प्रेरितुल्कुना कबाह्क 17
17
तेसलोनि सहरते पौलुस आनि सिलास
1पजा ओर अंपिपुलि आनि अपुलोनिया सहरकंता तिरियसेके-तिरियसेके तेसलोनि सहरते एवतुर. अगा यहुदिल्कनद उंदि दर्मसास्त्रम कराहना लोन मत्ता. 2पौलुस ओना अलवट परकारम यहुदिल्कुना दर्मसास्त्रम कराहना लोतागा होत्तोर. होंचि मूड नोमकेमकुन दाका ओरतोनि दर्मसास्त्रमता बारेमते चर्चा कीतोर. 3अगा ओर, किरिस्तुना हायमळ आनि हामुरताल तिरियसि तेदमळ बच्चोनो अवसरम मत्ता, इत्ता संगतितुन दर्मसास्त्रमताल हद्विसि ओर्कु बेस तेळियागोट्सि वेहतोर. पजा बा येसुना बारेमते अय्ते नना मीवा मुन्ने वेहसेक मंतनो आ येसे किरिस्तु आंदुर, इंचि ओर्कु वेहतोर. 4इल्हा इच्चुर लोकुल्कुंक निजम अनपिच्चि ओर पौलुस, सिलासुनहेके कलियतुर. पेनदुक वेरियना वेल्लेटुर युनानि लोकुल्कगुडा ओरतोनि कलियतुर. अचोने आयका वेल्लेन बेस पोरोल होत्ता मुर्ताह्कगुडा ओरतोनि कलियसि मत्तां.
5गानि यहुदिल्कुंक मात्रम मंटा अरसेक मत्ता. ओर इच्चुर बदमासुल्कुन जमा कीसि सहरते लोल्लिं कीतुर. बल्हा कीसन्ना गानि पौलुस, सिलासुन लोकुल्कुना मुन्ने तायागोम इंचि ओर यासोन इनानोना वरोन लोतपोर्रो होंचि अरतुर. 6पौलुस, सिलास ओर्कु दोर्का हिल्लुर अय्ते यासोनुन आनि इच्चुर दादालोर्कुन सहरता अदिकारिल्कुन मुन्ने इग्गिस ओतुर. ओसि, “ईर मनकालोर पूरा दुनियातुने हिळु-पोर्रो कीतुर, इंदके इग्गेगुडा वातुर. 7ईरकु यासोन ओना लोन मनालय जेगा हीतोर. ईर अंटोर कैसर#17:7 कैसर इद राजाना पोरोल आयो. रोम सरकारते अन्निटकन्ना पेद्दा पदवि आंद. राजाना नियमकुंक अड्डम कबळ कींतुर. अचोने आयका ओर, इंकावरोर राजाल मंतोर ओना पोरोल येसु आंद,” इंचि वेहांतुर.
8इद पोल्लेतुन केंजसि अगा मत्ता लोकुल्क आनि सहरता अदिकारिल्क इरगा होंगुंक वातुर. 9पजा यासोनुन हेंदाल आनि कळमातोरहेंदाल दंडगु तेंडकुंचि, रासकुंचि ओर्कुन होळसीतुर.
बिरिया इनना सहरते पौलुस आनि सिलास
10पजा बिराना नर्काटद-नर्केन दादालोर पौलुस, सिलासुन बिरिया इनना सहर लोहचीतुर. ओर अगा एवतारित्ते यहुदिल्कुना दर्मसास्त्रम कराहना लोते होत्तुर. 11तेसलोनि सहरता यहुदिल्कुंकन्ना इगेटा यहुदिल्क बच्चोरो बेस मत्तुर. ईर पौलुस वेहना पोल्लेन बेस मनसु ताससि केंजुंदुर. हरेक रोजु दर्मसास्त्रमतुन हद्विसि पौलुस वेहना पोल्लें निजमेना इंचि बेस अर्तम कीकुनुंदुर. 12इल्हा वेल्लेन मंदि यहुदिल्क विस्वासम कीतुर. यहुदिल्कुन लेह्कने बेस कदर मत्ता युनानि मुर्ताह्क-मांड्सागुडा विस्वासम कीतुर. 13गानि बस्के अय्ते पौलुस, पेनदा पोल्लें बिरिया सहरतेगुडा होंचि कराहचंतोर इंचि तेसलोनि सहरता यहुदिल्कुंक तेळियतनो, अस्के ओर अगा वासि लोल्लिं कियमळ, लोकुल्कुंक एकरेवुल्क वेहमळ सुरुव कीतुर. 14अदुनहाटीं दादालोर पौलुसुन बिराना समुद्रम ओड्डुनहेके लोहचीतुर. गानि सिलास, तिमोति मात्रम अग्गेन आगतुर. 15पौलुसुनतोनि बोर अय्ते होत्तुरो ओर पौलुसुन एतेंस इनना सहरदाका अरहतुर. पौलुसुन हेंदाल, सिलास, तिमोति बिराना ओनगा वायागोम, इंचि इत्ता आदेस पीकुंचि ओर अगटाल मल्सि बिरिया सहरकु वातुर.
एतेंस सहरते पौलुस
16पौलुस, एतेंस सहरते सिलास आनि तिमोतिना एदुर हूळसेक मत्तस्के, अद सहर बोम्मानतोनि निंडिस मत्तद हूळसि ओना मनसुने बागा दुक्कम वाता. 17दानहाटीं ओर रोज-रोज दर्मसास्त्रम कराहना लोह्कुने होंचि यहुदिल्कुनतोनि आनि पेनदुक वेरियना वेरे जाति लोकुल्कुनतोनि चर्चां कियुंदुर. अचोने आयका चौकुल्कुने होंचि बोर दोर्कुते ओरतोने चर्चा कियुंदुर. 18अस्के इच्चुर इपिकुरि आनि स्तोइकि#17:18 इपिकुरि आनि स्तोइकि इद इव्वुर मनकालोरा पोरोल आंद, ईर वेहता हरपीसि ताकानोर्कुन इपिकुरि आनि स्तोइकि इंचि इंतुर. इनना एक्को तेल्वि मत्ता लोकुल्क ओनतोनि जगडम दोसकुत्तुर. अव्टेटाल इच्चुर, “ई पिचुर-पिचुर वळकानोर बतल वेहांतन इंचंतोर?” इंचि इत्तुर. इंकिच्चुर बारे, “ईर अय्ते वेरे जातितोरा पेनदा बारेमते कराहनोर दिसंतोर” इंचि इत्तुर. पौलुस येसुना बारेमते आनि ओर हासि मर्रा जीवाते तेदतदुन बारेमते कराहुंदुर इंचि ओर अल्हा इत्तुर. 19आयंका ओन पीसि अरियपगुस#17:19 अरियपगुस इद उंदि पंचादि पोरोल आंद. इनना पंचादिते ओसि, “निमे कराहना ई पूना पोल्लें बतांगो माकु तेळियानाल वेहा. 20इंका निमे माकु मोमोट बस्के केंजुवा, तेळियवा पोल्लें वेहचंतिन. ई पोल्लेना अर्तम बतलो माकु तेळियागोट्सि वेहा.” इंचि विनंति कीतुर. 21एतेंस सहरता लोकुल्क आनि वेरेटागटाल वासि अगा मनना पलाता लोकुल्क, बस्केळ्क बतलन्ना पूनद केंजालय आनि दाना बारेमते चर्चा कियमळ तप्पा इंका वेरे बतले कबळ कियाकोंदुर.
22अस्के पौलुस, अरियपगुस इनना पंचादिते नित्तिसि इल्हा वळकालय दल्गुतोर. एतेंसता लोकुरिटा! मिमेट अन्नि तीरकुने पेनदा कदर कीसंतिर इत्ता संगति नाकु दिस्संता. 23नना मीवा सहरअंता तिरियसि मिमेट मोळ्कना अन्नि वस्तुकुन हूळतन. अचोने आयका, “एरपाट हिलवा पेनदाहाटीं” इंचि रासि मत्ता उंदि गद्देतुन इंका नना हूळतन. अय्ते मीकु एरपाट हिलाकोन्ना मिमेट मोळ्कना आ पेनदा बारेमतेन नना मीकु वेहंतन. 24इद दुनियातुन, इद दुनियाते मनना अन्निटवुन पुटिस्ता पेने, बूमि आनि स्वर्गमता सामि आंद. अदुनहाटीं मनकालोर तयार कीता गुळिने अद मन्नो. 25दानगा बतले तक्को हिल्ले. इंका अदे अंटोर्क ऊपिरि, पिस्वर आनि गावाले मत्तव अन्नि वस्तुक हींता. अय्ते असोंटा पेनदुक मनकना कय बतल हिया पर्रंता? 26पेन वरोर मनकन तयार कीता. आ वरोर मनकनतोनि ई दुनियंता निंडिस मननाहाटीं अन्नि जातिना लोकुल्कुन तयार कीता. इंका ओराहाटीं उंदि वेला, ओर मनना जेगांक गेट्टुकु, इल्हा पेने कीता. 27मनकालोर पेनदुन पहकागोम इंचि दाना मनसु मत्ता. ओक्कला पहकिस-पहकिस दान ओर दोर्काबेटकुनानुर. अयना अद मनागटाल बोर्के लक्कु हिल्ले. 28मनम दानतोने पिस्सेक मंतोम, दानतोने तिरियसेक मंतोम, अद मंता इंचे मनम मंतोम. इचोने आयका, मनम दाना पिलाल्क आंदुम, इंचि मीवा लोप्पोटोरे इच्चुर पाटां रासाना लोकुल्कगुडा वेहातुर.
29“अय्ते मनम पेनदा मर्कुम आसिगुडा, मनकल ओना तेल्विनुसार तयार कीता एंडि, बंगारम आनि बंडाता बोम्मानलेह्का पेन मनंता इंचि बस्केने इननायो. 30मुन्नेटा लोकुल्कुना पेनदा बारेमते तेल्वि तक्को लेक्कनहेंका पेन ओर्कुन हूळसिगुडा हूळवाप कीता. गानि इंदके मात्रम दुनियाता अंटोर लोकुल्क मनसु मार्सकुननाहाटीं आदेस हीसंता. 31अद पेर्कुत्ता मनकनाहेंदाल, इद दुनियाते मनना हरेक मनकना न्यायम नीतिते कियानाहाटीं पेन उंदि रोजुन पिक्स कीता. अचोने आयका अद पेर्कुत्ता मनकन हातोराव्टेटाल मर्रा जीवा अरहचि अंटोर मनकालोर्कुंक अद हीता पोल्लेतुन रुजुव कीता.”
32बस्के अय्ते लोकुल्क, हातोराव्टेटाल मर्रा जीवाते तेदतोर इत्ता पोल्ले पौलुसुना तोळ्दाल केंजतुरो, अस्के इच्चुर लोकुल्क ओन कव्तुर. गानि इंका इच्चुर मात्रम, “निमे वेहना पोल्ले मर्रा बस्केनना केंजंतोम,” इंचि इत्तुर. 33अस्के पौलुस पंचादिताल पेय्सि होत्तोर. 34इच्चुर लोकुल्क विस्वासम कीसि पौलुसुंक कलियतुर. ओराव्टेटाल वरोर दियोनुस इनानोर मत्तोर, ओर अरियपगुस पंचादिता मेंबर मत्तोर. अचोने आयका दामेरा इनना पोरोलतद उंदि मुरतळ ओरतोनि मत्ता, इंका वेरे लोकुल्कगुडा मत्तुर.
Currently Selected:
प्रेरितुल्कुना कबाह्क 17: esg-Deva
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
