Dibandu 49

Jacob ugabila egabili yigumi na baana bandi babeji bababaala miula

1Jacob amanengila baana bandi bababaala na amabaruma rie: Gukamanu, guluanu mbigulu tsiami. 2Gukamanu, baana bababaala baJacob guluanu! Guluanu taji enu Israel!

3Ruben, ndeju tsomi ami,

muana umangolu mabungebi buami.

Ndeʼ guvu utega

na duyitsu nesi na mangolu,

4tumba guvu nderi mingiba mimujamba

gugomueba utega!

mu mbari gumandasa tindi yisonyi,

gumabivisa mugatsi ami

gumafubana yitsiga nandi.

5Simeon na Levi bavu baana banguji;

bamafubana mirima ulasa dikasi diogu.

6Murima ami, kakana nogu!

Nyiyafubana na dibuli diogu

na kabu tsiogu bamaboka babaala,

na kanda bamanemisa balumi babangombi!

7Ka muna mulogu gu uvu nogu,

kabu ogu jimaviolila uranga

kabu ogu jivu na tindi dikasi!

Nyubakakasana na bategula bogu;

nyubapansa yiari na yiari o Israel.

8Juda, guyitsu na baana bataji bagu;

gutsotsa bavinitsi bagu ukesunsa va gusu agu.

Nesi baana bataji bagu bogudama va gusu agu.

9Juda muana ami guvu nderi mumfumfu yimbungu,

nderi yimbungu ayibanoruyila o ulega novopula;

nderi yibusi yiyimbungu,

anyi orungula ugukibisa?

10Aa Juda nguangu jibukaga jigogupatulu,

muansu ubusefu ubanganga na bategula bagu

te na fumu buonyi oruga;

agu batu botsu bodedila.

11Otunga buru andi mu mfuga

na otunga muana buru andi mu yibibili yiboti;

oputiga yikutu yiandi mu malamu;

osusa biduaru mu mamba mamilunda.

12Misu mandi mavu na yinyuru yimalamu

minu mandi mavu bujua nderi mabenyi.

13Zabulon otsananga va mugula mubu,

va mbura aji makumbi mesikimini

mandilu mandi motola te no Sidon.

14Issakar avu nderi buru ajiroga,

ajimasundusa mifuna uyesilama o yivanga.

15Olaba yiri mbura andi jivu jiboti

na yiari ayi etsanini yivu yiboti wandi

omanina mangolu mandi ubeganga mifuna

osinga ukotusu o buviga.

16Dan otabulila batu bandi bunsonsi

va mosi na bifumba bisusu biIsrael.

17Dan oba nderi nyoga va nsila,

nderi pili va mugula nsila,

nyoga ajigakingi kabala mu bakondu

na mubeyitsi andi ebonduyi.

18Aa, Fumu kobuli wami!

19Gad okindu na batu bandi

tumba abamamukinda bokindu nandi.

20Asser o yiari yiandi oba na digumba dineni.

Na odilanga biwelimina ugabila nesi bakaga.

21Neftali avu nderi kabi

ajilingingi nana erondili;

ajiburingi baana baboti.

22Joseph avu nderi yitayi yimuiri,

yitayi yimuiri aguiburingi,

aguvu va mugula yileka;

bitayi bi-uonyi biuwala tindi uwala.

23Bamamutunumuna na bamamunonga mbansa;

bamamufuengilila na divina.

24Tumba pita andi jimaba jiwara

na miogu miandi mimawarusu

na mangolu maNsambi Jacob;

na mangolu mamubungulitsi bindombu,

nesi Dimanyi DiIsrael.

25Nsambi aguvu Nsambi taji agu

oyiguwamusa;

Nsambi aguvu Mungo Mangolu motsu

oyigugabila miula:

miula amiuruyila o julu,

miula amiuruyila o butamba,

miula miduburu na mitulu nguji,

26miula ami nyigugabili

miviolili nesi maboti

amavu o julu tsimikongu,

miviolili nesi digumba

diwelimina dibikundubuga,

mibi nderi yilimba

va julu muru agu

muana ami Joseph,

Ndeʼ aguvu sefu jibaana bataji bagu.

27Benjamin avu nderi minsi aguivopuli;

kedi jineni eji nyama,

na ava tsisiga emueyenabokilanga basusu.

28Jogu bana bavu yigumi na bifumba bibeji biIsrael. Atsitsi mbigulu tsitaji ogu ava amabagabila miula. Amagabila mutu mutu miula miandi.

Dufu duJacob

29Mbana Jacob amabaruma rie: Namapapa ufu nyifu; dukansiga va mugula bataji bami o dilima adivu o gari nungi jiEfron, muisi Hitt, 30diwendi rie: o dilima adivu o nungi Makpela ajivu va nsungisini na Mamre o bulongu buCanaan aji Abraham amasumba na Efron muisi Hitt utsiyila bamfumbi bandi. 31Avana bamatsiyila Abraham na mugatsi andi Sara, avana wandi bamatsiyila Isaac na mugatsi andi Rebecca; na avana nyimatsiyila Lea. 32Nungi na dilima adivu guna bimasumbu na baana bababaala baHitt.

33Jacob anomana uvosa mambu memama ombu baana bandi bababaala amasilama, amatsukama na amafu.

Currently Selected:

Dibandu 49: PUU1992

Highlight

Copy