Dmak 9

Pakaso'lin to Tapang ci Sawlo

(Dmak 22.6-16; 26.12-18)

1Itiya i, mararid ci Sawlo a mipatalaw to sapipatayaw to nisawawaan no Tapang. Saka, tayra cingra i sakakaay a citodongay to ta'ong, 2ta mingitangit to tilid to sakanga'ayaw ningra a micomod to kalokasa'opoan no Yutaya a tamdaw itira i Tamaskus, onini i, ano cima ko ma'araway ningra a mitooray tonini a pakayraan a fa'inayan ato fafahiyan i, manga'ay kako a mirpet i cangraan a patayra i Yirusalim, o sanay ningra.

3Nikawrira, yo mangatato ni Sawlo ko Tamaskus i, fahal sa ira ko likat nai kakarayan a patdi i cingraan. 4Saka, polin sato cingra i sra, itiya i, ira a matngil ningra ko ngiha', sowal sa, <<Sawloaw, Sawloaw! nawiro mikari'ang kiso i Takowanan saw?>> saan.

5Saka, licay han ningra, <<Tapangaw, cima kiso saw?>> han ningra.

Paca'of sa koya ngiha', <<Oya nikari'angan iso ci Yis Kako. 6Kalomowad a micomod i niyaro', ta ira ko papasowal i tisowanan to malodadmaken iso,>> saan.

7Oya kapot ningra a tayra i, tireng sato itira, ^cato ka caciyaciyaw cangra. Nawhani ira a matngil nangra ko ngiha', nikawrira, awaay a ma'araw nangra ko cimacima. 8Lowad sato ci Sawlo nai sra, cngaw han ningra ko mata i, caayto paka'araw to maamaan. Saka, kayat hanto no kapot ningra cingra a patayra i Tamaskus. 9Tolo a romi'ad cingra a caay paka'araw, caay ka komaen, caay pinanom.

10Ira i Tamaskus ko ccay a nisawawaan ci Ananiyas hananay. Pakaynien no Tapang i mapolosi cingra a pasowal, <<Ananiyasaw,>> han Ningra.

<<Tapangaw, ini kako,>> han ningra a paca'of.

11Ta sowal sa ko Tapang i cingraan, <<Kalomowad. Katayra i Mo^celay hananay a lalan. Kilimen ci Sawlo hananay a Tarsus a tamdaw i loma' ni Yuta. Mitolon cingra itira. 12Ma'araw ni Sawlo i mapolosi ko nipicomod ni Ananiyas a mikapa to tireng ningra to sapaka'arawaw no mata ningra,>> han Ningra.

13Paca'of sa ci Ananiyas a somowal, <<Tapangaw, matngil ako ko sowal no 'alomanay a tamdaw to nika wata: ko nipikari'ang ningra to i Yirusalimay a finawlan Iso. 14Ano i tinito i, mapatorodto no kakridan no citodongay to ta'ong cingra to tilid to sakanga'ayaw ningra a mipalit to mita'ongay Tisowanan a tamdaw a ma^min,>> han ningra.

15Sowal sa ko Tapang i cingraan, <<Olili! Katayra kiso. Nawhani o nipili'an Ako a mamatayal Ako cingra to papatnak to pakayniay i Takowanan i roma a finacadan ato hongtingti ato finawlan no Israil. 16O papasifana'en Ako cingra to nika o a adihay ko pisemsem ningra tona mitoor cingra i Takowanan,>> han Ningra.

17Orasaka, tayra sato ci Ananiyas a micomod to kaitiraan ni Sawlo a loma', ta kapa han ningra ci Sawlo a somowal, <<Salikaka Sawloaw, oya pa'araway tisowanan i fatad no lalan yo tayni kiso i, o Tapang ci Yis, o niocoran Ningra kako to sapaka'arawaw no mata iso ato sakatomesaw iso to no Fangcalay 'Adingo,>> han ningra. 18Itiya i, tangsol sa a matfad nai mata ni Sawlo ko matiyaay o cikaf. Saka, paka'arawto cingra, lowad sato cingra ta milayap to pipaino'. 19Nakomaen cingra i, tanektekto ko tireng ningra.

O Pipatnak ni Sawlo i Tamaskus

Mikapot ci Sawlo to pinapina a romi'ad to i tiraay i Tamaskus a nisawawaan. 20Ta tangsol sa cingra a tayra i kasa'opo'opoan a loma' no Yutaya a tamdaw a patnak to nika o Wawa no Kawas ci Yis saan.

21Fahka' a ma^min ko mitngilay a tamdamdaw tonini. Sowal sa, <<Caay ko mipatayay cingra i Yirusalim to mita'ongay ci Yisan saw? Caay ko sapipalitaw ningra cangraan a patayra i kakridan no citodongay to ta'ong saw ko sakatayni ningra?>> saan cangra.

22Nikawrira, matongal a matongal ko nika ci'icel no pipakimad ni Sawlo, o Kristo ci Yis saan cingra a pahapinang a somowal. Saka, awato ko sapacawicawi no i tiraay i Tamaskus a Yutaya a tamdaw.

23Nanoya, halafinto ko romi'ad i, masasowasowal ko kakrikridan no Yutaya a tamdaw to sapipatayaw ci Sawloan. 24Nikawrira, mapakafana' no tao ci Sawlo to nipisa'imer nangra. O sapipatayaw nangra ci Sawloan, saka, songila'en nangra a mikacaw to romi'ad to dadaya ko 'adawang no niyaro'. 25Orasaka, yo ccay a dadaya pakafakar han no nisawawaan ni Sawlo cingra a mi^pod nai 'adipel no niyaro'.

I Yirusalim ci Sawlo

26Tahira ci Sawlo i Yirusalim i, <<Kapotaw ako ko nisawawaan,>> nasa cingra. 'Arawhani, matalaw cangra cingraan. Nawhani caay paso'lin cangra to nika o mitooray ci Kristoan cingra. 27Nikawrira, hamham han ni Parnapas cingra a mikrid a patayra i tarokos. Sahcien ni Parnapas cangra a pakafana' to nano dmak ni Sawlo a paka'araw to Tapang yo tayra i Tamaskus ato nipipasowal no Tapang i cingraan ato nika ^ca paska ningra a pakimad i Tamaskus pakayni i ngangan ni Yis. 28Nanoya, manga'ayto ci Sawlo a mikapot to i Yirusalimay a nisawawaan. Rarid sa cingra a malahaklong ato nisawawaan a talacowacowa i Yirusalim. Caay paska cingra a patnak pakayni i ngangan no Tapang. 29Malaliyaliyang cingra ato misanoKrisiyaay ko sowal a Yutaya a tamdaw a masasowasowal. Nikawrira, misa'imer cangra to sapipatayaw ci Sawloan. 30Mafana'to ko salikaka tonini saka, krid hanto nangra cingra a maloklon a tayra i Kaysariya, ta patayra hanto nangra cingra i Tarsus.

31Orasaka, sarihaday sato ko polong no kiwkay i Yutaya i Kalili ato Samariya a ma^min. Mita'ong cangra to Tapang, mapa'icel no Fangcalay 'Adingo. Satanektek sato cangra. Saka, matongal a matongal ko nika 'aloman no mitooray to romi'ami'ad.

Itira i Lita ato Yopa ci Pitiro

32Yo mirakat ci Pitiro to kasaniyaroaro' i, yo ccay a romi'ad tayra cingra i Lita a miliso' to i tiraay a mitooray. 33Ma'araw ningra itira ci Ayniyas hananay a tamdaw. Faloto a mihcaan ko nika lacaan ningra a mafoti' i kafoti'an to nika 'pi ningra. 34Pasowal sa ci Pitiro i cingraan, <<Ayniyasaw, adahen ni Yis Kristo kiso. Kalomowad. Losimeten ko kafoti'an iso!>> han ningra i, tangsol sa cingra a lomowad. 35Ma'araw no i tiraay i Lita ato Saron a tamdamdaw ci Ayniyas i, sasiyor sato ko faloco' nangra a pasayra i Tapang.

36Ira i Yopa ci Tapita hananay a fafahiyan a nisawawaan. (Ano sano Krisiyaen i, ci Torkas. O tatodong nonini i, <<o ngafol>> sanay.) Sahto o nga'ayay ko dmak nonini a fafahiyan. Maolah cingra a palada' to pakoyoc a tamdaw. 37Yo ccay a romi'ad mapatay cingra tona adada. Saka, sawsawen no tamdaw ko horac a tireng ningra a mitli i tongroh a loma'. 38I ngataay no Yopa ko Lita. Matngil no nisawawaan itira i Yopa ko nika ira ni Pitiro itira i Lita saka, ocor han nangra ko tatosa a tamdaw a patayra ci Pitiroan, longocen cingra, <<Kalamkamen a tayni. Aka pisafraang han ci Pitiro a somowal,>> han nangra koya tatosaay a patolon to sowal. 39Do^do han noya tatosaay konini a limo'ot. Saka, lowad sato ci Pitiro a mihaklong cangraan a tayra i Yopa. Tahira ci Pitiro i, kriden nangra cingra a patayra i tongroh a loma'. Alatangitangic sa ko maponengay a ma^min a miraod i ci Pitiroan a patiri' to adihayay a nano nisanga'an ni Torkas a riko' ato kafafang. 40Pasadak han ni Pitiro cangra a ma^min. Pitosor sa cingra a mitolon ta pasayra sa toya horac a tireng a somowal, <<Tapitaaw, kalomowad!>> han ningra. Cngaw sa cingra to mata. Ma'araw ningra ci Pitiro i, lowad sato cingra a maro'. 41Saka, padama han ni Pitiro cingra a palowad. Ta tahidang hanto ni Pitiro ko mitooray haloya maponengay a panengneng i cangraan to nika 'oripto ni Torkas. 42Malosiyang i Yopa a ma^min konini a dmak. Saka, 'alomanto ko paso'linay to Tapang. 43Halafin ko nika itira ni Pitiro i Yopa. I loma' ni Simon o misafalakoay a milafin cingra.

Currently Selected:

Dmak 9: AMIS2019

Highlight

Copy