Dibandu 39

Joseph utsana etsani o ndagu Potifar muisi Egypte

1BaIsmael bamabega Joseph o Egypte; bamamusumbisa ombu muisi Egypte diina diandi Potifar, yivunda yibagora baPharaon. 2Fumu amaba na Joseph, motsu ama amavaganga mamabuejingi; amatsananga o ndagu fumu andi agumaba muisi Egypte. 3Jandi amalaba yiri Fumu amaba na Joseph na motsu ama amavaganga mamabuejingi. 4Potifar amalaba tindi ubueji na Joseph; amamukotisa mu yisalu yijaʼ beni; amamuvega musuga uotsu o ndagu andi nesi ubiandi biotsu. 5Potifar anomukotisa o ndagu andi na anomuvega musuga ukelisa biotsu abimaba nandi, Fumu amagabila ndagu muisi Egypte miula mu diambu diJoseph na mimadugunu mu biotsu abimaba nandi nesi o ndagu nesi o manungi. 6Amasila mambu motsu na Joseph, asamamuekipa mambu masusu yika biguji biandi.

Joseph na mugatsi fumu andi

Joseph amaba mufudu uboti: nesi diteli nesi yinsi. 7Mua pesu temu mugatsi fumu andi amamunyungila na amavosa rie: Fubana yitsiga nami! 8Joseph amabusa na amatsingula mugatsi fumu andi rie: Jaba yiri fumu ami agekipi ne diambu dimosi o ndagu andi; amakwakisa musuga uotsu. 9Agepiolili musuga o ndagu ejiji; asamakandisa ne yima yimosi, yika ndeʼ buandi mu mbari guvu mugatsi andi. Tsie nyuvayila nsoruru tsimunongu eni nova-ga disumu va gusu Nsambi?

10Diuleba amawambilanga Joseph yilumbu na yilumbu, Joseph amabusa ufubana yitsiga nandi. 11Yilumbu yimosi Joseph amakota o ndagu uyesala yisalu yiandi, amarasuna yiri basalitsi bamapala, 12kabogu mugatsi Potifar amamugaanga yikutu yiandi na amamuwambila rie: Fubana yitsiga nami!

Joseph amamusila na yikutu yiandi va dikaka, amarina o dulombili. 13Ava mugetu amalabila yiri Joseph amamusila na yikutu yiandi na amarina o dulombili, 14amanengila basalitsi na amabatsingula rie: Duilabi, mulumi ami amatubeyila muisi Hebreu uyitulensa. Dibaala diedidi atsiruga ombu gami uyifubana yitsiga nami, tumba nsigamuga. 15Anogulu yiri ugamuga nyigamuyi atsisila yikutu yiandi va tangi na amarina o dulombili. 16Mbana amakebsa yikutu yiJoseph te na vana mulumi andi amaruyila o ulinga. 17Amatsingula mulumi andi rie: Muviga muisi Hebreu agu ndeʼ gumatubeyila amaruga ombu gami uyimbingila. 18Tumba nyinogamuga tindi ugamuga, atsisila yikutu yiandi va tangi norina o dulombili.

19Fumu Joseph anomana ugulu posulu tsimugatsi andi mu diambu diJoseph amabasa na tindi kabu. 20Amabonga Joseph na amamukotisa o tsugu mosi na bakoli bakaga.

Joseph avu o tsugu

Ava Joseph amabila o tsugu, 21Fumu amaba nandi; amamugabila maboti mandi te na nesi mukelisi tsugu amamurondanga. 22Mukelisi tsugu amamuvega musuga uruma bisi tsugu botsu; jandi amakipanga biotsu abi bisi tsugu bamasalanga. 23Mukelisi tsugu asamamuekipa ne yisalu yimosi ayi amawakisa Joseph; Fumu amaba nandi na amabuejisanga motsu ama amavaganga.

Currently Selected:

Dibandu 39: PUU1992

Highlight

Copy