Matay 2

O nai Waliay a Lafang

1Yo ci Hirotiho ko hongti i, itiya a hofocen ci Yis i Piclihim no Yutaya. Nanoya, ira ko nai waliay a papinapina a tamdaw to matanengay to no fo'is a tayra i Yirusalim 2a milicay, <<I cowa koya mamalahongti no Yutaya a nihofocan a Wawa? Ma'araw niyam i wali ko nika sadak no pahapinangay Cingraan a fo'is. Saka, tayni kami a mita'ong i Cingraan,>> han nangra.

3Matngil ni Hiroti a hongti konini i, rawraw sa ko faloco' ningra. Mahaen ko i Yirusalimay a tamdamdaw a ma^min a marawraw ko faloco'. 4Saka, tahidang han noya hongti a misa'opo ko polong no kakridan no citodongay to ta'ong ato pasifana'ay to Rikec a milicay, <<I cowa a hofocen koya ci Kristo hananay?>> han ningra.

5Paca'of sa cangra, <<I Piclihim no Yutaya, nawhani o sowal a matilid i cudad no pali'ayaway to sowal no Kawas i,

6<Kiso o Piclihim no Yuta a kowan,

caay ko samimingay a niyaro' kiso i niyaroaro' no Yuta.

Nawhani o mamasadak i tisowanan ko mamikowan,

o mamidipot to Israil a finawlan Ako saan,> >> han nangra.

7Itiya sato lonok han ni Hiroti a mitahidang koya matanengay a tamdaw a miliclic a mihapinang to nika i hacowa a masadak koya fo'is. 8Ta sowal han ningra cangra, <<Katayra kamo i Piclihim a misongila' a mikilim toya Wawa. Ano matama namo Cingra i, katayniho a pakafana' i takowanan. Ta halo ako a tayra a mita'ong i Cingraan,>> han ningra a miocor cangra.

9Namitngil cangra tonini a sowal no hongti i, lowad sato cangra a tayra. Itiya i, ira koya nama'araway nangra i wali a fo'is a mikrid i cangraan. Tangasa i kaitiraan noya Wawa koya fo'is i, sa'nger sa i tatodong noya Wawa. 10Salipahak sa cangra a minengneng toya fo'is. 11Comod sa cangra i loma' i, ma'araw nangra koya Wawa ato ina Ningra ci Mariya. Pitosor sa cangra a mita'ong toya Wawa. Fohat sato cangra to padafongan a pafli i cingraan to tada^kim ato tada^xiw ato mir.

12<<Aka patiko a tayra i ci Hirotian,>> han no Kawas a palimo'ot cangra i lmed. Saka, pakayra sato cangra i roma a lalan a minokay i kitakit nangra.

O Pilaliw a Tayra i Icip

13Naminokayto koya matanengay i, ma'araw ni Yosif i lmed ko coyoh no Tapang. Sowal sa koya coyoh, <<Kalomowad. Kriden konini a Wawa ato ina Ningra a milaliw a tayra i Icip. Kaitira ito kamo tangasa i pipasowalan ako. Nawhani o mamikilim ci Hiroti tonini a Wawa to sapipatayaw i Cingraan,>> han ningra.

14Saka, lowad sato ci Yosif toya dadaya a mikrid toya Wawa ato ina noya Wawa a tayra i Icip. 15Itira sa cangra tangasa i kapatayan ni Hiroti. Onini i, o nika lahci no nisowalan no pali'ayaway to sowal no Tapang toya, <<Tahidangen Ako ko Wawa Ako a pasadak nai Icip,>> sanay.

O Pipatay to Fa'inayan a Wawa

16Nanoya, mafana'to ci Hiroti to nika masafana' noya matanengay a tamdaw cingra i, kter sato cingra. Saka, ocor han ningra ko tamdaw a papipatay to polong no tangasa i tosaay ko mihcaan a fa'inayan a wawa no i Piclihimay ato i taliyokay a niyaro' a ma^min. Onini a mihcaan no wawa i, o nihapinangan ni Hiroti to nano sowal no matanengay.

17Mahaen ko nika lahci no nisowalan ni Yirimiya o pali'ayaway to sowal no Kawas toya,

18<<Matngil i Rama ko ngiha' no tomangicay.

Tomangic ci Rakil to pakayniay i wawa ningra.

Caay ko mamahinom ko tangic ningra,

nawhani mapatay a ma^min ko wawa ningra,>> sanay.

O Pinokay nani Icip

19Yo mapatayto ci Hiroti i, i tiraho i Icip ca Yosif. Ma'araw ningra i lmed ko coyoh no Tapang. 20Sowal sa koya coyoh, <<Kalomowad. Kriden konini a Wawa ato ina Ningra a minokay i kitakit no Israil. Nawhani mapatayayto koya sapipatayananay tonini a Wawa,>> han ningra. 21Saka, lowad sato ci Yosif a mikrid toya Wawa ato ina noya Wawa a minokay i kitakit no Israil.

22Nikawrira, matngil ni Yosif ko nipirocok ni Arkilaus to pikowan no mama ningra ci Hirotian to Yutaya a pala#2.22 pala -- o roma i, sofal han no i (ka'amisay).. Saka, matalaw cingra a tayra itira. Palimo'oten haca no Kawas cingra i lmed saka, liyas sato cangra a tayra i Kalili a pala. 23Saka, itira sato cangra i Nacali hananay a niyaro'. Onini i, o nika lahci no nisowalan no pali'ayaway to sowal no Kawas toya, <<O Nacali a tamdaw, wa han Cingra,>> sanay.

Currently Selected:

Matay 2: AMIS2019

Highlight

Copy