Loma 1

1O koli ni Yis Kristo kako ci Pawlo. O matahidangay a malatarokos, o nipili'an no Kawas kako to mamipatnak to Nga'ayay Ratoh Ningra.

2Onini a Nga'ayay Ratoh i, o nisowalanto no Kawas i ti:yaho pakayni i pali'ayaway to sowal Ningra a matilid i Fangcalay Cudad. 3O pakayniay i Wawa Ningra toya Tapang ita ci Yis Kristoan konini. Ano pakatamdaway a rayray i, o nai tlocay ni Tafiti a hofocen konini a Wawa. 4Ano pakayniay i no Kawasan a nika fangcal no pinangan Ningra i, o nikalomowadan Ningra a ma'orip nai patay a 'icel ko pahapinangay to nika o Wawa no Kawas Cingra. 5Pakayni i Cingraan, malmed a malayap ako ko tadamaanay a rocek a citodong a matayal to no Tarokos, to sakatadamaan no ngangan Ningra. Onini i, o sapapipaso'linaw to polong no roma a finacadan i ci Kristoan a papitoor. 6Halo amo o i Lomaay a niyaro' a marapot a matahidang no Kawas a malani Yis Kristo.

7Saka, patilid kako i tamowanan o i Lomaay a kaolahananay no Kawas a ma^min, o matahidangay no Kawas a malafinawlan Ningra.

Nanay, mapaini no Wama a Kawas ita ato Tapang ci Yis Kristo kamo to mikomi ato rihaday!

O Piahowid a Pitolon

8Sa'ayaway i, pakaynien ako i ci Yis Kristoan ko nipiahowid i Kawas ako to saki tamowanan, nawhani malosiyang i polong no hkal ko nipiti'er namo. 9Masarocod ko faloco' ako a matayal to no Kawas a patnak to Nga'ayay Ratoh to pakayniay i Wawa Ningra. Mafana' ko Kawas to nika rarid ako a mitolon to saki tamowanan ato nika so'lin no sowal ako. 10Mararid kako a milongoc i Kawas to matatodongay i nafaloco'an Ningra a papilahci to sakatayraaw ako i tamowanan a miliso'. 11Mangalay kako to sakatayraan i tamowanan a minengneng, nawhani o sapalada'aw ako i tamowanan to no Fangcalay 'Adingo a rocek to sakaki^mel namo. 12Ano ^ca mahaen ko sowal ako, pakayni i paso'lin no faloco' ita, ma^deng kita a masasipa'icel.

13Salikakaaw, kafana' kamo to nika kinapinapi:nato kako a misahalaka to sakatayraaw i tamowanan. Mangalay kako a milahci to tayal ako i tamowanan a matiya o nipilahci ako to tayal i romaroma a finacadan. Nikawrira, matna' iho kako tahanini. 14Ano i macakatayto ko 'orip a tamdaw, ano caayayho kacakat ko 'orip a tamdaw, ano i mafana'ayto a tamdaw, ano i mafokilayto a tamdaw i, ira ko tadah ako i cangraan a ma^min. 15Orasaka, kanir sa kako to sapipatnakaw to Nga'ayay Ratoh i tamowanan o i Lomaay a tamdaw.

O 'Icel no Nga'ayay Ratoh

16Caay ka ngodo kako a mipatnak to Nga'ayay Ratoh. Onini a Nga'ayay Ratoh i, o 'icel no Kawas a pa'orip to paso'linay a tamdaw a ma^min. O Yutaya a tamdaw ko sa'ayaway a mapatnak, ta o romato a finacadan. 17Nawhani, onini a Nga'ayay Ratoh ko pa'araway to samaanay ko palali'ay no Kawas to tamdaw ato Cingra. Pakayni i paso'lin ko satapangan, pakayni i paso'lin ko pahrekan. Mato nika tilid i Fangcalay Cudad, <<Pakayni i paso'lin a malali'ayay ato Kawas a tamdaw i, o papakalayap to 'orip#1.17 Pakayni i paso'lin ... 'orip -- ano ^ca i, O milayapan no Kawas a tamdaw i, pakayni i nipiti'er ningra ko sakaci'orip ningra to so'linay a 'orip.,>> saan.

O Raraw no Tamdamdaw

18Matahpo no caay ka mo^cel a dmak ato raraw no tamdaw ko so'lin no Kawas. Saka, pasayra i tatiihay ci raraway ko dmak a tamdaw ko kter no Kawas a mapatalahkal nai kakarayan. 19Mapahapinangto i cangraan ko sakafana' to pakayniay i Kawas. O Kawas ko pahapinangay tonini. Nikawrira, caay paso'lin cangra. Saka, tfocen no Kawas cangra. 20O caay ka 'araw ko Kawas. Nikawrira, o mida'ocay a 'icel ato nika o Kawas Cingra i, mapahapinangto a mapa'araw nai satapangan no pisanga' no Kawas to hkal i nisanga'an Ningra a kalomaamaan. Saka, awaay ko pakayraan no tamdaw a pa'ading to tireng. 21Talacowa mafana' cangra to pakayniay i Kawas nikawrira, o Kawas konini, caay ka saan cangra a mita'ong. Caay piahowid. Malaawaay ko ^poc no niharatengan nangra. Saka, o maapaay a faloco' nangra ko misato'manay i cangraan. 22O citangalay kami saan cangra to tireng. 'Arawhani, o maapaay aca cangra. 23Caay pita'ong cangra to mida'ocay a Kawas. Falicen nangra ko 'dil no mida'ocay a Kawas a palasamiyay, oya faco no mamapatay a tamdaw, o 'ayam, o 'a'adopen ato manafoyay i sra ko mita'ongan nangra.

24Orasaka, pakonira hanto no Kawas cangra i ka'anofan no faloco' nangra a kaackan a dmak. Saka, masasipakangodo cangra to tireng. 25Falahen nangra ko so'linay a sowal no Kawas, paso'linen nangra ko mangah a dmak. Kona o misanga'ay to kalomaamaan a Kawas ko tata'ongen nangra. 'Arawhani, o masanga'ay a maamaan ko nita'ongan nangra. O so'linay a kakahmekan a tahada'oc i, onini a misanga'ay a Kawas! Amin.

26Mahaenay saka, pakonira hanto no Kawas cangra i kakangodoan a 'anof no tireng nangra. Falicen no fafahiyan ko no fafahiyan a dmak a misafa'inayan a mikalona. 27Mahaen ko fa'inayan a misawad to no mararamoday a dmak to saki fafahiyan, masasirafraf to faloco'. Midmak to kangodoan a dmak a mikalona to fa'inayanto ko fa'inayan. Saka, matfoc ko tireng nangra to tatodong no moraraway a dmak nangra.

28Caay ka ngalay cangra to sakafana'aw to Kawas. Saka, pakonira hanto no Kawas ko nipitoor nangra to kaackan a faloco' nangra a midmak to caay ko dadmaken. 29Sahto caayay ka mo^cel cangra, o 'anof, o palakalatay, o 'inap, o sapipatayananay, o sapacoliananay, o misamangahay, o tatiihay a harateng. O milikafay cangra, 30o masasilokesay, o mi'intelay to Kawas,#1.30 o mi'intelay to Kawas, -- ano ^ca i, o ka'intelan no Kawas cangra, o maliyangay, o malita'angay, o pasnengay, o misahalakaay to tatiihay a dmak, o pacoliay to mama ato ina, 31o awaay ko nga'ayay a faloco', o caay pilahci to niktonan a sowal, o awaay ko olah no faloco', o awaay ko sini'adaay a faloco'. 32Mafana' ito cangra to limo'ot no Kawas to nika o mamapastek i patay ko midmakay to matiniay. Nikawrira, caay ko nipidmak nangra a ccay tonini. Haydaen nangra ko nipidmak no romaroma a tamdaw.

Currently Selected:

Loma 1: AMIS2019

Highlight

Copy