Dmak 10

O Pipatnak ni Pitiro ci Korniliusan

1Ira i Kaysariya ci Kornilius hananay a tamdaw. O kakridan no sofitay no Itali hananay a cfang no sofitay no Loma. 2O malalokay a mita'ongay to Kawas cingra. Mapolong ko paro no loma' ningra a mita'ong to Kawas. 'Aloman ko nipalada'an ningra a Yutaya a tamdaw. Mararid cingra a mitolon to Kawas. 3Yo ccay a romi'ad tolo ko toki to hrek no lahok i, mahapinang a ma'araw ningra i mapolosi ko coyoh no Kawas. Tayra i cingraan a somowal koya coyoh, <<Kornilius!>> han ningra a mitahidang.

4Pamotek han ningra a minengneng koya coyoh, matalaw cingra. Saka, sowal sa, <<Tapangaw, o maan saw?>> han ningra.

Pasowal sa koya coyoh, <<Matngilayto, ma'arawayto no Kawas ko pitolon iso ato pipalada' iso. 5Ocoren iso i matini ko tamdaw a patayra i Yopa, tahidangen koya ci Simon Pitiro hananay a tamdaw a patayni. 6Mipalafang cingra i loma' ni Simon o misafalakoay a tamdaw, ira i lawac no riyar ko loma' ningra,>> han ningra. 7Namiliyas koya somowalay cingraan a coyoh i, tahidangen ni Kornilius ko tatosaay a matayalay ningra ato ccay no marariday a mikapot cingraan a mipadang to tayal ningra a sofitay, o malalokay a mita'ong to Kawas a tamdaw koya sofitay. 8Mahrek ci Kornilius a misahci a pasowal i cangraan to polong nonini a dmak i, ocor hanto ningra cangra a patayra i Yopa.

9Cila sato a romi'ad pararid cangra a romakat. Yo mangatato nangra ko Yopa i, macakat ci Pitiro a tayra i fadahong no loma' to sapitolonaw. Ma^deng tosa ko safaw no toki to kalahokan itiya. 10Itiya i, macahiwento cingra, sakakomaenan sato. Yo mipatala to kakaenen ko tamdaw noya loma' i, malayap ningra ko ccay a mapolosi, 11ma'araw ningra ko nika fawahto no kakarayan, ira ko matiyaay o kakahaday a kiradom, maca'it ko spat a tadimocokan nonini a kiradom a ma^pod i sra, 12ira i laloma' ko masamaamaanay a ma^feray a 'ayam ato 'a'adopen ato manafoyay a fao no hkal. 13Ira ko ngiha' a pasowal i cingraan, <<Pitiroaw, kalomowad, pacoken ta kaenen!>> saan.

14Nikawrira, pasowal sa ci Pitiro, <<Tapangaw, caay ka nga'ay! Nawhani caayho ka komaen kako to kapaysinan ato romaroma a kaackan a kakaenen,>> han ningra.

15Itiya i, ira haca koya ngiha' a pasowal i cingraan, <<O makoracay a nengnengen no Kawas a maamaan i, o kaackan, aka ka saan kiso,>> saan. 16Kinatolo a ira ko matiniay a dmak ta tangsol a makakoy a talakakarayan koya patlian.

17Yo maoratho ci Pitiro a misaharaterateng to tatodong no ma'araway ningra a mapolosi i, itiya a matama noya niocoran ni Kornilius a tamdaw ko loma' ni Simon, tireng sa cangra i fawahan. 18Cli' sa cangra a milicay, <<Ira i tini a milafin koya ci Pitiro hananay a tamdaw ci Simon haw?>> han nangra.

19Yo misaharateratengho ci Pitiro toya mapolosi i, sowal sa ko Fangcalay 'Adingo cingraan, <<Ira a tayni a mikilim tisowanan ko tatolo a tamdaw. 20Kalomowad kiso, ka^podto, haklong han cangra a tayra, aka pisafraang, nawhani Kako ko niocoray i cangraan a patayni,>> saan. 21Orasaka, ^pod sato ci Pitiro a tayra toya tamdaw. Sowal sa, <<Kako koya nikiliman namo a tamdaw. O maan ko sakatayni namo saw?>> han ningra.

22Sowal sa cangra, <<O niocoran ni Kornilius hananay a kakridan no sofitay kami. O mo^celay a tamdaw cingra, o mita'ongay to Kawas, o nga'ayay ko lihaf ningra i polong no Yutaya a finawlan. Pahapinangen no coyoh no Kawas cingra a papitahidang i tisowanan a patayra i loma' ni Kornilius to sapitngilaw ningra to sowal iso. Saka, tayni kami,>> han nangra. 23Orasaka, pacomod hanto ni Pitiro cangra a papilafin.

Cila sato a romi'ad i, lowad sato ci Pitiro a mihaklong cangraan a tayra. Ira ko papinapina a salikaka no Yopa a mihaklong i cangraan. 24Sakatolo a romi'ad i, tahirato cangra i Kaysariya. Matahidangto ni Kornilius a misa'opo ko malininaay ato tadawidang ningra a mitala cangraan. 25Yo tahirato i loma' ningra ca Pitiro i, litmohen ni Kornilius cingra. Hinokop sa i ka'ayaw ningra a mita'ong. 26Nikawrira, palowad han ni Pitiro cingra a somowal, <<Katomireng. Aka pita'ong takowanan. O tamdawto kako,>> han ningra. 27Ta sacaciyaw sato aci Kornilius a micomod i loma'. Ma'araw ni Pitiro ko nika sa'opo no 'alomanay a tamdaw. 28Saka, sowal sa cingra i cangraan, <<Mato nika fana' namo, paysin kami o Yutaya a tamdaw a mikapot, ano ^ca i, miliso' to roma a finacadan. Nikawrira, <Paysin, kaackan aka ka saan to masamaamaanay a tamdaw,> saan ko Kawas a pahapinang i takowanan. 29Orasaka, caay pisafraang kako a tayni to pitahidang namo. Saka, licayen ako kamo, o maan ko sakapitahidang namo i takowanan saw?>> han ningra.

30Pasowal sa ci Kornilius, <<I 'ayaw no spat a romi'ad, yo mitolon kako i loma' to hrek no lahok to tolo ko toki. Fahal sa a ira a tomireng i ka'ayaw ako ko matdiay ko riko' a tamdaw, 31sowal sa, <Korniliusaw! Matngilayto no Kawas ko pitolon iso. Maharatengayto no Kawas ko pipalada' iso. 32Saka, ocoren iso ko tamdaw a patayra i Yopa, tahidangen koya ci Simon Pitiro hananay a tamdaw a patayni. Mipalafang cingra i loma' ni Simon o misafalakoay a tamdaw, ira i lawac no riyar ko loma' ningra,> saan. 33Orasaka, tangsol han ako a patayra i tisowanan ko tamdaw. Nga'ay aca ko nika tayni iso. O sapitngilaw niyam to nano sowal no Tapang i tisowanan a ma^min saka, masa'opo kami i ka'ayaw no Kawas i matini,>> han ningra.

O Pipakimad ni Pitiro

34Saka, pasowal sato ci Pitiro, <<So'linay mahapinangto ako i matini ko nika caay ko misakakinihay ko Kawas. 35Ano masamaamaanayto a tamdaw no kasakitakit i, ano o mita'ongay to Kawas ano o mo^celay ko dmak a tamdaw i, layapen no Kawas cingra. 36Pakaynien no Kawas ci Yis Kristoan ko nipipatnak to sakararihaday a Nga'ayay Ratoh i Israil. (Ci Yis Kristo ko Tapang no polong no tamdaw.) 37Mato nika fana' namo i ikor no nipipatnak ni Yohani to saka paino' no tamdaw i, nai Kalili a misatapang a mapatnak konini a dmak tangasa i polong no Yutaya. 38Mafana' kamo to pakayniay ci Yisan no Nacali. Paflien no Kawas Cingra to Fangcalay 'Adingo ato 'icel. Mikapot ko Kawas Cingraan saka, mirakat Cingra to niyaroaro' a midmak to nga'ayay. Miadah Cingra to polong no masamsamay no Palafoay. 39O pawacayay kami to polong no dmak ni Yis i Yutaya a pala ato dmak Ningra i Yirusalim. Paceken no tamdaw Cingra i ciwcika a mipatay. 40Nikawrira, sakatolo a romi'ad i, palowaden no Kawas Cingra a pa'orip a patalahkal a pa'araw i tamdamdaw. 41Caay ka i polong no tamdamdaw ko pipatalahkal Ningra a pa'araw. Deng i tamiyanan o nipili'an no Kawas to mamalopapawacay a tamdaw Cingra a pa'araw. O namikapotay kami i cingraan a komaen i ikor no nika lomowad Ningra a ma'orip nai patay. 42Saka, palimo'ot ci Yis i tamiyanan a papipatnak i tamdamdaw a papipawacay to nika o nipatirengan no Kawas ci Yis to mamalomamisawkit to ma'oripay ato mapatayay a tamdaw. 43Ci Yis ko nisowalan no polong no pali'ayaway to sowal no Kawas to nika ano cimacimato a tamdaw ko paso'linay i Cingraan i, pakayni i Cingraan ko sakahpol no raraw nangra sanay,>> han ni Pitiro.

O Pilayap no Roma a Finacadan to Fangcalay 'Adingo

44Yo pakimadho ci Pitiro i, ma^pod ko Fangcalay 'Adingo i polong no milayapay to ratoh no Kawas a tamdaw. 45Oya mihaklongay ci Pitiroan nai Yopa a mitooray ci Kristoan a Yutaya a tamdaw i, safahka' sa cangra to nika halo roma a finacadan a mapafli to Fangcalay 'Adingo. 46Nawhani matngil nangra ko nika somowal nangra to no 'Adingoan a sowal ato nipipahmek nangra to Kawas. Saka, sowal sa ci Pitiro, 47<<Malcad titaanan ko nipilayap nangra to Fangcalay 'Adingo. Saka, maanen ita ko nika ^ca paino' i cangraan saw?>> saan. 48Ta palimo'ot hanto ni Pitiro cangra, <<Pakaynien i ngangan ni Yis Kristo ko nika paino' namo,>> han ningra. Itiyasato fo'ot han nangra ci Pitiro a somowal a papilafin i cangraan to pinapina a romi'ad.

Currently Selected:

Dmak 10: AMIS2019

Highlight

Copy