মথি 10

সাকচিগ্মি জা·রিকগিবারাংখো ওয়াত্তেতা

1যীশু বিনি সাকচিগ্মি জা·রিকগিবারাংখো রিক্কামজক আরো গিসিক নামগিজাগিবারাংখো হা·রিকনা আরো গিম্মিক সাআরাংখো নাম্মেতনা বিল হ·ন্নে বিসংখো ওয়াত্তেতজক। 2উয়া সাকচিগ্মি ওয়াত্তেতারাংনি বিমুংরাং ইয়ান: শিমোন জেখো পিতর মিংআ, উনি জা·মানো বিনি জংগিবা আন্দ্রিয়; সিবদিয়নি দে যাকোব আরো বিনি জংগিবা যোহন; ফিলিপ আরো বর্‌থলময়; 3থোমা আরো খাজিনা গিলগিবা মথি; আলফেয়নি দে যাকোব আরো থদ্দেয়; 4হা·সংনা খা·ফাকগিবা শিমোন আরো যীশুখো বোবিলনি জাক্কো রি·ম্মে হন·গিবা ইষ্কারিয়োত যিহূদা।

5যীশু উয়া সাকচিগ্মিনা ইরাংখো গি·য়েতে ওয়াত্তেতজক, না·সং গিপ্পিন জাতরাংচা বা শমরিয়রাংনি সংচা দা·আ রি·য়াংআ, 6ইন্দিবা ইস্রায়েলনি মা·চংনি ব্রাংগিবা মেষরাংচা রি·য়াংবো। 7রি·য়াংমিত্তিংও না·সং ইন্দাকে আগানফ্রাকে রি·য়াংবো, সালগিনি সংনক সেফাংও সকবাজক। 8ইনা আগ্রে না·সং জমগিবারাংখো নাম্মেতবো, সিগিবারাংনা জাংগি হন·বো, খনচিরিত্তামগিবারাংখো নাম্মেতবো আরো গিসিক নামগিজাগিবারাংখো হা·রিকবো। না·সং ইন্দিনারি মা·ন্না, ইন্দিনারিন হন·বো। 9না·সংনি খাংখারি খাআনিও না·সং সোনাখো, রূপাখো বা তামানি থাংখাখোবা দা·আ রা·আংআবো। 10রি·য়াংনাগিবা রামানা দকরা, চলাবা·রা ফাৎগ্মি, জা·খপ বা গল·দিকখোবা দা·আ রা·আংআ, মুয়ানা কাম রিম·গিবাদে আন·থাংনা চা·আনিখো মা·ন্না খ্রাআ।

11“না·সং জে সংজিলমাচা বা সংচা রি·য়াংনুয়া উয়ো খ্রাগিবা মান্দি সাকসাখো সান্দিয়ে রা·বো আরো গিপ্পিনচা রি·য়াংখুজানা দিপ্পাৎ বিনি নক্কোন দংবো। 12উয়া নকনিং·আচা নাপমিত্তিংও বিসংখো সালাম হন·বো। 13উয়া নক খ্রাআওদে ইন্দাকোদে না·সংনি থম·থমা উয়া নকনি সাক্কাও রি·বাখানা। ইন্দিবা খ্রাজাওদে না·সংনি থম·থমা না·সংনি সাক্কাওন ফিল·বাখানা। 14দারাংবা না·সংখো রা·চাকসোজাওদে বা না·সংনি খাৎথাখো খিন্নাচাকজাওদে ইন্দাকোদে উয়া নকওনি বা সংওনি হং·খাতমিত্তিংও আন·থাংথাংনি জা·ফানি হা·দুলাখো দকফ্রংবো। 15আংআ না·সংনা বিবিন আগানিংআ, বিচালনি সালো উয়া সংনা বাত্তে সদোম আরো ঘমোরা সংজিলমান বাং·খালে চাকথআনি হং·নুয়া।

জা·রিকগিবারাংনি গিম্মিনো স্খিয়া

16“নিবো, মাৎচা হা·রেকনি গিসেপো মেষরাং গিত্তা আংআ না·সংখো ওয়াত্তেতিংআ। উনি গিম্মিন চিপ্পু গিত্তা সিমসাকবিগিবা আরো কইতর গিত্তা সনথলগিবা হং·বো। 17সিমসাকবো, মান্দিরাং বিচাল দাকগিবারাংচা না·সংখো রি·ম্মে হ·ন্নুয়া আরো বিসংনি থম·দাকরামও না·সংখো বেতচা দকনুয়া। 18হা·সংনি শাসন দাকগিবা আরো রাজারাংনি মিকখাংও আংনি হা·সেলান না·সংখো রিম্মাংনুয়া জেদাক্কে বিসংচা আরো গিপ্পিন জাতরাংচা না·সং সাক্ষি হ·ন্না মা·ন্না। 19জেনসালো মান্দিরাং না·সংখো রি·ম্মে হ·ন্নুয়া উনসালো বাদিকে দাক্কে আরো মুয়াখো আগান্না নাংনুয়া উখো রা·এ দা·আ চানচিয়া। মুয়াখো আগান্নুয়া উখো উনসালোন না·সংনা আগানে হ·ন্নুয়া। 20না·সংআন আগান্নুয়া ইন্দাকে হং·জা, ইন্দিবা না·সংনি ফা ইসলনি গিসিক না·সংনি গিসেপো খাৎথা আগান্নুয়া।

21“জংআদা জংআদাখো আরো ফাআ দেখো স·ওতে গালনা রি·ম্মে হ·ন্নুয়া। দেদ্রাং মা·আ-ফানা চাখাত্তে বিসংখো স·ওতেতনুয়া। 22আংনি হা·সেল গিম্মিকান না·সংখো মিৎচিনুয়া, ইন্দিবা বন·চতওনা দিপ্পাৎ চাকচিকগিবান জক্কাখো মা·ন্নুয়া। 23বাগিবাবা সংনি মান্দিরাং না·সংখো হা·রিকোদে সংগিপ্পিনচা খাতবো। আংআ না·সংনা বিবিন আগানিংআ, ইস্রায়েলনি গিম্মিক সংজিলমা আরো সংচা না·সংনি কাম ব·ন্নানি স্খাংআন মান্দিনি দেফান্থি রি·বানুয়া।

24“স্খিগিবানা বাত্তে স্নিংগিবা দাল·বাৎজা আরো নকগিবানা বাত্তে নকখল দাল·বাৎজা। 25স্নিংগিবা আন·থাং স্খিগিবা গিত্তা আরো নকখল আন·থাং নকগিবা গিত্তা আপসান হং·আন চু·য়োংআ। বিসং নকনি নকগিবাখোন বেল্‌সবূল মিংওদে, ইন্দাকোদে বাদিকে উনা বাতখালে নকনি গিপ্পিন মান্দিরাংখোবা বেল্‌সবূল মিংনুয়া!

26‘‘ইন্দিবা না·সং বিসংনা দা·আ খেন্নাবো, মুয়ানা থুম্মুয়ে দনগিবা গিম্মিকখোন ফারাকানি হং·নুয়া আরো মিৎথিনাও দনগিবা গিম্মিকখোন হা·আইএতনুয়া। 27আংআ জেখো না·সংনা আন্দালাও আগানিংআ উখো না·সং সেং·আও আগানবো। জেখো না·সং নাচিখলো খিন্নাংআ উখো নকরাংনি সাক্কাও আগানফ্রাকবো। 28জেরাং বে·এনখোসান স·ওতনা মা·ন্না ইন্দিবা জাংগিখো স·ওতনা মান·জা বিসংনা দা·আ খেন্নাবো। ইন্দিবা বে·এন আরো জাংগি ইয়া গি·গ্মিখোন নরকচা ব·ন্নেতনা মান·গিবানাসা খেনবো। 29দো·চক মাংগ্মিখো অকখিসা পয়সানা ফালজামা? ইন্দিবা না·সংনি ফাগিবা ইসলনি হ·ন্নানি আগ্রে উরাংনি মাংসাবা হা·আওনা গা·আকজা; 30আরো না·সংনি স্খুনি খিন্নিরাংবা চান্না দংআ। 31উনি গিম্মিন না·সং দা·আ খেন্না। দো·চকনাবা বাত্তে না·সং গামচাৎবাত্তা।

32“মান্দিরাংনি মিকখাংও আংখো খু·রাচাকগিবাখো আংআবা সালগিও দংগিবা আংনি ফানি মিকখাংও খু·রাচাকনুয়া। 33ইন্দিবা মান্দিরাংনি মিকখাংও আংখো জিচাকগিবাখো আংআবা সালগিও দংগিবা আংনি ফানি মিকখাংও জিচাকনুয়া।

34“আংআ হা·গিলসাকো থম·থম হং·আনিখো হ·ন্না রি·বাজক ইন্নে দা·আ চানচিয়া। আংআ থম·থম হং·আনিখো হ·ন্না রি·বাজা ইন্দিবা মান্দিনি সাক্কাও মান্দিখো চাখাত্তেতনা রি·বাজক; 35দেখো ফাথাংনি সাক্কাও, দেমিচিকখো মাথাংনি সাক্কাও, নামচিকখো নিওথাংনি সাক্কাও চাংফেংগ্রিকেতনা রি·বাজক। 36আন·থাংনি নকনি মান্দিরাংআন আন·থাংথাংনি বোবিল হং·নুয়া।

37“আংনা বাত্তে মা·আ-ফানা খা·সাবাৎগিবা আংনা খ্রাজা। আরো আংনা বাত্তে দেফান্থি দেমিচিকনা খা·সাবাৎগিবা আংনা খ্রাজা। 38আন·থাংনি চিসলখো রা·এ আংনি রামাও রি·ফাগিজাগিবাবা আংনা খ্রাজা। 39জাংগিথাংখো রাক্ষিনা হাম·গিবা বিনি চং·মত জাংগিখো গিম্মায়েতনুয়া; ইন্দিবা আংনি গিম্মিন জাংগিথাংখো গিম্মায়েতগিবা চং·মত জাংগিখো রাক্ষিনুয়া।

40“জে মান্দি না·সংখো রা·চাকা বিয়া আংখোন রা·চাকা; আরো জে মান্দি আংখো রা·চাকা বিয়া আংখো ওয়াত্তেতগিবাখোন রা·চাকা। 41আগানসোগিবা ইন্নে আগানসোগিবাখো রা·চাকগিবা আগানসোগিবানি মা·ন্নানিখো মা·ন্নুয়া। থরমি মান্দি ইন্নে থরমি মান্দিখো রা·চাকগিবা থরমি মান্দিনি মা·ন্নানিখো মা·ন্নুয়া। 42জে মান্দি ইয়া চনগিবা মান্দিরাংনি গিসেপো সাকসাখো আংনি জা·রিকগিবা ইন্নে চি খা·সিনাখো দিকথেসা রিংনা হ·ন্না, বিবিন আংআ না·সংনা আগানিংআ, বিয়া মামুং দাক্কেবা আন·থাংনি মা·ন্নানিখো গিম্মায়েতজানুয়া।”

Currently Selected:

মথি 10: GLNT

Highlight

Copy