Dmak 22

1<<Salikakaaw, mamaaw, tngilen ko sowal ako to pipa'ading ako i takowanan,>> han ningra. 2Yo mitngil cangra to nipisano Hipray ni Pawlo a pasowal i, mangalef ko nika tomrep nangra. Saka, pararid sato ci Pawlo a somowal,

3<<O Yutaya a tamdaw kako. O i tiraay i Tarsus no Kilikiya a hofocen. I tiniay tonini a niyaro' a mato'as kako. O singsi ako ci Kamalil. Pakaynien ningra i Rikec no tato'asan ita ko nipisongila' a pakafana' i takowanan. Orasaka, malcaday to nika lalok namo a ma^min anini ko nika lalok ako to saki Kawas. 4Nao mikari'angay kako to mitooray ci Kristoan a pakayraan a mipatay. Ano o fa'inayanto, ano o fafahiyanto i, paliten ako a pacomod i pirofoan. 5Pawacay ko sakakaay a citodongay to ta'ong ato polong no lomaocay tonini a dmak ako. I cangraan kako a miala to sapatilid to i tiraay i Tamaskus a Yutaya a finawlan, saka, tayra sato kako itira to sapipalitaw to i tiraay a mitooray ci Kristoan ato sapatayniaw cangraan i Yirusalim a mitfoc.

O Pitosil ni Pawlo to Nipifalic no Kawas to Faloco' Ningra

(Dmak 9.1-19; 26.12-18)

6<<Nikawrira, yo romakat kako a miraod to Tamaskus, ma^deng o kalahokan i, fahal sa ira ko nai kakarayanay a mi'cengay a likat a patdi i taliyok ako. 7Polin sato kako i sra, matngil ako ko ngiha' a somowal i takowanan, <Sawloaw, Sawloaw! nawiro mikari'ang kiso i Takowanan saw?> saan. 8Saka, licay han ako, <Tapangaw, cima Kiso saw?> han ako i. <Oya nikari'angan iso ci Yis no Nacali Kako,> saan Cingra. 9Ma'araw no mikapotay i takowanan koya likat, nikawrira, caay ka tngil nangra ko ngiha' noya pasowalay i takowanan. 10Licay han ako, <Tapangaw, samaanen ako ko dmak saw?> han ako i. Sowal sa ko Tapang i takowanan, <Kalomowad, katayra i Tamaskus, ta ira itira ko papasowal i tisowanan to no Kawas a malodadmaken iso,> saan. 11Nikawrira, caayto paka'araw kako to maamaan tona mapatdi noya ma'dilay a likat, saka, kayat hanto no kapot ako ko kamay ako a tayra i Tamaskus.

12<<Ira itira ci Ananiyas hananay a tamdaw. O ma'imeray to Rikec a malalokay a mitooray to Kawas cingra, o nga'ayay ko lihaf ningra itira i polong no i Tamaskusay a Yutaya a tamdaw. 13Raod sa cingra i takowanan a tomireng i tatihi ako, sowal sa, <Salikaka Sawloaw, paka'arawto kiso!> saan. Itiya i, tangsol a macngaw ko mata ako, ma'arawto ako cingra. 14Pasowal sa cingra, <O nipili'anto no Kawas no tato'asan ita kiso to sakafana'aw iso to nafaloco'an Ningra. Saka, pa'arawen Ningra kiso to mo^celay a Koli Ningra, papitngilen haca Ningra kiso to ngiha' Ningra. 15Nawhani o papawacay kiso to pakayniay i Cingraan. O papasowal kiso i tamdamdaw to ninengnengan ato nitngilan iso. 16O maan ko sasafraangen iso? Kalomowad, pilongoc to ngangan Ningra, pilayap to ino' ta masawsaw a makorac ko raraw iso!> han ningra.

O Piocor ci Pawloan i Roma a Finacadan

17<<Nanoya, minokay kako i Yirusalim. Yo mitolon kako i Fangcalay Pita'ongan i, cimapolosi kako. 18Ma'araw ako itiya ko Tapang. Sowal sa i takowanan, <Kalamkamen a miliyas to Yirusalim. Nawhani caay ko mamitngil ko i tiraay to pipawacay iso to pakayniay i Takowanan,> saan. 19Saka, paca'of han ako, <Tapangaw, mafana' cangra to nipirpet ako to tamdaw a mirofo ato nipisti' ako to paso'linay i Tisowanan i kasa'opo'opoan nangra a loma'. 20O romasato, yo mipatay ci Stifanoan oya mipawacayay to pakayniay i Tisowanan i ira kako itiya a mihai tora dmak, kako ko misimaway to riko' noya mipatayay cingraan,> han ako i. 21Sowal sa ko Tapang i takowanan, <Olili, ocoren Ako kiso a patayra i maraayay a papipatnak i roma a finacadan,> >> saan.

22Tangasa i tini ko pitngil no finawlan to sowal ni Pawlo i, cli' saan, <<Aka pa'oripen ko matiniay a tamdaw i tini i hkal. Patayen cingra,>> saan. 23Saka, alalkalkal sa ko tamdamdaw a mifihfih to riko' a pasifaled a mifolsak to alafoh. 24Saka, papipacomod hanto no tapang no sofitay ko sofitay ci Pawloan i loma' no sofitay. O sapihapinangaw noya tapang no sofitay to nika nawiro micli' ko finawlan to pakayniay i ci Pawloan saan cingra. Saka, papisti'en ningra ko sofitay ci Pawloan a miliclic. 25Yo miso'ot cangra ci Pawloan to sapisti'aw i, pasowalen ni Pawlo koya tomirengay i tatihi ningra a kakridan no sofitay, <<Caayho ka hapinang ko raraw i, manga'ay haw a misti' to Loma a tamdaw?>> han ningra.

26Mitngil tonini koya kakridan no sofitay i, tayra sa cingra i tapang no sofitay a milicay, <<Samaanen iso kora tamdaw saw? O Loma a tamdaw cingra,>> han ningra.

27Saka, tayra sato ci Pawloan koya tapang no sofitay a somowal, <<O Loma a tamdaw kiso haw? Sowalen kako,>> han ningra.

<<Hai,>> han ni Pawlo.

28Paca'of sa koya tapang no sofitay, <<Adihay ko nipasadakan ako a payso to sakacingangan ako a malafinawlan no Loma,>> han ningra.

Itiya i, sowal sa ci Pawlo, <<Nai kahofocan ako a o Loma a tamdaw kako,>> han ningra.

29Orasaka, tangsol sato a miliyas ci Pawloan ko sapiliclicananay cingraan a tamdaw. Haloya tapang no sofitay a matalaw to nipipalit ningra cingraan to lonayi'. Nawhani mafana'to cingra to nika o Loma a tamdaw ci Pawlo.

Pa'ading to Tireng ci Pawlo i Pilaocan

30Sapihapinangan koya tapang no sofitay a mipalita to nika o maan ko lalngatan no nipakokot no Yutaya a tamdaw ci Pawloan saan. Saka, cilasato a romi'ad i, tdalen ningra ko sapalit ci Pawloan a lonayi', sa'opo han ningra ko kakridan no citodongay to ta'ong ato polong no lomaocay, ta krid hanto ningra ci Pawlo a patayra a patireng i ka'ayaw nangra.

Currently Selected:

Dmak 22: AMIS2019

Highlight

Copy