प्रेरितुल्कुना कबाह्क 14
14
पौलुस आनि बरनाबास इकुनियुम सहरते सेवा कीतुर
1इल्हा पौलुस आनि बरनाबास इकोनिया सहरते यहुदिल्कुना दर्मसास्त्रम कराहना लोते होत्तुर. अगा पेनदा पोल्लें बेस वेहतुर. अदुनहाटीं यहुदिल्क आनि युनानि जातितोर वेल्लेटुर लोकुल्क येसुनपोर्रो विस्वासम कीतुर. 2गानि विस्वासम कियवा यहुदिल्कु, विस्वासुल्कुनतोनि जगडम कियालय वेरे जातितोर्कुन एक्किस्तुर. 3अय्नागानि पौलुस आनि बरनाबास अगा वेल्लेने रोजकु आगिसि मत्तुर. सामिना कुर्पाता बारेमते वेरियाकोंटा वेहचेके मत्तुर. ओर वेहना पोल्लें निजम इंचि गवाइ हुप्सालय सामि ओरा कय्दाल चिन्हां, इचंत्रमता कबाह्क हुप्सुंदुर. 4गानि हेके सहरते वरोनद वरोंकु अर्राकोंटा आता. इच्चुर यहुदिल्कुनहेके, इच्चुर बारे प्रेरितुल्कुनहेके आतुर. 5वेरे जातितोर आनि यहुदिल्कु ओरा अदिकारिल्कुनतोनि कलियसि पौलुसुन आनि बरनाबासुना कदर रेहचि बंडां हुक्कालय तयार आतुर. 6-7इद पोल्ले पौलुसुंक आनि बरनाबासुंक एर्का आता. अदुनहाटीं ओर लुकावनिया जिल्लाते विततुर. अद जिल्लाता लिसरा, दिरबे सहरते आनि दग्गेटा नाहकुने होंचि पेनदा बेसता कबुर वेहुंदुर.
पौलुस आनि बरनाबास लुस्त्राते सेवा कीतुर
8लिसराते वरोर कुंटि मनकल उदिस मत्तोर. ओर पुटतगाटाल बस्केने ताका हिल्लोर. 9पौलुस वेहना पोल्लें ओर केंजसेके मत्तोर. अस्के पौलुस ओन उंदेतीर हूळसि, ई कुंटिन लोप्पो बेस आयना विस्वासम मंता, इंचि इनकुत्तोर. 10अस्के पौलुस ओन, “तेदसि बेस नित्ता,” इंचि लगांचि इत्तस्के, ओर एगरिसि तेदसि ताकालय दल्गुतोर.
11लोकुल्क पौलुस कीतदुन हूळसि, लुकावनिया बासाते, “पेनकु मनकना रूपमते मनागा रेय्सि वातां,” इंचि लगांचि इत्तुर. 12ओर बरनाबासुन, जेयुस पेन, इत्तुर. #14:12 जेयुस पेन युनानि लोकुल्कुना मोदोल पेन.आनि पौलुस वळ्कानंटे पेद्दा मत्तोर इंचि ओन, हिरमेस पेन,#14:12 हिरमेस पेन युनानि लोकुल्कुना वेरे पेनकुंकु कबुर हियना पेन. इत्तुर. 13जेयुस पेनदा गुळि, नाटुक मुन्ने मत्ता. दाना पेर्माल, लोकुल्कुनतोनि कलियसि, पौलुस आनि बरनाबासुनाहाटीं मोक्कु हियालय कोंदां, पुंगाह्कुना दुम्में पीकुंचि सहरते नेंगना गलमानगा तत्तोर.
14गानि ओर इल्हा कीतद केंजसि, प्रेरित बरनाबास आनि पौलुस ओरां कपडिं हराहकुत्तुर.#14:14 कपडिं हराहकुत्तुर पेनदुक विरोदमते बद्दना पोल्ले केंजते यहुदि लोकुल्कुंक होंग वासि कपडिं हराहकुंदुर. लोकुल्कुना लोप्पो वितसि, 15“ए लोकुरिटा, मिमेट इल्हा बारि कीसंतिर? मोमोटगुडा मीलेसींटा मनकालोरमे. मिमेट वट्टि पोल्लेन होळसि, जीवाते मनना पेनदाहेके तिरियट. अदे पेन मब्बुन, बूमितुन, समुद्रमतुन आनि अव्टे मत्तव अन्निटवुन पुटिस्ता. इंचि अदे पेनदा बेसता कबुर वेहालय मोमोट वातोम. 16मुन्नेटा कालमते पेन, अन्नि जातिना लोकुल्कुन ओरा इस्टमाताप ओर्कुन मोळ्का हीता. 17गानि मीकु मब्बुनाल पिर्रु हीता, कालमनुसार पंटा पंडिस्ता, तिनालय गाटो हीसि, मीकुन आनंदमते इरसि, ‘ननाने निजम पेनदुन आंदुन’ इंचि दाना बेसता कबाह्कुनाहेंदाल मीकु हुपिस्ता,” इंचि वेहतोर.
18अच्चोन वेहिनागानि वेल्ले तिप्पलते ओर्क मोक्कु हियालय वातोर्कुन आपा परतुर. 19आयंका पीसिदियाता अंताकिया सहरताल, इकोनिया सहरताल इच्चुर यहुदिल्क वातुर. वासि लोकुल्कुन ओरा बाजुंक कीकुंचि, पौलुसुनपोर्रो बंडां हुक्तुर. ओर हातोर इनकुंचि ओन सहरता पलाते इग्गिस ओतुर. 20पजा सिस्युल्कु ओनगा वासि सुट्टु निततुर. अस्के पौलुस तेदिस सहरते होत्तोर. मर्रा इंकुंदि रोज बरनाबासुनतोनि दिरबे सहरते होत्तोर.
पय्नेम महाचि पौलुस अंताकिया सहरकु मल्सि वायमळ
21पजा पौलुस आनि बरनाबास दिरबे सहरता लोकुल्कुंक पेनदा बेसता कबुर वेहचि, वेल्लेटोर्कुन सिस्युल्कु कीतुर. पजा लिसरा, इकोनिया, पीसिदियाता अंताकिया सहरते मल्सि होत्तुर. 22अगा होंचि, “पेनदा राज्येमते होनना इत्ते तिप्पल्क वांतां, दानाहाटीं विस्वासमते गट्टिगासि मंटु,” इंचि वेहचि दैरनेम हीतोर.
23पजा ओर, अगाटा हरेक कलिसियाने पेद्दाल्कुन निलाहतुर. ओराहाटीं ओक्कापोद्दु मंचि पारतना कीसि, ओर बा सामिनपोर्रो अय्ते विस्वासम कीतुर, आ सामिंक अप्पजेपतुर. 24आयंका ओर पिसिदियाताल पंपुलिया एरियाते होत्तुर. 25अगा होंचि, पिरगा सहरते पेनदा बेसता पोल्लें वेहचि अतलिया सहरते होत्तुर. 26अगटाल डोंगा उदसि सिरियाता अंताकियाते मल्सि होत्तुर. बद कबळ अय्ते ओर पूरा कीतुरो, अद कबळ पेनदा कुर्पाते अदे जेगाताल सुरुव कीसि मत्तुर.
27अगा होत्तरित्ते, ओर कलिसियातोर्कुन जमा कीसि, पेन ओरा कय्दे बल्हा पेद्दा-पेद्दा कबाह्क कीता, वेहतुर. वेरे जातितोर्कुनगुडा विस्वासम कियालय पेन बल्हा हर्रि कीता, इंचि वेहतुर. 28आयंका सिस्युल्कुनतोनि वेल्लेन रोजकु ओर अगा मत्तुर.
Currently Selected:
प्रेरितुल्कुना कबाह्क 14: esg-Deva
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
