Maroko 4

O Tinako to Mifolsakay

(Matay 13.1-9; Luka 8.4-8)

1Pasifana' haca ci Yis i lawac no Kalili a fanaw. Tona tihlom sa ko 'alomanay a finawlan i taliyok Ningra. Saka, midakaw ci Yis to tamina a maro' itira. Ira i fanaw ko tamina, tomireng ko finawlan a ma^min i lawac no fanaw. 2Patinakoen ni Yis cangra a pasifana' to masamaamaanay a dmak. Mahaen ko nipipasifana' Ningra a somowal i cangraan,

3<<Pina'on kamo a mitngil! Ira ko ccay a tamdaw a talaomah a mifolsak. 4Yo mifolsak cingra i, ira ko matfaday i lalan a sapaloma, kaenen no ma^feray a 'ayam konini. 5O roma a sapaloma i, matfad i fokloklohan o kohpicay ko sra. Talacowa narikay a molngaw koya sapaloma i, tona caay ka talolong ko sra saka, 6yo tata'ang ko cidal i, mafadi' koya lngaw. Nawhani awaay ko palamitan nira saka, ma'icang ciira. 7O roma a sapaloma i, matfad i cifadalay a sra. Lomahad koya fadal i, ma'co koya lngaw. Saka, caay ka cihci. 8O roma a sapaloma i, matfad i nga'ayay a sra, fangcal ko lngaw a lomahad, malofic ko hci, citongal to tolo a polo', o roma i, ^nem a polo', o roma i, smo'ot,>> saan.

9Pasowal sa ci Yis, <<Pitngil kamo, o pakatngilay ko tangila a tamdaw,>> han Ningra.

O Patosokan no Pipatinako

(Matay 13.10-17; Luka 8.9-10)

10Yo masaccay to ci Yis i, lahaklong sa ko mikapotay ci Yisan a tamdaw atoya tosa ko safaw a tarokos a minengneng i ci Yisan, milongoc i Cingraan to sapitadtadaw tonini a tinako. 11Paca'of sa ci Yis, <<Mapaflito i tamowanan ko pakakmoday a sowal to pakayniay i Kitakit no Kawas. Nikawrira, sahto o tinako ko sapasowal Ako i taowanan. 12Onini i, mato nika tilid i Fangcalay Cudad toya,

<Talacowa misanengnengnengneng cangra i, caay paka'araw.

Talacowa misatngitngil cangra i, caay ka fana' cangra.

Nawhani ano mafana' cangra i, latek masasiyor ko faloco' nangra a pasayni i Kawas,

ta mahpol no Kawas ko raraw nangra,> >> sanay.

O Pisahci to Tatodong no Tinako to Mifolsakay

(Matay 13.18-23; Luka 8.11-15)

13Sowal sa ci Yis i cangraan, <<Caay ka fana' kamo tonini a tinako saw? Ano hatira i, maanen namo ko nika fana' to romaroma a tinako? 14O tatodong no mifolsakay hananay i, o mifolsakay to sowal no Kawas. 15Matiya o katfadan no sapaloma i lawac no lalan ko faloco' no romaroma a tamdaw. Yo mitngil cangra to sowal i, tangsol sa a ira ci Satan a mi'afas to nifolsakan i faloco' nangra to tatodong no sowal. 16O romasato, matiya o matfaday i fokloklohan a sapaloma ko faloco' no romaroma a tamdaw. Yo mitngil cangra to sowal no Kawas i, tangsol sa cangra a lipahak a milayap. 17Nikawrira, awaay ko palamitan i faloco' saka, caay ka halafin. Ano ira ko pades ato kari'ang tona sowal no Kawas i, tangsol sa a misawad a mitoor. 18O romasato, matiya o mafolsakay a sapaloma i cifadalay a sra ko faloco' no romaroma a tamdaw. Mitngil cangra to sowal no Kawas, 19nikawrira, ira ko roray no faloco' ato 'anof to saki dafong ato masamaamaanay a sawi a mi'co to sowal no Kawas. Saka, caay ka cihci. 20Nikawrira, ira ko romaroma a tamdaw matiyaay o mafolsakay a sapaloma i nga'ayay a sra hananay i, mitngil cangra to sowal no Kawas i, milayap cangra. Ta cihci cangra. Yo militodto i, ira ko cihciay to tolo a polo', ira ko cihciay to ^nem a polo', ira ko cihciay to smo'ot,>> saan.

I La^noay no Sato a Dawdaw

(Luka 8.16-18)

21Pasowal haca ci Yis i cangraan, <<Milikat ko tamdaw to dawdaw i, iraay ko patliay i la^no no sato, ano ^ca i, i la^no no kafoti'an hakiya? Caay hakiya ka i padawdawan a patli cingra? 22O tatalahkal a ma^min ko masimeday a maamaan. O mamahapinang a ma^min ko nikilifan a dmak. 23Pitngil kamo, o pakatngilay ko tangila a tamdaw,>> saan.

24Pasowal sa Cingra i cangraan, <<Pina'on a miharateng to nitngilan namo a sowal. Ano o maan ko sapilatang namo a pafli i, orira ito ko sapilatang no Kawas a pafli i tamowanan. Mangalef ko nipihaen no Kawas i tamowanan. 25O iraay ko nitatoyan i, o mamapatongal a mapafli. O awaay ko nitatoyan i, halonitatoyan ningra a mamangay a ma'afas,>> saan.

O Tinako to Molngaway a Sapaloma

26Pasowal sa ci Yis, <<O Kitakit no Kawas i, matiya o pifolsak no ccay a tamdaw to sapaloma i sra. 27Yo mafoti' cingra to dadaya, lomowad cingra to dafak i, fahal molngaw a lomahad koya sapaloma. Caay ka fana' koya tamdaw to nika masamaan ko nika lomahad noya sapaloma. 28O sra ko palahaday toya sapaloma a pahci. O sapal ko sa'ayaw. Ta cipo'ni#4.28 cipo'ni -- o roma i, poni (katimol), po'ni (ka'amis).. Ta cihci ko minaro'an. 29Ano ma^cak ko panay i, ritriten no tamdaw, nawhani maraodto ko pipanayan,>> saan.

O Tinako to Falo no Kolang

(Matay 13.31-32, 34; Luka 13.18-19)

30Licay sa ci Yis, <<O maan ko milcaday to Kitakit no Kawas saan kita hakiya? O maan ko sapatinako ciiraan ta mahapinang saan kita hakiya? 31Matiya o falo no ccay a kolang ko pikowan no Kawas. O samimingay no kalosapaloma a ma^min i tini i hkal, yo palomaen no tamdaw ciira i sra i, 32halafin i, lomahad to ciira, o satata'angay no kalodateng a ma^min. Tata'ang ko ca'ang nira. Saka, tayra ko ma^feray a 'ayam a padipong i ca'ang niira a mikilidong,>> saan.

33Adihay ko matiyaay o tinako ko sapakimad ni Yis i finawlan. O ka^meday a tngilen nangra ko sapasifana' Ningra. 34Sahto o tinako ko sapasowal Ningra i cangraan. Nikawrira, yo ccayto Cingra ato nisawawaan i, songila'en ni Yis ko tatodong no nisowalan Ningra a ma^min.

O Pipatrep ni Yis to Faliyos

(Matay 8.23-27; Luka 8.22-25)

35Tahadadaya to i, <<Tatata, milacal kita a tayra i ti:raw a lawac,>> han ni Yis a somowal ko nisawawaan Ningra. 36Saka, liyasen nangra ko finawlan, mitalato ci Yis i tamina, ta midakaw ko nisawawaan to tamina a malahaklong ato Cingra a tayra. Ira haca ko romaroma a tamina a mihaklong. 37Itiya i, talifahal sa a ira ko faliyos i fanaw. Matapsi' no taplik ko tamina, sakatomesan sato to nanom. 38Citatangalan sa ci Yis a mafoti' i pakaikor no tamina itiya. Palalen no nisawawaan ci Yis a somowal, <<Singsiaw, o mamapatayto kita i, caay pikihar Kiso saw?>> han nangra.

39Lowad sato ci Yis, a palimo'ot to fali <<Katomrep!>> palimo'ot haca to taplik <<Kasaysayto!>> han Ningra. Trep sato ko fali. Sarimadac sato koya fanaw. 40Ta pasowal sa Cingra to nisawawaan Ningra, <<Nawiro matalaw kamo? Nawiro awaayho ko paso'lin no faloco' namo saw?>> han Ningra. 41Tata'ang ko talaw nangra. Saka, sasowasowal sa cangra, <<O maan hakini konini a tamdaw, halofali ato taplik a mitngil to sowal Ningra?>> saan.

Currently Selected:

Maroko 4: AMIS2019

Highlight

Copy