Dmak 11

O Pipakafana' ni Pitiro to i tiraay i Yirusalim a Kiwkay

1Itiya i, matngil no tarokos ato i tiraay i Yutaya a salikaka ko nika halo roma a finacadan a milayap to sowal no Kawas. 2Saka, yo tayra ci Pitiro i Yirusalim i, likafen no Yutaya a tamdaw cingra. Onini a Yutaya a tamdaw i, o papi'imeray to krit a lisin i roma a finacadan. 3Sowal sa, <<Nawiro tayra kiso i caay pido^do to krit a lisin a tamdaw a mikapot i cangraan a komaen saw?>> han nangra. 4Saka, sowal sato ci Pitiro a misahci to kadado^do no dmak ningra.

5Sowal sa cingra, <<Yo mitolon kako i Yopa a niyaro' i, malayap ako ko ccay a mapolosi. Ma'araw ako ko ccay a lalosidan ma^pod nai kakarayan, matiya o ccay a kakahaday a kiradom, maca'it ko spat a tadimocokan nonini a kiradom a ma^pod i tatihi ako. 6Sahapinapinang han ako a minengneng ko laloma' nonini i, ira i laloma' ko ma^feray a 'ayam ato 'a'adopen ato manafoyay a fao. 7Do^do sa i, ira a matngil ako ko ngiha', sowal sa i takowanan, <Pitiroaw, kalomowad, pacoken ta kaenen!> saan. 8Nikawrira, pasowal han ako, <Tapangaw, caay ka nga'ay! Nawhani caayho ka komaen kako to kapaysinan ato romaroma a kaackan a kakaenen,> han ako. 9Itiya i, ira haca koya ngiha' nai kakarayan, sowal sa, <O makoracay a nengnengen no Kawas a maamaan i, kaackan, aka ka saan kiso,> saan. 10Kinatolo a ira ko matiniay a dmak ta makakoy a talakakarayan koya patlian. 11Tatodong sa toya tatokian i, ira koya tatoloay a nai Kaysariyaay a maocoray a tamdaw, tahirato i fawahan no kamaro'an ako a loma'. 12Mitoro' ko Fangcalay 'Adingo i takowan a papihaklong i cangraan, aka pisafraang saan. Orasaka, halonini a nai Yopaay a ^nemay a salikaka a mihaklong takowanan a tayra. Tahirato kami i loma' ni Kornilius. 13Pasowal ci Kornilius i tamiyanan, to masamaanay ko ka'araw ningra to ccay a coyoh a tomireng i loma' ningra, sowal sa i cingraan, <Ocoren iso ko tamdaw a patayra i Yopa, tahidangen ci Simon Pitiro hananay a tamdaw a patayni. 14Cingra ko papasowal tisowanan ato paro no loma' iso a ma^min to sapa'orip tamowanan a sowal,> saan cingra. 15Saka, yo misatapangto kako a somowal i, matiya o nika ^pod no Fangcalay 'Adingo i titaanan i sa'ayaw ko nika ^pod no Fangcalay 'Adingo i cangraan. 16Itiya i, maharateng ako ko sowal no Tapang toya, <O nanom ko sapaino' ni Yohani. Nikawrira, o mamilayap kamo to no Fangcalay 'Adingo a sapaino',> sanay a sowal. 17Matiya o nipipafli no Kawas i titaanan to Fangcalay 'Adingo yo paso'lin kita to Tapang ci Yis Kristoan ko nipipafli Ningra i cangraan saka, maanen ako ko nipitna' to dmak no Kawas saw?>> han ni Pitiro.

18Mitngil ko tamdamdaw tonini a sowal i, trep sato. Pahmek sa cangra to Kawas a somowal, <<Ano hatira i, halo roma a finacadan a mapafaloco' no Kawas to sapasasiyoraw to faloco' a pasayni i Kawas ta mapa'orip!>> saan.

O i Antiyokay a Kiwkay

19Tona makari'ang ci Stifano i, halo romaroma a salikaka a makari'ang. Tahirato i Foinikiya, i Sayprus, i Antiyok ko romaroma nangra. Caay pasowal cangra i romaroma a tamdaw to sowal no Kawas, deng o Yutaya a tamdaw ko nisowalan nangra. 20Nikawrira, ira i cangraan ko papinapina a Sayprus a tamdaw ato Kirini a tamdaw. Yo tahira cangra i Antiyok i, pasowal han nangra ko Krisiya a tamdaw a mipatnak to pakayniay i Tapang ci Yisan. 21Mapa'icel no Tapang cangra saka, 'aloman ko pasasiyoray to faloco' ta paso'lin to Tapang.

22Matngil no i tiraay i Yirusalim a kiwkay konini a dmak saka, ocor han nangra ci Parnapas a patayra i Antiyok. 23Yo tahira cingra i, mahapinang ningra ko pipalmed no Kawas i cangraan saka, salipahak sa cingra. <<Sa'icelen ko faloco' namo. Kararid a miti'er to Tapang,>> han ningra cangra a pa'icel. 24O nga'ayay a tamdaw ci Parnapas, o matomesay no Fangcalay 'Adingo, o tanektekay a miti'eray. Saka, 'aloman ko paso'linay a tamdaw a mitoor to Tapang.

25Tayra sato ci Parnapas i Tarsus a mikilim ci Sawloan. 26Yo matama ningra cingra i, krid hanto ningra ci Sawlo a tayra i Antiyok. Ccay a mihca cangra a mikapot to i tiraay a kiwkay. Pasifana'en nangra ko 'alomanay a tamdaw. Itira i Antiyok a misatapang a mapangangan to, <<MisaKristoay,>> hananay ko nisawawaan.

27Itiya i, maloklon nai Yirusalim a tayra i Antiyok ko papinapina a pali'ayaway to sowal no Kawas. 28Tireng sa ko ccay nangra, ci Akapus hananay a tamdaw. Papipali'ayaw han no Fangcalay 'Adingo cingra a papipasowal, <<O aira ko tata'angay a kdal i polong no hkal,>> saan. (So'linay yo malahongti no Loma ci Klautius i, malahciay konini.) 29Saka, kton sato to faloco' ko nisawawaan a somowal, <<Pakaynien ita i 'icel no paytmek ko nipipasadak to sapadama to i tiraay i Yutaya a salikaka,>> saan cangra. 30Saka, lahci han nangra konini a patorod i ci Parnapasan aci Sawloan a papipatayra i ciwlo no kiwkay#11.30 ciwlo -- mato'asay, o kakrikridan no sa'opo no mitooray ci Kristoan..

Currently Selected:

Dmak 11: AMIS2019

Highlight

Copy