'Olic 34
34
O Nika Hmek to Sini'ada no Kawas
O nitilidan ni Tafiti a 'olic, yo malaplapto ni Apimilik a hongti cingra a pakomafolaay a tamdaw.
1O mamararid kako a mikansiya to Tapang,
caay ko mamitolas kako a pahmek i Cingraan.
2O papahmek kako to tadamaanay a nidmakan no Tapang,
nanay lipahak kamo o mapa^kelay a tamdaw a mitngil tonini.
3Pikapot i takowanan a pahmek to nika tadamaan no Tapang,
hmeken ita a palosiyang ko ngangan Ningra.
4Milongoc kako to Tapang i, paca'of Cingra,
paliyasen Ningra kako nai masamaamaanay a katalawan ako.
5Ano misafaloco' to Tapang ko mapa^kelay a tamdaw i,
malipahak cingra,
caayto ko mamasefad ko faloco' nangra a tahada'oc.
6Tngilen no Tapang ko pitahidang no awaay ko palawinaan a tamdaw,
paliyasen Ningra a pa'orip cangra nai masamaamaanay a pades.
7Dipoten no coyoh no Tapang ko mangodoay to Tapang,
pa'oripen Ningra cangra a paliyas nai katalawan.
8Lifeten a mihapinang ko nika nga'ay no Tapang,
o miti'eray i Cingraan i, tada o malmeday.
9Kamo o fangcalay a finawlan no Tapang, kangodoen Cingra.
O mangodoay i Cingraan a tamdaw i, awaay ko maan aca a kacango'otan.
10Ano o toforto a layon i, ira ko kacango'otan a macahiw,
nikawrira, o milongocay to Tapang i,
awaay ko maan aca a kacango'otan.
11Kamo o ka^mangay, pitngil to sowal ako.
Pasifana'en ako kamo to sakangodoaw namo to Tapang.
12Mangalay kamo a lipahak ko 'orip haw?
Mangalay kamo a kakaya' ko 'orip haw?
13Ano hatira i, aka pasowal ko sma namo to tatiihay a sowal,
aka pisamangah ko filfil namo a somowal.
14Falahen ko tatiihay, ka o nga'ayay ko dmak,
ka o sakararihaday ko safaloco'en a misa'icel.
15Midipot ko Tapang to mo^celay a tamdaw,
mitngil Cingra to pingitangit nangra a mitolon.
16Nikawrira, misa'ada ko Tapang to tatiihay ko dmak a tamdaw,
ano mapatay cangra i, tangsol a mapawan no tamdaw cangra.
17Ano mitahidang a mingitangit to Tapang ko mo^celay a tamdaw i, tngilen Ningra,
pa'oripen Ningra a paliyas nai masamaamaanay a pades cangra.
18Patihien no Tapang ko mararomay matoleday a tamdaw,
pa'oripen Ningra ko maksemay ko faloco' a tamdaw.
19O mo^celay a tamdaw i, adihay ko malitmohay ningra a pades,
nikawrira, pa'oripen no Tapang cangra a paliyas nai tini tonini a pades a ma^min.
20Masongila' ko pidipot no Tapang i cingraan,
awaay ko ccaccay aca a mapitekay a 'okak ningra.
21O tatiihay a tamdaw i,
o tatiihay a dmak ningra ko sakapatay ningra.
O mi'intelay to mo^celay a tamdaw i,
o tatfocen no Kawas.
22Pa'oripen no Tapang ko matayalay Ningra,
caay ko mamatfoc ko miti'eray Cingraan a tamdaw.
Currently Selected:
'Olic 34: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
