प्रेरितुल्कुना कबाह्क 10
10
पत्रु आनि कुरनेलियुस
1कैसरिया सहरते कुरनेलियुस पोरोलतोर वरोर मनकल मनुंदुर. ओर इटलि इनना पोलिस दलमते नूर मिल्ट्री पोलिसुल्कुन पोर्रो दरोगाल मत्तोर. 2कुरनेलियुस बेस नीतिमंतुड मत्तोर. ओर, ओना लोतोरगुडा पेनदुक वेरियुंदुर. ओर गरिब लोकुल्कुंक वेल्ले सहायम कियुंदुर. बस्केळक पेनदुक पारतना कीसेके मनुंदुर. 3ओर उंदि रोज पियल मूड एगना पारतना कियनेंके दर्सनमते उंदि पेनदा दूता ओनगा निजम वासि, “कुरनेलियुस!” इंचि ओन केयताप हूळतोर.
4अस्के कुरनेलियुस वेर-वेरियसेक पेनदा दूताहेके हूळसि, “नीकु बतल गावाले वेहा,” इंचि इत्तोर. अस्के पेनदा दूता, “नीवा पारतनां पेन केंजता. गरिबोर्कुंक निमे कियना सहायमतुन पेन हूळता. 5निमे इंदके इच्चुर मनकालोर्कुन यापा सहर लोहचि सिमोन पोरोलता मनकन (ईन पत्रुगुडा इंतुर) निहगा केया. 6ओर सिमोन इनना वरोर तोलकुन कबळ कियानोना लोते मंचंतोर. ओना लोन समुद्रम ओड्डुंक मंता.” इंचि ओन इत्ता. 7इल्हा ओनतोनि वळकसेके मत्ता पेनदा दूता अगटाल होत्ता होनमळे, कुरनेलियुस ओना लोन कबळ कियाना जीतागाह्कुनाल इव्वुर जीतागाह्कुन आनि पेनदुक वेरियानोर अल्हेने ओन्क बेस सेवा कियना वरोर पोलिसुन, इल्हा मुव्वुर्कुन केयतोर. 8पजा अगा बतल अय्ते जरुगुतनो, अद पूरा वेहचि ओर्कुन यापा सहरकु लोहचीतोर.
पत्रु पेनदा दर्सनम हूळतोर
9इंकुंदि रोजु ओर यापा सहर दग्गेरा एवतस्के पिय्यटा वेलाकु पारतनाहाटीं पत्रु मिद्देपोर्रो होत्तोर. 10अस्के ओन्क कर्वेस्सि मत्ताहेंका बतलन्ना तिनकन बारे इंचि अनपिस्ता. गाटो वेसेकेन मत्ता अच्चोटेन ओर उंदि दर्सनम हूळतोर. 11अद दर्सनमते, मब्बु बय्यर आसि, पोर्रोटाल बतलो उंदि वस्तु हिळु वायनद ओर हूळतोर. अद उंदि पेद्दा सेदरलेह्का मंता. दाना नालुं मूलां पीसि हिळु रेयताप ओर हूळतोर. 12अव्टे नालुं काल्क मत्ता अन्नि तीरकुना जिवरासीं, बेंगाना जिवरासीं आनि मब्बुने परियना पिट्टें मत्तां.
13अस्के पत्रुंक उंदि अल्किर, “पत्रु, तेदा! अवुन हव्किस तिन,” इंचि केंजावाता. 14गानि पत्रु, “मन्नि सामि, नावा पिस्वरते नना बस्केने मूसान नियम परकारम तिनुमा इत्तद, अपवित्रमातद तिंडि तिना हिल्लेन,” इंचि इत्तोर.#लैव्यवस्ता 11
15पजा अद अल्किर, “पेन सुद्द कीतद बतले वस्तु आयि, दान निमे असुद्द इंचि इनुमा,” इल्हा रोंडो मल्का ओन्क केंजावाता. 16इल्हा मूड मल्कां जर्गुता. पजा अद सेदरतसोंटा वस्तु बिराने पोर्रोळ्क मब्बुनहेके तिरियसि होत्ता.
17-18पत्रु आ हूळता दर्सनमता अर्तम बतल आयावच्चु इंचि विचारम कीसेकेन मत्तोर, अद हूळा! कुरनेलियुस लोहता मनकालोर सिमोनुना गुयमाकुल्कुनगा वासि, “पत्रु इनानोर इदे लोते मंचंतोरा?” इंचि पूसकीतुर. 19पत्रु इंकागुडा अदे दर्सनमता बारेमते विचारम कीसेके मत्तोर. अच्चोटेन पेनदा आत्मा, “हूळा, मुव्वुर मनकालोर नीकुन पहकसंतुर. 20अय्ते तेदा, हिळु रेय्सि मनसुने बतले अनमानम इर्राकोंटा ओरतोनि होन्नु. ओर्कुन ननाने लोहतन,” इंचि ओन इत्ता.
21अस्के पत्रु हिळु रेय्सि ओरगा होंचि, “मिमेट बोन अय्ते पहकसंतिरो ओर ननाने आंदुन. अय्ते मिमेट हीके बारिंक वातिर?” इंचि पूसकीतोर.
22अस्के आ मनकालोर, “माकुन उंदि पोलिस दलमता दरोगाल कुरनेलियुस इनानोर लोहतोर. ओर बेस नीतिमंतुड आनि पेनदुक वेरियसि ताकाना मनकल आंदुर. यहुदि जातिता लोकुल्कुने ओर बेस पोरोल होत्तोर. नीकुन ओना लोन केया वेहचि, नीहेंदाल ओन्क पोल्लें वेहालय उंदि पवित्र पेनदा दूता ओन्क वेहता,” इंचि इत्तुर. 23पजा पत्रु ओर्कुन लोप्पो केय्सि ओर्कुन हेडमितोरलेसीं हूळकुत्तोर. इल्हा इंकुंदि रोजु तयार आसि ओरतोनि होत्तोर. होननेंके यापा सहरता इच्चुर विस्वासुल्कगुडा ओनतोनि होत्तुर. 24इंकुंदि रोजु ओर अंटोर कैसरिया सहरते एवतुर. अगा कुरनेलियुस ओना जीवातोर्कुन आनि दग्गेटा दंटातोर्कुन केय्सि ओना एदुर हूळसेक मत्तोर. 25पत्रु लोप्पो होळियतस्के कुरनेलियुस ओना काल्कुनपोर्रो अर्सि ओना काल्क मोळ्कतोर. 26गानि पत्रु ओन तेहचेके, “अरेरे! नित्ता, ननागुडा नीलेसीं वरोन मनकने आंदुन,” इंचि इत्तोर.
कुरनेलियुस दरोगान लोन पत्रु
27पजा पत्रु कुरनेलियुसुनतोनि वळकसेके-वळकसेके लोप्पो होत्तोर. अस्के अगा ओर वेल्लेने मंदि जमा आसि मत्तद हूळतोर. 28हूळसि, “मीकु उंदि पोल्ले अय्ते एरपाटे, अद बतल इत्ते, यहुदि मनकल वेरे जातिता मनकनगा होनमळ, ओनतोनि बेसता संबंदम इरमळ यहुदि रीति-रिवाजकुने बेस आयो. गानि पेन मात्रम, नना बोने मनकन पास्कामन्नि, बोने अपवित्र इना मन्नि इंचि नाकु हुपिस्ता. 29अदुनहाटीं नाकुन मिमेट केयतस्के नना बतले विचारम कियाकोंटा मीतोनि पेय्सि वातन. अय्ते मिमेट नाकुन बारि केयतिर नाकु वेहाट,” इंचि पत्रु ओर्कुन इत्तोर.
30ओर अल्हा पूसकीताहाटीं कुरनेलियुस, “मूड रोजकु मुन्ने#10:30 मूड रोजकु मुन्ने युनानि लोकुल्कुना नालुं रोजकु मना लेक्काते मूड रोजकु आंतां. इदे वेलाकु पियल मूड एगानेंके नना नावा लोनु पारतना कीसेके मत्तन, अस्के उंदेदम तलातला मेर्सना कपडिने वरोर मनकल नावा मुन्ने वासि निततोर. 31नित्तिसि, ‘कुरनेलियुस, नीवा पारतना पेन केंजता, गरिबोर्कुंक निमे कियना सहायमतुन पेन हूळता. 32अदुनहाटीं यापाते बोनना लोहचि पत्रुन केया लोहा. ओर समुद्रम ओड्डुनगा सिमोन इनना तोलकुन कबळ कियानोन लोन आगसि मंतोर,’ इंचि इत्तोर. 33अदुनहाटीं नना बिराना नीकुन केया लोहतन, निमे इगे वासि बच्चोरो बेस आता. इंदके नीकु पेन बतल वेहतनो अव अन्नि केंजालय मोमोट अंटोरम इगे पेनदा मुन्ने जमा आतोम,” इंचि वेहतोर.
पत्रुना बासन
34अस्के पत्रु वळ्कमळ सुरुव कीतोर. ओर इत्तोर, “पेन हरेक मनकन उंदेतीर हूळंता इंचि इंदके नाकु निजम तेळियता. 35दुनियाता अन्नि देसेल्कुना लोकुल्क ओर बोरन्ना आयिर, ओर पेनदुक वेरियसि नीति कबाह्क कियानय्ते पेन ओनपोर्रो कूस मनंता. 36येसु किरिस्तु अंटोरा सामि आंदुर. ओनहेंदाल पेन दाना सांतिता बेसता कबुर इस्राएलता लोकुल्कुंक हीता, अद कबुर इदे आंदु. 37बापतिस्माता बारेमते योहान वेहमळ सुरुव कीता पजा, गालिलते उंदि गटना सुरुव आता. इद गटनाता बारेमते पूरा यहुदिया एरियंता पैलांचता संगति मीकु एरपाटे मंता. 38नासरेत नाटेना येसुन पेन पवित्र आत्मातोनि अबिसेकम कीसि#10:38 अबिसेकम कीसि राज्येम ताकसना अदिकारम हीसि ओन्क निय होकमळ. अद्बूतामाता ताकत हीता. पेन ओनतोनि मत्ताहेंका, ओर अंटोराहाटीं बेसता कबाह्क कियुंदुर, देय्याल्कुना मुक्याना कय्दा हिळु मत्तोर्कुन बेस कीसेके तिरियुंदुर, इद मीकु एरके. 39येरुसलेम, यहुदिया देसेमते ओर कीता अन्नि कबाह्कुन मोमोट प्रेरितुल्कुम, कळ्कुने हूळतोम. इंका ओर ओन क्रुसुनपोर्रो वेलाड वाटसि हव्कतुर. 40गानि पेन मात्रम ओन मूड रोजकुने मर्रा जीवाते तेहाचि दिस्सानाल कीता. 41अंटोर लोकुल्क ओन हूळा हिल्लुर. गानि पेन माकुन मुन्नेन गवाइदार्क इंचि पेर्कुत्ता. अदुनहाटीं मोमोटे ओन हूळतोम. ओर हासि तेदतारित्ते मोमोट ओनतोनि कलियसि तित्तोम, उट्टोम. 42जीवाते मत्तोर्कुंक, हासोत्तोर्कुंक न्यायम कियानोर इंचि पेन ईने पेर्कुत्ता. इदुना बारेमते लोकुल्कुंक बेसता पोल्लें कराहना, गवाइ वेहना इंचि ओरे माकु आदेस हीतोर. 43येसुनपोर्रो विस्वासम इर्रना हरेक मनकंक येसुना पोरोलते पापाल्क मापि आंतां, इंचि अंटोर पेनदा कबुरतोर्क गवाइ हीसि मत्तुर.”
वेरे जातितोर पोर्रो पवित्र आत्मा रेय्ता
44पत्रुना वळ्कमळ सुरुव मनेंकेने पेनदा बेसता पोल्लें केंजसेक मत्तुरा अंटोरपोर्रो पवित्र आत्मा रेयता. 45पवित्र आत्माता वरम वेरे जातितोर पोर्रोगुडा वळियतदुन हूळसि पत्रुनतोनि वाता कतना आता विस्वासुल्कुंक इचंत्रम आता. 46-47ओर अंटोर्कुन ओर्कु तेळियवा बासाने पेनदा स्तुति कीतद केंजतुर. अस्के, “मनाकु दोर्कताप ईर्कगुडा पवित्र आत्मा दोर्कुता. ईर एते बापतिस्मा एता मन्नि इंचि बोरन्ना अड्डम वळकानोर मंतुरा?” इंचि पत्रु इत्तोर. 48इल्हा पत्रु, येसु किरिस्तुना पोरोलते ओर्कु बापतिस्मा हियालय आदेस हीतोर. इदंता आता पजा कोन्नि रोजकु पत्रु ओरतोनि मननाहाटीं अंटोर कलियसि पत्रुंक विनंति कीतुर.
Currently Selected:
प्रेरितुल्कुना कबाह्क 10: esg-Deva
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
