प्रेरितुल्कुना कबाह्क 12
12
हेरोद राजल पत्रुन जेलने वाटंतोर
1अवे रोजकुने हेरोद अग्रिपा राजाल कलिसियानाल इच्चुर मंदितुन तकलिप कियालय सुरुव कीतोर. 2ओर योहानुना दादल याकोबुना तल्लातुन कसेटे कोय्सि हव्का वेहतोर. 3ओर कियना कबाह्क यहुदि लोकुल्कुंक बेस अनपिस्ता इन्कुंचि हेरोद राजाल पत्रुन इंका दोर्का पीतोर. (इद गटना होयवा पिंडिता हारिना पंडुगुना#12:3 होयवा पिंडिता हारिना पंडुगु इद यहुदि लोकुल्कुनद उंदि पेद्दा पंडुगु आंद. रोजु जर्गुता.) 4दोर्कापीसि जेलने वाटतोर. पजा तेपाक नालुर सिपाइल्क ओनगा कावेल कियना इंचि, पदाहारुर सिपाइल्कुना कय्दे ओन अप्पजेपतोर. दाटसि होनना पंडुगु#12:4 दाटसि होनना पंडुगु यहुदि लोकुल्क गुलामगिरिताल पेय्सतस्के कीता पंडुगु आंद. इद मार्च-एप्रिल नेलाते कींतुर. आतारित्ते पत्रुना न्यायम कियालय लोकुल्कुना मुन्ने तायाना विचारम हेरोद राजाना मनसुने मत्ता.
5इल्हा पत्रुन ओर जेलने वाटसि इरतोर. गानि ओनाहाटीं कलिसियातोर मात्रम आगाकोंटा उंदेतीर पेनदुक पारतना कीसेके मत्तुर.
पत्रु जेलनाल पेय्संतोर
6हेरोद राजाल पत्रुन पलाते पीसि वायना उंदि रोज मुन्ने, नर्काटा वेलाक पत्रु इव्वुर सिपाइल्कुना नड्डुम निद्रा होंचेके मत्तोर. सिपाइल्क ओन रोंडु गोल्सुकुने बेडीं वाटसि इरतुर. पलाते तल्पुनगा कावेल कियानोर जेलता कावेल कीसेके मत्तुर. 7अचानक सामिनद उंदि पेनदा दूता अगा दिसता. आ अर्रंता पूरा वेल्गुनतोनि निंडिस होत्ता. आ पेनदा दूता पत्रुन मेलाहचि, बिराना तेदा! इंचि ओन तेहाता. ओना कय्कुना बेडीं लेंगसि हिळु अरतां. 8अस्के, बिराना तयार आसि हेरपुह्क केर्रा, इंचि पेनदा दूता ओन्क वेहता. अस्के अद वेहतापे ओर कीतोर. पजा पेनदा दूता, नीवा सेदर मुचकुंचि नावा पज्जो वा, इंचि इत्ता. 9ओर पेनदा दूताता पज्जो-पज्जो होंचि जेलनाल पलाते अय्ते पेय्सतोर, गानि पेनदा दूता बतल अय्ते कीसंतनो अद अंता निजमे जर्गुसंता इंचि ओर इनकुना हिल्लोर. ओर उंदि दर्सनम हूळसंतन बारे इत्ताप अनपिस्ता. 10पजा ओर मोदाटोन आनि ओना पज्जोटा कावेल कियानोन दाटसि सहरकु होनना कच्चि तल्पुनगाह्कु वातुर. अस्के आ तल्पु ओराहाटीं दानद अदे पेय्स्ता. अस्के ओर दान दाटसि पलाते पेय्सि होत्तुर. इच्चोन लक्कु होतंका अचानक आ पेनदा दूता ओन होळसि होत्ता. 11पजा पत्रुंक तेल्वि अरता. अस्के निजमे! सामिए ओना उंदि पेनदा दूतातुन लोहचि नाकुन हेरोद राजाना कय्दाल तप्पिस्तोर. यहुदि पेद्दाल्क नाकुन बतल-बल्हा कियाना इंचि विचारम कीसेक मत्तुरो, अव अन्निटावुनालगुडा सामिए नाकुन पिसागोटतोर, इंचि इन्कुत्तोर.
12इदंता तेळियता पजा ओर मरियम इनना मुरतटा लोन होत्तोर. ई मरियम योहान (ईन मरकुसगुडा इंतुर) इनानोना यावल आंद. अगा वेल्लेन मंदि उंदगा जमा आसि पारतना कीसेके मत्तुर. 13पत्रु पलाताल तल्पुन तंतस्के तल्पु तेंडालय रुदा इनना उंदि दासि पेगिड वाता. 14पत्रुना लेंग एरपाट कीसि अद वेल्ले आनंदमते तल्पु तेंडाकोंटेन मल्सि लोप्पो वित्सि, “पत्रु तल्पुनगा नित्तिसि मंतोर,” इंचि वेहता.
15अस्के, नीकु पिसा पीताना? इंचि अगा मत्तोर इत्तुर. अद वेहनद निजमे इंचि बच्चोनो वेहता. अस्के ओर, अद ओना पेनदा दूता आयावच्चु, इंचि इत्तुर. 16अयना पत्रु तल्पुन अल्हेन तंचेके मत्तोर. पजा तल्पु तेंडतस्के पत्रुन हूळसि ओर्कु इचंत्रम आता. 17अस्के पत्रु ओर्कुन सपुडदाका मंटु इंचि कय्दे सय्गे कीसि वेहतोर. सामि ओन जेलनाल बल्हा पलाते तत्तोर, इद ओर्कु पूरा समजांचि वेहतोर. पजा, ई संगति याकोबुंक (येसुना तम्मुर) आनि कळमता विस्वासुल्कुंक वेहाट, इंचि वेहचि अगटाल ओर इंकुंदि वेरे जेगाते पेय्सि होत्तोर.
18पंग आतास्के, पत्रु बेके होत्तोर, बतल आता? इंचि सिपाइल्क पेद्दा गाबर आतुर. 19हेरोद राजाल ओन पहकतोर. गानि पत्रु ओन्क बग्गेन दोर्का हिल्लोर. अस्के ओर कावेल इरता सिपाइल्कुन पूस कीसि ओर्कुन हव्कना आदेस हीतोर. हेरोद राजाल यहुदियाताल कैसरियाते वासि मनालय दल्गुतोर.
हेरोदना हामुर
20हेरोद राजाल सूर आनि सैदा सहरकुना लोकुल्कुनपोर्रो वेल्ले होंग आसि मत्तोर. ओर अंटोर उंदि आसि ओनतोनि वळकालय होत्तुर. राजाना वरोर बेस दग्गेटा सेवक बलासतुस इनानोन मुन्ने अरहचि, माकु सांति गावाले, इंचि ओन्क विनंति कीतुर. बारित्ते ईरा देसेमतोर्कु तिनालय तिंडि राजाना देसेमताले दोर्कुंदु. 21निरनायम कीता रोजु हेरोद राजाल, राजाल केर्राना कपडिं केरसि ओना राजगद्देपोर्रो उदसि लोकुल्कुंक बासन हियालय दल्गुतोर. 22अस्के लोकुल्क, “इद अय्ते पेनदा लेंग आंदु, मनकानद आयो,” इंचि वरगेयालय दल्गुतुर. 23अस्के राजाल पेनदा कदर कियाकोंटा पोंगसोत्तोर. अदुनहाटीं अस्केटद अस्केने सामिनद उंदि पेनदा दूता ओन बिमार अरहता आनि ओर पुळकु अरसि हासि होत्तोर.
24गानि पेनदा पोल्ले मात्रम पैलांचेके होत्ता. अव पोल्लें केंजसि वेल्लेन लोकुल्क विस्वासमते वातुर.
25बरनाबास आनि साऊल ओरा सेवा कबळ पूरा कीसि येरुसलेमताल वापस अंताकिया होत्तुर. होननेंके मरकुस इनना योहानुनगुडा पज्जो पीकुंचि होत्तुर.
Currently Selected:
प्रेरितुल्कुना कबाह्क 12: esg-Deva
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
