Dmak 1

1Tiofilusaw, onini a sa'ayaway a nitilidan ako a cudad to pakayniay i dmak ato nipipasifana' ni Yis, to nano pisatapangan Ningra a dmak a ma^min 2tangasa i kakakoyan Ningra a romi'ad a talakakarayan. Yo caho ka talakakarayan Cingra i, pakaynien Ningra i 'icel no Fangcalay 'Adingo ko pipalimo'ot to adihayay a sifana' i nipili'an Ningra a tarokos. 3I ikor no nika patay Ningra i, pakaynien Ningra i masamaamaanay a dmak ko nipipahapinang i cangraan to nika o ma'oripay Cingra. Spat a polo' ko romi'ad Ningra a misacnacna' a pa'araw i cangraan a pasowal to pakayniay i Kitakit no Kawas. 4Yo malakapotho cangra i,#1.4 Yo malakapotho cangra i, -- ano ^ca i, Yo mikapot Cingra i cangraan a komaen i. palimo'oten Ningra cangra, <<Aka piliyas to Yirusalim, talaenho koya nisowalan Ako i tamowanan to nano niktonan no Wama Ako a sowal. 5O nanom ko sapaino' ni Yohani. Nikawrira, caayto ka pina ko romi'ad ta o Fangcalay 'Adingo ko sapaino' i tamowanan,>> han ni Yis.

Makakoy ci Yis a Talakakarayan

6Orasaka, yo masa'opo ko tarokos ato ci Yis i, licayen nangra ci Yis, <<Tapangaw, anini Kiso a palowad to sakowan no kitakit no Israil haw?>> han nangra.

7Pasowal sa ci Yis i cangraan, <<Ano o pakayniay i toki ato romi'ad i, o Wama Ako ko citodongay a mihapinang tonini. Saka, caay ko kakafana'en namo konini. 8Nikawrira, ano ma^podto i tamowanan ko Fangcalay 'Adingo i, o caci'icel kamo. O papawacay kamo to pakayniay i Takowanan i tini i Yirusalim, i polong no Yutaya ato Samariya tangasa i tolas no hkal,>> han Ningra. 9Mahrek ci Yis a somowal tonini, yo minengneng cangra ci Yisan i, makakoy Cingra a talakakarayan. Ma'adingto no to'em saka, awa sato a ma'araw ko tireng Ningra.

10Yo talakakarayan ci Yis i, pamotek sa cangra a pasikakarayan a minengneng. Itiya i, fahal sa a ira ko kohcalay ko riko' a tatosaay a tamdaw a tomireng i tatihi nangra. 11Sowal sa, <<Kamo o Kalili a tamdaw, nawiro tireng sa kamo a pasikakarayan? Onini a ninengnengan namo a miliyasay tamowanan a makakoy a talakakarayan ci Yis i, o mamahaen onini ko nipiliyaw Ningra a tayni,>> han nangra.

O Microray ci Yutaan

12Nanoya, maloklon cangra nani Olif hananay a lotok a minokay i Yirusalim. Ma^deng ccay a kongli ko nika raraay nonini a lotok ato Yirusalim. 13Micomod cangra i niyaro' i, macakat cangra i tongroh a loma' toya pilafinan nangra. Onini a milafinay i, ci Pitiro, ci Yohani, ci Yakop, ci Antiri, ci Filip, ci Tomas, ci Partolomay, ci Matay, o wawa ni Alfayus ci Yakop, o malalokay to no kitakit ci Simon ato wawa ni Yakop ci Yuta. 14Ira a mikapot tonini a tamdaw ko papinapina a fafahiyan, o ina ni Yis ci Mariya ato salikaka ni Yis. Malaccay ko faloco' nangra a masarocod a mitolon.

15Nanoya, ma^deng smo'ot ira ko tosa a polo' (120) ko salikaka a masa'opo. Tomireng ci Pitiro a pasowal i cangraan, 16<<Salikakaaw, oya pakayniay i mikriday to mirpetay ci Yisan a tamdaw ci Yuta i, caay ka^ca ka lahci ko nano nipali'ayawan no Fangcalay 'Adingo a sowal pakayni i ngoyos ni Tafiti a sowal no Fangcalay Cudad. 17O kapot ita ci Yuta a citodong tonini a tayal.>>

18(Nikawrira, 'acaen nonini a tamdaw to nano lifon no tatiihay a dmak ningra ko ccay a omah. Itira cingra a maco'is a matfad. Maftas ko tiyad ningra, masadak ko tinai' ningra a ma^min. 19O kafana'anto no finawlan no Yirusalim a ma^min konini. Orasaka, Akeltama han to sowal nangra konini a omah. O tatodong nonini i, o <<Omah no Rmes>> sanay.)

20Nawhani mahaen ko nika tilid i 'Olic toya,

mamana malanalacolan koya loma' ningra,

awaayto ko maro'ay a tamdaw itira, saan.

O romasato ira haca a matilid,

mamana ma'afas no tao ko kamaro'an ningra, sanay.

21-22<<Orasaka, o mamipili' kita to ccay to mamikapot titaanan a pawacay to nika lomowad no Tapang ci Yis a ma'orip nai patay. I tini i mikapotay titaanan yo ma'oripho ko Tapang ci Yis a mikapot titaanan, oya mikihatiyaay titaanan a talacowacowa nai pipaino'an ni Yohani tangasa i piliyasan ni Yis titaanan a talakakarayan a tamdaw ko papili'en ita,>> han ningra.

23Orasaka, pasadaken nangra ko tatosa to malopapili'en nangra. Ci Yosif (o cimil a ngangan i ci Parsapas, o roma a ngangan i ci Yustus) aci Matiyas. 24Saka, mitolon cangra, <<Tapangaw, Kiso ko mafana'ay to faloco' no polong no tamdaw. Saka, toro'en a pahapinang i tamiyanan ko cima nonini a tatosaay ko nipili'an Iso 25to malomamicror ci Yutaan a malatarokos a citodong to tayal. Nawhani maliyasto ni Yuta konini a tayal a tayra i malokaitiraan ningra,>> saan ko pitolon nangra. 26Ta papiritos han nangra koya tatosaay i, matama ci Matiyas. Saka, papikapot hanto nangra cingra i ccay ko safaw a tarokos.

Currently Selected:

Dmak 1: AMIS2019

Highlight

Copy