प्रेरितुल्कुना कबाह्क 11
11
पत्रु येरुसलेमते मल्सि वांतोर
1वेरे जातितोरगुडा पेनदा पोल्लेतुन ओप्कुत्तुर इत्ता संगति, प्रेरितुल्क आनि यहुदिया एरियाते मत्ता दादालोर केंजतुर. 2-3गानि बस्के अय्ते पत्रु येरुसलेमते वातोर अस्के, इच्चुरकतना आता विस्वासुल्क, “निमे वेरे जातितोरा#11:2-3 वेरे जाति इत्ते युनानि बासाते कतना आयवा लोकुल्क. लोहकुने होंचि ओरतोनि गाटो बारि तित्तिन.” इंचि ओनतोनि जगडम दोस्तुर.
4अस्के पत्रु बतल अय्ते जरुगुतनो अद बल्हा मत्तद अल्हे ओर्कु ई परकारम तेळियागोट्सि वेहतोर. 5“नना यापा सहरते पारतना कीसेक मननेंके उंदि दर्सनम हूळतन. अद दर्सनमते, पेद्दा सेदरतसोंटा उंदि वस्तुन नालुं मूलां पीसि मब्बुनाल हिळु रेहानद हूळतन. अद हिळु रेय्सि नना मत्तागेन वाता. 6नना दान लोप्पो बेस हूळतस्के नाकु अव्टे बूमिपोर्रो मनना नालुं काल्कुना जिवरासीं, केडा जिवरासीं, बेंगना जिवरासीं आनि मब्बुने परियाना पिट्टें दिसतां. 7अस्के नाकु, पत्रु तेदा, अवुन हव्किसि तिन, इंचि वेहताप उंदि अल्किर केंजावाता. 8अस्के, मन्नि सामि, मूसान नियम परकारम तिनुमा इत्तद, अपवित्रमातद नना बस्केने तिना हिल्लेन, इंचि इत्तन. 9अदे अल्किर मब्बुनाल रोंडो मल्का, पेन सुद्द कीतद बतले वस्तु आयि, निमे दान असुद्द इंचि इनुमा, इंचि केंजावाता. 10इल्हा मूड मल्कां आता. पजा अदुन मर्रा पोर्रोळ्क तेहाकुंचि मब्बुनहेके ओयमळ जर्गुता.”
11अस्केने नाकुन केय्सि ओयालय कैसरियाताल वाता मुव्वुर मनकालोर नना मत्ता लोतागा वासि निल्तुर. 12बतले अनमानम कियाकोंटा ओरतोनि पेय्सि होन. इंचि पेनदा आत्मा नाकु वेहता. ईर हारुर विस्वासि दादालोरगुडा नावातोनि वातुर. मोमोट अंटोरम माकुन केया वेहता मनकना लोते होळियतोम. 13आ मनकल माकु वेहतद बतल इत्ते, ओर उंदि पेनदा दूतातुन ओना लोते नित्तिसि वळ्कतदुन हूळतोर. आ पेनदा दूता, यापाते मनकालोर्कुन लोहचि पत्रु इनना सिमोनुन केयकुन. 14ओर नीकु, नीवा लोतोर्कगुडा मुक्ति बल्हा दोर्कंता, अदुन बारेमते वेहांतोर इंचि वेहता.
15नना वळ्कमळ सुरुव कीतारित्ते पवित्र आत्मा मुन्ने मनापोर्रो बल्हा रेय्तनो अल्हेन ओरापोर्रो इंका रेय्ता. 16अस्के, योहान एततोनि बापतिस्मा हीतोर, गानि मीकु पवित्र आत्माते बापतिस्मा हियमळ जर्गंता. इंचि सामि इत्ता आ पोल्ले नाकु मति वाता. 17येसु किरिस्तुन मनम सामि इंचि विस्वासम कीतस्के मनाकु हीता वरमे ओर्कु इंका हीता. अय्ते पेनदुक अड्डम तिरियानोन नना बोन आंदुन?
18ई पोल्लें केंजसि ओर अंटोर सपुडदाका आतुर. पेन वेरे जातितोर्कगुडा पिस्वर दोर्किच्कुननाहाटीं मनसु मार्सकुनना वरम हीता, इंचि पेनदा स्तुति कीतुर.
अंताकिया सहरते पेनदा बेसता पोल्ले एवंता
19स्टिपन हासोत्ता पज्जो वेल्लेन कस्टाल्क वातां, अदुनहाटीं लोकुल्क सिल्लर आसि हिके-हेके पायसि होत्तुर. आ लोकुल्क पिनिके, साइप्रस, अंताकिया इनना सहरकुने होंचि अगा सिराप यहुदिल्कुंके पेनदा बेसता पोल्ले वेहचेके मत्तुर. 20ई विस्वासुल्कुनाले इच्चुर विस्वासुल्क साइप्रस आनि कुरेनि इनना सहरतोर मत्तुर. ओर अंताकियाक होंचि येसु सामिना बेसता कबुर युनानि लोकुल्कुंकगुडा वेहतुर. 21सामिना ताकत ओरतोनि मत्ता इंचि वेल्लेटुर लोकुल्क विस्वास कीसि सामिनहेके तिरियतुर.
22बस्के अय्ते ई कबुर येरुसलेमता कलिसियातोर्क तेळियता, अस्के ओर बरनाबासुन अंताकियाक लोहतुर. 23ओर अगा होंचि अगाटा लोकुल्कुनपोर्रो पेनदा कुर्पा#11:23 कुर्पा इत्ते उंदि परकारमता आसिर्वाद इत्ताप. हूळसि इरगा कूस आतोर, सामिनतोनि बस्केळ्ताहाटीं पूरा मनसुनाल बेस विस्वासमते नित्तिसि मनना, इंचि ओर्क अंटोर्क दैरनेम हीतोर. 24ओर बेस मनकल मत्तोर, अचोने आयका विस्वासम आनि पवित्र आत्माते निंडिस मत्तोर. इल्हा वेल्लेन मंदि सामिन नम्मिसि विस्वासुल्क आतुर.
25पजा बरनाबास साऊलुन पहकालय तरसुस इनना सहर होत्तोर. 26अगा ओन दोर्किच्कुंचि अंताकियाक पीसि वातोर. अगा ओर इव्वुर अगाटा कलिसियातोर्क कलियसेके, वेल्लेन लोकुल्कुंक कराहसेके मत्तुर. इल्हा ओर इव्वुर उंदि एडादिमेड अंताकियातेन मत्तुर. अय्ते मोट्टा मोदाला सिस्युल्कुन “किरिस्तुनोर#11:26 किरिस्तुनोर येसुनपोर्रो विस्वास कीसि ओर वेहताप ताकाना लोकुल्कुन किरिस्तुनोर लोकुल्क इंतुर.” इंचि इन्मळ ई अंताकियातेन जर्गुता.
27अवे तूकुल्कुने इच्चुर पेनदा कबुरतोर येरुसलेमताल अंताकियाक वातुर. 28ओरव्टे वरोर अगबुस पोरोलतोर मत्तोर. ओर पवित्र आत्माते निंडिस, पूरा दुनियाते उंदि पेद्दा कर्वु अर्रानद मंता, इंचि वेहतोर. इदु कर्वु कलादियुस इनना राजाना कालमते अर्सि मत्ता. 29अस्के अंताकियाते मत्ता अंटोर सिस्युल्क ओरा-ओरा एलवान परकारम यहुदियाते मनना विस्वासुल्कुंक सहायमहाटीं बतलन्ना लोहना इंचि निरनायम एततुर. 30ओरा निरनायमनुसार सहायमहाटीं जमा कीता सोम्मुन ओर बरनाबास आनि साऊलना कय्दे यहुदियाते मनना पेद्दाल्कुनहेके लोहचीतुर.
Currently Selected:
प्रेरितुल्कुना कबाह्क 11: esg-Deva
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
