'Olic 52
52
O Pisawkit ato Mikomi no Kawas
O nitilidan ni Tafiti a 'olic, o sapasifana' a 'olic. Yo paratohen ni Towik o Itom a tamdaw ci Sawlo to, <<To nipiraod ni Tafiti ci Ahimilikan>>. Mapatorod i kakridan no paradiway.
1Kiso o cisakowanay a tamdaw, nawiro pasneng kiso to nika tatiih iso?
O mida'ocay a caay ka falic ko olah no Kawas.
2O mitkopay to tamdaw ko sma iso, matiya o matalemay a sa'is'is,
mararid kiso a misahalaka to sapikari'angaw to tamdaw.
3Maolah kiso to tatiihay,
ma'osi kiso to nga'ayay,
maolah kiso a misamangah,
caay ka olah kiso to so'linay.
4Kiso o misa'fitay, tadamaolah kiso a miri'ang to tamdaw.
5Orasaka, o tatkopen no Kawas kiso,
o rarpeten Ningra kiso a pasadak nai loma' iso,
o papalasawaden Ningra kiso a mifangad nai kamaro'an no tamdaw.
6Minengneng ko mo^celay a tamdaw tonini a dmak i, matalaw,
sowal sa cangra a matawa i tisowanan,
7<<Nengnengen, o caay piti'er cingra to Kawas,
deng o dafong ato tatiih ningra ko niti'eran ningra,>> wa saan.
8Nikawrira, o no mako i, matiya o molngaway i loma' no Kawas a olif a kilang,
mida'oc kako a miti'er to caay ka falic a olah Ningra.
9Kawasaw, mida'oc kako a mikansiya to nidmakan Iso,
o mamipalosiyang kako i misarocoday a finawlan Iso to nika nga'ay Iso.
Currently Selected:
'Olic 52: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
