মথি 11

গিত্তেল যীশুচা যোহননি জা·রিকগিবারাং

1যীশু আন·থাংনি জা·রিকগিবা সাকচিগ্মিনা হন·গিবা গি·য়েতারাংখো ব·ন্নেতজক। উনি জা·মানো বিয়া সং গিপ্পিনরাংচা স্খিনা আরো আগানফ্রাকনা উয়োনি রি·য়াংজক।

2যোহন ফাতোকো দংএ খ্রীষ্টনি খাৎথাখো খিন্নানা মা·ন্নে আন·থাংনি জা·রিকগিবারাংখো যীশুচা সিং·এ ওয়াত্তেতজক, 3‘‘না·আন উয়া রি·বানা আগানগিবামা, বা চিংআ সাকগিপ্পিনখো নিচাকসনোমা?’’

4যীশু আগানচাকে বিসংনা আগানজক, ‘‘না·সং জেখো খিন্নাংআ আরো নিক্কিংআ উখো রি·য়াংএ যোহননা আগানেবো। 5বিনা আগানেবো, মিকগ্রিরাং নিকনা মা·ন্নিংজক, খোরারাং রামা রি·ইংজক, খনচিরিত্তামরাং রংথালিংজক, নাগকরাং খিন্নাংজক, সিগিবারাং থাংচাফিল্লিংজক আরো দিল্লা-চন্না মান্দিরাংচা নাম্মা খাৎথাখো আগানফ্রাক্কিংজক। 6আরো আংখো রা·এ গিসিকো জাজাগিজাগিবান ফাত্তিয়া মান·গিবা হং·আ।’’

যোহননি গিম্মিন গিত্তেল যীশুনি খাৎথা

7যোহননি জা·রিকগিবারাং রি·য়াংমিত্তিংও যীশু মান্দিরাংচা যোহননি গিম্মিন আগান্না হা·বাচেংজক, ‘‘না·সং হা·গিসি জওলো মুয়াখো নিনা রি·য়াংআমিং? বালওয়ানা মজিমগিবা নলবিফাংখোমা? 8হং·জাওদে মুয়াখো নিনা রি·য়াংআমিং? নিথুয়া বা·রাখো গানগিবা মান্দিখো নিনামা? আদতে নিথুয়া বা·রাখো গানগিবারাং রাজারাংনি নকরাংও দংআ। 9হং·জাওদে মুয়াখো নিনা রি·য়াংআমিং? আগানসোগিবাখোমা? হো·এ, আংআ না·সংনা আগানিংআ, বিয়া আগানসোগিবানাবা দাল·বাত্তা। 10যোহনআন উয়া মান্দি জেনি গিম্মিন শাস্ত্রও চক্কা দংআ:

নিবো, আংআ নাং·না স্খাং আন·থাংনি সা·গ্রেখো ওয়াত্তেতিংআ।

বিয়া নাং·না স্খাং রি·য়াংএ নাং·নি রামাখো থারিসনুয়া। 11আংআ না·সংনা বিবিন আগানিংআ, মান্দিরাংনি গিসেপো রিপ্পলেতগিবা যোহননা বাতগিবা সাকসাবা দংজা। ইন্দিবা সালগিনি সংনকো গিম্মিকনা চনবাৎগিবান যোহননা দাল·বাত্তা। 12রিপ্পলেতগিবা যোহননি সময়ওনি দা·আওনা দিপ্পাৎ সালগিনি সংনক বিলখো রা·এ রি·বাংআ, আরো বিলগ্মাংরাং উখো রি·ম্মে দংআ। 13যোহননি সময়ওনা দিপ্পাৎ গিম্মিক আগানসোগিবারাং, ইনাআগ্রে মোশিনি নিয়ামরাংবা রি·বানাগিবা চাসংনি খাৎথাখো আগানসোজক। 14না·সং ইয়া খাৎথাখো বিবিরা·আওদে, খিন্নাবো- ইয়া যোহনআন এলিয় জেখো রি·বানুয়া ইন্নে আগানসোআমিং। 15খিন্নানা নাচিল দংগিবা খিন্নাখানা।’’

16‘‘ইয়া চাসংনি মান্দিরাংখো আংআ সারাংমুং থসুসানুয়া? ইরাং ইন্দাকগিবা বি·সারাং গিত্তা দাক্কা জেরাং বাজালও আসংএ গিপ্পিন বি·সারাংখো রিংগামে আগানা, 17‘চিংআ না·সংনা বাংসি সিক্কামিং, না·সং মেসাজাজক; দুকনি গীতখো রিং·আমিং, না·সং খা·আখো দকজাজক।’ 18যোহন রি·বাএ চা·জা রিংজাজক ইন্নে মান্দিরাং আগানিংআ, ‘বিখো গিসিক নামগিজাগিবা মান·জক।’ 19আরো মান্দিনি দেফান্থি রি·বাএ চা·জক রিংজক ইন্নে মান্দিরাং আগানিংআ, ‘হাইওয়া নিবো, চা·ফেকগিবা আরো আংগুর বিৎচিখো রিংফেকগিবা, খাজিনা গিলগিবা আরো নামগিজা মান্দিরাংনি রিপ্পেং।’ ইন্দিবা হা·আইয়া আন·থাংনি কামরাংচান খাকখেৎ হং·আখো ফিন্নিকজক।’’

বিবিরা·গিজাগিবা সং আরো সংজিলমারাং

20যীশু জে সংরাংও আরো সংজিলমারাংও বাং·বাত্তে আইয়াও ইনমানগিবা কামরাংখো দাক্কামিং উয়া হা·দামরাংনি মান্দিরাং গিসিক ফিল·জাজক। উনি গিম্মিন উয়া হা·দামরাংখো মা·নেংএ বিয়া ইন্দাকে আগান্না হা·বাচেংজক, 21‘‘হং·সিখানা নাং·না কোরাসীন, হং·সিখানা নাং·না বৈৎসৈদা! না·সংও দাকগিবা বিল্লাকগিবা কামরাংখো সোর আরো সীদোন সংজিলমাও দাক্কোদে ইন্দাকোদে বাসোকোনিন বিসং ছালা গান্নে হা·দুবু সিত্তে পাপওনি গিসিক ফিল·নুয়ামিং। 22আংআ না·সংনা বিবিন আগানিংআ, বিচালনি সালো না·সংনা বাত্তে সোর আরো সীদোননি অবস্থা চাকবাত্তানি হং·নুয়া। 23আরো না·আ কফরনাহূম! সালগিওনা দিপ্পাৎ চুবাত্তাও না·আ গাদোয়াংনোমা? মামুং সালোবা মান·জানুয়া, নাং·খো সিগিবারাংনি হা·দামচা গাল্লেতনুয়া। নাং·ও দাকগিবা বিল্লাকগিবা কামরাংখো সদোম সংজিলমাও দাক্কোদে সদোম দা·আওবা দংনুয়ামিং। 24আংআ না·সংনা বিবিন আগানিংআ, বিচালনি সালো না·সংনা বাত্তে সদোমনি অবস্থা চাকথবাত্তানি হং·নুয়া।’’

গিত্তেল যীশুনি রিক্কামা

25জা·মানো যীশু আগানজক, ‘‘ও আপফা, না·আ সালগিসাক আরো হা·গিলসাকনি গিত্তেল। আংআ নাং·খো মিৎথেলা মুয়ানা না·আ হা·আইবাৎগিবা আরো বুদ্ধিগ্মাং মান্দিরাংওনি ইরাংখো থুম্মুয়ে দন্না, ইন্দিবা বি·সারাং গিত্তা মান্দিরাংচা ফারাকজক। 26হো·এ আপফা, নাং·নি হা·ম্মা গিত্তান ইরাং হং·জক।

27‘‘দিমদাকখোন আংনি আপফা আংনি জাক্কো হন·জক। ফাগিবানা আগ্রে দেফান্থিখো দারাংবা হা·আইজা আরো দেফান্থিনা আগ্রে ফাগিবাখো সাকসাবা হা·আইজা, আরো দেফান্থি জেচা ফাগিবাখো ফারাকেতনা হা·ম্মা উয়ান বিখো হা·আইনা মা·ন্না।

28‘‘নেং·গিবা আরো বালজ্রিমগিবারাং না·সং গিম্মিকান আংচানা রি·বাবো; আংআ না·সংখো নেং·থাকেতনুয়া। 29আংনি জোয়ালখো না·সংনি সাক্কাও গাত্তে রা·বো আরো আংচানিখো স্খিবো, মুয়ানা আংআ গিসিক নম·গিবা আরো রিন্নকগিবা হং·আ। 30ইনি গিম্মিন না·সং খা·থংও নেং·থাকাখো মা·ন্নুয়া, মুয়ানা আংনি জোয়ালান রিপ্পিএ রা·না নাম্মা আরো আংনি বোজা চেং·আ।’’

Currently Selected:

মথি 11: GLNT

Highlight

Copy