Matay 27

Mapatorod ci Pilatoan ci Yis

(Maroko 15.1; Luka 23.1-2; Yohani 18.28-32)

1To dafak sato i, masasowasowal ko kakrikridan no citodongay to ta'ong ato kalas no niyaro' no Yutaya a tamdaw a ma^min to sapipatayaw ci Yisan. 2Ta palit hanto nangra ci Yis a mikidkid a patorod i ci Pilatoan o mikomoday no Loma.

O Patay ni Yuta

(Dmak 1.18-19)

3Yo mafana' ci Yuta oya pacakayay ci Yisan to nika mapastek i raraw ci Yis i, matatikol ko faloco' ningra. Saka, patiko han ningra koya tolo a polo' a rimood no ^kim i kakridan no citodongay to ta'ong ato kalas no niyaro'. 4Sowal sa cingra, <<Ciraraway kako. Pacakayen ako a mipatay ko awaay ko raraw a tamdaw,>> han ningra.

Nikawrira, paca'of sa cangra, <<Caay ka fana' kami. Kiso ko cacitodong tonini,>> han nangra.

5Saka, fahkol han ni Yuta i Fangcalay Pita'ongan koya payso. Ta sadak sato cingra a mikinaso'ot.

6Ala hanto no kakridan no citodongay to ta'ong koya payso. Sowal sa, <<Onini i, o nano 'aca no papatayen a tamdaw saka, caay ka tatodong i Rikec ita a na'angen i papaysoan no Pita'ongan,>> saan cangra. 7Saka, sasowasowal sa cangra, <<Cakayen ita tonini a payso ko omah no misakorengay hananay, o malopitademan to mapatayay no roma a finacadan,>> saan. 8Saka, o Omah no Rmes hanto konini a omah a tahanini.

9Itiya a malahci ko sowal ni Yirimiya o pali'ayaway to sowal no Kawas toya, <<O nihapinangan no Israil a tamdamdaw a tatodong no 'aca Ningra to tolo a polo' a rimood i, alaen nangra 10to sapicakay to omah no misakorengay. Saka, mado^do ko sowal no Tapang i takowanan,>> sanay.

O Piliclic ni Pilato

(Maroko 15.2-5; Luka 23.3-5; Yohani 18.33-38)

11Tomireng i ka'ayaw no mikomoday ci Yis, ta liclicen noya mikomoday Cingra, <<O hongti no Yutaya a tamdaw Kiso haw?>> han ningra.

Paca'of sa ci Yis, <<O sowal iso konini,>> han Ningra. 12Nikawrira, yo pakokoten no kakridan no citodongay to ta'ong ato kalas no niyaro' ko pakayniay i ci Yisan i, caay paca'of ci Yis to maan aca.

13Pasowal sa ci Pilato i Cingraan, <<Hatini ko nika adihay no nipipakokot nangra a pawacay to pakayniay i Tisowanan i, caay ka tngil Iso haw?>> han ningra.

14Nikawrira, caayto paca'of ci Yis to ccaccay aca a sowal. Safahka' sato ci Pilato.

O Pipastek i Patay

(Maroko 15.6-15; Luka 23.13-25; Yohani 18.39--19.16)

15Maraod ko Pita'lifan a Lisin to mihcahcaan i, ira ko pinangan no mikomoday a mitdal to nilongocan no finawlan to ccay a marofoay a tamdaw. 16Itiya sato i, tatodong sa a ira ko ccay a kafana'an ko ngangan a marofoay a tamdaw ci Yisus Parapas hananay. 17Saka, yo masa'opo cangra i, licayen ni Pilato cangra, <<Cima ko kangalayan namo to tatdalen ako a tamdaw saw? Ci Yisus Parapas haw? Ano ^ca i, ci Yis oya Kristo hananay haw?>> han ningra. 18Mafana' ci Pilato to nika o nano 'inap nangra ci Yisan ko sakapipatorod nangra i cingraan.

19Yo maro' ci Pilato i pisawkitan i, ocoren no fafahi ningra ko tamdaw a papipasowal i cingraan, <<Aka pikihar kiso tora awaay ko raraw a tamdaw. Nawhani tadamapades kako to saki Cingraan i lmed ako i dadaya, han a pasowal,>> han ningra.

20Nikawrira, paororen no kakridan no citodongay to ta'ong ato kalas no niyaro' a pasowal, <<Ci Parapas ko tatdalen iso. Patayen ci Yis, han a mingitangit ci Pilato,>> han nangra. 21Pasowal sa koya mikomoday i cangraan, <<Cima nonini a tatosaay ko kangalayan namo a tatdalen ako saw?>> han ningra.

<<Ci Parapas!>> han nangra a paca'of.

22Pasowal sa ci Pilato i cangraan, <<Ano hatira i, maanen ako ci Yis oya ci Kristo hananay saw?>> han ningra.

<<Paceken i ciwcika!>> saan ko nika laccay nangra a micli'.

23Licayen ni Pilato, <<Nao maan ko tatiihay a dmak Ningra saw?>> han ningra.

Nikawrira, mangalef a mangalef ko picli' nangra, <<Paceken cingra i ciwcika!>> saan.

24Yo mafana' ci Pilato to nika awato ko ^poc no nika somowal ningra tonini a dmak, o malalalowadan no rarawraw konini saan cingra saka, ala sato to nanom. Nanaw sato cingra to kamay i ka'ayaw no finawlan. Sowal sa, <<Caay ka citodong kako to pipatay tonini a tamdaw. Kamo ko cacitodong,>> han ningra.

25Paca'of sa ko finawlan a ma^min a somowal, <<O tadah no rmes Ningra i, nga'ayto a matfoc kami ato tloc niyam!>> han nangra.

26Orasaka, tdal hanto ni Pilato ci Parapas a pafli i cangraan. Ta mipalimo'ot haca a mipalo ci Yisan, patorod hanto ni Pilato cangra a papipacek i ciwcika ci Yisan.

O Pisamsam no Sofitay ci Yisan

(Maroko 15.16-20; Yohani 19.2-3)

27Nanoya, krid hanto no sofitay ni Pilato ci Yis a pacomod i loma' noya mikomoday. Ta sa'opo sato ko sofitay a ma^min i taliyok ni Yis. 28Ta hlongen nangra ko riko' ni Yis. Ta pariko'en nangra Cingra to kahngangay a kafafang, 29sa'nged han nangra ko fadal a mipakafong i Cingraan, ta patatoy han nangra Cingra to pnen no 'ardo i kawanan a kamay Ningra, ta pitosor sa cangra i ka'ayaw Ningra a misamsam a somowal, <<Hongti no Yutaya a tamdaw, nanay mida'oc a malahongti Kiso!>> han nangra. 30Sopa'en nangra Cingra, alaen nangra koya nitatoyan Ningra a pnen no 'ardo a misti' to fongoh Ningra. 31Mahrek cangra a misamsam i Cingraan i, hlongen nangra koya kafafang Ningra, ta pariko'en haca nangra Cingra to nano riko' Ningra, ta krid hanto nangra ci Yis a pasadak a mipacek i ciwcika.

Mapacek ci Yis i Ciwcika

(Maroko 15.21-32; Luka 23.26-43; Yohani 19.17-27)

32Yo masadak cangra i, malitmoh nangra ci Simon hananay a Kirini a tamdaw, ta patangic han nangra cingra a papi'orong to ciwcika ni Yis. 33Tahira cangra i Kolkota hananay, o tatodong nonini i, o <<'Okak no Fongoh>> sanay. 34Pananomen nangra ci Yis to nipa'angreran a fadisoso' a ^pah. Nikawrira, caay kakahi ci Yis a minanom. Tinac han aca Ningra.

35Ta paceken nangra ci Yis i ciwcika, ta mararitos haca cangra a misakilac to riko' Ningra. 36Ta aro' sa itira cangra a misimaw ci Yisan. 37Pakafiten nangra i fafaed no fongoh ni Yis koya, <<Ci Yis konini, o Hongti no Yutaya a tamdaw,>> sanay a nitilidan a raraw Ningra a paya. 38Itiya i, pakapoten nangra i ci Yisan ko tatosa a kokong a mipacek i ciwcika, i kawanan Ningra ko ccay, i kawili Ningra ko ccay.

39'Inga'ing sa to fongoh ko mita'lifay a tamdaw a milikaf i ci Yisan a somowal, 40<<Kiso oya plengen Ako ko Fangcalay Pita'ongan, ta mapatireng Ako i tolo a romi'ad konini a Pita'ongan sanay! Dada, ano o Wawa no Kawas Kiso i, ka^pod nai ciwcika a pa'orip to tireng Iso!>> han nangra.

41Mahaen ko kakrikridan no citodongay to ta'ong ato pasifana'ay to Rikec ato kalas no niyaro' a mitongangan ci Yisan. Sowal sa, 42<<Pakapa'orip Cingra to tao i, caay pakapa'orip to tireng. Ano o Hongti no Israil Cingra i, mamaan ma^pod Cingra i matini nai ciwcika ta paso'lin kita i Cingraan! 43O miti'eray Cingra to Kawas. O Wawa no Kawas Kako, saan Cingra. Ano maolahay ko Kawas i Cingraan i, mamaan pa'oripen Ningra Cingra i matini,>> saan cangra.

44Haloya nipakapotan ci Yisan a mapacekay i ciwcika a kokong a mahaen ko nipilokes Cingraan.

O Patay ni Yis

(Maroko 15.33-41; Luka 23.44-49; Yohani 19.28-30)

45Yo kalahokanto i, sato'man sa ko polong noya hkal, ma^deng tolo a tatokian ko halafin. 46Ta ma^deng tolo ko toki to hrek no lahok i, satata'ang sa ci Yis to ngiha' a micli', <<Ili, Ili, lema sapaktani?>> saan. O tatodong nonini i, <<Kawasaw ako, Kawasaw ako, nawiro falahen Iso Kako a miliyas saw?>> o sanay.

47Matngil no tomirengay itira a papinapina a tamdaw konini a sowal i, sowal sa, <<Mitahidang Cingra ci Iliyaan,>> saan. 48Saka, tangsol sa a comikay ko ccay nangra a papihcep i 'acicimay a ^pah to parok#27.48 parok -- o roma i, takomod (katimol)., ta paktingen ningra i pnen no 'ardo, ta papitinacen ningra ci Yis.

49Nikawrira, sowal sa ko romaroma a tamdaw, <<Akaho, nengnengaw ita, latek tayni ci Iliya a mipa'orip i Cingraan!>> saan cangra.

50Itiya i, miliyaw haca ci Yis a misatata'ang to ngiha' a micli', ta lafot sato ko sla' Ningra.

51Itiya i, latosa sa a macinas nai fafaed tahira i kala^no ko maca'itay a sapala'ed a kiradom i laloma' no Fangcalay Pita'ongan. Mangernger ko sra, mapla' ko 'ongcoy. 52Mafawah ko tadem. Lomowad a ma'orip nai patay ko 'alomanay a namapatayay a fangcalay a mitooray. 53I ikor no nika lomowad ni Yis nai patay i, masadak cangra nai tadem a tayra i Fangcalay a Niyaro'. Itira a ma'araw no 'alomanay a tamdaw cangra.

54Ma'araw no kakridan no sofitay ato mikapotay cingraan a misimaw ci Yisan a sofitay ko nika lonen ato polong no dmak i, tata'ang ko talaw nangra. Sowal sa, <<So'linay, o Wawa no Kawas Cingra!>> saan.

55Ira itira i ra:ay a minengneng ko 'alomanay a fafahiyan. Nano mihaklongay cangra ci Yisan nai Kalili a mipadang Cingraan. 56Ira a mikapot cangraan ci Mariya no Maktala aci Mariya o ina ni Yakop aci Yosif ato wina no tosaay a fa'inayan a wawa ni Cipitay.

O Pitadem ci Yisan

(Maroko 15.42-47; Luka 23.50-56; Yohani 19.38-42)

57Yo pisakalafianto i, ira ko ccay a cidafongay a tamdaw ci Yosif no Arimatiya. O nisawawaan ni Yis cingra. 58Tayra cingra i ci Pilatoan a mingitangit to sapialaaw to tireng ni Yis. Palimo'ot hanto ni Pilato ko tamdaw a papipatorod to tireng ni Yis i cingraan. 59Saka, ^pod hanto ni Yosif a miala ko tireng ni Yis a mitafo to fa^lohay a nisanga'an to kliw a kiradom, 60ta tli han ni Yosif i malotadem ningra ko tireng ni Yis. O fa^lohay a nito^to'an a 'ongcoy konini a tadem. Walin han ningra ko tata'angay a fokloh a patli i fawahan no tadem, ta liyas sato cingra. 61Ira itira ci Mariya no Maktala ato roma a Mariyaan, misi'ayaw to tadem a maro', itira sa a misimaw.

O Pisimaw to Tadem

62I sakatosa a romi'ad, ikor noya pipatalaan a romi'ad i, masa'opo i ci Pilatoan ko kakridan no citodongay to ta'ong ato Farisay a tamdaw. 63Sowal sa, <<Tapangaw, yo ma'oripho koya misa'fitay a tamdaw i, ira ko sowal Ningra, <I ikor no tolo a romi'ad, o lalomowad Kako a ma'orip nai patay,> saan. Maharateng niyam anini koya sowal Ningra. 64Orasaka, palimo'oten ko tamdaw a papisimaw to tadem Ningra tangasa i sakatolo a romi'ad. Ano caay simawen i, latek tayra ko nisawawaan Ningra a mitakaw a pasadak Cingraan. <Lomowaday Cingra a ma'orip nai patay,> asa cangra a somowal i finawlan. Ano mahaen ko dmak i, ikaka noya i 'ayaway ko nika rawraw ita,>> han nangra.

65Pasowal sa ci Pilato i cangraan, <<Olili. Kriden ko mamisimaw a sofitay a patayra i tadem a papisongila' a misimaw,>> han ningra.

66Saka, tayra sato cangra a mitopa to satahaf no tadem a fokloh. Ta papisongila' han nangra ko sofitay a papisimaw toya tadem.

Currently Selected:

Matay 27: AMIS2019

Highlight

Copy