'Olic 40
40
O Sapahmek a Radiw
O 'olic ni Tafiti. Mapatorod i kakridan no paradiway.
1O mihadidiay kako a mitala to pipadama no Tapang,
mitngil Cingra to pitahidang ako a milongoc.
2Pasadaken Ningra kako nai cihnotay a talolongay a rfong,
ta tlien Ningra kako i kafkang no 'ongcoy,
patanekteken Ningra a parihaday kako.
3Pasifana'en Ningra kako to fa^lohay a radiw,
karomadiw a mipahmek to Kawas ita.
O 'alomanay a minengnengay tonini a dmak i,
o mamasinanot a mangodo a ma^min, o mamangalay cangra a miti'er to Tapang.
4Tada o malmeday ko masarocoday a miti'er to Tapang,
oya caay pasayra i samiyay,
caay pita'ong to mangah a kawas.
5 Tapang a Kawas ako.
Adihay ko nilahcian Iso a tadamaanay a dmak to saki tamiyanan,
cima ko mama^deng a sapasasotiri' i Tisowanan saw?
Misahalaka Kiso to kafahka'an a dmak to saki tamiyanan, ano sa'osien konini i, caay ko mama^min a somowal.
6Caay ka ngalay Kiso to pina'orip a sapato'aya ato sapatafang,
caay ka ngalay Kiso to nisakimoodan a mitodoh a sapato'aya ato sakahpol no raraw a sapato'aya.
Mapafli Iso kako to sapitngil a tangila,
7saka, paca'of han ako, <<Inito kako.
Matilid i Rikec a cudad ko sapasifana' Iso i takowanan.#40.7 Matilid i Rikec a cudad ko sapasifana' Iso i takowanan -- ano ^ca i, matilid i Cudad Iso ko nika so'lin no pitoor no faloco' ako a mangodo i Tisowanan.
8Kawasaw ako, tadamaolah kako a mido^do to nafaloco'an Iso!
Ka'imeren ako a pakifaloco' ko sifana' Iso,>> saan.
9 Tapangaw, palosiyangen ako i kasa'opoan no finawlan Iso ko pipa'orip Iso a nga'ayay a ratoh.
Mafana' Kiso, caay ko mamitolas kako a palosiyang tonini.
10Caay pisatked kako to pipa'orip Iso a nga'ayay a ratoh,
mararid kako a pasowal i kasa'opoan no finawlan
to pakayniay i nika so'lin Iso ato nipipadama Iso,
caay pisimed kako to so'linay caay ka falic a olah Iso.
11 Tapangaw, mafana' kako caay ko mamilodot Kiso a tahada'oc to sini'ada Iso i takowanan,
tahada'oc ko nika so'lin ato caay ka falic a olah Iso a midama i takowanan.
O Pitolon a Milongoc to Pipadama
('Olic 70)
12Malikot no masamaamaanay a pades kako,
malpel no raraw ako kako saka, caayto pakapica'ngaw kako,
ikakato no nika adihay no fokes ako ko nika adihay no raraw ako,
saka, matoledto kako a awaayto ko cdi.
13 Tapangaw, nanay pa'oripen Iso kako!
Nanay kalamkamen Iso a mipadama kako!
14Mamana parawrawen Iso a mitfad koya sapipatayananay i takowanan,
mamana pakasefaden Iso ko faloco' a pakangodo koya maolahay to nika pades ako a tamdaw.
15Mamana mackok a pkaw sa koya milokesay matawaay i takowanan a tamdaw.
16Nanay malipahak ko tayniay i ka'ayaw Iso a tamdaw a ma^min!
Nanay mararid a pasowal ko maolahay to pipa'orip Iso a tamdaw toya,
<<Wata: ko nika tadamaan no Tapang!>> saan.
17O rarimaay kako,
nikawrira, Tapangaw, oyananto a miharateng Kiso i takowanan.
O padamaay, o pa'oripay a Kawas ako Kiso.
Kawasaw ako, nanay narikay Kiso a padama i takowanan!
Currently Selected:
'Olic 40: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
