Luc 6

Bivu mu diambu diyilumbu yitsona

(Matt 12.1-8; Marc 2.23-28)

1Yilumbu yitsona Jesus na badukitsi bandi bamavioga mu nungi tsiputu. Badukitsi bandi bamadokula putu, bamatsigubula na bamatsiji. 2BaJuif abamaba baPharisie bamabawivula rie: Dibandu yi duisumunini migaga novaga adigaa diwelimina uvaga yilumbu yitsona?

3Jesus amabawivula rie: Mbe dusakaranga adi David amavaga ava amagululu nsala, jogu na bambatsi bandi? 4Amakota o Ndagu Nsambi na amabonga mapa amamavagulu ombu Nsambi, amamaji na amamavega ombu bambatsi bandi. Tsie jetu tugaa na mugaga aguivosi yika bavagulitsi bapagu bana musuga umaji?

5Jesus amabatsingula rie: Muana Mutu ana musuga uvaga adivu diwelimina yilumbu yitsona.

Dibaala na gogu ugasa

(Matt 12.9-14; Marc 3.1-6)

6Tsona jisusu Jesus amawenda o Ndagu Yibenguna na amalonsa. Aguna umaba dibaala na gogu umabaala ugasa. 7Milonsi mimigaga na baPharisie bamaromba diela ufuengilila Jesus kabogu bamamuketanga ulaba yeri obelusa mutu mu yilumbu yitsona. 8Jesus amajaba matasa mogu na amavosa na dibaala na gogu ugasa rie: Relama, lerugati.

Dibaala dieni amarelama nokueka ombu Jesus. 9Mbana Jesus amavosa nogu rie: Nyirondi uduwivula yivu. Diambu yi divu diwelimina mu migaga mietu? Uvaga maboti mu yilumbu yitsona vo uvaga mabi? Ugobula mutu vo umuboka?

10Mbana amabagengila yisuisu na amavosa na dibaala rie: Simbula gogu agu.

Amadivaga na gogu andi umabeluga. 11Banodilaba bamanyoga kabu jineni na bamabanda uwivusana rie: Tsie tuvayila Jesus?

Jesus usola esoli digumi na bilumbi bibeji

(Matt 10.1-4; Marc 3.13-19)

12Mbana Jesus amawenda o julu mukongu uyesambila; amaviosa mukolu uotsu umoga na Nsambi. 13Wisi unotebuga amanengila badukitsi bandi na amasola digumi na babeji uba bilumbi biandi. 14Abamasolu ababa: Simon (agu amaluga Pierre) na muana nguji andi Andre mbana Jacques na Jean na Philippe na Barthelemy; 15na Matthieu na Thomas na Jacques muana uAlphee na Simon muisi Canaan; 16na Judas muana Jacques na Judas Iscariote agumakaluga mufundisitsi.

Jesus ulonsa elonsi na batu bamabelusu

(Matt 4.23-25)

17Banosunduga vana bamalesikama va yidesi agu bamarasuna badukitsi basusu na batu bapuela abamaruyila o yiari yiJudee na Jerusalem nesi o Tyr na Sidon. 18Bamaruga umugulu nobelusu. Abamanyonyusungu na binyunyi bibi bamaruga wandi na binyunyi bibi bimapalusu. 19Batu botsu bamaweliga umubemba mu mbari mangolu maNsambi mamaba nandi ubelusa batu.

Ubueji na munyongu

(Matt 5.1-12)

20Mbana Jesus amagengila badukitsi bandi yisuisu na amavosa rie:

Ka muna ubueji gu jenu aduikelaba dugeyi dulaba!

Duji o tsi Durumu duNsambi!

21Ka muna ubueji gu jenu aduigulu nsala namunyi dulaba!

O gusu dugukurusu!

22Ka muna ubueji gu! Batu boduvina, bodubusa bodufuengilila na bodulensa mu diambu diMuana Mutu. 23Labanu ubueji na nsangu temu aji duilabili mambu memama mu mbari bisaku bienu bikelusu o julu. Jabanu yiri bataji babatu beni bamavayilanga babiyitsi mambu memama wandi.

24Ka muna munyongu gu jenu bandumba dulaba!

Dumakedilila bundumba buenu.

25Ka muna munyongu gu jenu adumagukuru dulaba!

O gusu dugulu nsala.

Ka muna munyongu gu jenu aduireki namunyi duiaba!

O gusu dulila kondu.

26Ka muna munyongu gu dulaba o gusu ne pa batu beduvosili maboti! Duyalibana bataji babatu beni bamavosilanga babiyitsi bamfurulu munongu mosi.

Rondanu batu abeduvini

(Matt 5.38-48; 7.12a)

27Tumba jenu aduikululu, guluanu rie: Rondanu batu abeduvini, vaganu maboti ombu jogu abedulensi. 28Vaganu maboti ombu jogu abeduloyi, sambilanu mu jogu abedulasi maguga. 29Pa mutu ogudimba va dibanga mugelusili disusu wandi. Pa mutu ebongi yikutu yiagu muveyi yijungi yiagu wandi. 30Vega mutu uotsu ayi eguvondi; pa mutu obonga yima yiagu guyamusuyiga yionyi. 31Vayilanu basusu munongu mosi nana duirondili yiri boduvayila.

32Pa duirondi yika abedurondi, ubueji uka? Ne bavayitsi bamasumu berondi abebarondi! 33Pa duivayi maboti yika ombu abeduvayi maboti ubueji uka! Ne bavayitsi bamasumu bedivayi. 34Pa duisombisi yika aba duitasi yiri bofuta, ubueji uka? Bavayitsi bamasumu na bavayitsi bamasumu besombisini yiri bosugasana. 35Rondanu batu abeduvini na bavayianu maboti; sombisanu, duyasuyiga. Yisaku yienu yiuba yineni; duba baana baNsambi aguvu uneni mu mbari jandi wandi evayili bango migalu na bango nyinga maboti. 36Balasianu yingeba nana Taji enu edulasili yingeba.

Duyatabulila basusu bunsonsi.

(Matt 7.1-5)

37Duyatabulila basusu bunsonsi na Nsambi agodutabulila bunsonsi; duyavega basusu mbela na Nsambi agoduvega mbela; tandanu basusu na Nsambi odutanda. 38Gabanu na Nsambi odugabila: dudila yietsu yiwelimina mu yievi yienu, yiubatugu nogomusunu te na yiupumuga. Yietsu ayi dumagabila basusu ayina Nsambi odugabila.

39Jesus amamuebabuayila nongu ejiji rie: Yidunga agorungula uwendisa yidunga nandi, mbeyianu? 40Jogu botsu babeji mbe bobonduga o yiduna. Muwijitsi ageviolili mulonsi tumba muwijitsi uotsu agumamana uwiji ebi nderi mulonsi andi.

41Mu mbari yi guilabili yiriri ayi vu o disu dimuana taji agu na gugelabi dupaju aduvu o disu diagu? 42Tsie guvosila na muana taji agu rie: Kokolu tugusuli yiriri ayivu o disu diagu? Gugelabi dupaju aduvu nagu? Ka muna penda ji! Legusula dupaju aduvu o disu diagu mbana gulaba nana gugusulila yiriri ayivu o disu dimuana taji agu.

Muiri na milunda

(Matt 7.16-20; 12.33-35)

43Muiri umubusi ugeburi milunda mibi na muiri uyinguma ugeburi. 44Muiri uotsu uijabunu na milunda. Bagedokuli mumanga mu yifundi vo dilanga difubu mu mingengatogu, mbeyianu? 45Mutu uboti evayi maboti mu mbari maboti mavu o murima andi na mutu ubi evayi mabi mu mbari mabi mavu o murima andi. Amamavosu meruyili o murima.

Tungitsi beji

(Matt 7.24-27)

46Mu tnbari yi duindengili Fumu Fumu? Dugevayi ama nyivosi! 47Nyudulasa na nyi mutu oyiguhi mambu mami ebagunu. 48Aji nana dibaala adimarunga ndagu; amaletima puela mbana amarunga va julu dugunga. Nyidu jimabasa na mipupila mimasingama ndagu eni; misamarungula ujirakula mu mbari jimarungu buranga. 49Tumba oyigulu mambu mami na agemadedili aji nana dibaala adimarunga ndagu andi va yisieyi tsiri utimane pesu. Mipupila mimajisingama na vana vana jimarakuga; mudunsu undagu eni umaba uneni.

Currently Selected:

Luc 6: PUU1992

Highlight

Copy