Matay 26

O Pisahalaka to Sapipatayaw ci Yisan

(Maroko 14.1-2; Luka 22.1-2; Yohani 11.45-53)

1Mahrek ci Yis a somowal tonini a ma^min i, pasowal sa Cingra i nisawawaan Ningra, 2<<Mafana' kamo ato tosato a romi'ad, ta maraod ko Pita'lifan a Lisin. O mamapacakay ko Wawa no Tamdaw, ta o mamapacek i ciwcika,>> han Ningra.

3Itiya i, masa'opo ko kakridan no citodongay to ta'ong ato kalas no niyaro' i potal no loma' ni Kayafas o sakakaay a citodongay to ta'ong. 4Samaanen ita ko nipidokdok a mirpet ci Yisan a mipatay. 5<<Caay ka nga'ay kita i pisalisinan a romi'ad a milahci tonini a dmak, ta caay ka palowad ko saka rawraw no finawlan,>> saan cangra a misahalaka.

Mapaloso' to Simal i Pitani

(Maroko 14.3-9; Yohani 12.1-8)

6Yo itira i Pitani ci Yis, itira Cingra i loma' ni Simon o nano malono'ay. 7Yo komaen ci Yis i, ira a miraod i Cingraan ko ccay a fafahiyan a mitatoy to cipinaroay a 'atomo to tadamatkesay a fangsisay a simal a paloso' i fongoh ni Yis. 8Yo paka'araw ko nisawawaan tonini i, kter sa a somowal, <<Nawiro haen han a misaloya saw? 9Ano pacakayen kora simal i, adihay ko 'aca ta ma^deng a malosapafli i pakoyoc a tamdaw,>> saan cangra.

10Mafana' ci Yis tonini i, sowal sa i cangraan, <<Nawiro pakasmeren namo ko faloco' nonini a fafahiyan saw? O nga'ayay konini a dmak ningra to saki Takowanan. 11Nawhani mararid a ira i tatihi namo ko pakoyoc a tamdaw. Nikawrira, caay ko mamida'oc a ira Kako i tatihi namo. 12O nipipaloso' ningra tonini a fangsisay a simal i tireng Ako i, o nipipatala ningra to sapitadem i Takowanan. 13So'linen Ako a somowal kamo, ano i cowacowato a mapatnak konini a Nga'ayay Ratoh i polong no hkal i, o papasowalen no tamdamdaw ko dmak nonini a fafahiyan, to sapiharatengaw i cingraan,>> han ni Yis.

O Pipacakay ni Yuta ci Yisan

(Maroko 14.10-11; Luka 22.3-6)

14Itiyasato, tayra i kakridan no citodongay to ta'ong ko ccay no tosaay ko safaw a tarokos ni Yis, ci Yuta no Iskariyot. 15Sowal sa, <<Ano patoroden ako i tamowanan ci Yis i, makahi kamo a pafli to ma:an i takowanan saw?>> han ningra. Saka, pafli han nangra cingra to tolo a polo' a rimood no ^kim. 16Nanitiya a misa'imer ci Yuta to kanga'ayan a romi'ad to sapacakayaw ci Yisan.

O Pitahka na Yis to Pita'lifan a Lisin

(Maroko 14.12-21; Luka 22.7-13, 21-23; Yohani 13.21-30)

17O sa'ayaway a romi'ad to Ka^caan Pipatamod to ^Pang a Lisin i, tayra i ci Yisan ko nisawawaan a milicay, <<I cowa ko kangalayan Iso to pipatalaan niyam to malo no Miso a tahka to saki Pita'lifan a Lisin saw?>> han nangra.

18Paca'of sa ci Yis, <<Picomod i niyaro' a tayra toya nisowalan Ako i tamowanan a tamdaw a somowal i cingraan, <O sowal no Singsi i, Mangatato ko romi'ad Ako. Itira i loma' iso Kako ato nisawawaan a mapolong a mitahka to saki Pita'lifan a Lisin,> saan han ko sowal,>> han ni Yis.

19Saka, do^do hanto no nisawawaan ko nano sowal ni Yis a mipatala to tahka to saki Pita'lifan a Lisin.

20Yo pisakalafianto i, polong sato ci Yis ato tosaay ko safaw a tarokos a mitahka. 21Yo komaen cangra i, sowal sa ci Yis, <<So'linen Ako a somowal kamo, ira i tamowanan ko ccay a mamipacakay i Takowanan,>> han Ningra.

22Tadamararom cangra, saka haccaccay sa a milicay i Cingraan, <<Tapangaw, kako haw? Kako haw?>> saan.

23Paca'of sa ci Yis, <<Oya milcaday i Takowanan a mitnas to ^pang i kaysing a tamdaw i, orira ko papacakay Takowanan. 24Mato nika tilid i Fangcalay Cudad to pakayniay i sakapatay no Wawa no Tamdaw. Nikawrira, o cacilafo ko pacakayay to Wawa no Tamdaw. O nika ^ca kahofoc nonini a tamdaw ko nga'ay,>> han ni Yis.

25Pasowal sa ci Yuta oya papacakay i ci Yisan, <<Singsiaw, kako haw?>> han ningra a milicay.

<<Masano sowal iso,>> han ni Yis a paca'of.

O Saki Tapang a Lafi

(Maroko 14.22-26; Luka 22.14-20; 1 Korinto 11.23-25)

26Yo komaen cangra i, tatoy sa ci Yis to ^pang. Kansiya sa Cingra to Kawas, ta pcih han Ningra a pafli i nisawawaan Ningra a somowal, <<Dada, alaen a komaen. O tireng Ako konini,>> han Ningra.

27O romasato, tatoy sa Cingra to takid. Kansiya sa Cingra to Kawas, ta pafli i cangraan a somowal, <<Kapinanom kamo a ma^min tonini. 28Onini i, o lalowadan no nika tatlek ato Kawas to sakahpol no raraw no 'alomanay a tamdaw a masadakay a rmes Ako. 29Sowalen Ako kamo, caayto piliyaw Kako a komaen tonini a ^pah no fadisoso', tangasa i pikapotan Ako i tamowanan a komaen to fa^lohay a takid i Kitakit no Wama Ako,>> han ni Yis.

30Yo mahrek cangra a pa'olic a romadiw i, sadak sato cangra a tayra i Olif a lotok.

O Pipali'ayaw ni Yis to Pihakeno ni Pitiro

(Maroko 14.27-31; Luka 22.31-34; Yohani 13.36-38)

31Itiyasato, pasowal ci Yis i cangraan, <<Anini a dadaya o mamilaliw kamo a ma^min i Takowanan, nawhani <Paloen Ako ko pakaenay to siri, ta maliwasak ko kasaflaw no siri,> saan a matilid i Fangcalay Cudad. 32Nikawrira, ano lomowadto Kako a ma'orip nai patay i, o a i 'ayaw namo Kako a tayra i Kalili,>> han Ningra.

33Paca'of sa ci Pitiro i ci Yisan, <<Ano milalilaliw cangra a ma^min i Tisowanan i, caay ko mamiliyas Kako i Tisowanan,>> han ningra.

34Pasowal sa ci Yis ci Pitiroan, <<So'linen Ako a somowal kiso, anini a dadaya i 'ayaw no nika skak no 'ayam#26.34 'ayam -- o roma i, koko' (katimol). i, wa kinatolo kiso a mihakeno i Takowanan,>> han Ningra.

35Paca'of sa ci Pitiro, <<Ano mapakapokapot kako i Tisowanan a mapatay i, caay ko mamihakeno kako i Tisowanan,>> han ningra.

Mahaen ko sowal no nisawawaan a ma^min.

O Pitolon i Kisimani

(Maroko 14.32-42; Luka 22.39-46)

36Nanoya, lahaklong sato ci Yis ato nisawawaan Ningra a tayra i Kisimani. Sowal sa i cangraan, <<Tayra Kako itira a mitolon i, kamaro' kamo i tini,>> han Ningra. 37Ta krid han Ningra ci Pitiro atoya tatosaay a wawa ni Cipitay a malahaklong a tayra. Ksem sa ko faloco' Ningra a mararom. 38Itiya i, sowal sa ci Yis i cangraan, <<Hato mamapatayto Kako to nika tata'ang no rarom no faloco' Ako. Kaitini kamo a mitala, kihatiyaen Kako a mapalal!>> han Ningra.

39Ta tala'ayaw sa ci Yis to mamang, hinokop sa a mitolon, <<Wamaaw Ako, ano mama^deng i, nanay aka papinanomen Kako tonini a 'anengeray a takid! Nikawrira, aka ka o no Mako a harateng ko tatooren. Ka o no Miso a nafaloco'an ko lalahcien,>> saan Cingra.

40Ta patiko sa ci Yis a tayra i tatoloay a nisawawaan. Ma'araw Ningra ko nika foti' nangra. Sowal sa Cingra ci Pitiroan, <<Nawiro, caay pakahadidi kamo to ccaccay aca a tatokian a mikihatiya i Takowanan a mapalal saw? 41Kapalal kamo a mitolon to saka^caaw ka sawi namo. Talacowa mangalay ko faloco' namo, nikawrira, rarima ko tireng namo,>> han ni Yis.

42Tayra haca ci Yis a mitolon to sakinatosa. Sowal sa, <<Wamaaw Ako, ano caay ko laliyasen Ako konini a 'angreray a takid, o nanonanomen aca Ako i, nanay malahci ko nafaloco'an Iso!>> saan Cingra. 43Patiko haca Cingra i nisawawaan, manengneng haca Ningra ko nikafoti' nangra. Nawhani tadamatokatok cangra.

44Ta miliyaw haca ci Yis a miliyas cangraan a tayra a mitolon to sakinatolo a somowal toyanan to a sowal. 45Ta patiko haca Cingra i nisawawaan. Sowal sa, <<Mafoti'ho, pahanhanho kamo saw? Nengnengen, maraodto ko toki. O mamapacakay ko Wawa no Tamdaw i kamay no ciraraway a tamdaw! 46Kalomowad, tatata, tayra kita, nengnengen, irato a miraod ko pacakayay i Takowanan a tamdaw!>> han Ningra.

Marpet ci Yis

(Maroko 14.43-50; Luka 22.47-53; Yohani 18.3-12)

47Yo somowalho ci Yis i, irato a miraod ko ccay no tosaay ko safaw a tarokos ci Yuta. Mihaklong i cingraan ko mitatoyay to fonos ato sapalo a 'alomanay a finawlan. O niocoran no kakridan no citodongay to ta'ong ato kalas no niyaro' cangra. 48Pa'ayawen noya pacakayay ci Yisan a tamdaw a pasowal cangra to kacipinangan. <<Oya nicocopan ako a tamdaw i, Cingra ko rarpeten namo,>> han ningra.

49Ta tangsol sa ci Yuta a micopa ci Yisan, sowal sa, <<Singsiaw, nga'ayho,>> saan, ta micocop i Cingraan.

50Pasowal sa ci Yis, <<Idangaw, kalamkamen a milahci ko niharatengan iso#26.50 kalamkamen a milahci ko niharatengan iso -- ano ^ca i, o maan ko dadmaken iso. a dmak,>> han Ningra.

Itiya i, raod sato koya mirpetay a tamdaw ci Yisan a mipalit i Cingraan. 51Saka, sodoc sa to fonos ko ccay no mikapotay ci Yisan a tamdaw a mico'ay to koli no sakakaay a citodongay to ta'ong a mikrit to tatihi a tangila ningra. 52Itiya i, pasowal sa ci Yis i cingraan, <<Cofelen ko fonos iso! O mitatoyay to fonos a tamdaw i, o fonos ko sakapatay ningra. 53Caay ka fana' kiso saw to nika ma^deng Kako a mingitangit to Wama Ako a papiocor i matini to ikakaay no tosaay ko safaw a kasaflaw ko nika 'aloman no coyoh to mamipa'ading Takowanan? 54Nikawrira, ano haenen Ako ko dmak i, samaanen ko nika lahci noya O mamahaen konini a dmak yasanay a matilid i Fangcalay Cudad saw?>> han ni Yis.

55Itiya i, pasowal sa ci Yis i finawlan, <<Samato mico'ayay sa to kokong a cifonos, cisapalo kamo a tayni a mirpet i Takowanan saw? Maro' Kako i Fangcalay Pita'ongan to romi'ami'ad a pasifana' i tamdamdaw i, caay pirpet kamo i Takowanan. 56Nikawrira, o sakamatini nonini a dmak a ma^min i, o sakalahciaw no nisowalan no pali'ayaway to sowal no Kawas i Fangcalay Cudad,>> han Ningra.

Itiya i, alapkapkaw sato ko nisawawaan a ma^min a miliyas i Cingraan.

Masawkit i Pilaocan

(Maroko 14.53-65; Luka 22.54-55, 63-71; Yohani 18.13-14, 19-24)

57Kriden noya mirpetay ci Yisan a tamdamdaw ci Yis a patayra i loma' ni Kayafasan o sakakaay a citodongay to ta'ong. Ira itira a masa'opo ko pasifana'ay to Rikec ato kalas no niyaro'. 58Pakaraaraay sa ci Pitiro a mikotod i ci Yisan, tangasa i potal no loma' no sakakaay a citodongay to ta'ong. Comod sa ci Pitiro itira a mikapot to midipangay a tayring a maro' a minengneng to nika o mamasamaan ko pahrekan nonini a dmak. 59Mikilim ko kakridan no citodongay to ta'ong ato polong no lomaocay to sapakokot a wacay ci Yisan. Onini i, o sapastekaw nangra ci Yisan i patay. 60Talacowa 'aloman ko tala'a'ayaway a pakokot a pawacay, nikawrira, awaay a matama nangra ko so'linay a wacay. Saikoray sato i, tala'a'ayaw ko tatosa a tamdaw. Sowal sa, 61<<O sowal nonini a tamdaw i, <Ma^deng Kako a mipleng tonini a Fangcalay Pita'ongan to Kawas, ta liyawen Ako a mipatireng i tolo a romi'ad konini a Pita'ongan,> saan Cingra,>> han nangra.

62Tireng sa ko sakakaay a citodongay to ta'ong a pasowal i ci Yisan, <<Awaay ko maan a sapaca'of Iso to nipipakokot nonini a tamdamdaw a pawacay to pakayniay i Tisowanan saw?>> han ningra a milicay. 63Nikawrira, trep sa ci Yis. Liyawen haca no sakakaay a citodongay to ta'ong a milicay Cingra, <<Pakaynien ako i ngangan no ma'oripay a Kawas ko papikton i Tisowanan a paca'of i tamiyanan, so'linay, o Wawa no Kawas ci Kristo Kiso haw?>> han ningra.

64Pasowal sa ci Yis, <<O sowal iso konini. Nikawrira, sowalen Ako kamo, i ikor nonini i, o mama'araw namo ko nika maro' noya Wawa no Tamdaw i kawanan no Ci'icelay a Kawas. O romasato, o mama'araw namo ko nika pakato'em Ningra a tayni nai kakarayan,>> han Ningra.

65Tona pakatngil tonini a sowal ko sakakaay a citodongay to ta'ong, ta cinas sato to riko' ningra, sowal sa, <<O milokesay Cingra to Kawas. O maanho ko kakilimen ita to malowacay saw? Matngilto namo ko nipilokes Ningra to Kawas. 66Maan saan ko harateng namo saw?>> han ningra a milicay cangra i.

<<O papasteken i patay Cingra,>> saan cangra a paca'of.

67Itiyasato, sopa'en nangra ko pising Ningra. Skongen haca nangra Cingra. 68Oya mipatpihay#26.68 patpihay -- o roma i, patpi'ay (katimol), patri'ay (ka'amis). i Cingraan a tamdaw, sowal sa, <<Kristoaw, o pali'ayaway to sowal no Kawas Kiso! Cima kona patpihay Tisowanan saw? Pasowalen kami,>> han nangra.

O Pihakeno ni Pitiro ci Yisan

(Maroko 14.66-72; Luka 22.56-62; Yohani 18.15-18, 25-27)

69Yo maro' ci Pitiro i potal no loma' no sakakaay a citodongay to ta'ong i, ira a miraod i cingraan ko ccay a matayalay a fafahiyan. Sowal sa, <<O kapot ni Yis no Kalili kiso sa kako,>> han ningra.

70Nikawrira, paca'of sa ci Pitiro, <<Hakeno, caay ka fana' kako tora nisowalan iso!>> han ningra a somowal i ka'ayaw no 'alomanay a tamdaw. 71Ta sadak sa ci Pitiro a tayra i fawahan i, ma'araw no roma a matayalay a fafahiyan cingra. Sowal sa, <<Onini a tamdaw i, o kapot ni Yis no Nacali,>> han ningra koya tomirengay itira a tamdamdaw a somowal.

72Ta mikton haca to sowal ci Pitiro, <<Hakeno. Caay ka fana' kako toya tamdaw!>> saan.

73Nanoya, miraod i ci Pitiroan koya tomirengay i tatihi a tamdamdaw. Sowal sa, <<So'linay o kapot Ningra kiso. Nawhani mahapinang i caciyaw iso konini,>> han nangra.

74Itiyasato, kton sa to faloco' ci Pitiro, <<Ano caay ko so'linay ko sowal ako i, nga'ayto a tfocen no Kawas kako. Caay ka fana' kako toya tamdaw,>> saan.

Itiya i, tangsol sa a maskak ko 'ayam. 75Saka, itiyato a maharateng ni Pitiro ko nano ni sowalan ni Yis toya, <<I 'ayaway no nika skak no 'ayam i, wa kinatolo kiso a mihakeno i Takowanan,>> sanay a sowal. Ta sadak sato cingra a miongong a tomangic.

Currently Selected:

Matay 26: AMIS2019

Highlight

Copy