प्रेरितुल्कुना कबाह्क 15
15
येरुसलेमते उंदि पंचादि
1पजा यहुदियाताल इच्चुर लोकुल्क अंताकियाक वासि, “मूसाना नियम परकारम मीवद कतना आयाकोंटे मीकु मुक्ति दोर्का पर्रो” इंचि अगाटा दादालोर्कुंक कराहलय दल्गुतुर. 2ओर लोकुल्क कराहता पोल्लें पौलुसुंक, बरनाबासुंक नच्चा हिल्लें. अदुनहाटीं ओरा नड्डुम वेल्लेन लोल्लिं आतां. अय्ते ई लोल्लिंकु समादानम पूस कियनाहाटीं पौलुस, बरनाबास आनि इच्चुर विस्वासुल्क येरुसलेम होंचि अगाटा प्रेरितुल्कुंक, पेद्दाल्कुंक कलियना इंचि निरनायम कीतुर. 3पजा अगाटा कलिसियातोर ओर्कुन सार्ला कीतुर. अय्ते ओर पिनिके, सामरिया इनना एरियानाल तिरियसेक येरुसलेम होत्तुर. होननेंके वेरे जातितोर ओरा मनसु बल्हा मार्सकुत्तुर, अदुन बारेमते वेहासेक होत्तुर. इल्हा ओर अगाटा दादालोर्कुन इरगा कूस कीतुर. 4ओर येरुसलेम एवतस्के, अगाटा कलिसियातोर, प्रेरितुल्क, पेद्दाल्क ओर्कु बेस आनंदमते कलियतुर. पजा पौलुस आनि बरनाबास पेन ओरतोनि मंचि बता-बता कबाह्क कीता, अदंता वेहतुर. 5अस्के परिसिल्कुनाल इच्चुर विस्वासुल्क तेदसि, “वेरे जातितोरद कतना तप्पाकोंटा आये पींता, मूसाल वेहता नियम परकारम ओर ताके पींता,” इंचि इत्तुर.
6अस्के ई पोल्लेन बारेमते विचारम कियालय प्रेरितुल्क आनि पेद्दाल्क उंदगा जमा आतुर. 7बच्चोनो जेम विचारम कीतारित्ते पत्रु तेदतोर. तेदसि, “नावा दादालोरिटा, वेरे जातितोर नावा तोळ्दाले पेनदा बेसता कबुर केंजसि विस्वासमते वायाना इंचि, वेल्लेन रोजकु मुन्ने पेन मना अंटोर नड्डुमताल नाकुन पेर्कुत्ता. इद संगति मीकु अंटोर्क एर्के मंता. 8मनकालोर्कुना मनसुन एरपाट कियाना पेन, बल्हा मनाकु पवित्र आत्मातुन हीता, अल्हेने ओर्कु इंका हीसि ओरतोनि कलियसि मत्ता संगति मनाकु वेहता. 9ओर विस्वासम कीताहेंका पेन ओरा मनसुकुन इंका बेस कीसि, ओर्कु, मनाकु बतले बेदबावम इर्रा हिल्ले. 10अय्ते मरि, मनमगुडा मना पेद्दाल्कगुडा कांजा पर्रुवा कांडितुन मिमेट सिस्युल्कुना हट्टनपोर्रो ताससि, मीकु पेनदा परिक्सा हूळानद मंताना? 11येसु सामिना कुर्पाते मनाकु मुक्ति दोर्कंता इंचि मनम नम्मंतोम गदा! अल्हेन ओर्कगुडा मुक्ति दोर्कंता इंचि विस्वासम मंता.” इंचि इत्तोर.
12अस्के बरनाबास आनि पौलुस, पेन ओर्कुन वेरे जातितोर लोप्पो लोहचि ओराहेंदाल बसंटा चिन्हां, इचंत्रमता कबाह्क कीता, अदुन ओर वेहालय दल्गुतुर अय्ते अंटोर लोकुल्क सपुडदाका आसि ओरा पोल्लें केंजालय दल्गुतुर.
13ओरा वळकुमळ आतारित्ते याकोब इल्हा वळकालय दल्गुतोर. नावा दादालोरिटा, नना वेहनद केंजट. 14पेन मोट्टा मोदाला वेरे जातितोर पोर्रो दाना दया हुपिच्चि ओरागटाल इच्चुर्कुन दाना लोकुल्कुन लेह्का बल्हा कीकुत्ता, इदुना बारेमते सिमोन पत्रु मनाकु वेहचि मत्तोर. 15पेनदा कबुरतोर वेहता पोल्लें इंका इद गटनकु कलियंतां. अव पोल्लें इल्हा रासि मंतां:
16“नना तिरियसि वासि दाविदना अरसोत्ता राज्येमतुन मर्रा निल्हंतन,
दाना नासडेम आता मुक्का-मुक्कातुन कल्पिसि अद मुन्ने मत्ताप मर्रा कींतन.
17अस्के पेर्कुत्ता वेरे जातितोर आनि मिगिल्सि मत्ता अन्नि वेरे जातिनोर,
पेनदुन पहकानुर, इव पोल्लें पेन वेहता.#आमोस 9:11-12
18पेन कुद इदुन बारेमते वेल्लेन रोजकु मुन्ने वेहचि मत्ता.”
19अदुनहाटीं नावा विचारम बतल मंता इत्ते, मनसु मार्सकुंचि पेनदाहेके तिरियता आ वेरे जातितोर्कुन मनम तकलिप कियामन्नि. 20गानि बोम्मांक मोळ्कतदुन तिनामन्नि, व्यबिचारम कियामन्नि, गोंदके पिसकिसि हव्कता जिवरासिता हव्विं, नेत्तुरतुन तिनामन्नि इंचि ओर्क मनम रासि लोहकोम.
21बारित्ते ओर एनकाटाल मूसाल वेहता नियमतुन, अन्नि सहरकुने वेहासेक अल्हेन हरेक नोमकेम रोजुननाड दर्मसास्त्रम कराहना लोते हद्विसि वेहासेक मंतुर, इत्तोर.
वेरे जाति विस्वासि लोकुल्कुंक उंदि सिट्टि
22पजा प्रेरितुल्क, पेद्दाल्क आनि कलिसियातोर अंटोर कलियसि, अगाटा विस्वासुल्कुनाल इच्चुर लोकुल्कुन पेरसि पौलुस आनि बरनाबासुनतोनि अंताकियाक लोहना निरनायम कीतुर. पजा बरसब्बान#15:22 बरसब्बा ईन यहुदल इंचिगुडा इंतुर. आनि सिलासुन ईर इव्वुर्कुन पेरतुर. ईर इव्वुरगुडा विस्वासुल्कुनाल मुक्य मनकालोर मत्तुर. 23ओर होननेंके ओरा कय्दे उंदि सिट्टि हीतुर, अद सिट्टिते इल्हा रासि मंता.
अंताकिया, सिरिया, किलिकिया सहरकुने मनना अंटोर वेरे जाति विस्वासुल्कुंक, येरुसलेमते मनना मीवा पेद्दाल्क आनि प्रेरितुल्कुना हेंदाल जोहार.
24मावा पावरमगल्ला दादालोरिटा, माकुन पूस कियाकोंटेन महागटाल इच्चुर लोकुल्क मिहगा वासि ओरा मनसुंक वाताप वळकिसि मी मनसुने अनमानम पुट्टिचि मीकु तकलिप हीतुर इत्ता संगति मोमोट केंजतोम. 25अदुनहाटीं मना पावरमगल्ला बरनाबास आनि पौलुसुनतोनि, पेर्कुत्ता इच्चुर लोकुल्कुन मीहेके लोहना इंचि मोमोट अंटोरम कलियसि निरनायम कीतोम. 26मना अंटोरा किरिस्तु येसु सामिना पोरोलहाटीं बरनाबास आनि पौलुस ईर ईरा जीवातुन इंका हियालय तयार आता मनकालोर आंदुर. 27अय्ते मोमोट सिट्टिते रासता अन्नि पोल्लें यहुदल आनि सिलास ओर ओरा तोळ्दाल मीकु वेहना इंचि ओर्कुन मीहेके लोहसेक मंतोम. 28-29बोम्मांक मोळ्कतदुन मिमेट तिनमट, गोंदके पिसकिसि हव्कता जिवरासिता हव्विन, नेत्तुरतुन तिनमट, व्यबिचारमताल लक्कु मंटु. इसंटा अवसरमाता नियमकुंक तप्पा इंका वेरे बद्दे बर्वु मीपोर्रो वाटा मन्नि इत्ता पोल्ले पवित्र आत्माकु आनि माकु बेस अनपिस्ता. मिमेटगिंटा इव पोल्लेनाल लक्कु मत्ते मीके बेस आयार. मीकु अंटोर्क जोहार.
30इल्हा रासि ओर्कुन अगटाल सार्ला कीतंका, ओर पजा अंताकियाक एवतुर. एव्सि, अंटोर विस्वासुल्कुन जमा कीसि अद सिट्टितुन ओरा कय्दे हीतुर. 31सिट्टिते रासि मत्ता प्रोत्साहन हियना पोल्लें हद्विसि ओर्क अंटोर्क वेल्लेन कुसि आता. 32यहुदल आनि सिलास, ईर इव्वुरगुडा पेनदा कबुरतोर आंदुर. अदुनहाटीं अगाटा विस्वासुल्कुनतोनि वेल्लेनजेम वळ्किसि ओर्कुन विस्वासमते गट्टिगा कीसि ओर्कु प्रोत्साहन हीतुर. 33इल्हा यहुदल आनि सिलास कोन्नि रोजकु अगा मत्तुर. पजा अंटोर विस्वासुल्क जमा आसि, ओर्कुन बोर अय्ते अंताकियाक लोहतुरो ओराहेके वापस येरुसलेम होनालय सांतिते सार्ला कीतुर. 34गानि सिलास अंताकियातेन मनना विचारम कीतोर.#15:34 इद वचनम कोन्नि पांडु लिपिने हिल्ले. 35पजा पौलुस आनि बरनाबास कोन्नि रोजकु अंताकियातेन आगतुर. अगाटा वेल्लेन लोकुल्कुनतोनि कलियसि सामिना पोल्लें कराहसेक, बेसता कबुर वेहासेक मत्तुर.
पौलुसनद रोंडो पय्नेम
(15:36–18:22)
पौलुस, बरनाबास वेरे-वेरे आंतुर
36इच्चुं रोजकु आतारित्ते, “मनम सामिना पोल्लें बव-बव सहरकुने वेहतोमो अव अन्नि सहरकुने मर्रा दाकोम. पेनदुन नम्मुकुत्ता पजा अगाटा विस्वासुल्कुना पिस्वरकु बल्हा बतल मंतांगो हूळसि वाकोम,” इंचि पौलुस बरनाबासुन इत्तोर. 37अय्ते बरनाबासुंक मरकुसुन (ईन योहानगुडा इंतुर) इंका पज्जेके ओयाना मनसु मत्ता. 38गानि, पेनदा कबळते आकिरदाका कलियसि मनाकोंटा नड्डुमे पंपुलिया एरियाताल होळसि वापस होत्ता मरकुसुन पज्जो ओयमळ पौलुसुंक नच्चा हिल्ले. 39इल्हा ओर इव्वुर नड्डुम वेल्लेन पोल्लें आसि ओर वेरे-वेरे आतुर. अस्के बरनाबास मरकुसुन पीकुंचि डोंगाते उद्दिस साइप्रस इनना दीबेक होत्तोर. 40पजा पौलुस ओनतोनि मननाहाटीं सिलासुन पेरकुंचि अगटाल होत्तोर. अय्ते अगाटा विस्वासुल्कगुडा पौलुसुंक आनि सिलासुंक पेनदा कुर्पा दोर्कानाहाटीं पारतना कीसि ओर्कुन पेनदा कय्दे अप्पजेपतुर. 41अस्के ओर सिरिया, किलिकिया इनना एरियानाल तिरियसेके अगाटा कलिसियानोर्कुंक कलियसि पेनदा विस्वासमते बेस एदगानाहाटीं ओर्कु बेसता पोल्लें वेहासेक होत्तुर.
Currently Selected:
प्रेरितुल्कुना कबाह्क 15: esg-Deva
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
