Matay 7

Aka Pipastek to Tamdaw

(Luka 6.37-38, 41-42)

1<<Aka pipastek to tamdaw, ta caay ka sawkit no Kawas kamo. 2Nawhani ano masamaan ko pipastek namo to tamdaw i, hatira ko pisawkit no Kawas i tamowanan. Ano o maan ko sapilatang namo a pafli i, orira ito ko sapilatang no Kawas a pafli i tamowanan. 3Paka'araw kiso to coca' no mata no salikaka iso i, nawiro caay pakahapinang kiso to nika ira no mifalatay a kilang i mata iso saw? 4Ira i mata iso ko mifalatay a kilang. Saka, caay ka nga'ay kiso a somowal to, <Alaaw ako ko coca' no mata iso,> saan a somowal i salikaka. 5Kiso o misamangahay a tamdaw, i 'ayawen a miala to mifalatay a kilang i mata iso ta paka'araw kiso a miala to coca' no mata no salikaka.

6<<O romasato, aka paflien ko waco to fangcalay. Ano haenen namo i, latek pasayra i tamowanan a mikalat. Aka fahkolen i fafoy ko cinco. Ano haenen namo i, latek sakasaken naira.

Pingitangit, Pikilim, Pikongkong to Fawahan

(Luka 11.9-13)

7<<Pingitangit ta mapafli kamo. Pikilim ta pakatama kamo. Pikongkong to fawahan ta mafawah. 8Nawhani o mingitangitay a tamdaw i, mapafli. O mikilimay a tamdaw i, pakatama. O mikongkongay to fawahan a tamdaw i, mafawah ko fawahan. 9Ano milongoc ko wawa iso to ^pang i tisowanan i, cima namo ko pafli sanay to fokloh i wawa no tireng saw? 10O romasato, ano milongoc ko wawa iso to foting i tisowanan i, pafli han iso cingra to 'oner haw? 11Talacowa o tatiitiihay a tamdaw kamo i, mafana' kamo a pafli to nga'ayay i wawa namo. Saka, mangalef ko nipipafli no Wama namo i kakarayan to nga'ayay i milongocay i Cingraan.

12<<Orasaka, ano o maan a dmakan no tao ko kaolahan namo to saki tamowanan i, haenen ko dmak to saki taowanan. Onini ko so'linay a tatodong no Rikec ni Mosi ato nipasifana'an no pali'ayaway to sowal no Kawas.

O Kincoay a 'Adawang

(Luka 13.24)

13<<Pakayni i kincoay a 'adawang kamo a micomod. Nawhani o sakatayra i katkopan a 'adawang i, o kakahaday. O nga'ayay a rakaten a lalan saka, 'aloman ko pakayraay a micomod a tamdaw. 14Nikawrira, o picomodan i sakaci'orip a 'adawang i, tadakincoay, caay ka rahoday a rakaten koya lalan, caay ka 'aloman ko pakatamaay.

O Kilang ato Hci

(Luka 6.43-44)

15<<Pina'on to mangah a pali'ayaway to sowal no Kawas. Matiya o lalifanohen a siri a damsay ko papotal nangra. Nikawrira, matiya o mari'angay a oles ko laloma' nangra. 16Pakayni i dmak nangra ko sakafana' namo i cangraan. Tinako sa, cihci ko fadal to hci no fadisoso' saw? Cihci ko 'odidal to hci no sokon saw? 17Malcad tonini, o nga'ayay a kilang i, o nga'ayay ko hci nira. O tatiihay a kilang i, o tatiihay ko hci nira. 18O nga'ayay ko tireng a kilang i, caay ka tatiih ko hci nira. O ma'ngiday a kilang i, caay ka nga'ay ko hci nira. 19O caay ka nga'ay ko hci a kilang i, o lalteken ta fahkolen i namal. 20Mahaenay saka, pakayni i dmak noya mangah a pali'ayaway to sowal no Kawas ko sakafana' namo i cangraan.

Caay ka Fanafana' Kako i Tamowanan

(Luka 13.25-27)

21<<Oya <Tapangaw, Tapangaw> sanay a mitahidang i Takowanan a tamdaw i, ira ko caay ko mamicomod i Kitakit no Kawas. Deng o mido^doay to nafaloco'an no Wama Ako i kakarayan ko mamicomod. 22Itiya i pisawkitan a romi'ad i, 'aloman ko sasomowal i Takowanan, <Tapangaw, Tapangaw, o ngangan Iso ko sapasowal niyam a pakimad to sowal no Kawas. O ngangan Iso ko sapifahfah niyam a pasadak to palafoay nai tamdaw. O ngangan Iso ko sapidmak niyam to adihayay a kafahka'an a dmak kyami,> saan. 23Nikawrira, itiya i, o papatalahkalen Ako a somowal cangra, <Caay ka fanafana' Kako tamowanan. Pilaliw Takowanan kamo o tatiihay ko dmak a tamdaw,> wa han Ako cangra.

O Tosaay a Paranaan

(Luka 6.47-49)

24<<Orasaka, o mitngilay a mido^do tonini a sowal Ako i, matiya o patirengay i 'ongcoy to loma' no tireng a citanengay a tamdaw. 25Talacowa tata'ang ko fali, tata'ang ko 'orad, tata'ang ko cdas a mistol i, caay ka loyoh, nawhani o 'ongcoy ko paranaan noya loma'.

26<<Nikawrira, o caay pido^do to nitngilan a sowal Ako i, matiya o patirengay i tafok to loma' no tireng a mafolaay a tamdaw. 27Ano tata'ang ko fali, tata'ang ko 'orad, tata'ang ko cdas a mistol toya loma' i, tastas sa a maloyoh koya loma',>> han ni Yis.

Ci'icel ko Pipasifana' ni Yis

28Mahrek ci Yis a pasifana' tonini i, safahka' sa ko finawlan a mitngil toya sowal. 29Nawhani ci'icel ko nipipasifana' ni Yis. Caay ka matiya o pipasifana' no pasifana'ay to Rikec ko pipasifana' Ningra.

Currently Selected:

Matay 7: AMIS2019

Highlight

Copy