Matay 15

O nano To'as a Lkakawa

(Maroko 7.1-13)

1Itiya i, ira ko nai Yirusalimay a Farisay a tamdaw ato pasifana'ay to Rikec a tayra i ci Yisan, milicay i Cingraan, 2<<Nawiro caay pido^do ko nisawawaan Iso to nano to'as a lkakawa saw? O sakasaan niyam i, yo kakomaen cangra caay kamonanaw,>> han nangra a somowal.

3Paca'of sa ci Yis, <<Ano kamoto i, nawiro pakaynien namo i nipi'imer to nisanga'an namo a lkakawa ko nipiliyang namo to limo'ot no Kawas saw? 4O sowal no Kawas i, <Kangodoen ko mama ato ina iso>. Pasowal haca, <O milokesay to mama ato ina a tamdaw i, o papatayen,> saan. 5Nikawrira, o sowal namo i, <Oya sapafli ako i tamowanan i, malasapacakatayto ako i Kawas,> ano saan a somowal i mama ato ina ko cima a tamdaw i, 6nga'ayto a caay kangodoen noya tamdaw ko mama ato ina saan kamo a somowal. Pakaynien namo i nipi'imer to nisanga'an namo a lkakawa ko nipipalasawad namo to sowal no Kawas. 7Kamo o misamangahay a tamdaw, matama ko sowal ni Isaya to nipali'ayawan a sowal to pakayniay i tamowanan toya,

8<O sowal no Kawas i, o ngoyos aca nonini a finawlan ko mita'ongay i Takowanan.

Nikawrira, miraay i Takowanan ko faloco' nangra.

9Salama han nangra ko nipita'ong i Takowanan.

O no Kawas konini han nangra ko nisanga'an no tamdaw a limo'ot a pasifana' sanay,> >> han ni Yis.

O Paacekay to Tamdaw a Dmak

(Maroko 7.14-23)

10Pasa'opoen ni Yis ko finawlan a somowal i cangraan, <<Pitngil! Hapinangen! 11Oya micomoday i ngoyos a maamaan i, caay paacek to tamdaw. Oya masadakay i ngoyos a sowal ko paacekay to tamdaw,>> han Ningra.

12Itiya i, raoden no nisawawaan ci Yis a somowal, <<Mafana'ay Kiso haw to nika kter no Farisay a tamdaw a mitngil tonini a sowal Iso?>> han nangra.

13Paca'of sa ci Yis, <<O caay ko nipalomaan no Wama Ako i kakarayan a losay i, o fafo'noten a ma^min. 14Saka, pakoningra han cangra. O mapohaway a mikriday cangra. Ano kriden no mapohaway ko mapohaway i, o mamatfad i rfong a tatosa,>> han ni Yis.

15Paca'of sa ci Pitiro, <<Sahcien a pakafana' kami to tatodong nonini a tinako Iso,>> han ningra.

16Sowal sa ci Yis, <<Halo amo a tahanini a milcad to tao a mafokilho saw? 17Caay ka fana' kamo saw to nika o micomoday i ngoyos a maamaan i, talatiyad ta mafalah i tatayi'an kiya saw? 18Nikawrira, o masadakay i ngoyos a sowal i, o nai faloco'ay no tamdaw, onini ko paacekay to tamdaw. 19Nawhani nai faloco' no tamdaw a masadak ko masamaamaanay a tatiihay a harateng. Onini a tatiihay a harateng ko sakapipatay ningra to tamdaw, o saka'odang, o saka'otit, o sakapitakaw, o sakapisamangah ato sakapilokes ato romaroma a raraw, 20o polong nonini a dmak ko so'linay a paacekay to tamdaw. Nikawrira, ano caacaay kamonanaw a komaen sanay a dmak i, caay ka pakaacek to tamdaw,>> han ni Yis.

O Pipaso'lin no Ccay a Fafahiyan

(Maroko 7.24-30)

21Nanoya, miliyas ci Yis itira a tayra i ngataay no Tiri ato Siton. 22Ira itira toya pala ko ccay a Kanan a fafahiyan. Tayra i ci Yisan. Cli' sa a somowal, <<Tapangaw! O Wawa ni Tafiti, kasini'adaen kako! Maaro' no palafoay a mapasemsem ko fafahiyan a wawa ako,>> han ningra.

23Nikawrira, caay paca'of ci Yis to ccaccay aca a sowal. Saka, raod sato ko nisawawaan i Cingraan, <<Papinokayen konini a fafahiyan, nawhani cacli' sa cingra a mikotod titaanan,>> han nangra ci Yis a mingitangit.

24Paca'of sa ci Yis, <<Deng i moraraway a siri, o finawlan no Israil ko patosokan no nipiocor no Kawas Takowanan,>> han Ningra.

25Namatngil nona fafahiyan konini a sowal, raod sa i Cingraan a mipitosor a mita'ong i ka'ayaw ni Yis. <<Tapangaw, padamaen kako!>> saan cingra a somowal.

26Paca'of sa ci Yis, <<Caay ka nga'ay a 'afasen ko 'alangad#15.26 'alangad -- o roma i, 'angad (katimol). no wawa a pafli i waco,>> han Ningra.

27Sowal sa koya fafahiyan, <<Hai, Tapangaw, masanosowal Iso. Nikawrira, ano o wacoto i, komaen ito to matfaday a posak i kakomaenan no tawki naira!>> han ningra.

28Itiya i, paca'of sa ci Yis toya fafahiyan, <<O tadamaanay a miti'eray to Kawas a fafahiyan kiso. O mamalahci i tisowanan ko nilongocan iso a dmak,>> han Ningra. Saka, itiya a maadah koya fafahiyan a wawa ningra.

O Piadah to 'Alomanay a Adadaay

29Nanoya, miliyas ci Yis itira. Pakayra Cingra i lilis no fanaw no Kalili a macokacok i lotok ta maro' itira. 30Itiyasato patayraen no 'alomanay a finawlan ko mapi'iway, mapikingay, mapohaway, maapaay ato romaroma a adadaay a tamdaw i ci Yisan. Tli han nangra i ka'ayaw ni Yis konini a adadaay. Ta adahen ni Yis cangra. 31Safahka' sa ko finawlan to nika caciyawto ko maapaay, maadahto ko mapikingay, romakatto ko mapi'iway, paka'arawto ko mapohaway. Hmek sato cangra to Kawas nangra o Israil.

O Pipakaen ni Yis to Spat a Patek a Tamdaw

(Maroko 8.1-10)

32Tahidangen ni Yis a misa'opo ko nisawawaan Ningra a somowal, <<Sasini'ada sa Kako tonini a finawlan, toloto a romi'ad ko nika pikapot nangra i Takowanan, awaayto ko kakaenen nangra imatini. Caay ka sapipanokayan Kako cangraan to nika cahiw nangra, latek masto' cangra i fatad no lalan,>> han Ningra.

33Pasowal sa ko nisawawaan, <<O kohkohan konini i, i cowa kami a miala to ma^dengay a kakaenen to sakafcol no hatiniayto a nika 'aloman no finawlan saw?>> han nangra.

34Licay han ni Yis cangra, <<Pina a 'aplad ko ^pang to nitatoyan namo saw?>> han Ningra.

Paca'of sa cangra, <<Pito a 'aplad ko ^pang. O romasato, ira ko pinapina a mimingay a foting,>> han nangra.

35Saka, sowalen ni Yis ko finawlan a pakamaro' i sra. 36Ta tatoy sato Cingra toya pito a 'aplad no ^pang atoya pinapina a mimingay a foting a mikansiya i Kawas. Pcih han Ningra a pafli i nisawawaan. Ta pakilacen no nisawawaan haca ko finawlan. 37Mafcol cangra a ma^min a komaen. Sa'opo han no nisawawaan ko pinapcih a 'osaw a ^pang i, matomes ko pito a fakar. 38O komaenay a tamdaw i, spat a patek ko fa'inayan. Caay ka sa'osi ko fafahiyan ato wawa.

39Itiya i, paliwasak hanto ni Yis ko finawlan, ta dakaw sato Cingra to tamina a tayra i Makatan hananay a pala.

Currently Selected:

Matay 15: AMIS2019

Highlight

Copy