Loma 2

O Pisawkit no Kawas

1Salikakaaw, ano misatatiih kiso to tao, ano o cimato kiso i, awaay ko pakayraan iso a pa'ading to tireng. Tona misatatiih kiso to tao saka, o malcaday to midmakay kiso to raraw. Nawhani o mipastekay i raraw to tireng ko misatatiihay to tamdaw. 2Saka, mafana' kita to nika o so'linay ko dmak no Kawas a misawkit to midmakay to matiniay a raraw. 3Salikakaaw, kiso o misatatiihay to matiniay a raraw no tao i, o midmakay kiso to matiniay a raraw. Saka, <<O mamaliyas ako ko pisawkit no Kawas>>, sa kiso saw? 4Latek o misakahmaway ko harateng iso to sini'ada ato nika kodait ato nipihadidi no Kawas. Caay ka fana' kiso saw to nika o sini'adaay ko Kawas a mangalay a mikrid tisowanan a papifalic to faloco' iso. 5'Arawhani, 'atkak, caay ka falic ko faloco' iso. Saka, kiso ko mitongalay to sakakarteng no nika sawkit iso i pipatalahkalan no Kawas to kter ato mo^celay a pisawkit Ningra. 6Nawhani o nano nidmakan no kahaccaccay a tamdaw ko pi'arawan no Kawas a pafli to tatodong noya tamdaw. 7O romaroma a tamdaw i, misa'icel to nga'ayay a dmak. Milongoc cangra i Kawas to sakatadamaanaw ato sakaci'oripaw nangra to mida'ocay. O matiniay a tamdaw i, o mamapafli no Kawas cangra to mida'ocay a 'orip. 8Nikawrira, o misatkeday, o caay pido^do to so'linay a sowal no Kawas, o paci^ci sanay a mitoor to caay ka mo^cel a tamdaw i, o kakteren no Kawas cangra. 9O tatiihay a tamdaw a ma^min i, o mamapades a misemsem cangra. I 'ayaw ko Yutaya a tamdaw, ta ikor i, o romato a finacadan a mapasemsem. 10Nikawrira, o nga'ayay ko dmak a tamdaw a ma^min i, o mamala tadamaanay, o cacirihaday cangra. I 'ayaw ko Yutaya a tamdaw, ta ikor i, o romato a finacadan a mapalmed. 11Nawhani caay pisakakinih ko Kawas.

12O awaay ko Rikec ni Mosi a roma a finacadan, ano mararaw cangra i, caay ka sawkit no Rikec a matkop. Ci Rikec ko Yutaya a tamdaw, saka ano mararaw i, mamasawkit no Rikec cangra. 13Nawhani o sakanga'ay no tamdaw a malayap no Kawas a mo^celay, caay ko nano nitngilan nangra to Rikec, o nano nilahcian to Rikec ko sakapilayap no Kawas toya tamdaw. 14O caay ka fana' to Rikec ni Mosi ko roma a finacadan. Nikawrira, ano ira i pinangan nangra ko lonok sanay a mido^do to matiliday i Rikec a sowal, ano caacaay ka cirikec cangra i, o niyah a tireng ko malorikec nangra. 15O dmak nangra ko pahapinangay to nika ira i faloco' nangra ko limo'ot no Rikec. O romasato, o nga'ayay a faloco' nangra ko pawacayay tonini. Nawhani toro'en no nga'ayay a faloco' nangra ko moraraway a dmak nangra. Ano ^ca i, mipa'ading ko nga'ayay a faloco' nangra to dmak nangra. 16Orasaka, o papatalahkalen no Kawas pakayni i ci Kristo Yisan i pisawkitan a romi'ad ko nisimedan no tamdamdaw a dmak. Mato sowal no nipatnakan ako a Nga'ayay Ratoh konini.

O Yutaya a Tamdaw ato Rikec

17Ano hatira i, maan saan kiso saw? O Yutaya a tamdaw kako saan kiso a mitadi'ec to Rikec a mipasneng to nipitoor iso to Kawas. 18Pakayni i Rikec ko sakafana' iso to nafaloco'an no Kawas. Saka, mafana' kiso a mihapinang to nga'ayay a dmak. 19Tona o mafana'ay kako to Rikec a ma^min ato so'linay a dmak no Kawas saka, o mamikayat kako to mapohaway, o mamalalikat kako i to'manay, 20o mamipasifana' kako to mafokilay, o mamala singsi no ka^mangay kako saan ko nipaso'lin iso. Nawhani iraen to kiso to Rikec ni Mosi, saka mahawop iso ko fana' ato so'lin, saan ko harateng iso. 21Mipasifana' kiso to tao. Nawiro caay pasifana'en iso ko tireng saw? Aka pitakaw saan kiso a patnak i tao i, a mitakaw kiso haw? 22Aka ka 'odang saan kiso a pasowal i tao i, a ma'odang kiso haw? Ma'osi kiso to samiyay i, a mitakaw kiso to maamaan no pita'ongan saw? 23Pasneng kiso to nika fana' iso to Rikec no Kawas i, mipacoli kiso to Rikec a mipakangodo to Kawas haw? 24Mato nika tilid i Fangcalay Cudad, <<Pakayni i tamowanan o Yutaya a tamdaw a mapaacek ko ngangan no Kawas i roma a finacadan,>> saan.

25Ano ma'imer kiso to Rikec i, ci^poc ko nipido^do iso to krit a lisin. Nikawrira, ano miliyang kiso to Rikec i, awaay ko ^poc no nipido^do iso to krit a lisin. 26Ano caacaay pido^do to krit a lisin ko roma a finacadan, ano ma'imer cangra to limo'ot no Rikec i, matiya o makritay cangra a nengnengen no Kawas. 27Ano cicudacudad kamo to no Rikec a mido^do to krit a lisin i, tona miliyang kamo to Rikec saka, o mamasawkit no roma a finacadan kamo to raraw namo o Yutaya a tamdaw. 28O sapa'araw aca ko dmak a Yutaya a tamdaw i, caay ko so'linay a Yutaya a tamdaw. Caay ko so'linay a krit koya ma'araway i tireng a krit. 29O so'linay a Yutaya a tamdaw i, o nai faloco'ay ko dmak. O nai faloco'ay a pitoor to Kawas ko so'linay a nika krit. Onini a nika krit i, o nano tayal no 'Adingo no Kawas. Caay ko nano matiliday i Rikec a dmak. O matiniay a tamdaw i, caay ko tamdaw ko mahmekay. O Kawas ko mahmekay cingraan.

Currently Selected:

Loma 2: AMIS2019

Highlight

Copy