Migaga Mimatubula 21

Uboku agusamajabunu mubokitsi

(Uku 21.1-11)

1O bulongu abu Fumu Nsambi enu oduvega abuba abuenu pa borasuna mutu agumaboku o gari musiru tsiri ujaba agumamuboka, 2bivunda bienu na bansonsi benu boyeweliga bataka ubandila vana mfumbi te no misiengi amivu o yiari na yiari. 3Banojaba musiengi aguvu bebeli na mfumbi, bivunda bimusiengi eni bobonga muvogulu ngombi agusakasalusu nesi yisalu yimosi. 4Bovindiga muvogulu ngombi eni o mujamba agugekamuyi, diwendi rie: o yibususu ayisakasalu manungi; avana bogutabulila muru o mamba.

5Mbana bisi Levi abavu bavagulitsi bapagu bobambana; mu mbari Fumu Nsambi enu amabasola umusalila nogabila miula mu diina diFumu; yika jogu bavu na musuga utabula mambu mamakuba nesi mamapura.

6Bivunda biotsu bimusiengi eni, sinsa viri jogu abamabemba mfumbi bogolila mamba vana julu muvogulu ngombi agumatabulu muru. 7Jogu bovosa rie: Tsiri jetu atumawitila malungu memama na tusamamulaba dibokulu. 8Aa Fumu, tanda batu bagu baIsrael aba gumakobula; guyabavega mbela jimalungu ma-agugaa na diambu. Kabogu Nsambi obatanda.

9Anana dukagusulila mbela jimalungu ma-agugaa na diambu ava duvayila amavu mawelimina na Fumu.

Diwela na Koli

10Ava duwendila oyetoga divita na bavinitsi benu, pa Fumu obawakisa ombu genu yiri dubabonga bakoli, 11tanguji mutu olaba va gari bakoli beni mugetu aguvu muboti na oba na ditasa umuwela. 12Kabogu akamubega o ndagu andi. Mugetu akafuga notabula nyala tsiandi, 13akavula biduaru biandi abi amaduara ava amabongulu, otsananga o ndagu andi nolilanga taji na nguji andi te na tsungi jimfuimbila. Va julu vana dibaala omukotisa na oba mugatsi andi. 14Pa agemuemugulu nsala akamubinga akayenawenda agu oronda, agaa na musuga umusumbisa nesi umukelisa nderi muviga andi mu mbari amamutsotsa uba mugatsi andi.

Musuga ubuvunda

15Diurungula uba yiri dibaala adivu na bagatsi babeji erondi umosi na evini ususu. Mugetu mugetu amamuburila muana dibaala, digada amarela ubura, 16ava taji ogabila baana bandi bima biandi agorungula upatula buvunda ombu tsomi jidigada nobuvega ombu tsomi jidironda. 17Vengu osinga tsomi avu muana udigada, nomuvega makabu matega mabiandi biotsu; muana eni avu muana utega umangolu mandi; buvunda buvu abuandi.

Muana dibaala aguvu mumbini

18Diurungula uba dibaala ana muana udibaala aguvu mumbini agugededili diufi ditaji andi nesi dinguji andi, aguibusi ubagululu, diuleba bemukilisingi. 19Taji na nguji bobonga muana ogu nomubega va gusu bivunda bimusiengi va dikotulu dimusiengi. 20Mbana botsingula bivunda bimusiengi rie: Labanu muana etu udibaala aguvu mimbini; agededili diufi dietu; edibulingi mulugu andi na elangingi. 21Kabogu babaala bamusiengi bomutindila mamanyi te nofu. Adina diugusula dibi va gari enu. BaIsrael botsu bodigulu na diubalasa goma.

Mfumbi jilelugu

22Diurungula uba yiri dibaala ovaga dibi adivu diwelimina umuvega mbela dufu; aboku mbana mfumbi jiulelugu va muiri. 23Mfumbi eni jiyasilama va muiri, dukatsiga mfumbi muna yilumbu yieni; mu mbari jionyi jiurombisa mulogu uNsambi. Kebananu yiri dugobivisa bulongu abu Fumu Nsambi enu oduvega disiala.

Currently Selected:

Migaga Mimatubula 21: PUU1992

Highlight

Copy