যোহননা 8

থি·ল্লেকগিবা মিচিকনি বিচাল

1ইনি জা·মানো দিমদাক মান্দিন আন·থাংথাংনি নকচানা রি·য়াংজক, ইন্দিবা যীশু জৈতুন হা·ব্রিওনা রি·য়াংজক। 2উনি সালসা জা·মানো ফ্রিংও যীশু দা·আবা থরম নক্কোনা রি·য়াংআনি জা·মানো দিমদাক মান্দি বিচা রি·বাজক। উনো যীশু আসংএ বিসংনা স্খিনা হা·বাচেংজক। 3-4উনোন শাস্ত্র স্খিগিবা আরো ফরীশীরাং সাকসা মিচিকখো যীশুচা রিমবাজক। উয়া মিচিকখো থি·ল্লেকানি গিম্মিন রি·ম্মামিং। শাস্ত্র স্খিগিবারাং আরো ফরীশীরাং উয়া মিচিকখো জাংচিও চাদেংএতে যীশুনা আগানজক, “স্খিগিবা, ইয়া মিচিকখো থি·ল্লেকানা রিম·জক। 5নিয়ামও দংআ গিত্তা মোশি ইন্দাকগিবা মিচিকরাংখো রং·থিচা গোথাত্তে স·ওতনা গি·য়েৎজক। ইন্দিবা না·আ মুয়াখো ইন্না?”

6বিসং যীশুখো সিং·ব্রুএ নিনা ইন্নেন ইখো আগানজক, জেদাক্কে বিসং বিখো দোস হ·ন্না গি·সা চল সান্দিয়ে মা·ন্না। উনোন যীশু বামগপ্পে জাকসিচা হা·আও চকনা হা·বাচেংজক। 7ইন্দিবা বিসংনি দাপ্পেৎ দাপ্পেৎ সিং·ফিলানা বিয়া চাখাত্তে বিসংনা আগানজক, “না·সংনি গিসেপো মামুং পাপ দাকগিজাগিবান বিখো স্খাং রং·থিচা গোথাতখানা।” 8ইনি জা·মানো দা·আবা বিয়া বামগপ্পে হা·আও চকনা হা·বাচেংজক।

9ইয়া খাৎথাখো খিন্নাএ উয়া দাল·গিবারাংনি গিসেপো বুদেফাওনি হা·বাচেংএ সাকসা সাকসা দাক্কে গিম্মিক মান্দিন রি·য়াংথকজক। যীশু সাকসানান উয়ো দংজক আরো উয়া মিচিক বিনি মিকখাংও চাদেংএ দংআমিং। 10যীশু চাখাত্তে উয়া মিচিকনা আগানজক, “বিসং বাও? নাং·খো সাকসাবা শাস্তি মা·ন্না খ্রাআ ইন্নে চানচিজামা?”

11উয়া মিচিক আগানচাকজক, “হং·জা স্খিগিবা, সাকসাবা চানচিজা।”

উনোন যীশু আগানজক, “আংআবা চানচিজা। দে রি·য়াংবো; দা·আ পাপ দাক্কাবো।”

গিত্তেল যীশু হা·গিলসাকনি সেং·আ

12জা·মানো যীশু দা·আবা মান্দিরাংনা আগানফিলজক, “আংআন হা·গিলসাকনি সেং·আ। আংনি রামাওনা রি·গিবাদে মামুং দাক্কেবা আন্দালাও রি·জানুয়া, ইন্দিবা জাংগিনি সেং·আখো মা·ন্নুয়া।”

13ইনি গিম্মিন ফরীশীরাং যীশুনা আগানজক, “নাং·নি সাক্ষি হ·ন্না বিবি হং·জা, মুয়ানা না·আ আন·থাংআন আন·থাংনি গিম্মিন সাক্ষি হ·ন্নিংজক।”

14যীশু বিসংনা আগানচাকজক, “আংআ আন·থাংআন আন·থাংনি গিম্মিন সাক্ষি হ·ন্নোবা ইন্দাকোবা আংনি সাক্ষি হ·ন্না বিবিন হং·আ, মুয়ানা আংআ বাওনি রি·বাজক আরো বাওনা রি·য়াংইংজক উখো আংআ হা·আইয়া। ইন্দিবা আংআ বাওনি রি·বাজক আরো বাওনা রি·য়াংইংজক উখো না·সং হা·আইজা। 15মান্দিনি বিচাল দাক্কা গিত্তা না·সংবা বিচাল দাক্কা, ইন্দিবা আংআ দারাংখোবা বিচাল দাকজা। 16ইন্দিবা আংআ মামুং সালো বিচাল দাক্কোদে ইন্দিদে আংনি উয়া বিচাল দাক্কা বিবি হং·আ, মুয়ানা আংআ সাকসান হং·জা। আংআদে দংআন আরো আংখো ওয়াত্তেতগিবা ফাগিবাবান আংমুং দংআ। 17না·সংনি নিয়ামরাংও চক্কা দংআ, সাকগ্মিনি সাক্ষি আপসান হং·ওদে উয়া বিবি হং·আ। 18আংআন আন·থাংনি গিম্মিন সাক্ষি হ·ন্না, আরো আংখো ওয়াত্তেতগিবাবা আংনি গিম্মিন সাক্ষি হ·ন্না।”

19ফরীশীরাং বিনা আগানজক, “নাং·নি ফাগিবা বাও?”

যীশু আগানচাকজক, “না·সং আংখোবা হা·আইজা আরো আংনি ফাগিবাখোবা হা·আইজা। আংখো হা·আইওদে আংনি ফাগিবাখোবা হা·আইনুয়ামিং।”

20থরম নক্কো স্খিমিত্তিংও থাংখা হন·গিবা হা·দামও যীশু ইয়া খাৎথারাংখো আগানজক। ইন্দিবা উনোবা বিনি সাল সকখুজা ইন্নে দারাংবা বিখো রিম·জাজক।

আন·থাংনি সিয়ানি গিম্মিন গিত্তেল যীশু

21ফি·ল্লে যীশু ফরীশীরাংনা আগানজক, “আংআ রি·য়াংইংজক। না·সং আংখো সান্দিনুয়া, ইন্দিবা না·সং না·সংনি পাপনি হা·সেলো সিনুয়া। আংআ জেও রি·য়াংআ না·সং উয়ো রি·বানা মান·জানুয়া।”

22উনোন যিহূদীনি দাল·গিবারাং আগানজক, “বিয়া আন·থাংখোন স·ওতনুয়ামা? মুয়ানা, ‘আংআ জেও রি·য়াংআ না·সং উয়োনা রি·বানা মান·জানুয়া’ ইন্নে বিয়া আগানা।’ ”

23যীশু বিসংনা আগানজক, “আংআ সাক্কাওনি রি·বাআ আরো না·সং খা·মাওনি রি·বাজক। না·সং ইয়া হা·গিলসাকনি হং·আ, ইন্দিবা আংআ ইয়া হা·গিলসাকনি হং·জা। 24ইনি গিম্মিন আংআ না·সংনা আগানিংআ, না·সং না·সংনি পাপনি হা·সেলো সিনুয়া। আংআন উয়া, ইখো না·সং বিবিরা·জাওদে, ইন্দিদে না·সংনি পাপনি হা·সেলোন না·সং সিনুয়া।”

25ইনি গিম্মিন দাল·গিবারাং যীশুখো সিং·জক, “না·আ সা?”

যীশু বিসংনা আগানজক, “হা·বাচেংওনি আংআ না·সংনা জেখো আগানা আংআ উয়ান হং·আ। 26না·সংনি গিম্মিন আগান্না আরো বিচাল দাক্কে নিনা গিত্তা আংও বাং·এন দংআ। ইন্দিবা আংখো ওয়াত্তেতগিবাও বু·আনি দংজা; আংআ বিচানিখো জেখো খিন্নাংআ উখোন মান্দিনা আগানা।”

27যীশু ফাগিবানি গিম্মিনান বিসংনা আগানিংআমিং ইখো বিসং হা·আইজাজক। 28ইনি গিম্মিন যীশু আগানজক, “জেনসালো না·সং মান্দিনি দেফান্থিখো চু·য়াকাও দি·দনুয়া উনসালো আংআন উয়া ইন্নে হা·আইনা মা·ন্নুয়া। আরো ইখোবা হা·আইনা মা·ন্নুয়া, আংআ আন·থাংওনি মামুংখোন দাকনা মান·জা, ইন্দাকোবা ফাগিবা আংনা জেখো স্খিয়েতজক আংআ উয়ারাংখোন আগানা। 29আংখো ওয়াত্তেতগিবান আংমুং দংআ। বিয়া আংখো সাকসানখো ওয়াত্তেতজা, মুয়ানা বিনি নামনিকগিবা কামখোন আংআ ফাংনান দাক্কা।” 30যীশুনি ইরাংখো আগানমিত্তিংও বাং·এন বিখো বিবিরা·জক।

গিত্তেল যীশুনি সাক্কাও যিহূদীরাং

31বিখো বিবিরা·গিবা যিহূদীরাংনা যীশু আগানজক, “না·সং আংনি আগানা গিত্তা রি·ওদে না·সং বিবিন আংখো জা·রিকগিবা হং·আ। 32ইনাআগ্রে না·সং বিবিখো হা·আইনা মা·ন্নুয়া, আরো উয়া বিবিন না·সংখো জক্কেৎনুয়া।”

33যিহূদীনি দাল·গিবারাং উনো যীশুনা আগানজক, “চিংআ অব্রাহামনি মা·চংনি মান্দি হং·আ; চিংআ মামুং সালোবা দারাংনিবা নকখল হং·খুজা। না·আ বাদিকে দাক্কে চিংখো জক্কেৎনুয়া ইন্নে ইন্না?”

34যীশু বিসংনা ইখো আগানচাকজক, “আংআ বিবিন না·সংনা আগানিংআ, পাপ দাকগিবা গিম্মিকান পাপনি নকখল হং·আ। 35নকখল ফাংনানান নক্কো দংজা ইন্দিবা দেফান্থিদে দংআ। 36উনি গিম্মিন ইসলনি দেফান্থি না·সংখো জক্কেতোদে বিবিন না·সং জকনুয়া। 37আংআ হা·আইয়া না·সং অব্রাহামনি মা·চংনি মান্দি, ইন্দিবা না·সং আংখো স·ওতে গালনা হা·ম্মিংজক, মুয়ানা আংনি আগানাদে না·সংনি খা·থংও মামুং দাক্কেবা হা·দাম মান·জা। 38আংআ আংনি ফাগিবাওনা জেখো নিকজক উখোন আগানা, আরো না·সং না·সংনি ফাচা জেখো খিন্নাজক উখোন দাক্কা।”

39ইনি গিম্মিন যিহূদীনি দাল·গিবারাং যীশুনা আগানজক, “অব্রাহামআন চিংনি ফাগিবা হং·আ।”

যীশু বিসংনা আগানজক, “না·সং অব্রাহামনি দেদ্রাং হং·ওদে অব্রাহাম গিত্তান কাম দাকনুয়ামিং। 40আংআ ইসলোনিখো জে বিবিখো হা·আইজক উখোন না·সংনা আগানজক, ইন্দাকোবা না·সং আংখো স·ওতে গালনা হা·ম্মিংজক; ইন্দিবা অব্রাহাম ইন্দাকে দাকজা। 41না·সংনি ফাগিবা জেখো দাক্কা না·সংবা উখোন দাক্কিংআ।”

বিসং যীশুনা আগানজক, “চিংআদে দেব্রিং হং·জা। চিংনি সাকসাসান ফাগিবা দংআ, উয়া ফাগিবান ইসল হং·আ।”

42যীশু বিসংনা আগানজক, “না·সংনি ফাগিবা ইসল হং·বিবিওদে না·সং আংনা খা·সানুয়ামিং, মুয়ানা আংআ ইসলোনি রি·বাআ আরো দা·আও না·সংমুং দংআ। আংআ আন·থাংওনি রি·বাজা, ইন্দিবা বিয়ান আংখো ওয়াত্তেতজক। 43মুয়ানা না·সং আংনি আগানাখো হা·আইজাংআ? মুয়ানা, না·সং আংনি আগানাখো চাকনা মান·জা। 44শয়তানআন না·সংনি ফাগিবা হং·আ আরো না·সং বিনিআন দেদ্রাং হং·আ; উনি গিম্মিন না·সং বিনি হা·সিকাখো চু·সকেতনা হা·ম্মা। শয়তান হা·বাচেংওনিন মান্দি স·ওতগিবা হং·আ। বিয়া মামুং সালোবা বিবিও দংখামজামিং, মুয়ানা বিও বিবি দংজা। বিয়া বু·এ আগানজোকনো আন·থাংওনিন আগানা, মুয়ানা বিয়া বু·এ চা·গিবা আরো গিম্মিক বু·আ বিওনিন আৎচিয়া। 45ইন্দিবা আংআ বিবিখোন আগানা, আরো উনি গিম্মিন না·সং আংখো বিবিরা·জা। 46না·সংনি গিসেপো সা আংখো পাপ দাকগিবা ইন্নে ফিন্নিকনা মা·ন্না? আংআ বিবিখোন আগানোদে না·সং আংখো মুয়ানা বিবিরা·জা? 47সাবা ইসলনি মান্দি হং·ওদে বিয়া ইসলনি আগানাখো খিন্নাচাক্কা। না·সং ইসলনি হং·জা ইন্নে ইসলনি আগানাখো খিন্নাচাকজা।”

48উনোন যিহূদীনি দাল·গিবারাং যীশুনা আগানজক, “চিংআ খাকখেৎখো আগানজামা, না·আ সাকসা শমরিয়ানি মান্দি আরো নাং·খো মি·মাং মান·জক?”

49যীশু আগানচাকজক, “আংখো মি·মাং মান·জা। আংআ আংনি ফাগিবাখো মান্দিরা·আ, ইন্দিবা না·সং আংখো মান্দিরা·জা। 50আংআ আন·থাংনি গিম্মিন রাসং মা·ন্না দাকজা, ইন্দিবা আংখো মান্দিরা·গিবা সাকসা দংআ, আরো বিয়ান বিচাল দাকগিবা হং·আ। 51আংআ না·সংনা বিবিন আগানিংআ, সাবা আংনি আগানাখো মানিওদে বিয়া মামুং দাক্কেবা সিজানুয়া।”

52যিহূদীনি দাল·গিবারাং বিনা আগানজক, “দা·আও চিংআ থাল্লেন হা·আইজক, নাং·খো মি·মাংআন মান·জক। অব্রাহাম আরো আগানসোগিবারাং সিজক, আরো না·আ আগানিংআ, ‘সাবা আংনি আগানাখো খিন্নাওদে বিয়া মামুং দাক্কেবা সিজানুয়া।’ না·আ ফাগিবা অব্রাহামনাবা দাল·বাতামা? 53বিয়াদে সিজক আরো আগানসোগিবারাংবা সিজক। না·আ আন·থাংখো মুয়াখো চানচিয়া?”

54যীশু আগানচাকজক, “আংআ আন·থাংআন আন·থাংখো রাসং দাক্কোদে ইন্দিদে উনি মামুং দাম দংজা। আংনি ফাগিবা, জেখো না·সং না·সংনি ইসল ইন্নে আগানা বিয়ান আংখো মান্দিরা·আ। 55না·সং মামুং সালোবা বিখো হা·আইজা, ইন্দিবা আংআ বিখো হা·আইয়া। আংআ বিখো হা·আইজা ইন্নে আগানোদে না·সং গিত্তান আংআ বু·এ চা·গিবা হং·নুয়া। ইন্দিবা আংআ বিখো হা·আইয়া আরো বিনি আগানাখো মানিয়া। 56না·সংনি ফাগিবা অব্রাহাম আংনি সালখো নিনা খা·দংএন হান·সেংআমিং। বিয়া উখো নিক্কামিং আরো খুসিবা হং·আমিং।”

57যিহূদীনি দাল·গিবারাং যীশুনা আগানজক, “না·আ দা·আওবা বিলসি সৎবংআন হং·খুজা, আরো না·আ অব্রাহামখো নিকজকমা?”

58যীশু বিসংনা আগানজক, “আংআ না·সংনা বিবিন আগানিংআ, অব্রাহাম আৎচিনা স্খাংওনিন আংআ দংআ।” 59ইখো খিন্নাএ উয়া দাল·গিবারাং যীশুখো স·ওতনা রং·থিখো খল্লামে রা·জক। ইন্দিবা যীশু আন·থাংখো থুম্মুয়ে থরম নকনি হং·খাতে রি·য়াংজক।

Currently Selected:

যোহননা 8: GLNT

Highlight

Copy