Dmak 21

O Rakat ni Pawlo a Tayra i Yirusalim

1Licinowas sato kami ato cangra. Pakalonan kami a pafsoc a tayra i Kos. Cila a romi'ad i, tangasa i Rotis. Nanitira tayra kami i Patara. 2Ira itira ko tatayra a lonan i Foinikiya. Saka, dakaw sato kami a miliyas. 3Nanoya, ma'araw niyam ko Sayprus. Pasatimol sa ko rakat no tamina niyam a pafsoc a pasayra i Siriya. Ta macakat kami i Tiri, nawhani mi^pod itira ko tamina to dafong. 4Matama niyam itira ko nisawawaan saka, itira sa kami to pito a romi'ad. Mapasowal no Fangcalay 'Adingo cangra saka, aka ka tayra i Yirusalim, han nangra ci Pawlo a milalang. 5Yo malponto ko kaitiraan niyam a romi'ad i, lomowadto kami. Halofafahi ato wawa nangra a patono i tamiyanan tangasa i lawac no niyaro'. Ta pitosor sa kami a ma^min i lawac no riyar a mitolon. 6Ta alapaikoikor sato kami a pasowal. Dakaw sato kami to lonan. Ta minokay cangra i loma'.

7Nai Tiri tangasa i Ptolimais ko rakat niyam. Itira a mapahrek ko pakariyaray a rakat niyam. Nga'ayho han niyam ko i tiraay a salikaka. Itira sa kami i cangraan to ccay a romi'ad. 8Cila a romi'ad i, miliyas kami to i tiraay a tayra i Kaysariya. Tayra kami i loma' ni Filip hananay a patnakay, o ccay noya nipili'an i Yirusalim to citodongay to tayal a papitoay cingra. Itira kami a milafin. 9Ira ko wawa ningra to saspatay a kaying. Sahto o cirocekay to patnakay cangra to sowal no Kawas. 10Yo itira kami to pinapina a romi'ad i, ira nai Yutaya a tayni ci Akapus hananay a pali'ayaway to sowal no Kawas. 11Raod sa cingra i tamiyanan. Ala han ningra ko safaked ni Pawlo a miso'ot to wa'ay ato kamay ningra. Ta sowal sa, <<O sowal no Fangcalay 'Adingo i takowanan i, o mamahaen ko piso'ot no Yutaya a tamdaw i Yirusalim tonini a cisafakeday a tamdaw ta o papatoroden nangra cingra i roma a finacadan saan,>> han ningra.

12Matngil niyam konini a sowal i, lalangen niyam ato i tiraay a salikaka ci Pawlo to saka^caaw ka tayra ningra i Yirusalim. 13Paca'of sa ci Pawlo, <<Nawiro tomangic kamo a mipakararom to faloco' ako? Ano o pipatnak ako to pakayniay i Tapang ci Yisan ko sakapalit ako ato sakapatay i Yirusalim, mahrekto kako a mipatala to faloco',>> saan.

14Caay ka solot niyam cingra saka trep sato kami, deng to, <<Nanay malahci ko nafaloco'an no Tapang,>> han niyam cingra a pasowal.

15Mata'lif ko pinapina a romi'ad i, malkakawa kami. Ta lowad sato kami a tayra i Yirusalim. 16Ira a mihaklong i tamiyanan ko papinapina a nisawawaan nai Kaysariya. Kriden nangra kami a tayra i loma' ni Nason no Sayprus.#21.16 Kriden nangra kami a tayra i loma' ni Nason no Sayprus -- ano ^ca i, Kriden nangra ko ccay a Sayprus a tamdaw ci Nason a mihaklong, o tatayra kami i loma' nonini a tamdaw a milafin. O halafinayto a nisawawaan cingra. Itira sa kami a milafin.

O Piliso' ni Pawlo ci Yakopan

17Tahira kami i Yirusalim i, salipahak sa ko salikaka a mihamham a militmoh i tamiyanan. 18Cila sato a romi'ad i, kriden ni Pawlo kami a tayra a miliso' ci Yakopan. Ira itira ko ciwlo no kasakiwkay a ma^min. 19Mahrekto a malalicay ato cangra i, songila'en ni Pawlo cangra a pasowal to nano tayal no Kawas i roma a finacadan pakayni i tayal ningra. 20Mitngil cangra tonini i, hmek sato cangra to Kawas. Ta pasowal sa cangra ci Pawloan, <<Salikakaaw, mato nika fana' iso, pi:nato a 'ofad ko paso'linay ci Kristoan a Yutaya a tamdaw. Ma'imer cangra a ma^min to Rikec ni Mosi. 21Nikawrira, o matngilay nangra to pakayniay i dmak iso i, aka pitoor to Rikec ni Mosi, aka pido^do to krit a lisin a pakrit to wawa, aka pido^do to lkakawa no Yutaya, han ni Pawlo a pasifana' ko i tiraay i roma a finacadan a Yutaya a tamdaw a ma^min saan. 22Ano hatira i, maanen ita ko dmak? Caay ka ^ca ka fana' cangra to nika tayni iso. 23Orasaka, do^do han ko sowal niyam. Ira i tamiyanan ko nano miktonay to faloco' i Kawas a saspatay a tamdaw. 24Haklongen konini a tamdaw a mikapot cangraan a mikorac to tireng. Pasadaken ko sapa'is'is to fokes nangra a payso. Ta, o mangah koya nitngilan niyam to pakayniay i ci Pawloan. O ma'imeray to Rikec ni Mosi cingra, ta saan ko nika fana' nangra a ma^min to pakayniay i tisowanan. 25O pakayniay i paso'linay ci Kristoan a roma a finacadan i, mahrekto kami a patilid i cangraan to nihapinangan niyam to saka^caaw ka komaen nangra to nipacakatan i samiyay a kakaenen ato rmes ato titi no ni'mecan a mipatay a 'a'adopen ato saka^caaw ka 'odang nangra,>> han nangra.

26Orasaka, krid hanto ni Pawlo koya pinapina a tamdaw, cila sato a romi'ad i, lahaklong sato cangra a milahci to no korac a lisin. Micomod haca cingra i Fangcalay Pita'ongan a pakafana' to pahrekan no pikoracan a romi'ad, ta mitala to citodongay to ta'ong a pato'aya to saki cangraan o kahaccay a tamdaw.

Marpet ci Pawloan i Fangcalay Pita'ongan

27Yo sakahrekanto koya pito a romi'ad i, ma'araw no nai Aciyaay a Yutaya a tamdaw ko nika ira ni Pawlo i Fangcalay Pita'ongan. Saka, paoror han nangra ko finawlan a ma^min a pakamay i cingraan. 28Cli' sa cangra a somowal, <<Kamo o i tiniay a Israil a tamdaw, padangen kami. Onini a tamdaw ko pasifana'ay to i cowacowaay a tamdaw to sapipacoliaw to finawlan ita ato Rikec ni Mosi atonini a Fangcalay Pita'ongan. Caay korira a ccay. Kriden ningra anini ko roma a finacadan a pacomod i Fangcalay Pita'ongan a paacek tonini a fangcalay a kaitiraan,>> saan. 29(O sakasaan nangra i, nama'araw nangra ko nika lahaklong ni Pawlo aci Trofimus no Ifiso i tini i niyaro' nangra. Saka, O nikridan ni Pawlo cingra a micomod i Fangcalay Pita'ongan, saan ko piharateng nangra.)

30Orasaka, sararawraw sa ko niyaro'. Alaraoraod sa ko finawlan a mirpet ci Pawloan a mikidkid a pasadak i papotal no Fangcalay Pita'ongan. Ta tangsol sato a ma'def ko 'adawang no Pita'ongan. 31Yo mamipatay cangra ci Pawloan i, ira ko paratohay to tapang no sofitay no Loma to nika rarawraw no polong no Yirusalim. 32Saka, tangsol sa cingra a mikrid to sofitay ato kakrikridan no sofitay a comikay a tayra i finawlan. Ma'araw no finawlan koya tapang no sofitay ato sofitay a ma^min i, sawad han nangra a misti' ci Pawlo. 33Raod hanto no tapang no sofitay ci Pawlo a mirpet. Papiso'ot hanto ningra to tosa a lonayi' ko sofitay ci Pawloan. Ta licay han ningra ko tamdaw, <<O maan a tamdawan ci Pawlo? Nao mimaanay cingra saw?>> han ningra. 34Nikawrira, alapatdotdo sa a micli' ko finawlan, saka rarawraw sato, awa sato ko pinang no tapang no sofitay a mihapinang tonini a dmak, saka, papikrid hanto ningra ko sofitay ningra ci Pawloan a patayra i loma' no sofitay. 35Yo mamacakat ci Pawlo to sacakat no loma' no sofitay i, co^co sa ko finawlan ci Pawloan to sapikari'angaw saka, 'orong hanto no sofitay cingra a pacakat. 36Nawhani <<Patayen cingra!>> saan ko 'alomanay a finawlan a micli' a mikotod i aikor nangra.

O Pipasowal ni Pawlo a Pa'ading to Tireng

37Yo mamicomod cangra i loma' no sofitay i, sowal han ni Pawlo ko tapang no sofitay, <<Ira ko sasowalen ako. Manga'ay a somowal kako i tisowanan haw?>> han ningra.

Licay han noya tapang no sofitay, <<Mafana' kiso to no Krisiya a sowal saw? 38Ano hatira i, caay ka kiso koya palowaday to rawraw i ti:yaho a mikrid to spatay a patek (4,000) a mari'angay a tamdaw a milaliw a tayra i kohkohan a Icip a tamdaw,>> han ningra.

39Paca'of sa ci Pawlo, <<O Yutaya a tamdaw kako, o i tiraay i Tarsus no Kilikiya a tadamaanay a niyaro' a hofocen kako. Milongoc kako i tisowanan. Papipasowalenho kako tonini a finawlan,>> han ningra.

40Hayda han noya tapang no sofitay cingra. Saka, tireng sa ci Pawlo i sacakat. Pasayra sa i finawlan a mikawih to kamay. Yo tomrepto cangra i, sano Hipray sato cingra a pasowal i cangraan.

Currently Selected:

Dmak 21: AMIS2019

Highlight

Copy