Dmak 2

O Ka^pod no Fangcalay 'Adingo

1Yo maraodto ko pisalisinan to saka Lima a Polo' a romi'ad i, malaccay a masa'opo ko mitooray ci Kristoan a ma^min. 2Itiya i, fahal sa a ira nai kakarayan ko matiyaay o soni no nipifiyok no tata'angay a fali. Saharengheng sa koya kasa'opoan nangra a loma'. 3Itiya i, ira a ma'araw nangra ko matiyaay o kasasmasma no namal a malaklak a patfo i kahaccaccay nangra. 4Saka, matomes no 'icel no Fangcalay 'Adingo cangra a ma^min. Pa'icelen no Fangcalay 'Adingo cangra a pakasomowal to sowal no roma a finacadan. Saka, somowal to cangra to sowal no roma a finacadan.

5Itiya i, ira a maro' i Yirusalim ko malalokay a mitooray to Kawas a Yutaya a tamdaw. O nai cowacowaay a kitakit no tahaf no kakarayan cangra. 6Matngil nangra konini a ngiha' i, sa'opo sa cangra o 'alomanay a finawlan. Fahka' cangra a mitngil to nika fana' no mitooray ci Yisan a caciyaw to sowal nangra o kasakitakit a tamdaw. 7Saka, sowal sa, <<Caay ko Kalili a tamdaw konini a somowalay a tamdaw a ma^min saw? 8Nawiro mafana' cangra a somowal to sowal no paytmek ita saw? 9Nawhani kita i, o Partiya, o Mitiya, o Ilam ato nai tiraay i Misopotamiya, Yutaya ato Kapatokiya, Pontus ato Aciya, 10Frikiya ato Pamfiliya, Icip ato ingataay no Kirini a Lipiya a pala ato nai Lomaay kita a tayni. 11Ira i titaanan ko Yutaya a tamdaw ato micomoday to no Yutaya a pakayraan a roma a finacadan ato Kriti a tamdaw ato Arapiya a tamdaw. Matngil ita ko nika somowal nangra to sowal ita o paytmek a pasowal to tadamaanay a dmak no Kawas!>> saan. 12Safahka' sa cangra a ma^min. Rawraw sa cangra a masasowasowal, <<Masamaanay a dmak konini saw?>> saan cangra.

13Nikawrira, katawaen no romaroma a tamdaw cangra sowal sa, <<Malasangay no ^pah cangra!>> saan.

O Pipakimad ni Pitiro

14Itiya i, tireng sa ci Pitiro ato ccay ko safaw a tarokos. Ta cli' sa ci Pitiro a somowal i finawlan, <<Kamo o finacadan ako a Yutaya ato i tiniay i Yirusalim a tamdamdaw, kafana' tonini a dmak. Pitngil to sowal ako. 15Malasangay cangra saan kamo haw? Siwaho ko toki to dafak i matini saka, caay ko malasangay cangra. 16Onini a dmak ko nisowalan ni Yoil o pali'ayaway to sowal no Kawas toya,

17<O sowal no Kawas i, i saikoray a romi'ad i,

O papaflien Ako ko tamdamdaw to todong no tireng Ako a 'Adingo.

O papatnak to sowal Ako ko fa'inayan ato fafahiyan a wawa namo.

O papaka'araw to mapolosi ko kapah namo.

O cacilmed ko mato'asay namo.

18Itiya a romi'ad i, halofa'inayan ato fafahiyan a koli Ako a mapafli Ako to todong no tireng Ako a 'Adingo.

O papatnak cangra to sowal Ako.

19O papatiri'en Ako to kafahka'an a dmak itira i kakarayan ato i tini i hkal.

O mama'araw ko rmes ato namal ato canem a 'acfel.

20I 'ayaw no nika ira no tadamaanay ci'dilay a romi'ad no Tapang i, o mamapadeng ko cidal.

O kakahngang ko folad a matiya o rmes.

21Itiya i, Ano cimacimato ko milongocay to ngangan no Tapang i, caay ka ^ca o mamapa'orip,> sanay.

22<<Kamo o finacadan ako a Israil, pitngil to sowal ako. Mato nika fana' namo, pakaynien no Kawas i ci Yisan no Nacali ko nipidmak i tamowanan to ci'icelay a kafahka'an a dmak a pahapinang i tamowanan to nika o nai Kawasay Cingra. 23Do^doen no Kawas ko nano niktonan Ningra a faloco'. Saka, patoroden Ningra ci Yis i tamowanan. 'Arawhani, pakaynien namo i tadatatiihay a tamdaw ko nipipacek i Cingraan i ciwcika a mipatay. 24Nikawrira, tdalen no Kawas ci Yis nai sapalit no patay a palowad a pa'orip. Nawhani caay ko mamapalit no patay Cingra. 25Pasowal ci Tafiti to pakayniay i Cingraan,

<Mararid a ma'araw ako ko Tapang i ka'ayaw ako,

ira i kawanan ako Cingra saka, caay ko mamangiyangi kako.

26Orasaka, mahmek ko faloco' ako,

sahto o lipahakay ko sowal ako,

ano mapatapatay ko tireng ako i, iraho ko pafaloco'an ako.

27Nawhani caay ko fafalahen Iso kako i kaitiraan no mapatayay,

caay ko mamihayda Kiso to nika poni' no so'linay ko faloco' a matayalay Iso.

28Mapahapinangay ito Iso kako to sakaci'orip a lalan,

o nika ira Iso a mikapot i takowanan i, o sakatadamaan no lipahak ako,> saan.

29<<Salikakaaw, pahapinangen ako kamo a somowal to pakayniay i tato'asan ita ci Tafitian. Mapatay cingra, matadem. Oya tadem ningra i, ira i titaanan a tahanini. 30O pali'ayaway to sowal no Kawas cingra. Saka, mafana' cingra to niktonan no Kawas i cingraan a sowal, na miktonanto no Kawas ko sowal a patireng to ccay a hongti nai tloc ningra a pakamaro' i tadamaanay a kamaro'an ningra. 31I 'ayawto ko nika fana' ni Tafiti to pisahalaka no Kawas, yo pasowal cingra to pakayniay i nika lomowad ni Kristo a ma'orip nai patay i, sowal sa cingra,

<Caay ka falah Cingra i kaitiraan no mapatayay,

caay haca ka poni' ko tireng Ningra,> saan cingra.

32O nipalowadan no Kawas a pa'orip nai patay ci Yis. O pawacayay tonini a dmak kami a ma^min. 33Mapacakatto ci Yis a mapaaro' i kawanan no Kawas. Milayap Cingra to nano nisowalan no Wama a Fangcalay 'Adingo, ta pafli i tamiyanan tonini. Onini koya ninengnengan, nitngilan namo i matini. 34Caay ka talakakarayan ci Tafiti, nikawrira, matini ko sowal ningra,

<Pasowal ko Tapang to Tapang ako,

Kamaro' Kiso i kawanan Ako,

35tangasa i papihinokopan Ako to 'ada Iso i pasaripa'an Iso,> saan.

36<<Orasaka, kamo o finawlan no Israil a ma^min i, aka ka ^ca ka fana' tonini. Oya nipacekan namo i ciwcika a Yis i, mapatirengto no Kawas a palaTapang, palaKristo!>> han ni Pitiro.

37Macocok ko faloco' no tamdamdaw a mitngil tonini. Sowal sa ci Pitiroan ato romaroma a tarokos, <<Salikakaaw, maanen niyam ko dmak ta nga'ay saw?>> han nangra.

38Paca'of sa ci Pitiro i cangraan, <<Pasasiyoren ko faloco' namo o kahaccaccay a pasayni i Kawas. Pakaynien i ngangan ni Yis Kristo ko nika paino' to sakahpolaw no raraw namo. Ta malayap namo ko sapafli no Kawas a Fangcalay 'Adingo. 39Nawhani onini a nisowalan no Kawas i, o sapafli tamowanan ato wawawawa namo ato polong no i cowacowaay a tamdaw, oya nitahidangan no Tapang a Kawas ita a tamdamdaw to maloningra,>> han ningra.

40Adihay ko pipasowal ni Pitiro a pa'icel i cangraan, <<Piliyas kamo to pitfoc to aniniay a tatiihay a tamdaw,>> han ningra. 41'Aloman ko mipaso'linay to sowal ni Pitiro. Ta mapaino' cangra. Saka, ma^deng tolo a patek (3,000) ko tamdaw to mitongalay a mikapot i cangraan toya romi'ad. 42Mararid cangra a mitngil to pipasifana' no tarokos. Sakapolongan sa ko tayal nangra. Malaccay ko tahka nangra. O romasato, malaccay cangra a mitolon.

Masakapolongan ko 'Orip no Mitooray

43Adihay ko nidmakan no tarokos to masamaamaanay a kafahka'an a dmak saka, mangodo ko finawlan a ma^min i cangraan. 44Mararid a malaccay ko paso'linay ci Yisan a tamdaw a ma^min. Saka, sakapolongan han nangra ko tayal ato maamaan nangra. 45Pacakayen haca nangra ko omah ato dafong nangra, ta patatodong patatodong han nangra a pakilac to payso i kahaccaccay no cango'otay a tamdaw. 46To romi'ami'ad i, malaccay ko faloco' nangra a masa'opo i Fangcalay Pita'ongan. Mapolong cangra a komaen i loma' nangra. So'lin ko faloco' nangra a lipahak a komaen. 47Pahmek cangra to Kawas. Malarihaday cangra ato finawlan a ma^min. O romasato, tongalen no Tapang cangra to romi'ami'ad to mafohatay ko faloco' a nipa'oripan Ningra a tamdaw.

Currently Selected:

Dmak 2: AMIS2019

Highlight

Copy