Hogusra 9
9
1Egi Maura Noah egi hinig‐wahira washophi howe warogiguna egi wawagena: Wojawire, egi worohawire, egi mara hoixjiwine.
2Egi nanikawairekjanihawina egi naxirairekjena jarnaga ma hihagregi nagre, egi jarnaga ahuirassa wangregi herera, egi jarnaga ma hihagregi hixga‐xgankhi egi jarnaga hora tejanja khi, de‐e harnaj nabeja wornigishurawina.
3Washara jarnaga hixga‐xgankhi niambanankhi, waraijanihawina, xawi‐ab xete jora hornik’uwira shesge, shige washara harnaj hornik’uwina.
4Eshi warnira wankshighi‐ira hoshurnankhi inke rujwinianje.
5Egi jasgegi wankshig‐hoi hashinira wa‐ira hagikarakjekjanena, wanoijge jagura hisha nab harnieja howaji waungi hakara‐kjekjanena, egi wankshig nab wauinegi, egi wankshig jagura khinub‐hirera nab harnieja howaji waungi, wangjega wankshig‐hoi harnira hagikarakjekjanena.
6Higu peshe wankshig wa‐i xuhigi, waunjega wankshig wa‐i xuhirekjanena. Wankshigra Maura hoikawank wakhi waunge esge.
7Egi ne wojawire egi worohawire egi ma hihagra hoixgawianje, egi worohawire.
8Egi Maura Noah hokit’ena egi hinig‐wahira wakarakishu wawagena:
9Egi ne, horuxujwire, rohira hikisge waki harnira hakishu nikerewina, egi shige su washiniwira wakishu haghowarehire.
10Egi wanoijge niambra jarnagara wakishu harnikishu uinegi, ahuirassara, jera, egi wanoijgera jarnaga ma hihagregi harnikishu uinegi, jarnaga waj‐regi hihinabgi, jarnaga wanoijgera ma hihagregi uankhi.
11Egi rohira hikisge waki harnira hakishu unikerena, inke shige rora harnaj hinupahana maisinsh waharnikjanena nija hiu, inke shige hinupahana ni‐janaga mara maisinsh‐nikjanena.
12Egi Maura wena: De‐e woijantira herena rohira hikisge nikiwi hauna hojakena hihiwiregi egi wanoijge niambra jarnagara harnikishu uinegi, hokijhu rehikjanare.
13Wipamakere harnira maxiwi‐regi hakerena, woijantira erekjanena rohira hikisge wakira Ne‐wineanaga egi managre hojakena‐hawiregi.
14Egi waunkjanena, jaja managre wangeja maxiwi harniahigi, wipamakerera eja hajairekjanena.
15Egi rohira hikisge waki harnira hakewe‐winkjanena hojakena hihiwiregi‐agre, egi wanoijgera jarnaga niambbakhi, egi inke hinupahana nira nijanaga rora harnaj maisinsh hiranikjanena.
16Egi wipamakerera maxiwieja nihekjanena, egi hotuxuj hikjanena, hakewe‐winkjanena manegus rohira hikisge wakira Maura egi washa jagu niambbakhi rora harnaj ma hihagregi unankhi hojakenanegi.
17Egi Maura Noah wagena: De‐e woijantira herena rohira hikisge wakira, e hojakenanegi hakerena Ne‐wineanaga egi rora harnaj ma hihagregi unagre.
18Egi Noah hinig‐wahira e waj‐eja hihinab‐hirena, Shem, Ham egi Japhet hererena egi Kanaan Ham hianjhina.
19De‐e Noah hitanike hinig‐wahina. Egi she‐e mara harnaj hoerairena.
20Egi Noah max‐hikishere jirena egi habsinsh max hisha hoshuna.
21Egi nishuj rajgana egi jarnikshana egi nanoka jhi hojhieja‐kshana.
22Egi Kanaan hianjra Ham hajarna hianjra nanokakhi egi wakhinubra hinuinke wawogiragshana jangejanankhi.
23Egi Shem egi Japhet wonashi hisha rus‐hirena, egi hinuinke hinej hakanag hirena, egi hakjopahi hokawairena egi hianj‐hirera nanokakhi hirarukainena, egi hakjamb‐nankshana egi hianj‐hirera nanokara inke hajairanina.
24Egi Noah hiperes‐shana nishuj hijarniganaga, egi hiperes‐shana hinigwahi xununa jagu giuinera.
25Egi wena: Kanaan washoshishig howekjena, wakhinubra ware warnira ware harninekjanena.
26Egi wena: Shem Hirukana Maura rajankjanena, egi Kanaan ware harnikjanena.
27Maura Japhet xete hikjanena egi Shem hojhieja jhikjanena, egi Kanaan ware harnikjanena.
28Egi Noah ni‐janaga hageja ma hogihi‐danianaga egi kerepana‐saja‐hashanaha wankshig‐ina.
29Egi Noah hamb warnira harnajra ma hogihi‐hishankijushguni‐anaga egi kerepana‐saja‐hashanahangaja, egi d’ena.
Currently Selected:
Hogusra 9: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
