Matay 19

O Sifana' to i Nika Sasawad no Mararamoday

(Maroko 10.1-12)

1Mahrek ci Yis a somowal tonini i, liyasen Ningra ko Kalili a tayra i ti:raw no Yortan i Yutaya a pala. 2'Aloman ko finawlan a mitoor i Cingraan saka, adahen Ningra ko adadaay nangra itira.

3Ira a miraod i ci Yisan ko papinapina a Farisay a tamdaw a milifet Cingraan a milicay, <<Ano ira ko maan a lalngatan i, matatodongay i Rikec ita ko nipisawad no fa'inay to fafahi ningra haw?>> han nangra.

4Paca'of sa ci Yis, <<Caayho ka asip namo saw koya <Yo misatapang a misanga' ko Kawas to hkal i, misanga' Cingra to fa'inayan ato fafahiyan,> sanay a sowal? 5O sowal no Kawas i, <Onini ko saka liyasen no tamdaw ko mama ato ina ningra a malaccay ato fafahi ningra. Malaccayto ko tireng noya tatosaay,> sanay. 6Tona caayayto ko tatosaay ko mararamoday, o ccayayto ko tireng. Orasaka, o nipalaccayan no Kawas i, aka palicinowasen no tamdaw,>> han Ningra.

7Pasowal sa koya Farisay a tamdaw ci Yisan, <<Ano hatira i, nawiro matilid ni Mosi i rikec ko sakanga'ay no fa'inay a mitilid to sakalaliyas a tilid a misawad to fafahi ningra saw?>> han nangra.

8Paca'of sa ci Yis, <<'Atkak ko faloco' namo saka, mihayda ci Mosi to nipisawad namo to fafahi namo. Nikawrira, caay ka hatira ko dmak nanisatapangan. 9Nikawrira, sowalen Ako kamo, ano caay ko nika'odangan no fafahi ko sapisawad no fa'inay to fafahi ningra ta cifafahi to roma i, o ma'odangay cingra,>> han Ningra.

10Pasowal sa ko nisawawaan ci Yisan, <<Ano hatira ko dmak no mararamoday i, o nika ^ca ka ciramod ko nga'ay,>> han nangra.

11Paca'of sa ci Yis, <<Caay ka filo no tamdaw ma^min a mido^do konini a sowal. Deng o nisa'osian no Kawas a tamdaw ko pakado^doay tonini a sowal. 12Nawhani ira ko nano kahofocan a caay ko caciramod a tamdaw. O romasato, ira ko niliti'an a tamdaw to saka^ca ka ciramod ningra. O romasato, ira ko lonok sanay a caay ka ciramod to sakanga'ay ningra a matayal i Kitakit no Kawas. O pakado^doay tonini a sowal i, do^doen,>> han Ningra.

O Pipakalmed to Ka^mangay

(Maroko 10.13-16; Luka 18.15-17)

13Ira ko patayraay to ka^mangay a wawa i ci Yisan, mangalay cangra a papikapa ci Yisan to wawa nangra a mitolon, nikawrira, kakteren no nisawawaan cangra. 14Nikawrira, sowal sa ci Yis, <<Pakoningra han ko nika tayni no wawa i Takowanan, aka lalangen cangra, nawhani o matiniay a wawa ko finawlan no Kitakit no Kawas,>> han Ningra.

15Saka, kapa hanto ni Yis cangra, ta liyas sato Cingra itira.

O Cidafongay a Kapah

(Maroko 10.17-31; Luka 18.18-30)

16Yo ccay a romi'ad, tayra ci Yisan ko ccay a tamdaw a somowal, <<Singsiaw, o maan a nga'ayay a dmak ko dado^doen ako ta ci'orip kako to mida'ocay a 'orip saw?>> han ningra.

17Paca'of sa ci Yis, <<Nawiro milicay kiso i Takowanan to pakayniay i nga'ayay a dmak saw? Ccay aca ko nga'ayay a tamdaw. Ano mangalay kiso a ci'orip to mida'ocay a 'orip i, ka'imer a mido^do to limo'ot,>> han Ningra.

18<<O maan a limo'otan saw?>> saan cingra.

Saka, pasowal sa ci Yis, <<Aka pipatay to tamdaw, aka ka 'odang, aka pitakaw, aka patdo a pakokot to tamdaw, 19kangodoen ko mama ato ina. Samatiyaen o nika olah iso to tireng ko nika olah iso to tao, yasanay,>> han Ningra.

20Paca'of sa koya kapah, <<Mado^doayto ako a ma^min konini a limo'ot. O maanho ko caay ka^deng ako saw?>> han ningra.

21Pasowal sa ci Yis, <<Ano mangalay kiso a malamasongila'ay haw i, olili, pacakayen ko dafong iso a ma^min, ta palada'en ko pakoyoc a tamdaw to payso iso, nga'ay a mana'ang ko dafong iso i kakarayan. Ta katayni haca a mitoor i Takowanan,>> han Ningra.

22Yo pakatngil koya kapah tonini a sowal i, sa 'ickoy sa a mararom a miliyas, nawhani adihay ko dafong ningra.

23Ta sowal sa ci Yis i nisawawaan Ningra, <<So'linen Ako a somowal kamo, caay ka rahoday#19.23 rahoday -- o roma i, dayom (ka'amis), caloway (fata'an). ko cidafongay a tamdaw a malafinawlan no Kitakit no Kawas! 24Sowalen haca Ako kamo, ano malafinawlan no Kitakit no Kawas ko cidafongay a tamdaw i, ikakaho no pimomok no lakota a micomod to tangila no rinom ko nika ^ca ka rahoday,>> han Ningra.

25Mitngil ko nisawawaan tonini a sowal i, safahka' sa cangra, licay sa, <<Ano hatira i, cima ko mamapa'orip saw?>> saan cangra.

26Pamo^tek han ni Yis cangra a minengneng, sowal sa, <<Talacowa caay ka filo no tamdaw konini a dmak, nikawrira, mafilo no Kawas ko masamaamaanay a dmak,>> han Ningra.

27Itiya i, paca'of sa ci Pitiro, <<Nengnengen, masawadayto no niyam ko maamaan a mitoor i Tisowanan. O maan ko hamamalayap niyam saw?>> han ningra.

28Pasowal sa ci Yis i cangraan, <<So'linen Ako a somowal kamo, yo maro' Cingra o Wawa no Tamdaw i ma'dilay a tadamaanay a kamaro'an, i aira a fa^lohay a hkal i, halo amo o mitooray i Takowanan a maro' i tosaay ko safaw a tadamaanay a kamaro'an, misawkit to tosa ko safaw no ngangasawan no Israil. 29Ano pakayni i pitoor no cimacima i Takowanan ko sakapisawad ningra to loma', to salikaka to fa'inayan to fafahiyan, to mama, to ina, to wawa, ano^ca o omah i, o mamilayap cingra to smo'otay ko camahaw a sapakaolah ato mida'ocay a 'orip. 30Nikawrira, o sa'ayaway a 'alomanay a tamdaw i, o mamalasaikorayto. O saikoray a 'alomanay a tamdaw i, o mamalasa'ayawayto,>> han Ningra.

Currently Selected:

Matay 19: AMIS2019

Highlight

Copy