Dibandu 41

Mandosi maPharaon

1Bilima bibeji binovioga Pharaon amadora ndosi. Muna ndosi eni amaba va mugula mujamba uNil. 2Amalaba yisambuali yibangombi baboti na bavonga abamamatanga va mugula uNil noyenajanganga bisinga. 3Mbana amalaba yisambuali yibangombi basusu babiva na bagasa abamaba yika bivisi na bivisi abamamatanga va nsima ogu va mugula mujamba uNil. 4Bangombi ababiva na bagasa bamamina bangombi baboti na bavonga mbana Pharaon amarambuga.

5Amamuewenda yilu na amamuedora ndosi ajimubeji. Muna ndosi eni amalaba yisambuali yibisaga biuresi biroga na biboti abimawansa va muiri umosi. 6O nsima tsibionyi bimawansa yisambuali yibisaga biuresi bibivuda abimabivusu na punga ajiruyili o yiari ayi wisi epalili. 7Yisambuali yibisaga biuresi bibivuda bimamina yisambuali yibisaga biuresi biroga na bibasa. Mbana Pharaon amarambuga amalaba yiri ndosi atsidora.

8Ava kedi Pharaon amaba na murima o julu. Kabogu amanengila banganga botsu na bango diela botsu abamaba o Egypte na amabawalulila mandosi meni. Ne mutu mosi asamarungula umuvindiyila monyi. 9Mbana yivunda yibaboyi amatsingula Pharaon rie: Namunyi nyirangimini nsimbulu tsiami. 10Ava gumatunyoyila jetu na yivunda yibavayitsi bamapa, gumatukotisa o tsugu jiyivunda yibagora bakaga. 11Mukolu mosi jetu botsu babeji tumadora mandosi: mutu mutu na ndosi andi; jetu botsu babeji tumadila mavindugulu mawelimina na mandosi metu. 12Guna tsugu gumaba mufudu uHebreu agumaba muviga uyivunda yibagora. Jetu tumamuwalulila mandosi metu, mutu mutu na ndosi andi, jandi amatuvindiyila monyi.

13Mambu mamalabana nana amavindiyila. Gumakabusa o yisalu yiami na yivunda yibavayitsi bamapa amatabulu muru na mfumbi andi jimalelugu.

Joseph uvindiga evindiyi mandosi maPharaon

14Pharaon amaruma mutu unengila Joseph. Bamalensa nomupalisa o tsugu. Amafuga na amavinsa biduaru mbana amawenda ombu Pharaon. 15Pharaon amatsingula Joseph rie: Nsidora ndosi aji ne mutu mosi agorungula upindiga; nyimagulu yiri guijabi uvindiga mandosi yiotsu ayi guimagulu. 16Joseph amagabusila Pharaon rie: Tsiri menu! La Nsambi aguguvega divindugulu diwelimina adiuguwamusa.

17Mbana Pharaon amatsingula Joseph rie: Muna ndosi ami nyibetsi va mugula mujamba uNil. 18Vabetsi yisambuali yibangombi babo-ti na bavonga abatsimatanga va mugula mujamba noyenajanganga. 19Yisambuali yibangombi basusu abatsimatanga va nsima ogu babetsi bagasa na babiva; babetsi yika bivisi na bivisi. Mbe nyisakalaba ubiva umunongu eni mu bulongu buotsu buEgypte. 20Bangombi bagasa na babiva batsimina yisambuali batega abavonga, 21diuleba batsibamina bagaalabana yiri bamaroga na babetsi dedi mosi nana va kala. Mbana nsirambuga. 22Nsimuedora yisambuali yibisaga biuresi bibasa na biboti abibetsi mu muiri umosi. 23Mbana nyimalaba yisambuali yibisaga biuresi bibivuda abimabivusu na punga ajiruyili o yiari ayi wisi epalili, 24yisambuali yibisaga biuresi bibivuda bitsimina yisambuali yibisaga biuresi abibasa. Nsimawalulila banganga tumba ne jimosi jigaarungula umapindiyila.

25Joseph amatsingula Pharaon rie: Mandosi motsu ihabeji mavu na divindugulu dimosi. Nsambi amagujabisa adi ovaga. 26Yisambuali yibangombi baboti bavu yisambuali yibilima: divindugulu dimosi divu. 27Yisambuali yibangombi bagasa na babiva abavu yika bivisi na bivisi na abatsimatanga va nsima bangombi abatega bavu yisambuali yibilima; yisambuali yibisaga biuresi bibivuda abimabivusu na punga ajiruyili o yiari ayi wisi epalili bivu yisambuali yibilima bidungosu dunsala. 28Anana nyibanotsingulila Pharaon yiri Nsambi amajabisa Pharaon adi ovaga. 29Voba yisambuali yibilima bidigumba o bulongu buotsu buEgypte. 30Abina binovioga yisambuali yibilima binsala biuruga na batu bolibana ne ulibana digumba diEgypte, dungosu dunsala dugudisa bulongu. 31Nsala eni ajiuduka jiuba dungosu na bolibana digumba dikala. 32Gutsidora ndosi agu kumbu beji ulasa yiri Nsambi amatabula diambu kala na agotsikadana udidugusu. 33Namunyi Pharaon asoli dibaala adivu na diela na dujabu nomuvega musuga uruma bulongu buEgypte. 34Pharaon abiatsi batu aboba na musuga o biari biotsu bibulongu ugusula yimosi mu biranu bidutsonsugu duEgypte mu yisambuali yiotsu yibilima bidigumba. 35Jogu bagukiyi biguji bidigumba dieni dibilima biboti abiuruga, badivayi na musuga uPharaon, diwendi rie: bakagukiga ble atsiusuegu o bilundulu bimisiengi miotsu na vabi bagora ubikelisa. 36Biguji bieni biusuegulu bisi bulongu mu diambu didungosu dunsala duyisambuali yibilima abiuruga o bulongu buEgypte yiri dungosu dunsala dugogudisa bulongu.

Dumatusu duJoseph

37Pharaon na basalitsi bandi bamasinga matasa meni. 38Pharaon amawivula basalitsi bandi rie: Tudila mutu nana jandi egugu aguvu ubasa na Yinyunyi ayiruyili ombu Nsambi?

39Pharaon amatsingula Joseph rie: Nsambi amagujabisa mambu motsu na vagaa mutu aguvu na diela na dujabu uviolila ndeju. 40Ny ugubiatsa yivunda yibisalu bibufumu buami na batu bami botsu bodedila maruma magu; dimosi buandi gugonengulu na diina dikaga. 41Pharaon amabuesa rie: Ubongila namunyi guna musuga uruma bulongu buotsu buEgypte.

42Pharaon amavula moru andi ubukaga na amaguduisa Joseph; na amamuduisa biduaru bitsanda jiboti jilina na amamuduisa panga jilora mu kingu. 43Mbana amamunangiga mu dikalu adimadukanga adiandi na batu bamayenagamuganga va gusu andi rie: Kutamanua! Anana Pharaon amamuveyila musuga uruma bulongu buotsu buEgypte.

44Pharaon amamuetsingula Joseph rie: Menu Pharaon oyivosi rie: Musuga uotsu ubisi Egypte uvu va julu muru agu.

45Pharaon amaluga Joseph Safnat-Panea na amamuwelila Asnat muana mugetu uPotifera agumaba muvagulitsi upagu uOn. Joseph amatsiengilanga bulongu buotsu buEgypte. 46Joseph amaba na magumarieru mabilima ava amalabinina ombu Pharaon agumaba kagajiEgypte.

Joseph amaganina Pharaon uyenatsiengilanga bulongu buotsu buEgypte. 47Mu yisambuali yieni yibilima bidigumba butamba bumafunisanga tindi digumba. 48Joseph amagukiga biguji biotsu biyisambuali yibilima o bulongu buEgypte; amakotisa biguji bimbanda tsi o bilundulu o gari kadi musuengu 49Joseph amagukiga ble tsipuela te na tsimaba nderi yisieyi yidukueku dumubu; tsimaviolila ufuna te na bamadunda utsitala mu mbari dutalu dumaviolila ufuna.

50Ne bilima binsala bikatola Asnat muana mugetu uPotifera muvagulitsi upagu uOn amabunla Joseph baana babeji bababaala. 51Joseph amaluga tsomi andi Manasse divindugulu rie: Nsambi amakwamusa ulibana purulu tsiami tsiotsu na ndagu taji ami jiotsu. 52Amaluga agumubeji Efraim divindugulu rie: Nsambi amamfunisa o bulongu bumaguga mami.

53Yisambuali yibilima bidigumba abimaba o bulongu buEgypte bimasuka. 54Yisambuali yibilima binsala bimabanda nana Joseph amabiyila. Nsala jimaba o malongu motsu; tumba o bulongu buotsu buEgypte umaba biguji. 55Ava bisi Egypte bamagaangulu na nsala bamatatila Pharaon udila biguji. Pharaon amaruma bisi Egypte botsu rie: Wendanu ombu Joseph na vaganu adi odutsingula. 56Nsala jimaba dungosu o bulongu buotsu. Joseph amadibula bilundulu biotsu na amasumbisa ble ombu bisi Egypte. Nsala jimavarila o bulongu buEgypte. 57Bisi malongu motsu bamawendanga o Egypte uyesumba ble ombu Joseph; mu mbari nsala jimaba dungosu te no malongu motsu.

Currently Selected:

Dibandu 41: PUU1992

Highlight

Copy