदा सेवाकुल्क आंदुर. ईर मीकु मीवा पापमताल मुक्ति दोर्कना हर्दा बारेमते वेहासेक मंतुर,” इंचि वरगेयसेके पौलुस आनि मावा पज्जो वाता. 18अद वेल्ले रोजकुनाल इल्हेने वेहासेक मत्ता अय्ते पौलुस परेसान आतोर. अदुनहाटीं ओर पजोळ्क तिरियसि, “येसु किरिस्तुना पोरोलते नना नीकु आदेस हीसेक मंतन, ई पेगिटाल पेय्सि होन,” इंचि आ आत्मातुन इत्तोर. अस्के आ आत्मा पेगिटाल बिराना पलाते पेय्सता.
19पजा आ पेगिटा मालकुल्कुंक दोर्कना दनम दोर्काकोंटा आताहेंके ओर पौलुसुन आनि सिलासुन दोर्कापीसि, इग्गिसेके नड्डुम सहरते अदिकारिल्कुना मुन्ने ओतुर. 20रोमि अदिकारिल्कुना मुन्ने ओसि, “ईर यहुदि लोकुल्क आंदुर. मावा नाटेने वेल्ले तकलिप कीसंतुर. 21ईर वेहना रीति-रिवाजकुन परकारम ताकमळ मावा रोमि लोकुल्कुना नियमकुना विरोदमते मंता,” इंचि इत्तुर. 22लोकुल्कुना मंदागुडा पौलुस आनि सिलासुना विरोदमते तिरियतुर. रोमि अदिकारिल्क, पौलुस आनि सिलासुना कपडिं हराहचि ओर्कुन दुड्डुकुने तनना आदेस हीतुर. 23ओर्कुन पक्का तंतारित्ते जेलने वाट्सि, ओरपोर्रो कडक पहारा इर्राना इंचि जेलना अदिकारिंक आदेस हीतुर. 24ओन्क इल्हा आदेस दोर्कतारित्ते ओर्कुन जेलना लोप्पोटा अर्राते वाट्सि, ओरां काल्कुन उंदि मोट्टुंकु बोल अरहचि दोहतोर.
25नळजाम नर्काटा वेलाते पौलुस, सिलास पेनदा स्तुति पाटां पारसेके, पारतना कीसेक मत्तुर. जेलने मत्ता वेरेतोर केंजसेके मत्तुर. 26अस्के उंदेदम बूमि इल्हा कदुलता गदा, जेलना पुनादि कदुलसि जेलनव अन्नि तल्पुक उंदे मल्का कुल्ला आतां. जेलने मत्ता अंटोरा बेडीं लेंगसि होत्तां. 27जेलना अदिकारि निद्राताल तेदसि हूळतस्के जेलना तल्पुक कुल्ला दिसतां. अदुन हूळसि, जेलने मत्तोर अंटोर पेय्सि वित्तुर बारे, इनकुंचि, ओनाद ओरे कोह्ककुंचि हांतन इंचि कसेर तेहतोर. 28गानि पौलुस, “मोमोट अंटोरम इगेने मंतोम, नीवद निमेने नुकसान कीकुनमा,” इंचि जोरते वरगेयतोर.
29अस्के वरोनतोनि वेडसि ताया वेहचि आ अदिकारि बिराना लोप्पो होत्तोर. वनकुसेक पौलुस, सिलासुना काल्कुनपोर्रो अरतोर. 30पजा ओर्कुन पलाते तच्चि, “दादालोरिटा, पापाल्कुनाल मुक्ति दोर्कालय नाकु बतल किया पींता?” इंचि पूसकीतोर. 31अस्के, “निमे येसु सामिना पोर्रो विस्वासम इर्रा, नीकु, नीवा लोते मत्तोर अंटोर्क मुक्ति दोर्कंता,” इंचि ओर इत्तुर. 32ओर ओन्क, ओना लोते मत्ता अंटोर्क पेनदा पोल्लें वेहतुर. 33अस्के जेलना अदिकारि अदे नर्का अदे वेलाते ओर्कुन अगटाल ओसि, ओरां पुनकुन नोरतोर. पजा आल्सेम कियाकोंटा ओर, ओना लोते मत्तोर अंटोर बापतिस्मा येततुर. 34पौलुस, सिलासुन ओर ओना लोन पीसि ओसि ओर्कु गाटो दोस्तोर. इंदके पेनदापोर्रो विस्वासम इरताहेंके ओर, ओना लोते मत्तोर अंटोर इरगा कूस आतुर.
35पंगातारित्ते रोमि अदिकारिल्क, ओर्कुन होळसीम्टु इंचि जेलना अदिकारिंक वेहालय इच्चुर सिपाइल्कुन लोहतुर. 36जेलता अदिकारि, “मीकुन होळ्सगोम इंचि रोमि अदिकारिल्क सिपाइल्कुन लोहचीतुर, इंदके मिमेट सांतिते पेय्सि होंटु,” इंचि पौलुसुन इत्तोर.
37अस्के पौलुस, “मोमोट इंका रोम देसेमता रहिवासिल्के आंदुम. अय्नागानि ओर मावा बतले तप्पु हूळाकेने माकुन लोकुल्कुना मुन्ने तंतुर, जेलने वाटसीतुर. इंदके सपुडदाका बोर्कु एरपाट हिलाकोंटा माकुन होळसियालय हूळसंतुर, गानि इल्हा आयापर्रो. माकुन होळसानद मत्ते ओर कुद इग्गे वासि होळसियिरकांटी,” इंचि इत्तुर.
38सिपाइल्क होंचि रोमि अदिकारिल्कुंक इद संगति वेहचीतुर. पौलुस, सिलास ईर रोम देसेमता रहिवासिल्क आंदुर इंचि रोमि अदिकारिल्कुंक तेळियतारित्ते ओर इरगा वेरियतुर. 39आयंका रोमि अदिकारिल्क वासि ओर्कुन मापि तल्किसि पलाते ओतुर. ओर्क विनंति कीसि इद सहर होळसि होनालय वेहतुर. 40पौलुस, सिलास जेलनाल पलाते पेय्सि लिदियाना लोन होत्तुर. विस्वासि दादालोर्कुंक कलियसि, ओर्कु प्रोत्साहन हीसि अगटाल पेय्सि होत्तुर.
Currently Selected:
प्रेरितुल्कुना कबाह्क 16: esg-Deva
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
