Matay 16

O Nipingitangit to Kafahka'an a Dmak

(Maroko 8.11-13; Luka 12.54-56)

1Ira ko papinapina a Farisay ato Satukay a tamdaw a miraod ci Yisan a sapilifetan. Orasaka, milongoc cangra i Cingraan pakaynien i kafahka'an a dmak Iso ko pipahapinang i tamiyanan to nika o nai Kawasay Kiso saan. 2Sowal sa ci Yis, <<Kalafian i, <Malodi' ko kakarayan saka, o mamacidal kita anocila,> saan kamo. 3Dafak sa i, <Malodi' a makotem ko kakarayan saka, ma'orad a mafali anini,> saan kamo. Mahaen ko nika fana' namo a mihapinang to romi'ad. Nikawrira, mafokil kamo a mihapinang to tatodong nonini a hkal.#16.3 O roma a katlangay a cudad awaay Kalafian i ... mihapinang to tatodong nonini a hkal. 4Wata: ko nika tatiih no aniniay ato ma'odangay a tamdaw. Sapinengnengan kamo to kafahka'an a dmak saw? Caay ko mamapa'araw i tamowanan, deng oya kafahka'an a dmak i ci Yonaan ko mama'araw namo,>> han Ningra a somowal.

Ta laliw hanto ni Yis cangra.

O Tamod no Farisay ato Satukay a Tamdaw

(Maroko 8.14-21)

5Yo tahira ko nisawawaan itira:way a lawac no fanaw i, matawalay nangra a mihawikid ko ^pang. 6Pasowal sa ci Yis i cangraan, <<Pina'on kamo to tamod no Farisay ato Satukay a tamdaw,>> han Ningra.

7Salango^ngo^ngo sa ko nisawawaan, <<O sakasomowal Ningra tonini a sowal i, o nika ^caan ita pihawikid to ^pang hakiya,>> saan cangra.

8Mafana' ci Yis tonini a harateng nangra, licay sa i cangraan, <<O tadancaay ko piti'er namo i Kawas! Nawiro masasowasowal kamo to nika awa no nitatoyan namo a ^pang saw? 9Mafokilho kamo tahanini! Caay ka harateng namo saw? Yo pakilac Kako to lima a 'aplad no ^pang a pafcol to lima a patek (5,000) a tamdaw i, pina a fakar ko nisa'opoan namo a 'osaw itiya saw? 10O romasato, yo pakilac Kako to pito a 'aplad no ^pang a pakafcol i spat a patek (4,000) a tamdaw i, pina haca a fakar ko nisa'opoan namo a 'osaw saw? 11Nawiro caayho ka fana' kamo saw? Caay ko pakayniay i ^pang ko ni sowalan Ako. Pina'on kamo to tamod no Farisay ato Satukay a tamdaw, saan ko sowal Ako kyami!>> han Ningra.

12Itiyato a mahapinang no nisawawaan ko nika oya <<Pina'on sanay a sowal ni Yis i, caay ko pakayniay i tamod no ^pang. O pakayniay i nipasifana' no Farisay ato Satukay a tamdaw,>> sato cangra a mafana'.

O Pipatalahkal ni Pitiro ci Yisan o Kristo

(Maroko 8.27-30; Luka 9.18-21)

13Yo tahirato ci Yis i Kaysariya Filipi i, licayen Ningra ko nisawawaan itira, <<Pakocima ko kalotamdaw to Wawa no Tamdaw saw?>> han Ningra.

14Paca'of sa cangra, <<Ci Yohani o Paino'ay, ira ko sanay, ci Iliya, ira ko sanay. Ci Yirimiya ano ^ca i, o roma a pali'ayaway to sowal no Kawas, ira ko sanay,>> han nangra.

15Milicay ci Yis i cangraan, <<Kamo sa i? pakocima kamo i Takowanan?>> han Ningra.

16Paca'of sa ci Simon Pitiro a somowal, <<O Wawa no ma'oripay a Kawas, ci Kristo Kiso,>> han ningra.

17Paca'of sa ci Yis i cingraan, <<Wawa ni Yohani Simonaw, o malmeday kiso. Nawhani caay ko tamdaw ko pasifana'ay tonini a so'linay i tisowanan. O Wama Ako i kakarayan ko pahapinangay i tisowanan. 18Orasaka, sowalen Ako kiso, o 'ongcoy kiso Pitiro. O papatireng Kako to kiwkay Ako i tini tona 'ongcoy. Caay ko mamalowid no 'icel no patay konini. 19O papaflien Ako kiso to safawah no Kitakit no Kawas. Saka, o ni'metan iso i hkal i, o mama'metto i kakarayan. O nihaydaan iso i hkal i, o mamahaydato i kakarayan,>> han Ningra.

20Itiya i, palimo'ot hanto ni Yis ko nisawawaan Ningra, <<Aka pasowal i cimacimaan to nika ci Kristo Kako,>> han Ningra.

O Pipali'ayaw ni Yis a Somowal to Pades ato Patay Ningra

(Maroko 8.31--9.1; Luka 9.22-27)

21Nanoya, satapang sato ci Yis a pahapinang a pakafana' i nisawawaan Ningra, sowal sa, <<Caay ka ^ca o tatayra Kako i Yirusalim. O mamapasemsem no kalas no niyaro' ato kakridan no citodongay to ta'ong ato pasifana'ay to Rikec Kako to masamaamaanay a pades, o papatayen nangra Kako. Ta sakatolo a romi'ad i, o lalomowad Kako a ma'orip nai patay,>> han Ningra.

22Tengteng han ni Pitiro ci Yis a milalang. <<Tapangaw, caay ko aira ko matiniay a dmak i Tisowanan,>> han ningra a somowal.

23Siikor sa ci Yis a pasayra ci Pitiroan a somowal, <<Satanaw, piliyas i Takowanan! O mipatahfikoday kiso i Takowanan. Nawhani, caay ko no Kawas ko niharatengan iso, o no tamdawan ko niharatengan iso,>> han Ningra.

24Saka, pasowal sa ci Yis i nisawawaan Ningra, <<Ano cima ko sapitoorananay i Takowanan i, falahen ko no tireng a harateng, 'orongen ko ciwcika no tireng, tooren Kako. 25Nawhani, o limlaay to 'orip no tireng i, o mamafalah ko 'orip ningra. Nikawrira, ano saki Takowanan ko pikinafalah to 'orip no tireng i, o papakalayap to 'orip. 26Ano ci^ta^tan ko cima a tamdaw to polong no hkal i, nikawrira, ano mafalah ningra ko 'orip no tireng i, o maan ko ^poc saw? O maanho ko sapalolol ningra to 'orip no tireng? 27Nawhani o mamalahaklong koya Wawa no Tamdaw ato coyoh Ningra i 'dil no Wama Ningra a miliyaw a tayni. Itiya i, o dmak no kahaccaccay a tamdaw ko malopi'arawan Ningra a pafli to lifon i cangraan. 28So'linen Ako a somowal kamo, ira i tini ko papakatakop a paka'araw to nika talahkal no nipikowan noya Wawa no Tamdaw i 'ayaw no nika patay nangra,>> han Ningra.

Currently Selected:

Matay 16: AMIS2019

Highlight

Copy