Luc 5

Jesus unengila enengili badukitsi batega

(Matt 4.18-22; Marc 1.16-20)

1Yilumbu yisusu Jesus amaba va disimu diyiiiba yiGenesareth na batii bamasindasana uyegulu Mambu maNsambi. 2Amalaba bota beji va dibungu atsi bavubitsi bamasila ava bamawendila uyesusa mbusa tsiogu. 3Amanangama mu bota jiSimon na amamuwivula usindila bota mua pesu. Mbana amatsana muna uyelonsa batu.

4Ava amamanina ulonsa amavosa na Simon rie: Wendanu avavu ndonga, jenu na bambatsi bagu uyebuaga mbusa tsienu. 5Simon amamugabusila rie: Mulonsi, tutsivuba mukolu uotsu na tugaadila banyama tumba mu diambu diagu nyuleweliga.

6Banotsibuaga, bamadila banyama bapuela te na mbusa tsimabupasiga. 7Kabogu bamagebula bambatsi bogu abamaba mu bota jisusu uyebawamusa. Bamawagula na bamabasa bota tsiotsu tsibeji te na tsimabudiama. 8Simon Pierre anodilaba amakutama va gusu Jesus na amavosa rie: Kokolu Fumu, lekakana nami, nyiji mungo masumu.

9Diwendi rie: Simon, jogu na bambatsi bandi bamagaangu na goma ulaba banyama bapuela aba babanodila. 10Munongu mosi bambatsi bandi Jacques na Jean baana baZebedee bamakambulu wandi. Tumba Jesus amavosa na Simon rie: Guyalaba goma! Ubongila namunyi gudila batu tsiri yika banyama.

11Banobega bota tsiogu va dibungu bamasila biotsu na bamaduka Jesus.

Jesus ubelusa ebelusi yibedu yinyambi

(Matt 8.1-4; Marc 1.40-45)

12Yilumbu yisusu Jesus amaba o musiengi na vamaruga yibedu yinyambi ombu gandi. Anolaba Jesus amakutama va gusu andi na amamutsingula rie: Fumu, pa guirondi gurungula umbelusa.

13Jesus amasimbula gogu na amamubemba na amavosa rie: Nyirondi, beluga. Vana vana nyambi jimabeluga. Mbana amamutsingula rie: Guyatsingula mutu. 14Tumba yekelasa ombu bavagulitsi bapagu nana gumabeluyila; vagula pagu aji Moise amaruma yiri batu botsu bolaba yiri gumabeluga.

15Tumba diduma diJesus dimanyavanga uviolila; batu bapuela bapuelabamaruga umugulu nobelusu. 16Temu na temu Jesus amagusuga va gari ogu uwenda o kumu uyesambila.

Jesus ubelusa ebelusi yibomfi

(Matt 9.1-8; Marc 2.1-12)

17Yilumbu yisusu Jesus amalonsa. BaJuif abamaba baPharisie na milonsi mimigaga bamaba batsana bebeli nandi, bamarugasana o misiengi miotsu miGalilee no Judee no Jerusalem wandi. 18Batu bamabega yibomfi va tangi na bamaronda umukotisa o ndagu nomusunsa va gusu Jesus. 19Tumba vasamaba mbura umukotisa mu diambu diyinombu. Kabogu bamamunangiga va julu muansa na banotoba muansa mbana bamamusundusa na tangi andi va gusu Jesus va gari dibuli. 20Jesus anolaba yitu yiogu amavosa na yibedu rie: Mbatsi ami masumu magu mamagutandu!

21Milonsi mimigaga na baPharisie bamabanda uvosa nowivula rie: Jandi gugu la nyi oyilensi Nsambi? Anyi orungula utanda mutu masumu, tsia yika Nsambi buandi?

22Jesus anojaba matasa mogu amabawivula rie: Dibandu yi matasa meni mavunemi? 23Diambu yi diwelimina uvosa: Masumu magu mamatandu? Vo rie: Relama nowendanga? 24Tumba nyudulasa yiri Muana Mutu ana musuga uyetanda batu masumu. Kabogu amavosa na yibomfi rie: Relama, bonga tangi agu nogabuga o ndagu agu!

25Vana vana yibomfi amarelama va misu mogu; amabonga tangi eni na amayenawenda o ndagu andi uyenadodisanga Nsambi. 26Botsu bamakambulu puela, diuleba goma jimabagaanga bamadodisa Nsambi na bamavosa rie: Adi tutsilaba namunyi tusakadilaba na kala.

Jesus unengila enengili Levi

(Matt 9.9-13; Marc 2.13-17)

27Mbana Jesus amagusuga va musiengi eni na amarasuna Levi, mubongitsi lepu, atsana va mbura aji bamabongilanga lepu. Jesus amamunengila rie: Nduki!

28Levi amarelama; amasila biotsu na amamuduka.

29Levi amamulambila mulambu uneni o ndagu andi na babongitsi balepu bapuela na batu basusu bamatsana nogu va tavula. 30BaJuif abamaba baPharisie na milonsi mimigaga bamanyinganga na bamawivula badukitsi bandi rie: Dibandu yi duilili nonuanganga na babongitsi balepu na bango bikumbu?

31Jesus amawagula rie: Batu abavu polu bagaa na nsala nganga, yika bibedu. 32Nyisamaruga ukalusa basungama diela tumba nyimaruga yiri bango bikumbu bokalula diela.

Bivu mu diambu diubusa uji

(Matt 9.14-17; Marc 2.18-22)

33Batu bamavosa na Jesus rie: Badukitsi baJean bebusingi uji temu na temu na besambilingi; badukitsi babaJuif abamaba baPharisie bevayingi munongu mosi tumba badukitsi bagu bejangingi na benuangingi.

34Jesus amabawivula rie: Jenu durungula ubusisa bambatsi bayiwela-mugetu uji mu temu yiwela-mugetu aki nogu? Tsatsabi! 35Diweru diuruga adi yiwela-mugetu obapatulu mbana bobusa uji.

36Jesus amababuayila nongu ejiji rie: Mutu agepasi yikutu yigona ulonda yikutu yigulu. Paevayi nana obivisa yikutu yigona na yirendi yigona yigesoyini na yikutu yigulu. 37Na mutu agewitili malamu mamienga mu mambuta mamikata magulu. Pa evayi nana mbe mopansa mambuta mamikata na malamu mopumuga. 38Kabogu owitila malamu mamienga mu mambuta mamikata magona! 39Mutu agerondi malamu mamienga pa amanu malamu magala. Evosi rie: Ngomuenu mienga!

Currently Selected:

Luc 5: PUU1992

Highlight

Copy