Migaga Mimatubula 26

Biumanga

1Ava dutolila o bulongu abu Fumu Nsambi enu oduvega disiala, ava dubudilila noyetsana guna, 2dukabonga biumanga bimilunda miotsu ami dudilila o bulongu abu Fumu Nsambi oduvega. Dukamipodula mu yievi mbana dukawenda o mbura aji Fumu Nsambi enu osola ukelasa ombu genu. 3Dukakelasa ombu muvagulitsi upagu agusala vana temu eni na dukamutsingula rie: Namunyi tuitubuli ombu Fumu Nsambi etu yiri tumatola o bulongu abu Fumu amavangana uvega bataji betu. 4Muvagulitsi upagu owaka yievi na oyisunsa va gusu yinyensulu yipagu yiFumu Nsambi enu. 5Dukamuevosa va gusu Fumu Nsambi enu rie:

Taji etu amaba muisi Aram na yilayilayi; amawenda o Egypte na mua pesu batu na amayetsana guna. Aguna amakaluyila bulongu buneni abumaba na mangolu maneni na amafuna tindi ufuna. 6Bisi Egypte bamatukuananga na bamatutsoyisanga na bamatukotisa o buviga. 7Tumagamuyila Fumu Nsambi bataji betu. Fumu amagulu mufi metu na amalaba purulu tsietu na mukilu etu na maguga metu. 8Tsia Fumu amatupalisa o Egypte na mangolu mandi ava amaiasila bimaga bigoma na bilimba na tindi bimaga. 9Amatuwendisa te na mbura eni na amatuvega bulongu buebubu, diwendi rie: Bulongu abuvu na tindi digumba. 10Fumu, namunyi tuibeyi biumanga bimilunda ami gumatuvega!

Dukabiviosa va gusu Fumu Nsambi enu nomukutimina. 11Mbana dulaba nsangu va mosi na bisi Levi na benyi aboba va gari enu wandi mu diambu dimaboti motsu ama Fumu Nsambi enu amaduvega na bisi ndagu enu.

Yimosi mu digumi yiyilima ayimurieru

12Yilima ayimurieru yiuba yilima yiyimosi mu digumi. Kabogu dunomana ugusula yimosi mu digumi abina duvega ombu bisi Levi na benyi na bisiana na bakuili abetsani nenu, bojanganga te na bogukurungu. 13Dukavosa va gusu Fumu Nsambi enu rie: Tumagusula abimavagulu pagu o mandagu metu na tumabivega ombu bisi Levi na benyi na bisiana na bakuili nana gumaturumina. Tusamasumuna nesi ulibana ne dirumadiagu dimosi. 14Tusamaji bima bieni ava tumalabila munyongu, tusamatsiemusa ne dimosi usalisa adivu nsoruru na tusamavega ne yimosi uyitsa bakosi; tumadedila diufi diNsambi etu, tumavaga nana gumaturumina. 15Tugengili ava guvu va yitsiga yiagu yibunsambi o julu, gabila batu bagu baIsrael miula na bulongu abu gumatuvega wandi nana gumavanginina na bataji betu, bulongu abuvu na tindi digumba.

BaIsrael batu baFumu

16Namunyi Fumu Nsambi enu edurumi ukipanga migaga na maruma; dukamakelisanga na mirima mienu miotsu na matasa menu motsu. 17Namunyi dumavanganga pangini na Fumu yiri obanganga Nsambi enu pa dudedila diufi diandi, nokelisanga migaga miandi na maruma mandi na malongi mandi. 18Dumavangana na Fumu yiri duba batu bandi, abandi badurondu, na dukelisanga maruma mandi motsu. 19Dingensa Fumu Nsambi erondi yiri duba dilongu ditega va gari malongu motsu ama amasunda. Erondi uduvega buneni na diduma na bundumba jenu duba bulongu abumawakusu ombu Fumu Nsambi enu nana amaledutsingulila.

Currently Selected:

Migaga Mimatubula 26: PUU1992

Highlight

Copy