Migaga Mimatubula 22

Bima Bingana

1Pa dulaba ngombi vo yindombu vo yinsabi yimutu nagu ayimatsiemuga duyayiliyila nsima, dukayigabusa ombu gandi. 2Pa agetsani bebeli nenu vo dugejabi agudila yionyi dukayikelisa o mandagu menu. Yiutsana guna te na mutu oyeyiromba mbana dukamugabusila yionyi. 3Dukavaga munongu mosi nesi na buru nesi na yikutu nesi na yima yiotsu ayi mutu nagu otsiemusa ayi dumalaba; dugaa na musuga uyiliyila nsima.

4Pa dulaba buru jimutu nagu vo ngombi andi ajimaberuga va nsila duyajiliyila nsima, dukajiwamusa usimbula.

Migaga miminongu na minongu

5Mugetu ayaduara yiduaru yidibaala na dibaala ayaduara yiduaru yimugetu; mu mbari uotsu aguivayi mambu meni avu nsoruru va gusu Fumu Nsambi enu.

6Pa dulaba diuva ditsoli mu nsila adiuba mu muiri vo va tsi na diuba na baana vo makeji na nguji agudimina baana vo makeji, duyabonga nguji na baana bandi, 7dukawensa nguji, dukabonga yika baana yiri dulabanga nsangu na dutsinga o bulongu.

8Pa duirungisi mandagu magona, miansa mibi mikandu yiri pa mutu omata o julu mionyi agobonduga nofu.

9Duyavara bivaru bimunongu ususu o manungi mamirayisan. Pa duivayi anana digumba dimirayisan na dibivaru bisusu mbe biuwakusu ombu Fumu.

10Duyasalisa ngombi na buru va mosi ava duifutsili. 11Duyaduara biduaru abimabuangu na minongu mibanyongi mibeji.

12Dukavaga matsatsa mana mu mafubu mabikutu abi duiduaringi.

Butsiemi bumugetu

13Diurungula uba dibaala amawela mugatsi na anofubana yitsiga nandi, agemuemuronda. 14Pa emuveyi mbela na ebivisi diina diandi ava evosili rie: Nyimawela mugetu egugu, nyinofubana yitsiga nandi nyimamurasuna amajaba babaala kala, 15mbana taji na nguji mugetu eni bobonga bilimba bibutsiemi buandi na boyebilasa ombu bivunda bimusiengi va dikotulu dimusiengi. 16Taji muana mugetu otsingula bivunda rie: Nyimawetsa muana ami ombu dibaala dieni na agemurondi; 17emuveyi mbela ava evosili rie: Ngaarasuna muana agu yiri avu tsiemi. Kabogu labanu bilimba bibutsiemi bumuana ami abibi. Mbana bowala tsanda jibutsiemi va gusu bivunda bimusiengi. 18Kabogu bivunda bimusiengi bogaanga dibaala dieni na bomukilisa 19mu mbari amabivisa diina ditsiemi jibaIsrael, bomufutisa kama mbongu tsilora jivema atsi bovega ombu taji muana mugetu. Jandi oba mugatsi andi na mulumi agorungula umugusula te na dufu duandi.

20Tumba pa diambu divu dingensa yiri muana mugetu asamaba tsiemi, 21bopalisa muana mugetu va gusu kana undagu taji andi; bisi musiengi bomutindila mamanyi te na ofu mu mbari amavaga buvuyisa o Israel ava amabila o ndagu taji andi. 22Adina diutsiemusa dibi va gari enu.

23Pa muana mugetu amakumumunu na dibaala obenguna nandi o musiengi na ofubana yitsiga nandi, 24dukababega botsu babeji va dikotulu dimusiengi, dukabatindila mamanyi te na bofu; muana mugetu, mu mbari asamagamuga na dibaala mu mbari amabivisa mugatsi umutu nandi. Adina diutsiemusa dibi va gari enu. 25Pa o musiru dibaala obenguna na muana mugetu agumakumumunu, na omulasa bukanyi nofubana yitsiga nandi, dibaala dieni aboku wandi pinsa. 26Guyavaga muana mugetu diambu; agaa na mbela jidibi dieni ajiumurombisa dufu, (mu mbari diurungula uba nderi mutu agu mutu nandi amagaanga nomuboka.) 27Muana mugetu agumakumumunu agumabenguna na dibaala dieni o musiru amagamuga tumba asamadila mutu umuwamusa.

28Pa dibaala obenguna na muana mugetu aguvu tsiemi na asakakumumunu na omulasa bukanyi nofubana yitsiga nandi na bobatsukiga, 29dibaala afuti magumaranu mambongu ombu taji jimuana mugetu mu mbari amamubivisa, jandi oba mugatsi andi na agorungula umugusula te na dufu duandi.

Currently Selected:

Migaga Mimatubula 22: PUU1992

Highlight

Copy