Dibandu 42

Jacob usindiga esindiyi baana bandi bababaala o Egypte

1Jacob amagulu yiri uvu ble o Egypte, amawivula baana bandi hababaala rie: Dibandu yi duitsingiyi yika utsingiga miogu? 2Amavosa rie: Nyigulu yiri uvu ble o Egypte; wendanu uyetusumbila ble yiri tudilanu monyu na tugomuefuanu.

3Yigumi yibaana bataji baJoseph bamawenda o Egypte uyesumba ble. 4Jacob asamasingisa Benjamin agumaba muana nguji Joseph uwenda nogu; amavosa rie: Goma nyilabi yiri odila diambu. 5Baana bababaala baJacob na batu basusu abamaronda uyesumba ble bamatola va mosi o Egypte mu mbari nsala jimaba dungosu nesi o bulongu buCanaan.

Joseph na baana bataji bandi

6Joseph amarumanga o bulongu bueni; jandi agumasumbisanga ble ombu benyi botsu. Baana bataji baJoseph banotola bamagudama va gusu andi te na bamadukusu mbami tsiogu mu tsi. 7Joseph anolaba baana bataji bandi amabajaba; tumba amavaga nderi agebajabi. Amabawivula na bukanyi rie: Agunyi duiruyisini? Bamawagula rie: O bulongu buCanaan, tuirondi usumba biguji.

8Joseph amajaba baana bataji bandi tumba jogu basamamujaba. 9Mbana Joseph amarangimina mandosi mandi ama amabadorilanga, na amabatsingula rie: Jenu duji baleyitsi, dutsiruga uyisieenga bulongu nojaba udeda uetu. 10Jogu bamamugabusila rie: Fumu, kokolu tsiagu, tsiri nana. Jetu tutsiruga yika uyisumba biguji. 11Jetu botsu tuvu baana badibaala dimosi; tugaa na mabeʼ mabeji. Kokolu tsiagu tugaa baleyitsi. 12Joseph amabatsingula rie: Viaga! Dutsiruga uyisieenga bulongu nojaba udeda uetu. 13Bamamuwagula rie: Kokolu tsiri nana, tuvu baana badibaala dimosi na tuiruyili o bulongu buCanaan. Tumaleba yigumi na baana bataji babeji, tindi ngebi etu atsisiala namunyi na taji etu, umosi asaatsi. 14Joseph amabatsingula rie: Adina nyibanodutsingula yiri duvu baleyitsi. 15Tulelaba! Pharaon! Pa marina menu asakaruga jenu dugopala mu bulongu bubuebu. 16Sindiganu mutu enu umosi uyelanda muana taji enu; jenu dusiala o tsugu. Tulelaba pa ufura duifuri vo pa ngensa duivosi. Pharaon! Duji baleyitsi.

17Amabakotisa va mosi o tsugu te na bilumbu birieru. 18Yilumbu ayimurieru Joseph amabaruma rie: Vaganu adi nyivosi pa duirondi udila monyu! Nyidumi Nsambi! 19Tulelaba yeri duna mabeʼ mabeji. Diwendi rie: muana taji enu umosi osiala o tsugu, jenu basusu dukayenawenda na ble uyebungula mikuta mienu. 20Mbeyilianu muana taji enu, agu ngebi, mbana nyujaba yiri dugaa na mabeʼ mabeji, na dugomuefu.

Anana bamavayila. 21Tumba bamavosasana rie: Nyiina, jetu tuna mbela mu diambu dimuana taji etu, nesi amakalana notulenda tusamamulasa yingeba, la dibandu tuilabili maguga memama.

22Ruben amabawivula rie: Nyisamadulubusa rie: Duyavaga muana dibi? Tumba dusamakulu. Tsiri dufu duandi tuifuti namunyi?

23Basamajaba yiri Joseph amabagulungu mu mbari amavosanga nogu na yikambi. Kabogu jandi amakakana nogu uyelila.

Baana bababaala baJacob ugabuga begabuyi o Canaan

24Ava Joseph amagabuyila amavosa nogu rie: Nyusikiga Simeon mbana amamutungisa bapanga va misu mogu. 25Joseph amaruma basalitsi ubasa saku tsiogu ble nogabusa mutu mutu mbongu tsiandi mu saku andi mbana bamabavega biguji ujanganga muna nsila. Adina dimabavagulu. 26Bamalongila baburu saku tsiogu tsible mbana bamayenawenda.

27Va mbura aji bamasilimina, mutu ogu umosi amadibula saku andi uvega buru andi biguji, kabogu mbongu tsimaba vana munu saku. 28Amagamuyila baana bataji bandi rie: Mbongu tsiami tsimakabusulu, aratsi, tsivu mu saku ami. Mbana bamabakama mirima te na bamawivusana na goma rie: Diambu yi Nsambi amatuvaga?

29Bamatola o bulongu buCanaan ombu taji ogu Jacob na bamamutsingula motsu ama bamalaba. Bamavosa rie: 30Dibaala adivu fumu bulongu amavosa netu na bukanyi na amatugengila nderi baleyitsi tuvu. 31Tumamutsingula rie: Tugaa na mabeʼ mabeji na tugaa baleyitsi. 32Tuvu yigumi na baana bataji babeji, jetu botsu taji mosi; umosi asaatsi, marina atsisiala na taji etu o bulongu buCanaan. 33Dibaala adivu fumu bulongu atsitutsingula rie: Tulelaba pa dugaa na mabeʼ mabeji. Silanu muana taji enu umosi ombu gami, bonganu ble uyebungula mikuta mienu, 34mbeyilianu muana taji enu aguvu marina. Mbana nyujaba yiri dugaa baleyitsi na dugaa na mabeʼ mabeji; mbana nyudugabusila muana taji enu Simeon na durungula ne ulinga nana duirondili mu bulongu buebubu.

35Ava bamafulila saku tsiogu, mutu mutu amalaba diumba dimbongu tsiandi o gari saku andi. Jogu na taji ogu banolaba mumba meni mambongu bamagaangu na goma. 36Taji ogu Jacob amabatsingula rie: Jenu dumbana baana botsu! Joseph esaatsi na Simeon wandi, va julu vana dumuebonga Benjamin! Ngeba menua, aa Nsambi!

37Ruben amavangana na taji andi rie: Pa ngaagugabusila Benjamin gukaboka baana bami babeji bababaala; abi va julu muru ami na nyumugabusa ombu gagu. 38Jacob amavosa rie: Muana ami agoweʼ nenu; mu mbari muana nguji andi amafu na jandi esiali pinsa. Pa olaba diambu mu mulingu enu nyufu na dufu duami duba na mambu.

Currently Selected:

Dibandu 42: PUU1992

Highlight

Copy