Dibandu 40

1Yilumbu yimosi dimalabana yiri bo-yi na muvayitsi mapa bakaga jiEgypte bamamuvayila mabi. 2Pharaon kaga jiEgypte amanyoyila basabtsi beni babeji: yivunda yibaboyi na yivunda yibavayitsi bamapa. 3Amabakotisa o tsugu jiyivunda yibagora, guna tsugu aji Joseph amaba. 4Yivunda yibagora amabawakisa ombu Joseph agumabakelisanga; bamaleviosa mua temu o tsugu.

Joseph uvindiga evindiyi mandosi mabisi tsugu babeji

5Mukolu mosi, boyi na muvayitsi mapa bakaga jiEgypte abamaba o tsugu, jogu botsu babeji bamadora mandosi. Mutu mutu na ndosi andi na ndosi ndosi na divindugulu diandi. 6Kedi Joseph amalaba yiri botsu babeji bavu na munyongu. 7Amawivula basalitsi beni abamaba nandi o tsugu rie: Mu mbari yi duvu na munyongu namunyi? 8Bamamugabusila rie: Jetu botsu tumadora mandosi na vagaa mutu umavindiga. Joseph amabawivula rie: Tsia Nsambi oyivindiyi mandosi? Kwalulilianu mandosi menu.

9Mbana yivunda yibaboyi amamuwalulila ndosi andi rie: Muna ndosi ami vabetsi mfuga va gusu ami. 10Mfuga eni jibetsi na bitayi birieru. Binonega bitsifula tsangu atsibetsi bisaga mirayisin amimawela. 11Kopa Pharaon jibetsi va dikaka diami. Nsidokula milunda, nsimigama mu kopa Pharaon na nsijiwakisa ombu gandi. 12Joseph amamuvindiyila rie: divindugulu dindosi adidi: Bitayi birieru bivu bilumbu birieru. 13Gubuela bilumbu birieru o tsugu mbana Pharaon ogupalisa na ogugabusa o yisalu yiagu. Gumuwakisa kopa nana gumamuwakisilanga ava gumalebila boyi andi. 14Tangimini ava gulabila ubueji. Kokolu tsiagu posili maboti ombu Pharaon yiri opalisa meʼ wami o tsugu. 15Nyimapatulu o bulongu buHebreu na diuleba nyisamavaga dibi nyimakotusu o tsugu.

16Yivunda yibavayitsi bamapa amalaba yiri divindugulu dimaba diboti kabogu amawalula ndosi andi rie: Muna ndosi ami vabetsi bievi birieru bimapa va julu muru ami. 17Mu yievi ayimavioga uroga mubetsi mapa mageyi ama Pharaon amarondanga; tumba batsoli batsidodanga mapa amabetsi mu yievi ayibetsi va julu muru ami. 18Joseph amamuvindiyila rie: Divindugulu dindosi adidi: Bievi birieru bivu bilumbu birieru. 19Gubuela bilumbu birieru o tsugu mbana Pharaon ogutabula muru na oguleliga va muiri na batsoli bododa musonyi agu.

20Bilumbu birieru binovioga feta jiduburu duPharaon jimaba; amalambisila basalitsi bandi botsu mulambu uneni mbana va misu mogu amapalisa yivunda yibaboyi na yivunda yibavayitsi bamapa o tsugu. 21Amagabusa yivunda yibaboyi o yisalu yiandi yiboyi yiri omuemuwakisa kopa. 22Tumba amatabula yivunda yibavayitsi bamapa muru na amaleliga mfunbi andi va muiri nana Joseph amabavindiyila mandosi. 23Yivunda yibaboyi asamamuekipa ne ukipa Joseph. Amamulibana.

Currently Selected:

Dibandu 40: PUU1992

Highlight

Copy